مشكله مالها حل ؟؟؟

[الحب الحزين]

السلام عليكم ورحمة الله وبركاته
اولا رحبو فيني لاني عضوه يديده توني ابقراطيسي والحين يالسه اطلع من الكيس
واول مشاركه لي هي عن معاناتي وياريت ما تبخلون علي وتساعدوني


سلمكم الله ...... مشكلتي مع اهل زوجي ..
تعاملهم معاي مب شي مع اني انا احترمهم واقدرهم واعاملهم بكل حب لكن ماشي فايده وانا ابدا ما اطول الساني عليهم ولا اقولهم شي حتى لما اينغزون لان طبعي بايخ وما اعرف ارد ومعاملتهم بايخه يمكن لاني مب من اهلهم انا ما ادري شو السبب مع اني اعرف انهم لو ايدورون على وحده مثلي ما بيحصلون وحده تستحمل كلامهم ودلعهم
والمشكله الثانيه انا اخوانهم مزوجين من بنات اعمومتهم والله لو اشوفون كيف ايعاملونهم بكل دلع وحب مع ان بنات عمهم السانهم طويل وابد ما يحترمون حد بس بيني وبينكم لما يطلعون حريم اخوانهم ييلسون ايحشون فيهم الا هاي جذه والا هاي طبعها ما عيبني وها جذه بس لما ايون ايشلونهم على راسهم والحين لما بديت احاول اني ارد على بعض الاشياء البسيطه ييلسون ايقولون هي عاد بديتي اتردين بس مب عارفه كيف اصرف ؟؟؟؟ ولما اشكى حق زوجي او اقوله على سالفه استوت بيني وبين اهله ايرد ويقول لا اهلي ما يسوون جذه او اهلى ما يقولون جذه والله الشاكل بدت اتزيد بيني وبين زوجي والسبه اهله
ساعدوني الله ايخليكم مالي غير الله ثم انتوا لاني ما اقدر اقول حق اهلي شي ايقولونلي انتي اخترتي هالزوج غصبا عنا (لاني كنت احبه واهلي ما كانو راضين ):confused:

[الحب الحزين]

ارجوكم ساعدوني اشحقه محد ايرد عليه انا في حيره من امري وانا متعبه جدا ارجوكم ..
:confused:
والخلافات بيني وبين زوجي مشتعله وانا توني عروس جديده ما كملت 10 شهور ارررررررررجوكم وينكم يا اهل الخير كيف اصرف :confused: هل اذهب عند اهلي والي ايصير ايصير ولا كيف لان زوجي ايقول انوه ما بيغفرلي اني قلت عن اهلوه انهم بيفرقو وانهم يصطنعو المشاكل لما انا بجي عندهم
صدقوني حالتي صعبه بس انا ماني عارفه كيف اوصفلكم :confused:

[سوسو]

كيف حالك اخت الحب الحزين

انشاء الله مشكلت لها حل بس انتي طولي با لك عليهم وتبين نصيحتي لالالاتشتكين لزوجك لانه مهما صار هم اهله يعني حطي نفسك مكانه وكل يوم يجيك ويقولك امك سوت اختك فعلت ابوك قال

اول يوم بتراضينه وثاني يوم بتقولين له معليش مهما كان اهلى تحملهم علشاني وثالث يوم ورابع يوم اكيد بتملين

فا اكيد هو يشوف انه ما يكبر الموضوع علشان مايعطيه اكبر من حجمه من وجهت نضره ((اعتقد))

فا انتي اصبري وحاولي انك ماتحتكين معاهم كثير حاول تحببينهم فيك من جهت كلامك مزحك معهم مساعتك لهم في وقت الحاجه ولاتنسين ام زوجك وخواته من الهدايا لانها مهما كان في مشاكل صدقيني راح تخليهم يتقبلونك
وحاولي ان تكونين مرحه معهم بقدر المستطاع بس ((موعلىحساب كرامتك))

وقولي لزوجك انا راح انسي ماسوه فيني بس علشانك وامك مهما سوت يكفي انها جابتك لدنيا بعد الله هذا بحد ذاته يخليني احطها على راسي من فوق ويارب يخليك لي ولهم ومن هذا الكلام ;)

وابدي بصفحه جديده معاهم صدقيني ماراح تندمي بس اهم شى اوصيك فيه انك ما تكثيرين الشكوى على وزجك لانك ماتتصورين قدايش المشاكل وكثره الشكوى تقتل الحب

وانشاء الله اكون حاولت اخفف عنك لو الشي البسيط

[الحب الحزين]

الله ايخليج للي يحبك يا سوسو


والله انك بردتي قلبي بردك علي وفرحتيني كثير بس يالحبيبه انا اعمل تقريبا كل الي قلتي عليه وعلى العكس انا احب عمتي وايد وهو يعرف هذا الشي المشكله الكبيره هي الخوات هم سبب المشاكل :confused:

