أبي أتعلم الطبخ (بلييييييز)

خلج معاي وتتعلمين :)

انا كنت مثلج عمري مادخلت المطبخ حتى الشاي ماعرف اسويه يعني انتي احسن مني شوية .... بس لما تزوجت كسر خاطري زوجي وانا مليت من اكل المطاعم فقمت اسوي الاشياء السهلة اذا تبين ارسلج كل يوم شي سهل من الاشياء اللي اسويها وبجذي تتعلمين وتحرين رفيجاتج واذا تعلمتي اتعلميني انتي بعد :)))

وترى اكلاتي كلها مجربة واهم شي سههههههههلة يعني تصلحلج :)

اتمتالج التوفيق حبيبتي :)

نبدي بأول طبق ...

اخذي علبة صدور دجاج قصصيها قطع صغيرة وتبليها بليمون وخل وثوم لمدة .... نص ساعة وبعدين حطيها مع خلطتها بالفرن لين تستوي

لالالا ما خلصت

اخذي جدر حطي فيه شوية زيت وبصل مقطع شرايح وثوم وفلفل اخضر ومشروم وجزر ومكعب دجاج ماجي وووو ... اظن بس جذي ... حطي الدجاج فوقه وصبي فوقه علبة كريمة KDD السائلة وحطيلة نص ملعقة صغيرة لومي اسود مطحون وربع ملعقة صغيرة فلفل اسود مطحون ونص ملعقة صغيرة بهار ولالالالالالالالاتحطين ملح ........وخليه على النار ربع ساعة وقدميه وقولي لااهلج ترى صعععععععععععععععبة الاكلة وتعبت فيها وايد ...

على فكرة .... الاكلة كلها ماراح تاخذ منج ساعة .... مع غسيل الصحون :)

وبالعافية ... عاد عطيني خبر اذا جربتيها

مشكوره بعد عمري ...
والله راح اسويها اليوم على العشاء واقولج الاخبار ...وتسلمين حبيبتي على الرد ...وآسفه تعبتج وياي ...بس اذا مافيه اي ازعاج اتمنى كل مافضيتي تحطين لي كل مره طبق أجربه (بس يكون سهل) واذا بغيتي ايميلي راح ادزه لج ...
تسلمين يا بنت ديرتي ...:) :) :)

حاضرين افا عليج انتي وين ماتبين ادزلج الطبخات ( صدقت عمرها انها طباخة) :)

بس ماقلتيلي جربتي اول اكلة والا لا وعجبتهم والا لا ؟؟ شجعيني خل اكمل اكتبلج انجازاتي :)



اكلة اليوم شوووووية يبيلها شغل اكثر بس سهلة مو تشوفين مقاديرها وايد وتغيرين رايج :) جربيها وقوليلي :


صينية البطاطس بالدجاج:

راح اكتبلج كل طبقة وطريقتها بروح اوكي ؟؟

المقادير :

- الطبقة الاولى :
4 حبات بطاط متوسطة
قالب زبدة صغير
3/4 كوب حليب سائل
ملح + شوية ثوم مهروس

تسلقين البطاط ولما يخلص تشيلين القشر وتهرسينه بالشوكة بعدين تخلطينه مع الزبدة (تكون ذايبة شوي) والحليب والملح والثوم ولما تخلصين تاخذين صينية بايركس وتغطين اجنابها كلها بالبطاط يعني مو بس القاعدة .... غطي الاجناب والقاعدة

- الطبقة الثانية:
صدور دجاج تقطعينها وتتبلينها وتحطينها بالفرن نفس الطريقة اللي طافت
ملعقة طحين
نص كوب حليب سائل
مكعب دجاج ماجي
نص ملعقة صغيرة من (فلفل اسود + ليمون اسود مطحون+ بهارات مشكلة) بس لاتحطين بهارات صفرا او كاري
مشروم مقطع + بصل مقطع + شوية ثوم+ذرة حلوة (لاتخترعين من المقادير ترى سهلة)

تقلين البصل والثوم مع شووووية زيت وتحطين الدجاج فوقه بعد ماتطلعينه من الفرن وتحطين باقي المقادير كلها بس يكون الحليب مع الطحين اخر شي .... تخلينه على النار تقريبا عشر دقايق او ربع ساعة بعدين تحطينه فوق طبقة البطاط

- الطبقة الثالثة:
جبن موزاريلا

تحطينه فوق طبقة الدجاج وتدخلينه الفرن بس الى ان يتحمر الجبن يعني مو موايد ..... وبالعافية

شكريا (بالهندي)
مشكوره تسلمين... ادري تعبتج وياي ...الطبخ جربته وصج اعجبتهم وايد ( بس الصراحه بنت عمي ساعدتني وايد توني مااعرف شيء )
وأكيد راح اجرب الطبخه الثانيه بس مو اليوم باجر عند بيت يدي وانشاء الله تعجبهم ولو اني متأكده انها راح تعجبهم لانها منج ...
وتسلمين :) :) :) :)

هلا منال ....

اشوه عجبتج الاكلة .... انا اخواني وزوجي يطلبونها مني دايما ..... عاد جربي الثانية هم حلوة وعطيني رايج شجعيني خل اكمل .... وعادي اذا احد يساعدج بالبداية ترى اول مرة دايمن تكون اصعب بعدين تاخذ ايدج وعادي ماتكون صعبة .......


اكلة اليوم ...... بنغير الدجاج بنسوي مرق كفتة .... شرايج ؟؟ لاتخافين ترى هم سهلة بس انا كتبتها على خطوات وايد علشان ما اضيعج :)

المقادير :

- كفتة مثلجة
- طماطة متوسطة مقطعة قطع صغيرة+جزر+بطاط مقطع شرائح+نص كوب خضار مجمدة
- بصلة مقطعة شرائح + ثوم
- 1 معجون طماط
-3 او 4 اكواب ماء (عادي حتى لو زدتي الماي مايضر)
- فلفل اسود مطحون + لومي اسود مطحون + كاري + بهارات مشكلة (نص ملعقة صغيرة من كل شي)
- مكعب دجاج ماجي
- زيت للقلي

الطريقة :
- اول شي تقلين الكفته بزيت حار وتحطينها على صوب ..
-تحطين شووووية زيت بالجدر وتحطين فوقه البصل والثوم الى ان يحمر البصل بعدين تضيفين الطماط والكفتة وبعدين المعجون والماي وباقي المقادير كلها (الخضار-الجزر-البطاط-البهارات-مكعب الماجي) وخليه يغلي شوية وبعدين قصري الجولة وغطي الجدر وخليه الى ان يتبخر الماي وتثقل الصلصةيعني تقريبا ساعة بس ديري بالج لايحترق وقدميه مع خبز ايراني وباااالعافية :)

اتمنى ان هاذي بعد تعجبج وماتدعين علي :) باي