مرثية الولاء..JOoOry

يقولون إنه رحل عن دنيانا..بس أنا ماني فاهمة ويش يعني رحل..
فهموني وقالوا الموت حق وهو توفى وبيندفن..يعني رحل
ليتهم ما فهموني وخلوني على عماي ...
زايد الخير ..توفى واندفن
بكيت من قلبي ولا عمري قد بكيت لأحد قد ما بكيت لزايد

أنا أقول زايد ..ما أقول الشيخ زايد
لأنه كان أكثر من قائد...هو قائد ومعلم ووالد
وشعبه تعودوا يسمونه بابا زايد
الله يطول عمره ..كانت تتبع كلمة بابا زايد
والحين يصعب علي أقول الله يرحمه لأن أحزاني تجدد
وتجبرني إني أصدق وفاته

سكتت وقمت أفكر ويش معناته إنه زايد يغيب عنا..
ويش معناته. .يوم يفقد الإبن ابوه..يوم يفقد سنده اللي يسند به ظهره
يوم يفقد والد...هو بنسبة له أكثر من مجرد والد
هو زايد ..زايد في كل شئ
ومن فقدناه ما عاد عندنا شئ زايد
يوم أسافر ..كنت افخر لأني بنت زايد
كنت أحس إنه عندي شئ ما هو عند كل الناس

أحب زايد ..أحب زايد ... أحب زايد...أحبه لدرجة إني ما اتخيل إني راح أعيش من دونه
بالأصح ما كنت اتوقع يمر علي يوم مثل اليوم اللي فقدت فيه زايد
كل إنسان مفارق ..دنياه وأهله والناس اللي يحبونه..
هذه سنة الحياة
هذه حقيقة ..ما هي برأي ولا نظريه هي واقع ولازم نعيشه..
واقع مرير ...ياما عشنا مصائب وواجهتنا احزان وهموم
بس في مصيبتنا هذه الوضع اختلف
لأن مصيبتنا هذه أبدية..
عسى الرب يرزقنا الصبر والسلون..ويكون خليفة وإخوانه خير من خلف زايد
ويرحم زايد ويغفرله ويسكنه فسيح جنانه..
إنا لله وإنا إليه راجعون..