والشكله الاكبر انه لما نكون جالسين مع بعض يقعدو يقولوا ليش ما تتزوج وحده ثانيه يعني بنت خالنا (فلانه) كثير حلوه وحبوبه كمان ترقص حلو وبتعرف تطبخ حلو ولا ليش ما تاخذ بنت عمنا (فلانه ) ويبدو يتمدحو فيهم فأنتو اتخيلو شو ممكن اعمل انا ويحاولو يتمدحو بالبنات جدام اخوهم على بالهم انا ما فيني غيره لالاوالله اني اموت من القهر لكني ما اقدر ارد لانه بيقولي هم يمزحون ليش انتي حساسه اقوله كيف ما اكون حساسه وهم يذكرون مفاتن البنات كلها جدامك ..وانا قلتلهم لا تقولون جدام زوجي هالحكي :mad: ايقولو نحنا متعودين على هالكلام :confused:

فما ادري اذا عندكم اي اضافه او مساعده تفيدني

[الرمانه]

هلا ......اختي
انت ماعليك منهم خليهم يتكلمون الين يشبعون كنك ماتسمعينهم
اصفطيهم وحقريهم الحقران يقطع المصران....... هذا اولاً...
ثانياً: انت ابتسمي اذا قالوا هالكلام وناقشيهم بالمزح اذا سولفوا .
ثالث شيء:نفذي كلام سوسو كله صح بصح انا اايدها .
على معلومك ترى كل الناس كذا يتكلمون بعدين يطفشون يزهقون اذا شافوكي اخواته ساكته وصافطتهم بعدين بعد فترة ماراح يتكلمون خليهم على راحتهم وانت ماعليك منهم اخذي راحتك بعد مع زوجك اهم شيء انك راضيه عنه وهو راضي عنك ولا بينكم مشاكل
اوكي
من اختك الرهيبة.

[سوسو]

الله يسعدك يا الحب الحزين

ليش انتي لهذىالدراجه متحطمه وتبين توصلينها لاهلك خطا انا ما ائيدك على ان تروحين عند اهلك وبعدين هذى اول مشكله تواجهك المروض تتحملين شوي وبعدين احمدي ربك انك مو عايشه معاهم ولاكان :confused: الله يصبرك

وبعدين زي ما قالت الرمانه خليها على شكل مزح لاتاخذين الامور بجديه ولا تحسسين زوجك انك غيرانه حسسيه انك واثقه بنفسك وبجمالك ترى هذا الشى جدا مهم مهم مهم بثلاث

وبعدين يا حلوه انتي عررررروس يعني اتهني مستحيل زوجك يفكرفي غيرك على الاقل في الوقت الحالى

انتي فى احلى ايام عمرك تهنى تهنى بدري عليك هذي المشاكل صدقيني

[الحب الحزين]

اختي الرمانه ما قصرتي سويتيلي سالفه ودخلتي موضوعي وكتبتيلي والله اني ما اعرف كيف اشكرج انتي والاخت سوسو :o

وانا اسفه اتاخرت بالرد لانا كنا نا زلين عند الاهل (اهل زوجي ) ابصراحه سويت مثل ما قلتو لي كانو كل ما يتكلمو اطنش كأ ني ما اسمع شي
وهم يقرقرون ومع هذا كله كنت اقولهم اذا عا وزين تروحو مكان قولو عشان نوصلكم (على فكره اخوانهم الثانين ما يودونهم مكان وقتهم كله لزوجاتهم ) وهم يقولو لا ما بدنا شي ..
المهم انا كنت عامله نفسي اني ما مهتمه بالكلام وكنت ابتسم لهم كل ما يقولو شي حتى لما يقولو حق زوجي اعمل كذه ( قصدهم يغيضوني )
انا كنت اايد كلامهم وقول لزوجي فكره حلوه ليش ما تعمل مثل ما بيقولو حتى لو قالو راح نزوجك وحده من اهلنا انا كنت اقوله اوكي شي حلو ليش ما تاخذ وحده من اهللك وهم يشوفوني وهم مستغربين يقولولي انتي عم تطنزين على كلامنا اقولهم لا ابدا ;)

بس بيني وبينكم انا كنت اموت من القهر ما تتصورون كيف كنت امسك عمري عن الصياح وما اصدق ادش الغرفه واذبح عمري من الصياح :confused: وطول الليل وانا افكر بالمشكله الى انا حطيت نفسي فيها واني اخذت واحد مب من اهلي :confused:
اتصدقون هاليومين الي نروح عندهم كانو سنتين بس الحمد لله الله ايهون علينا كل شي
والله يا اخت سوسو (l) ورمانه(l) انكم الحمد لله سا عدتوني كثير جزاكم الله الف خير

