تجربتي / مع حسون في دخول الحمام .. شعارنا وداعا للبامبرز .. !

[أم حســــين]

صباحكم عسل و قشطه .. ,

مثل مو مبين بتوقيعي حسون عمره سنتين و سته شهور .. ,
و بما اني بوديه السنه الروضه
فلازم يقطع الحفاظه قبل و يتعلم على الحمام انتم بكرامه


قرات تجارب بنات عروس
و بعضها استفدت منها واجد .. ,

لانه بنتي زنوب كلش ما تعبتني ولا سويت معها مثل ما سويت مع حسون ..,

في البدايه شريت حفاظ الكلوت
لكن للاسف ما استفدت منه
8o|يحسبها حسون حفاظ و احس كلش ما استفدت منها

لذلك قررت اسوي حل ثاني لمتى بعد

رحت مذركير سنتر بوينت
و شريت اللى ينحط على المرحاض
المرحاض الصغير

على الدب و يني
لانه حسون يحبه



و ركبته على المرحاض و انتو بكرامه
و قعد اشجع فيه

و كنت افصخه البامبرز و اوديه
و شفت انو بعد ما فاد
بعض الاحيان يسويها في الحفاظ

فشريت ليه نوعين من الكلوتات

النوع الاول الكلوت القطن



على الشخصيات اللى يحبها
اللى في حديقه المرح

و قلت بخليها لين اتعلم شوي و بدات يقول انه بيروح الحمام


و النوع الثاني
كلوت يجي مثل الطربال و داخله قطن

ما يسرب لو عمل حاجه



و هذا شكله من الداخل



فمت من اول ما يقعد اوديه الحمام
و اشجعه
و بعدها البسه الكلوت
و كل نصف ساعه اوديه الحمام

و حسيت و لدي بدا يمل

فشنو وسيت



بما ان و لدي يحب شخصيات حديق المرح
و يموت في شي اسمه سيارات


فخليت فوق المرحاض
شخصيه جوجو
و حطيت سياره

و قلت ليه
اذا رحت الحمام
اخليك تلعب في السياره
خصوصا السياره تشتغل بالرموت
و تعلب مع جوجو لانه يحبه موووووووووت




وكنت اقول ليه
اذا ما سويت
جوجو ما يحبك وما يحب يلعب معاك
و حسيته اتشجع شوووي
انه يروح


وكمان
ادخل معاي هذا المجموع من الكتب عن النظافه




شريته من معرض الكتاب

والكتيبات كلش حلو ه لانه براقه و رسومتها جدا حلوه

وبدل ما كان ما يبي يدخل الحمام
حسته يستانس لين يدخل الحمام

خليت كلوت الطربال تقريبا اسبوعين عليه

و بعد فتره الحمد لله

اذا يبغي يسوي الووووف :biggrin:
يجي يقول لييييييييي
و اول يوم قال لي
خليت ابوه يروح معاه و يشتري ليه سياره
علشان يستجع اكثر


ومن يوم الخميس
بدات البسه الكلوت القطني

و الحمد لله اشوف للحين ماشي اوكي

ادعو الى ولدي بالهديه ان شاء لله
و اتمنى من امهات يستفيدو من تجربتي المتواضعه

:o و اي نصائح امهات لاتبخلو عليينا


محبتي للجيمع

همسه : الموضوع مجهود شخصي
لذلك لا اسمح بنقل بتاتا


F:محبتي للجميع

[ام عــلاوووي]

ما شاء الله ام حسوون تجربه ناجحه ,

والله يعطيش العافيه يارب ..!

,

وعقبال علاووينا ..

اكيدن استفدت من تجربتج ..

وقريب قريب بطبقهاا بعد شهر رمضان والله يساعدنا ,

,

الله يخلي حسوونه ويهديه ويسويها على طوول بالحمام : )

وتستاهلين التقييم ,!

[أم حســــين]

تسلمين حبيبتي ام علاوووي
و ربي يهديهم ان شاء لله
لا عدمتك حبيبتي
ولا يحرمني منك

[دلوعة سونه]

الهم صلي على محمد وال محمد

ما شاء الله عليج يا ام حسون الله يخليج لعيالج ويخليج لنا و نستفيد من ابداعاتج مع لعيال

و انشاء الله اطبق مع رقااااوي بعد سنه و ثمانية اشهر :thumbs_up:

[أم حســــين]

اهلين خيوتي دلوعه
ربي يخلي ليك رقاووي يارب و يحفظها

تسلمين حبيبتي
و اتمنى تجربتي فدتك

تقديري

[um fa6mah]

هلا أم حسون
مبادره حلووو انك تشجعين ولدك
وخلاص هو كبير ع البامبرز
أنا لمن كملت بنتي سنتين تركت البامبرز
وخذتلها نفس كرسي حسون اللي ع المرحاض
واالحين ما نلبس البامببرز إلا وقت الليل
بس ما أعرف كيف أتركه عنهاإ
يبيلي وقت عشان أتركه

الله يخليج لعيالج و يهديهم

[مالكة الليل]

تجربه حلوووه وناجحه ام حسون
يعني صدق تشجع الطفل ع ترك الحفاظ

اني ولدي شاريه له الكرسي مال الحمام من زمان ع اساسا اني اعلمه ع ترك الحفاظ بس من اوديه يقعد يصح وتالي مع تعب الحمل تركت السالفه وقلت بعده صغير واكو ولدت وهو لحين ع الحفاظ ..

