أحلى كشري مصري لأحلى بنااااااااااات

ازيكم يا بنات عروس

ولو اني زعلانة منكم علشان ما حدش عبرني ورد على موضوع خلطة الفراخ بتاعتي

لكن حبيبة الحبوبة اقترحت اني احط لكم وصفة الكشري المصري على حق

وانا بصراحة ما اقدرش ازعل منكم قوي (يعني انا زعلانة كده وكده :smile:)

المهم شوفوا الكشري وقولوا لي رأيكم بقى

واتعشم انكم تردوا على المرة دي

حبيبة الحبوبة

ازيك يا قمر

مؤقتا هأحط الكشري هنا، واللي ما يدخلش علشان الفراخ يبقى هو بقى الخسران :D2

المقادير

1-كوب عدس بجبة بلدي أو غير (الحباية البلدي بتكون أصغر)
2- 2 كوب ونصف أرز مصري
3- بصلة كبيرة أو 2 متوسطين
4- راس ثوم مفرومة
5- لتر عصير طماطم
6- زيت
7- مكرونة حجم صغير (اصغر حجم بنسميها في مصر خواتم)
8- حمص مسلوق (انقعيه شوية لمدة 3 ساعات مثلا وبعدين اسلقيه في ماء مع ملح وكمون وشطة وعصير ليمون وطماطمية مقطعة)

الطريقة

أولا: الكشري

1- انقعي العدس بعد غسله في ماء دافئ لمدة ساعة او اثنين حسب وقتك

2- قطعي البصل ترنشات رفيعة وحمريه في 3 أو 4 معالق كبيرة زيت لحد ما يغمق لونه نشفيه من الزيت وخليه على جنب

3 - ضيفي العدس بعد تصفيته من الماء للزيت اللي حمرتي فيه البصل وقلبيه كويس وبعدين ضيفي له كوب ماء واتركيه على النار لحد ما تحسي انه قرب يستوي

4- بعد ما تحسي انه العدس قرب يستوي صفيه من ميته كويس وضيفي له الأرز بعد غسله وتصفيته

5- قلبيه كويس مع بعضه وبعدين سويه زى ما بتسوي الأرز وخدي بالك الماء ما يكونش كثير وضيفي الملح

6- بعد الكشري ما يستوي اطفي عليه واكشفي عنه الغطاء علشان يتهوي وقلبيه

ثانيا طريقة الصلصة:

1- حمري بعض من الثوم المفروم (فرم تخين مش ناعم قوي) في 2 او 3 ملعقة زيت كبيرة

2- بعد ما يصفر لون الثوم ضيفي له عصير الطماطم ، وقلبيه كويس واتركيه يغلي غلوتين وبعدين غطيه على نار هادية لحد ما يتسبك والصلصة تحمر (بعدين ضيفي الملح والكمون والفلفل الأسود وشطة حسب الحاجة)

ثالثا طريقة الدقة:

دقة الكشري بقى ايه :up:

بتجيبي الثوم المدقوق المفروم وافرمي معاه ثمرتين فلفل أخضر أو احمر حامي، ضيفي لهم الخل والكمون والملح والفلفل الأسود والشطة (كله على البارد)


المكرونة اسلقيها عادي وصفيها


طريقة تقديم الكشري

على حسب راحتك

ممكن تغرفي المكرونة في الأول أو الآخر وبعدين تغرفي فوقها الكشري وترشي فوقه البصل المحمر وتقدمي جنبه الصلصة والدقة وحمص الشام وممكن فص ليمون لأنه بيكون هايل مع الكشري

بالهنا والشفا
(wink)