[انا الحلوه]

السلام عليكم
مرحبا الغاليه الحب الحزين

ان شاء الله تقدرين اتحلين مشكلتج وترتاحين

ابصراحه انا اول مره ادش هالقسم مع ان خوات ريلي امخبريني عن القضاياو الحلول بس انا توني شايفه هالقسم
على العموم انرد لموضوعنا
الحب الحزين الكلام الي قالوه الخوات كله عين العقل وقد ما تقدرين طنشي ;)
ادري ان الي اتمرين فيه وايد صعب بس حاولي اتأقلمين عمرج وان شاء الله اتردين وتكتبين لنا ان كل شي اتغير وحياتج صارت سمن على عسل ااااااامين يارب
الهم يالحب الحزين يمكن هم ايعاملونج جذه لانهم كانو حاطين في بالهم ان اخوهم بياخذ وحده من اهلهم فعشان جذه هم ايطفرونج بس انتي ما عليج من هالحركات كلها وحاولي انج تتقربين منهم وتحبينهم صدقيني بالكلام الزين والمعامله الزينه كل حد يتغير
وانا بقولج عن تجربتي ...
انا لما خذت ريلي عن حب مرينا فالبدايه بمشاكل وايده من الصوبين لانهم ما كانو اموافقين على هالزواج :s
لكن والحمد لله عقب ما شافو اني انا اوكي وياهم صاروو ايحبوني حتى روحهم ايقولون انهم كانو ماخذين فكره ثانيه عني ..
ابصراحه علاقتنا صارت قويه وي بعض وسوالفنا حلوه حتى اني عادي انا اامنهم على سري وهم بعد فحاولي انتي انج تتقربين منهم عقب بتقولين هي والله اهل ريلي وايد طيبين ;)
وبصراحه انا صرت متعوده عليهم وايد حتى اذا صادف انا في اسبوع من الاسابيع ما بننزل احس بالملل وابغي اسير البلاد عشان ايلس وياهم ونسولف (انا على هالمديح بخليهم ايدشون هالموضوع ويقرون انا شو كاتبه عنهم )
بس بيني وبينكم اهل ريلي الحمد لله وايد طيبين بس ما ادري عاد جان اهل ريلج مثل اهل ريلي
وشوفي يالحب الحزين
اهم شي ما أتخبرين ريلج عن اي شي ايصير بينج وبين خواته يوم تيلسين مع ريلج انسي كل الكلام الي دار بينج وبين خواته ..
لاني انا جذه اسوي ما اخبره اي شي ايدور بيني وبين اهله الا سوالف ضحك او نكت او اذا مرينا بموقف حلو اخبره

اسمحيلي عاد الكلام كله املخبط فوق وتحت بس كنت ابغي احل وياج المشكله
واذا احتجتي اي شي احنا حاضرين مثلا ،، جان تبينا اني نضارب وي اهل ريلج نحنا فالخدمه بيب وياي سوسو ورمانه عشان اندافع عنج :mad:

[الام الحنون]

الحب الحزين هلا عيوني ان دخلت متاخر لكن شكلي مالي مكان وسط ها الكم الهائل من الحلو من الاخت العبقريه سوسو وان الحلوة الى فعلاً تستندين عليها وقت الحاجه ...;) تراها ما تقصر :mad:
واوصيك بالصبر والثقة باالنفس .. وخلى عنك السأس والحزن واعطى المشكلة اكبر من حجمها ... واهم شيء خليك مرحة وضاربة طناش ولاتكونين حساسه ابد .. وسامحي وانسي الاساءة ..وراح تشوفين اشلون يصيرون .. لان المشكلة عندك خواته وليس امه انكانهم ممتزوجات .. راح يتزوجون ويشفون بعدين اشلون القهر من اهل زوجهم وينفكون عنك شوي .. وان كان متزوجات لاتخافين يجي يوم وبيملون وينشغلون بمشاكلهم ....وباين عليهم مدلالات من قبل اهلهم وشكلهم ثنتين وسط كم هائل من الاولاد لذلك الواحد يراعيهم من قبل الاخوة وشكله كذا زوجك حان على اخواته احتوال انهم ليس لديهم اب وهو شايل مسؤليتهم ..
اذا كان كذلك أعينيه وصبريه على تحمل المسؤليهواسعديه واشغلي تفكيره ..ودائم قولى له ان اتحمل كل شيء بس انت تكون راضي عني ومايهمني احد الا امي وامك وبس .......

