<< للعرايس وخاصة المالكات >>

بسم الله الرحمن الرحيم
السلام عليكم ورحمة الله وبركاته..

خواتي الحبيبات وخاصة المالكات.. هذي بعض النقاط اللي قدرت اكتبها عن الأشياء اللي تحتاجها البنت المالجة "المالكة".. والمشاكل البسيطة اللي نقدر نغيرها.. ان شاء الله تنال استحسانكم وتفيدكم يارب


أذا كنتي تبين ريليج يطرشلج مسجات.. إنتي لا تبخلين عليه.. صباح الحب يا حبي الأول والخير.. مساء الشوق يا.., ورسايل حب وشوق وغرام.. حتى لو كان ما يطرش انتي طرشي بس لا تبالغين.. يعني بحدود 6 أو 7 رسايل بالأسبوع.. واذا شفتيه ماطرش.. قوليلها مثلاً وصلت الرسالة اللي طرشتها اليوم؟ وبعدين قوليله مثلا ً انا ما توصلني رسايلك وراح يفهم :cool2:

اذا ياكم الحبيب.. في زيارة يعني.. لا تنسين انج تتعدلين.. المكياج خليه هادي وبسيييييط يعني آي شدو بيج وبني. أو وردي ولا تنسون الكحل والماسكارا.. وغلوس اذا كنتي تبين تكبرين شفايفج لا ترسمين بالمحدد.. الطريقه انج تحطين شوي من الكريم الأساس اللي تحطينه على ويهج شوي عالشفايف.. وتحطين غلوس فااتح راح يطلع روووعة.. و احمر خدود عالخفيييييف قريب عالطبيعة.. واذا تبين تنقصين على كيفج المهم تكونين طبيعية مع لمسة جمال.. :up:

اللبس حاولي تعرفين هو شو يحب من اللبس والخامات..مثلا أذا كان من النوع اللي يحبج تلبسين جلابيات البسي عادي.. بس بعد غيري في فترات خاصة لو كان فيه مناسبة خاصة.. يعني البسي بودي وتنورة حلوة .. وشوفي الألوان اللي يفضلها .. :smile:

أما عن الاكسسوارات من ناحيتي بس البس سلسلة بسيطة أو مرات ولا شي !! احس احلى ماتكون البنت في أيام ملكتها بساطتها.. عشان يبان الفرق بعد ماتعرس وتبدي تلبس هالاشياء.. :shy:

وصل الزوج البيت.. وجلس.. كيف تدخلين عليه!! من الطرق الأكثر فعالية.. لمزيد من الشوق..:D2
اقولكم شو تسوون.. تدخلين بكل رقة حتى المشية تكون بخفة مب كأنك في الجامعه ولا رايحة معركة..وين تجلسين جنبه؟؟؟ لا لا لااا:eek2: .. جلسي شوي بعيد عنه .. شوفي شو راح يصير.. ملكة داخلة عليه وهو بالحيل مشتااااق وفي الأخير تجلسين بعيد عنه.. راح يقوم من مكانه ويجلس جنبج.. واذا لا .. راح يقولك ليش جالسة بعيد عني تعالي جنبي ..(a)

هالفرصة لا تضيعينها في الكلام الزايد عنك وعن يومياتك.. حاولي تسمعين له أكثر يعني كأنه جاي يكلمك عن نفسه وبس.. ويوم تسمعين له.. مب بس عيونج معاه وتفكيرج في شي ثاني:down:.. شوفي يعني بينيله اهتمامج وخوفج مثلا او فرحج في اللي يقوله من تعابير ويهج ومداخلاتج البسيطة.. وحاولي انج تقربين ايدج من ايده قد ما تقدرين وتلمينها وهو يتلكم.. او تلعبين بشعره بخفة طبعا:o

انتي ويا ريلج .. سميه بمسميات ثانية.. في أي وقت بالتلفون او زيارة لكم.. مثلا حبيبي.. حياتي.. عمري. روحي.. حتى اسمه بالتلفون غيريه لأسامي حلوة مثل ملك قلبي.. روح روحي.. هوا عمري..و بالرنة الخاصة.. وسمعي اذا كان عندكم بالبيت زيارة عطيه موبايلج وخذي موبايله.. مثلا قوليله اوه شوفيه طاح يمكن اخترب او أي عذر واتصلي من موبايله على موبايلج اللي عنده.. وراح يشوف الأسم وشوفي ردت فعله.. :smile:

حاولي ابداً ما تثقلين عليه بهمومج.. "بل" حسيسيه انه مهم وقراراته ورايه اهم.. يعني لو كنتي محتارة في شي اسأليه وقوليله انا ما اعرف انت شو رايك..دايما اشركيه في قراراتج :)