بس سؤالي لج من وين شريتي الكلوت اللي ع حديقه المرح والطربال ..

لان ولدي بعد يحب هالشخصيات جوجو وريحانه ,,

[مالكة الليل]

وتستاهلين التقييم عزيزتي

[um 3looy]

هلا اختي
تجربة حلوة عشان يستفيدون منها البنات

اني الحمد لله علووي الحين عمره سنتين و3 شهور وافتكيت من الحفاظ
والفال لميمي بعد

وتقريبا نفس الطريقة المعتمدة عني

وبالنسبة للحفاظ الكلوت اني كنت البسه علوي واقول ليه هذا هاف جديد ماتسوي في شي لانه يتلعوز ويصير كريه

وهو يقول لي لا هذا حفاظ واقول ليه لا هاف جديد يشبه الحفاظ وبعدين قام ما يسوي فيه حتى لين البسه يصر انه يدش الحمام ولا يسوي فيها

وحتى لين أحد كان يقول ليه وع عليك حفاظ يقول لااااااااا هاف جديد

والحمد لله افتكينا منه

والفال لجميع الجهال

[مسك أبيض]

أم حسين يعطيك العافية عالمجهود
جزاك الله كل خير
بس حبيت أسألك من وين كلوت الشخصيات حديقة المرح؟

[زهور يانعة]

ما شاء الله تجربة حلوة وناجحة

تستاهلي التقييم بس الميزان العنيد رافض

[رسيل الورد εïз]

أني علمت بتولتي على الحمام وماشاءالله عليها شطورة

بس للحين ساعات البسها الحفاظ لكن تقول بتروح الحمام وارد أشيله

وكرسي الحمام مثل بتولتي بس مالها اميرات من سنتر بوينت


وفكرة الحفاظ الكلوت لتعليم للحمام فاشلة لانه الطفل يحسها مثل الحفاظ ويوسخ فيها

[um yaqeen]

تم التقييم
مشكوره حبيبتي

[أم حســــين]

هلا أم حسون
مبادره حلووو انك تشجعين ولدك
وخلاص هو كبير ع البامبرز
أنا لمن كملت بنتي سنتين تركت البامبرز
وخذتلها نفس كرسي حسون اللي ع المرحاض
واالحين ما نلبس البامببرز إلا وقت الليل
بس ما أعرف كيف أتركه عنهاإ
يبيلي وقت عشان أتركه

الله يخليج لعيالج و يهديهم

هلا خيوتي
ان شاء لله رب يهديه و يهدي بنوتك يارب

بالليل خيوتي
حاولي اتقعدينها كل ثلاث ساعات او ساعتين
و خليها تدخل الحمام

بعدها راح هي تتعلم بروحها تقعد و تروح لمن اتكون بحاجه الى الحمام

زنوب لمن كانت صغيره جذي
و الحمد لله
زنوب كلش ما تعبتني

و ربي يهديهم هالنتف
تسلمين خيه على مروك

[أم حســــين]

تجربه حلوووه وناجحه ام حسون
يعني صدق تشجع الطفل ع ترك الحفاظ

اني ولدي شاريه له الكرسي مال الحمام من زمان ع اساسا اني اعلمه ع ترك الحفاظ بس من اوديه يقعد يصح وتالي مع تعب الحمل تركت السالفه وقلت بعده صغير واكو ولدت وهو لحين ع الحفاظ ..

بس سؤالي لج من وين شريتي الكلوت اللي ع حديقه المرح والطربال ..

لان ولدي بعد يحب هالشخصيات جوجو وريحانه ,,

هلا خيوتي
احسه تعليم الحمام كلش متعب
و يبغي له صبر

الله يعنيا عليهم هالنتف يارب


بخصوص الكلوت خيوتي
كلوت حديقه المرح اخذته من مذركير الاصلي
يجون في كيسس 8 مع بعض
شريته بالتخفيض بدرينارين
و سعره الاصلي كان 8 دينار



اما كلوت الطربال شريته من سنتر بوينت
و سعره 1.400
و فيه اشكال ثانيه بعد


تسلمين خيوتي لا عدمت تواجدك