تكفوووووووون ادخلوا تكفووووووووون

عواشة الحلوة :

أتذكر مرة كتبتي نفس الموضوع عند انتهاء المرحلة الدراسية .. وكنتي خايفة ان ينتهي العام الدراسي وماتاخذي رقم مدرستك ...صح؟

والحين انتي خايفة انك تواجهي نفس معلمتك مع بداية العام الدراسي ..

أنا أقول :
من الجميل ان الانسان يحب معلمه ( من علمني حرفاً صرت له عبداً ) هذا ان دل فيدل على مدى أهمية المدرس وعظمته واحترامه وحبه وتقديره...

وانتي ياعواشة : حبي مدرستك ، بس ماتتخطي حدود حبك لها ... وانتي فاهمة علي ... لأني من خلال قراءة مشكلتك لاحظت انك تحبيها بشكل غير طبيعي ، بدليل انك خايفة تشوفيها واعترفتي بحبك لها وسألتيها عن مشاعرها اتجاهك لو كانت هذه المشاعر من قلبها أو لأ ... وووو ...

انتبهي لنفسك ياعواشة ، وتأكدي ان هذه معلمتك تحبك مثل ماتكوني بنتها تماماً وتبي تشجعك للدراسة ، وهي تحبك مثل ماتحب باقي البنات ,, أتمنى انك ماتفهمي معنى حبها لك بالمعنى اللي انتي تبيه ...

فهمتي علي ...


وأنا أعتقد ان المرحلة اللي تمري فيها هي مرحلة مراهقة ،،,راح تنتهي بإذن الله ،، ولما تكبري ياعواشة وتخلصي المدرسة وتفوتي الجامعة وتتزوجي وتنجبي أطفال راح تضحكي على نفسك :D2:D2:D2:D2:D2... وراح تستغربي من مشاعرك اللي كنتي موجهتيها اتجاه مدرستك ..

السلام عليكم ورحمة الله وبركاته

هدّي أعصابك يا عواشة...

الحمد لله المدرسة لسه في المدرسة...يعني راح تقدري تشوفيها و تتكلمي معاها...و ما تقلقي..مش راح تبكي...لأنك راح تكوني مشتاقة لها...

روحي و سلمي عليها و اسأليها عن أخبارها و اتكلمي معاها مثل زمان...

يمكن راح تنشغلي عنها بدراستك...لكن خلي علاقتك بيها دايما كويسة...و دايما اسألي عليها...

و بالتوفيق في السنة الجديدة إن شاء الله...

ويييي الله يعينج

بس عادي تقدرين تروحين عندها بالمكتب وتسولفين معاها:D2

يا احليلك ياعواشه

بكل صراحة حبيبتي عواشي

هذه مراهقة .. إن رضينا ولا لا

وحبيبتي .. لا تحرقي كل مشاعرك وعواطفك أزيد عن اللزوم

وصدقيني راح تكبري يا عسولة وتقولي قالوا لي البنات وما صدقتهم

أقول لك قصتي

أنا مثلك كنت حساسة .. بس حساسية غير طبيعية

مرة حبيت مدرستي .. كنت أوقف في كل مكان تمشي منه بس علشان أشوفها وتعطيني ابتسامة

كنت أحب الأرض اللي تمشي عليها .. أحب ريحتها .. أحب شكلها .. ملابسها .. أسلوبها

كنت أتعمد أدور أي سؤال علشان أروح لها بالفرصة وأسألها

ومرة جاتني واحدة من صديقاتي تقول لي عندي رقم بيتهم .. تحرني

رحت انقهرت وكلمت مدرستي .. أحاسب فيها .. بلفيت لي حق يعني أتشره عليها

أقول لها أبلة ليش عطيتي رقم بيتك لفلانة

تقول لي هي رفيجة أختي وأختي عطتها الرقم

وبدك الصراحة من يومها أعدت تفكيري في علاقتي بمدرسي

المفروض تكون احترام وتكون لي قدوة وأحبها لكن الحب المعقول

أما الولع الزايد عن اللزوم هذا ما له معنى ولا له داعي

وبدك الصراحة زيادة شوي .. صرت كل ما أتذكرها أكرهها لأنها وبكل صراحة ما وجهتني صح علشان أنتبه أن هالنوع من الحب الزايد غلط

المفروض لما المدرسة تشوف البنت متولعة فيها ما تستغلها أو تتركها لأوهام هالحب الغير طبيعي

آجيكي على موقف ثاني حبيت واحدة من بنات المدرسة بصراحة تسأليني ألحين أقول لك مادري على ويش؟؟ ما فيها من الزود شي لكن عبط وهبل بعيد عنك صرت أقعد لها في الفرصة .. الفرصة اللي الكل يستمتع فيها وياكل ويشرب ويلعب أنا أقعد لها حاطة إيدي على خدي وأناظرها وين راحت فلانة ومن وين جات فلانة لا وأزيدك من الشعر بيت كنت أسوي حركات تخليها تنتبه لي بلفيت بتهتم وتيجي تطبطب علي وهي ولا على بالها وأروح أركب الباص اللي هي فيه وأسرح في جمال عيونها وأرميلها ذيك النظرات .. نظرات المحبين

