بعد الشتات

بسم الله الرحمن الرحيم
السلام عليكم و رحمة الله و بركاته
أخواتي العزيزات ....
أنا عضوة جديدة بينكم و أرجو أن تتقبلوني كأخت لكم...

أنا كنت أتردد على منتداكم من فترة و لاحظت مدى ترابطكم ببعض و حبكم للمساعدة و من هذا المنطلق راح أقول لكم عن مشكلتي و أرجو إنكم تحاولون تساعدوني في حل هذه المشكلة و تفكرون معاي بصوت عالي أو على الأقل أجد فيكم المتنفس عندما تسمعوني و لكم مني جزيل الشكر و التقدير ...

و قبل ما أشرح لكم عن مشكلتي لازم أعطيكم فكرة عن ظروفي و نوعية الحياة إللي أعيشها علشان تقدرون تكونون صورة واضحة عني... يا خواتي أنا يتيمة الأم و الأب و أعيش مع أحد خواتي بحكم إن ما عندي إخوان و لله الحمد علاقتي مع خواتي ممتازة جداً وماشاء الله تبارك الله يحبوني وااااااااااااااااايد و يخافون علي وايد و مو مقصرين في حقي من جميع النواحي و حتى في بعض الحالات يقصرون على أعمارهم و على عيالهم علشاني و أنا مقدرة هذا الشي منهم وايد, لكن في بعض الأحيان أحس إنهم ما يفهموني و ما يقدرون يتوصلون حق أفكاري و خصوصا إني صايره مكتأبه من بعد وفاة أمي و أبوي و حساسة وايد و ساعات أحس إني مثقلة عليهم و إني عالة عليهم خصوصا إني ما تخرجت من الجامعة للحين و طولت في تخرجي بسبب تقطعي عن الدراسة لأني قعدت فصل مع أمي الله يرحمها و و ووقفت الدراسة بعد لما أبوي مرض الله يرحمه , و من كثر ما توقفت عن الدراسة صايره ما أقدر أركز في دراستي و ثقتي إنعدمت في نفسي و صايره مو مهتمة لو نجحت أو رسبت أو تخرجت أو ما تخرجت يعني مثل ما يقولون "بايعتها" مو السبب في هذا كله التوقف عن الدراسة بس, في أسباب ثانية إني مريت بضروف صعبة قبل و بعد وفاة أمي الله يرحمها "بحكم مرضها بالسرطان" و زواج أبوي و مشاكل زوجة الأبو وفقدان حنان الام و الابو , على الرغم من إن أبوي طلق زوجته قبل ما يتوفى و رجع لي لكن الجروح اللي سواها بقلبي تركت أثر عميق فيني ما إندمل حتى بعد وفاته "متوفي من سنتين تقريباً و بعد بمرض السرطان" , انا سامحته و أسأل الله يسامحني لو قصرت في حق أمي و أبوي , لكن المشكلة ألحين في حالتي النفسية إللي مو راضية تتعدل و حتى أحس إن شكلي تغيرمن بعد ما شفته من هلدنيا.... أدري إن الدنيا فانية لكن الوحدة ذابحتني , مهما إهتمو فيني خواتي ببقى بروحي في يوم من الأيام و هم لهم ضروفهم و حياتهم الخاصة و بيوتهم و همومهم مع عيالهم و عايلاتهم.....
يا خواتي المشكلة تكمن في التالي و باختصار قدر الإمكان لأني طولت عليكم:
قبل فترة تقدم لي شاب طيب و مصلي و زين بشكل عام , لكن فيه أمور أنا ما إرتحت لها و هي أولاً: يدخن و ثانياً: كانت له سوابق "بنات و شرب" و هو تايب من سنين و ما يصلي إلا في المسجد و بار بأمه وايد و مشترط إني أعيش معاه و معانه أمه لأنها مريضة و مالها غيره.....

