كنت قاعدة أتفرج عالتلفزيون ... متابعة مسلسل ..
<<< ما ذبحنا يالبنات إلا هالمسلسلات
وجا مشهد زواج وحدة من الشخص اللي تحبه من زمااااان ...
<<< أبو الرومنسية خخخخخخ
قلبت القناة على قناة ثانيه ...
لقيت عرض أزياء فساتين عرايس...
<<<<< يا ربي .. متقصّدين يفتحون لي سالفة العرس
قلبت القناة .. لقيت خطوات وضع مكياج العروس ...
<<<< و بعدين ؟؟؟؟؟؟
سكرت التلفزيون وجرّيت الونّـه
<<<<<< " تنهيدة كبيرة " تشقق الصدر
التفت علىّ أبوي اللي نسيت تماما إنه كان جنبي ...
قال لي أبوي :
خير إن شاء الله يابنتي ؟! وش فيك ؟! عسى ماشر ؟!
أنا تلخبطت ساعتها وفتحت له التلفزيون وقعدت ساكتة ...
إيه اكيد بسكت وش أقول ؟ اقول له ودي أعرس ؟؟؟ ( يعني أتزوج بالعربي ) ...
أقول له إن صاحباتي أغلبهم تزوجوا ؟؟؟
وإلا أقول له إني تمنيت أكون مكان بنت خالي في كوشتها وفي الزفة أمس ؟
يقطع الدراسة وسنينها يا شيخ ...
أوووف والله غثا ..
يا بخت جداتنا ماتطق الوحدة العشر سنين إلا هي مخطوبة ..
وعلى الثنعش أعرست ..
وان وصلت البنت ثمنطعش ما أعرست قالوا عااااانس !!!
هذوليك البنات اللي عايشين صح مُبْ حنا اللي نعجز ونوصل سن اليأس ما أعرسنا ...
أخخخ .. يُبه الله يفتح عليك وتخليني أعرس ... وتفكني من الدراسة ...
وساعة أنا غارقة في قاع هذي الهواجيس ويرن التلفون ويقطع حبل أفكاري ...
طالع الرقم أبوي وقال رقم غريب ... رد بلهجة رسميه :
- وعليكم السلام .....
الله يسلمك .....
الحمد لله بخير .....
ايه أنا أبوفلانة ( منيب قايلة لأحد عشان محد يعرفني ويضحك علي ) ....
لا منت غلطان أنا هو ...
ماعليك زود الله يسلمك ...
من معاي ياخوي ماعرفتك ...
والنعم .... تفضل وش السالفة اللي تبيني فيها ؟....
لا ماني مشغول ...
لهالدرجة الموضوع مهم ؟!...
تفضل تكلم شغلتني ...
والتفت أبوي علي وعطاني نظرة غريبة ..
انا ساعتها قرصني قلبي مو من ردود أبوي بس من نظراته الغريبة ..
رد أبوي على المتصل : وش فيها زود طيب ؟...
لا بس مافيها أي ميزات عن الباقي ...
أقول في نفسي .. ودي أرجفك يبه وآخذ السماعة منك وأكلم الرجال ...
ناشر غسيلي حتى عند الرجاجيل !!!
رد ابوي على المتصل : طيب وبعدين ... أيوه ....
طيب وش اسمك الكامل ؟
وش شغلتك بالضبط ؟
طيب من دلك علي وعطاك رقمنا ؟
لا الموضوع يا ابني مو بهالبساطة ....
الواحد لازم يسأل كثير ويحرص قبل يقدم على أي خطوة ...
لا موضوع إنك تجي لبيتنا خليها بعدين ...
لين أسأل عن كل صغيرة وكبيرة ...
لا لما أكتفي من السؤال وأخذ المعلومات اللي تكفي .. بأتصل عليك تجي ونتفاهم ويكون خير إن شاء الله ..
أنا كنت أتابع حركات أبوي وأنا متشققة من الفرحة ...
أخيرا انخطبت وبتزوج مثلي مثل غيري ...
يوووووه أخيرا بلبس فستان أبيض منفووووووش
أخيرا بطلع أجهز واتقضى للزواج ...
بسوي زواج كبير مررررررة
وبحط زفة ريميكس وطرحتي مابيها خليجية بخليها مبتكرة ...
منيرة منيب عازمتها هي وخواتها .. ماعزموني الأسبوع اللي فات على الدي جي اللي سووه ...
**************
وبشتري أغراض وأشيل وأحط وأخطط ... بيصدع راسي بس ولو لذيذ هالصداع ...
يوم قفل الخط أبوي التفت علي وهو مبتسم ابتسامة تعجب وهو ساكت ... قلت :
- هاه يبه ؟ متى بيجي يشوفني ؟
- منهو
- هذا اللي خطبني تو
- وشو؟!
- خطيبي اللي تو
- تموووووونين أنتي ووجهك صار خطيبك على طول ماعندك وقت ..
- إيه يبه ترى أحذرك هالمرة شف تطرد العريس .. مثل ما طردت ولد أم مساعد العام الماضي .
للحين تراها حازة في نفسي ..
ترى هالمرة بضرب عن الدراسة ...
والا الأكل مقدر أضرب عنه ...
وجع يبه بعنس من تحت رأس فعايلك بخطاطيبي ...
والرسول حث على تزويج من ترضون دينه وخلقه ...
<<< عطت الوالد محاضرة خخخ
وهذا الخاطب قايل قلبي انه أجودي ..
ترى ما أعرفه بس أتوقع إنه كذا...
وترى العرس أهم من الدراسة عشان الجنس البشري ماينقرض ....
<<<<<< أبووووك يا التفكير و الاستنتاج خخخخخخ
وبعدين من قال لك إني منيب مكملة دراستي ؟؟؟ والله بكمل .
حسيت إن عيون أبوي بتطلع من شدة علامات التعجب اللي في وجهه ..
بعدين انفجر من الضحك .
- هي أنتي وين رحتي ... حدك حدك لا تشطحين !!!
- وش أشطح ؟!
هذي الحقيقة يبه والحقيقة ماتزعّل ..
وأنت الله يطول لنا بعمرك علمتنا على الصراحة وحب الحقيقة
- أي عريس وأي هم؟؟!!
أنتي مصخّنة ؟؟
هذا المتصل مندوب شركة
يبي يجي يوريني المكنسة الكهربائية العجيبة على قولته اللي تغسل وتنفخ وتطبخ ..
قومي نامي يابنيتي .. ولا تكثرين قعدة قدام التلفزيون ...
الحين بس عرفت ليه سكرتيه تو...
- أنا لا تسألون عن وجهي ...
الله يقطع أم العجلة اللي تعرفونها ....
مشكلتي إني أجزم على طوووووول قبل أتأكد
استروا ما واجهتوا ........
انتهت القصة خخخخخخ
ارق تحيه
اتريا الردود
رد مع اقتباس