ألحين ذكريني بهالمواقف .. اكره نفسي وشكلي وشيفة اللي كنت أحبهم

الصداقة حلوة لكنها بحدود لا تتعداها

الإعجاب برضو بحدود علشان ما ينكسر القلب

صرفنا عواطفنا في الكلام الفاضي

والحين يوم نحتاج نظهر هالعواطف لمن يستحقها ما نلقاها

أقول لك حبيبتي

أول ما تبدى الدارسة سلمي عليها واظهريلها سعادتك بشوفتها

لكن انتبهي لدراستك .. وراك امتحانات ولازم تركزي شوي علشان تنجحي ويكون لك دور فعال في المجتمع أو حتى داخل نطاق أسرتك اللي راح تكونينها بإذن الله تعالى

ردي علي وانا اختك تراني فاهمة هالمشاعر وأضحك عليها كل ما تذكرتها

أتمنى لك التوفيق

السلام عليكم ورحمة الله وبركاته

صلى الله عليه وسلم

عواشة الحلوة..

ذكرتيني بالمدرسة وسوالف البنات مع المدرسات.. و حركات المراهقة.. بس عواشة انتي طلبتي رأينا صح؟ وانا راح اقول لك رايي.. وتحملي راي لأني بتكلم بصراحة معاك شوي وحزم..

تقولي إن كل يوم يزيد عوار قلبك على فراقها.. وش راح تسوين لمن تتخرجين وتروحين الثانوي.. وشلون بتصرفين؟؟

لا تبني أمال وأحلام على أول يوم وإنك خايفة تبكين لأن يمكن هذه الأبلة تصدمك بتصرفها..
يمكن
نستك..
او نست إنك تحبينها..
أو يمكن تقابلك ببرود وتنصدمي..
وترجعي تجري أذيال الخيبة والألم على اللقاء البارد وتندمي..


انتي حبيتي هذه المعلمة لأنك في مرحلة عمرية جديدة ومختلفة عن المرحلة اللي سبقتها والدليل على ذلك إن هل حبيتي معلمة وانتي بالابتدائية.. ما اظن ويمكن ولا عمرك فكرتي إنك في يوم من الأيام تحبي معلمة..

حبيتي هذه المعلمة لأنها خلوقة وحلوة وتعاملك تمام.. وتسولف وتضحك معاك .. وشخصيتها غريبة .. و يمكن اتخذتيها قدوة لك وكل إنسان فينا عندة قدوة يقتدي بها ليش ما تقتدين بنساء النبي(ص) ..

حبيتي هذي المعلمة لأنك مفتقده للحب سواء حب أهلك او صديقاتك وانتي في مرحلة فيها تقلبات عاطفية ونفسية وودك تملين قلبك .. لأنك تعانين من فراغ عاطفي ..

حبيتي هذي المعلمة لأنك مو شاغلة نفسك بشئ ثاني لازم تحطي في بالك إن المدرسة محطة نوقف فيها فترة ونمشي منها بس مو أكثر نتعلم منها وننمي مهارتنا وقدراتنا ..

عواشة الحلوة..
راح تتألمين كثيير لمن تواصلين على نفس الطريق.. وتتعذبين .. زين شنو اللي جابرك على الألم والعذاب وانتي بعدك طالبة .. ادرسي ..ادرسي ..

خففي علاقتك بمدرستك لأنك ما راح تظلين هناك .. ولازم تهيئين نفسك من الحين حق التخرج..

لربما قصدها يخوف.. سبحان الله الله العالم وش اللي بالها..


وقوي علاقتك بربك .. هو اللي نافعك ولامك ورازقك الخير..

يمكن تكرهي ردي وكلماتي بس أنا ما حصدت من شي من حبي لمدرساتي غير الالم والبكي .. بس من بعيد لبعيد.. والحين أضحك على نفسي وأقول انا ضيعت وقتي في لا شي..

سامحيني على صرامتي معاك..

بس هذا رأيي..

الله يعينج يا اختي

بصراحة ما عمري مريت في مثل هذا الموقف بس اللي اقدر اقولة ان هاذي فترة مراهقة و انشالله بتعدي و لا تشيلين هم

الله يهديج و ويوفقج

حياتى والله انتى،،

موضوعك مش صعب ترى روحى سلمى عليها واسألى عنها بس تعرفين انتى تمرين بمرحلة انتقالية يعنى جسمك وهرموناتك قاعدة تتغير هذا شئ واعتقد فى شئ ثانى: انتى تفتقدى فى حياتك الاسرة الى الانتماء يعنى احتمال يكون ترتيبك بين اخوانك وخواتك صار ما لك اهتمام بينهم هذا مجرد تخمين مش اكثر بس دائم فكرى يا حياتى انتة لسة فى بداية حياتك وشخصيتك زى العسل بارك الله فيج وربك يوفقك يارب فى حياتك

اختك سهور:up:

مشكووووووووورين حيل يا بنات على الي قلتوه ..