أنا في البداية ما كنت أدري عنه شي غير إن ما عنده شهادة جامعية فرفضت و بدون تردد " أدري الشهادة مو مقياس للرجل بس هلزمن صعب الوحدة تتنازل عن هلشرط و خصوصاً إن أنا مو فالحة في دراستي يعني ممكن في أي وقت أطلع من الجامعة و ما أخلص لأن مشواري طويييييييييييل و أنا مليت و الحياة صعبة" ........
و لما رفضته خواتي غضبو مني لأن كلما تقدم لي واحد رفضته لسبب ما و السبب يكون دايما مقنع جداً و دايماً لما أرفض يكونون واقفين معاي ما عدا هلمرة قاموا ضدي, و بحجة إن الرجال زين و مصلي و محترم و لكن إسلوبهم كان قاسي جدا معاي وحصلت كلام يجرح و حسيت مرة وحده إني نطيت من مرحلة الطفولة لمرحلة العنوسة !!!! و خصوصا لما ناقشت وحده من خواتي و قلت لها ليش ما أرفضة أنا مو عمري 35 علشان أتنازل عن شروطي بس ردت علي و قالت لي إنتي في نظرة المجتمع مثل ال35 "انا حالياً عمري 26" و شباب الحين يبون وحده في عمر الزهور ما تعدت العشرين "فرش" أو وحده تشتغل و لها راتب و إنتي مب صغيرة و لا تشتغلين!!!!
و مر كم يوم أنا حالتي النفسية عدم و حسيت إن الدنيا ضاقت بي و الشيطان وسوس لي من كل صوب , و لما كنت أفضفض حق رفيجتي كانت تقولي لي"إنتي تستاهلين واحد أحسن من ذي" لأنها تعرف شكثر عانيت في دنيتي, بصراحة خواتي ما غصبوني عليه و تركو لي حرية الاختيار لكن إصراهم عليه كان غريب مع إني عزيزه عليهم وايد و عمري ما راح أنكر هلشي....
و بعد كم يوم قالت لي إختي ترى هلشاب سئلنا عنه و كانت له سوابق "مثل ما قلت لكم" لكن الله هداه و إللي قال لنا عنه واثق عنه 100% و إن هو مو من النوع إلي يرتد.... فقلت لها إنتي ترضين علي ياخذني واحد جذي؟ و شنو يضمني إن ما راح يرد حق إللي كان عليه؟؟ قالت لي ما تضمنين حتى لو خذتي واحد ما عنده هلسوالف من البداية يمكن بعد الزواج ينحرف و تصير عنده هلسوالف؟؟؟
بصراحة أنا بعد الإحباط إللي صادني صرت مب قادرة أفكر أو أقرر ....... الموضوع كله على بعض شائك و يخوف لأن محد يضمن المستقبل غير رب العالمين و هو العالم بالغيب وحده, صح الله غفور و رحيم و خير الخطائون التوابون بس أنا شلي يضمني ما راح يرجع على إللي كان عليه, و غير جذي أنا دايماً أخاف من إللي يتقدمون لي إنهم يستصغروني لأني يتيمة و ما لي سند في هلدنيا ....
و خوفي دايما مستمر من الفشل لأني صدج تعذبت في حياتي و خاطري أستقر و أحس بكياني و بوجودي و إني أكون محبوبة لإنسان يضحي بحياته علشاني مو بس حيا الله زوجة و مظهر إجتماعي ........

على فكره أنا صليت الإستخارة و مع ذلك مترددة لأني ماأبي أظلم الولد أو أظلم نفسي, و خواتي بعد ما دروا عنه هلشي قل حماسهم له و صاروا مو مرتاحين له لكنهم تركوا القرار لي علشان ما يضغطون علي ......

سؤالي لكم يا خواتي "أدري إني طولت عليكم بس سامحوني و إعتبروني مثل إختكم":
لو كنتو مكاني إيش كنتو تسوون و شنو راح يكون ردكم ؟؟ بتوافقون أو بترفضون؟؟ بتحسون بالإحباط أو لا؟؟ ترضون بالأمر الواقع و تتوكلون على الله "التوكل على الله طبعاً في كل الأحوال" و بتوافقون و إلي فيها فيها؟؟

و سلامتكم و اَسفة على الإطالة و عسى الله يجازيكم كل خير ...

إختكم : جمر الحزن