[الحب الحزين]

انا الحلوه
كلامك والله مثل العسل وانتي احلى يا عسل :p

ابصراحه انا ماني عارفه كيف اشكرك على التشجيع وعلى المساعده
وبصراحه شوقتيني ان حياتي تكون جميله مع اهل زوجي :mad:
بس ياريت اهمه ايعاملوني بطريقه حلوه لاني انا زينه كثير معاهم بس الكلام الي قلتوه كله صح هم يحاولون ايغيضوني وان شاء الله يتغيرون للاحسن عشان احس بالراحه
بس اتمنى انكم تدعولي انو الله ايفرج همي

انا الحلوه والله اني احتاج كل بنات المنتدي انهم يجو ويضاربو معاهم
بس خليها على ربنا


الام الحنون
اشكرك كثير على مداخلتك انتو فعلا طيبتو خاطري والبنات كلهم ما قصرو وفعلا انا الحلوه ما اتقصر لانو انا شفت ردودها ومثل ما انتي بتقولي انها ما بتقصر وايضا الاخت سوسو ورمانه كثير سا عدوني

[الدلوعة دلال]

الله يعيييييييينج
بصراحة اهل ريلج شكلهم كانو يبون ولدهم ياخذ وحدة من اهلهم
واكثر شي يقهرهم انهم يشوفونج سعيدة مع ريلج;)
ويمكن شافوج من الاول ما تردين على تعليقاتهم فخذو عليج
نصيحتي لا تزعلينهم منج وبنفس الوقت فهميهم انج قادرة تردين عليهم يعني بشوية دبلوماسية وذكاء وخبرة مع الوقت بتعرفين كيف تتصرفين
بس لا تسوين شي يزعل ريلج منج
لان هذا هو هدفهم


والتطنيش وسيلة زينة والاستهبال بعد اوكي
والله يعينج

[شمس البحرين]

السلام عليكم ورحمة الله وبركاته
تحملي ولا تيأسي اختي الحب الحزين انزين طلعو في بيت لوحدكم عشان تبتعدين عن مشاكلهم ولا تضايقين امامهم بل خلهم يشعرون لا ن ما يهمك شي الا زوجك وبدلك تقهريهم وتخليهم يسكتون وادا عندهم اولاد اكيد بينشغولون بأعبائهم وتربيتهم وبينسونك

[الحب الحزين]

الدلوعه دلال ابصراحه كلامك صح وانا راح احاول ابينلهم اني اعرف ارد على حكيهم البايخ



شمس البحرين انا ماني ساكنه معهم على العكس انا ساكنه في منطقه بعيده عنهم لاكن من الاربعاء لحد الجمعه انا بكون متواجده معهم وعلى فكره مشاكلي انا وزوجي ما تجي الا خلال الايام ياي نحنا بنكون عندون
والمشكله الثانيه انهم مانهن مزوجين يعني امفرغين حالهن النا

[dream one night]

اختي الحب الحزين يوووم انتي متزوجة الانساان الي تحبينه اظن كل المشااكل على شاانه تهوون ترى ما في اجمل من الحب خاااصتا اذا توج بالزوااج والله يسعدك

[المغتربه4622]

هلا اختي الحب الحزين

مشكلتك تذكرني بمشكلت اختي نفس المشكله مع انها تحترمهم بس الله يهدي.. وكانت تعاني كثير من اخوات زوجها وخصوصا الكبيره ونفس الشي ايحبون يغضونها ويقولون لها اننا بنزوجه وحده قريبتنا(قمة القهر) بس اختي ماكانت ترد عليهم وكانت تاخذ كلامهم من باب المزاح وبالاخير صارت تمازحهم اذا ذكرو لها هالسالفه طبعا اهم ينقهرون..
لم تفعل شي سوى انها وكلت امرها لله تعالى واكثرت من الصلاه والدعاء وقراءة القران وكانت تصبر عليهم وعلى تصرفاتهم ..تصدقين ان اخت زوجها الكبيره متزوجه الحين وانها تعاني من نفس المشكله!!!

ان الله يمهل ولا يهمل

وكلي امرك لله اختي وكان الله في عونك.. ومثل ماوصوك الاخوات لا تاخذي الامور بمحمل الجد وخذيهم على قد عقلهم.. ولا تخلين تصرفاتهم تاثر على علاقتك بزوجك.. وماتصارحيه بشئ لانه مهما كان هذولا اهله وعاش معهم سنوات عمره واكيد يعتبرهم مثله ويحبهم فمن الطبيعي انه مايتقبل الي تقوليه عنهم حتى ولو انك صادقه..
احتسبي الاجر اختي وان شالله الله بيكون معك ويخفف عنك..

وبعدين لا تفكرين فيهم كثير وفكري في حياتك الزوجيه وكيفية جعلها حياه سعيده;)


اختكم:
العصفور المهاجر