بس في شىء ما قلته لكم ..

انا بالعطلة تعبت و نوموني بالمشتسفى اسبوع كامل

و انا ما توقعت هذا الشىء يصير جتني ابلتي و جابت لي هدية على سلامتي

ليما سألتها انتي شعرفج اني انا هني تبتسم و قالت اكيد اعرف مو تقولين لي اني انا نبض قلبج فراح اعرف كل خطوة تمشينها و ليما احن عليها و قولها منو قالج تقول ماني معملة ..

بس الي صار هذا انا متعجبة فيه و اشوف خواتي يطالعوني و يبتسمون كأنهم يعرفون شىء و و الله من ذاك اللحطة و انا اقول حق اهلي انتم تعرفون شىء يقولون لأ ما نعرف شىء بس انا لحد الحين متعجبة من هالشىء ..

و سهورة انا ترتيبي بي اخواني آخر العنقود يعني الدلوعه بالبيت او مثل ما يسموني اهلي شمعة البيت يعني ماكوا اي شىء يهملهم عني عارفه ..

ممكن تقولون اني في فترى مراهقه انا معاكم في الشىء هذا

و الله اناا احبها مثل ما احب امي و خواتي ..

حبي لأمي و خواتي كبير فأنها احبها مثلهم انا ما احبها اكثر مثل اهلي

و الله انا اخذ ابلتي كأنه وحده من عايلتنا

و مرات ليما نكون لحالنا بالمدرسة و نضحك مع بعض و نتغشمر اناديها بأسمها مرة وحده بعدين اغير

حتى اذكر مره سمعتها بدون لا تدري يعني بالصدفه

سمعت ابلة معاها بالقسم تقول انتي من صجج معطية وجه لعواشه لا تصير جذي مع البنات

ردت عليها قالت عواشه غير عن البنات كلهم الي اعرف فيها شخصيتها مرحه حيل و ممكن ان طريقه تعاملها معاي انا يا مدرستها حلوه و لأنها خجولة و جرئية يعني غير عن كل الناس الي شفتهم عواشه غير عن الكل

و الله يا بنات رحت و قعدت ادور على رفيجاتي و افكر فيها اقول لهدرجه يعني ابلتي جذي فاهمتيني

و ليش الابلة الي معاها تقول جذي

بس كلامها هذا غير مجرا حياتي كلها قاعد اسوي كل الي يرضيها و مرة جبت درجه شوي نازلة بالأمتحان زعلت علي

رحت قلت ابلة و الله مو بكيفي انا دارسة عدل و الامتحان كان شوية صعب

و انتي تعرفين متفوقه و بذات في مادتج درجات عالية

و انا وحده متوفقه في كل مراحلي الدراسية

بس يا بنات في مواقف واجد تصير معاي و معاها و انصدم ان هذي ابلتي احس يوم عن يوم تحبني مثل ما انا احبها

و تسولف معاي و تكلمني عن اهلها يعني عندها عادي بس كل هذا يكون بيني و بينها

بس راح اظل احبها


و ياما و ياما كتبت خواطر وااااااااايده عنها و عن جمالها و اخلاقها و قلبها الطيب و اكتب نسخه ثانية في ورقة مرتبه و خط حلو و اهديها لها

و مره اهديت لها درع في آخر يوم تقولي يا عواشه ما اتوقع ان الاخت تهدي حق اختها درع

كلت لها عادي اختي و بكيفي و ابتسم قالت على العموم مشكووووووورة

:D2:D2:D2:D2

والله ذكرتيني بأيام المدرسة ..

أنا كنت مثلج .. أموت في وحدة من المدرسات ..

لكن الحين .. أفكر وأقول ليش أنا كنت هبله هالكثر ...:D2:D2:D2:D2

الله يرحم هذيج الأيام .. :D2

ياحليلج ياعواشه :D2.. ذكرتيني بأيام المتوسط .. وبأبلتي اللي كنت بنجن من كثر ماحبها ..
تخيلي كان ودي أغير أسمي عشان أصير مثلها مع ان اسمها خايس بس الحب يعمل عمايل ..:D2 ...

بس الحين وييييييييييي .. نسيتها كلش كلش وما يهمني إلا ريلي ...:cool2::cool2:

عواشه الحلوه بس ما قلتيلنا شو صار لما فتحت المدرسة

وشلون استقبلتي الأبله؟؟

وشلون هي استقبلتج؟؟

اعقلي يا بنت وابعدي عن هالحركات
وهدي موب حركات انسانه عاقلة
انتي اتظرين عمرج وهدا بياثر على دراستج لانه هالمدرسه ما بتم طول الحياة في هالمدرسة يمكن تنتقل الله واعلم صدقيني هدا موب من صالحج ..... يا اختي شوفي حياتج ودراستج وجابلي دراستج احسن