طـــلـــب وظـــيـــفـــة

بسم الله الرحمن الرحيم

السلام عليكم ورحمة الله وبركاته

عبدالله ... شاب في مقتبل العمر، توه مخلص الثانوية العامة، ومثل ماتعرفون، مايمدي الشباب والبنات بعد الامتحانات إلا و موسم تقديم طلبات الالتحاق بالجامعات والوظايف يبدأ ... محلات الطباعة تكسب ذهب ونص الشباب المتهاونين تلقونهم في الجوازات ... يجددون جوازاتهم المنتهية...

عبدالله ... كان من ضمنهم .. بس مو لأنه من الشباب المتهاون .. لكنه نسى جوازه في جيبه والشغالة غسلت الجواز مع الدشداشة...

يوم بالكثير والجواز جاهز .. عبدالله راح مبكر عشان يلحق تقديم طلبات الابتعاث والوظايف

دخل احدى الدوائر الحكومية..واخذ طلب وظيفة وبدأ بسم الله وقام يعبي الطلب ما مداه يكتب شيء حتى توقف عند خانة العمر.. المطلوب منه كتابة العمر..احتار وقعد يفكر...الشباب اللي حذاله خلصوا وهو بعده واقف عند خانة العمر...راح تستغربون شو اللي خلاه يتأخر..احد في العالم مايعرف عمره !!!!

لكن تفكير عبدالله كان غير..وغير جدا
شخط على كلمة العمر وكتب مكانه تاريخ الميلاد
وكمل تعبئة طلب الوظيفة وهو يتمتم بصوت غير مسموع...احد في العالم يعرف كم عمره ؟؟؟ عادها كذا مرة وجاوب نفسه بصوت مسموع ... مستحيل


شرايكم بالقصة