تدليع الزوج هذا اول شي لازم الوحدة تعرفه.. حتى لو كانت تحس أنه زوجها مب من النوع اللي يحب الدلع. صدقيني في الأخير راح يمشي معاج عالخط.. وكل ريال أصلا يحب الدلع.. وقد ماتقدرين كوني دلوووووووووعة وبريئة في تصرفاتج مثل الأطفال يعني.. لان الريال راح يذووب.. بس انتبهوا.. لا تخلون الحركات مصطنعة لانه ماراح يتقبلها..:pain:

بعد الاتصال او الزيارة قوليله راح اشتاقلك حياتي.. أو راح تردني وحيدة.. وتعطيه بوسة خفيفة على خدة(a) (يمكن البعض راح يقول لا مانقدر بس اذا كانت فترة الملكة طويلة يكون أحسن يعني 4 شهور وفوق..يعني ما اظن وحدة كملت السنة وماتقدر تسوي هالشي)

يوم تتكلمين معاه حاولي تتكلمين في الأشياء اللي يحبها مثلا اذا كان يحب كرة القدم شو تسوين!! شوفي مباريات!! بس شوفي اذا كان مثلا يحب يشوف مباراة العين مو تروحين تتابعين ريال مدريد .. يعني انا شو اسوي.. اشوف لقطات بس والتحليل ههههه:D2 ..

اذا كنتوا وخاصة اللي يكونون في البداية ساكتين اغلب الوقت.. يعني السلام عليكم وعليكم السلام كيف الحال بخير.. وتظلون ساكتين. فهذا في البداية شي عااادي.. انا مثلا شو كنت اسوي.. كل يوم احط لسته:eek2:!! اقول اذا اتصل بكلمه في كذا وكذا .. ولا تنسين تسألينه عن اهله وشغله.. متى قمت من النوم؟ متى رحت.. وين رحت يعني من هالأسئلة بس مب كلها يعني تقوليله ليش نمت متأخر يا عمري تتعب نفسك.. يعني الكلام راح يطلع ان شاء الله مع الأسئلة..

إذا كنت زعلانة منه أبداً لا تحاولين تكبرين السالفة أو انه ما يهتم فيج أو شي.. مجرد زعلج أو دمعة وسكوتج ان شاء الله راح يكون له المفعول السحري أو حتى مسج اقطعي عنه المسجات مثلا او المكالمات وصباح الخير..

واعرفي حبيبتي دايماً انج اذا تبين أي شي من ريلج سواء حب او شوق.. انتي تبدئينه عشان تحصلينه:smile:..عطيه من الحب وصدقيني راح تحصلين اللي تبينه.. ولا تنسين أبدا الدعاء ثم الدعاء ثم الدعاء.. ومن الأدعية اللي دوم على لساني في وقت الملجة
" اللهم اجعل قلب زوجي معلقا بحب الله ورسوله ثم حبي"
" اللهم احينا حياة السعداء وامتنا ميتة السعداء والشهداء"وادعوا بالثبات والهداية وبالذرية الصالحة والدعاء ما يتطلب نص تحفظونة او لغة او لهجة الدعاء الكلام اللي في خاطرج ادعيه بقلب صادق مؤمن ..
والله وماراح اكذب عليكم يعني الدعاء مفعوله سحري.. يعني البعض يقول ندعي وما يستجاب النا ليش؟؟ يوم تدعون ادعوا وكلكم ثقة انه الله راح ينفذه وفي أي لحظة وابدا لا تشكين بهالشي.. والدعاء مب مجرد سمعتيه وقلتيه لا خليه يطلع من قلبج وبطريقتج انتي.. حتى لو كان السبب بسيط.. مثلا اذا كنتي تبين ريلج يزورج اليوم ادعي .. وقبل ما تبدين الدعاء احمدي الله اول شي وبعدين الصلاة على النبي صلى الله عليه وسلم.. واحسن اوقات الدعاء السجود في آخر ركعة من الصلاة :)..


ان شاء الله هالنقاط تكون عجبتكم خواتي:up:.. وخاصة طبعاً(للمالجات) للمملكات لأنه كثير من الأحيان اشوف انهم يسألون شو يسوون وما يعرفون يتصرفون.. وخاصة اني مريت بهالتجربة في البداية وسألت وقريت الكثييير.. فعطيتكم من خبرتي في هالفترة وخاصة انها طويلة.. واذا عندكم اسئلة انا حاضرة .. :smile:

ولا تنسوني من صالح الدعاء خواتي.. وان الله ييسر زواجي..

الله يوفقكم جميعاً

اختكم في الله
عروس الجنة(a)..