أموت ماذليت نفسي لخنزير * يكفيني إن العز يلحق عيالي ! * جديد حمدان بن سالم !!

[poet font="Times New Roman,5,blue,bold,normal" bkcolor="transparent" bkimage="" border="none,4,gray" type=0 line=200% align=center use=ex length=0 char="" num="0,black" filter=""]
صحيح هزتني رياحٍ معاصير = وشنت علي الحرب سود اليالي
وصحيح عاثت بي صنوف المقادير = واقفى البخت عني وقَصْرت حبالي
وصحيح يوم إني نخيت الطوابير = اللي لحوم أكتافهم من حلالي
تناطقوا من عقب ماهم مسايير = ماكنّهم ذاقوا مبَهّر دْلالي !
صحيح ! ماينكر زمان المعاسير = إلاّ الجحود المستبد الخيالي
وماهو صحيح إني زبنت الطراطير = شرهان أبلقى بينهم لي ظلالي
والله ولا فكّرت لو بس تفكير = أشكي على الأنذال شيٍّ جرالي
أموت ماذلّيت نفسي لخنزير = يكفيني إن العز يلحق عيالي
أبوك ياخالد عطاك التفاسير = عن كل حزنٍ باقيٍ له توالي
قريت كل الأسئلة والتعابير = في صمت نظراتك بليّا سؤالِ
يابوك لاتبكي ترى توّك إصغير = على الدموع اللي تناثر قبالي
ترى دموعك ياسلا خاطري غير = معها يابوك الموت سكّر وحالي
أنا أبوك إنْ قدّر الله فلا انير = لامن غدا صوت الخطر حيل عالي
لو شفتني غرقان وسط التفاكير = بالك إتحسبنّي جزوعٍ خيالي
الصمت لامن صار حكمة وتدبير = أخير من هرجٍ من الملح خالي
لاياحبيب الروح قل للعصافير = إن العواصف ماضية للزوالِ
إركض ولاعبها وزف التباشير = أنشد لها لحن الفرح لاتبالي
ماطاح أبوك بعلم خزي ومعايير = حاشا ولا درب الرذيلة خمالي
ومايوم صادتني شباك الغنادير =لامن تباهن فوق عرش الجمالِ
مافز قلبي للكحل والمناكير = ولاسببّن سود النواظر هبالي
هذي حقايق صدق ماهي معاذير = الكل يدري عزّتي راس مالي
أبوك أقوى من عيونٍ مشاطير = ملجاي سبحانه عليه اتكالي
لامايرد الباس خوف ومحاذير = لاقدّره ربٍّ عزيز الجلالي
خالد ترى بعض المصايب تناوير = تعرف عدوّك من صديقٍ موالي !

[/poet]

شعر \ حمدان بن سالم العنزي