المساعد الشخصي الرقمي

مشاهدة النسخة كاملة : مشكلة وردتني على البريد الخاص...و أطلب رأيكم فيها...علّنا نجد لها حلا...



مرموم
21/08/2004, 10:54 AM
السلام عليكم ورحمة الله وبركاته

كيف حالكم يا جماعة...إن شاء الله بخير يا رب ؟

هذه المشكلة وردتني على الخاص...و طلبت منّي صاحبتها نشرها لكم...لعلي أجد عندكم الحل..

العضوة كتبت لي مشكلة بنت عمها...و هي كالآتي...

" المشكلة مشكلة بنت عمي وهي أصغر مني تقريبا بسنتين من أيام كان عمرها يمكن 12 أو 13 ما أعرف بالظبط بس من أيام كانت بإعدادي كانت تعرف شاب وحبته وأنكشفت جدام أهلها وجدامنا طبعا ليش أنا أحنا يعني أنا وأخواتي مقربات منها كثير أنسبت وأنشتمت وانظربت ظرب عينها وبالفعل تابت وأعتذرت على أنها ما تعود له مره ثانية والأهل ما كانو عارفين من هو الشاب اللي كانت تكلمه .

المهم بعد مرور السنوات ولمن خلصت الثانوية وأدخلت بالكلية تقدم لها نفس الشاب وخطبها من أهلها مع العلم يمكن أنهم كانو يتبعو أخبار بعضهم البعض عن طريق أخت الشاب بس بنت عمي تحلف انها ما كانت تكلمه من هذاك الوقت اللي انكشفت فيه وبنت عمي تعرف انه كان معاه علاقات بعد من بنات ثانيات بس من جى وخطبها حست أن الدنيا ما واسعتنها من الفرح
واهلها اللي هو عمي وعمتي وأخوانها ما كانو عارفين أنه هو نفس الشاب اللي أنظربت وانهانت بسببة كان يمكن يتخذو موقف منها ومنه وهي كانت تخلي نفسها تتغلى يعني ترفض لمن يجي طاريه بالبيت وقت الخطوبه المهم أمها كانت تقنعها وأخوانها لحد ما وافقت .

بس الطامة الحين أنهم تزوجو وخلفت بنت عمي بنت تقريبا سنها سنتين ونص وصار لهم 3 سنوات من تزوجو بس طول هذيك السنوات على قولتها أنها ما شافت طعم الراحة ولا الفرح .

بنت عمي تخبرنا ان زوجها ما لمسها غير شهر فقط من أيام شهر العسل وبعدها مافي بينهم أي نوع من التواصل والود. وكل يوم يطردها من البيت ويقول لها لو عندك كرامه كان رحتي لبيت أهلك يعني هايننها كثير وكارهنها لدرجه ما تنوصف لدرجه أنه يشتمها ويقول لها انا أشوفك مثل البومه ولو عندك كرامه كان رحتي لبيت أهلك هذا غير أنه أبدا ما يكلمها خلال هذيك السنوات الثلاث يعني مافي بينهم غير جيب كذا وهات كذا للبيت وبس هذا حتى لما يطلع مكان ويظطر يشيلها معاه بحكم ان اخته وأخوه معاهم بنفس البيت لما بيطلب شي ولا يريد يسألهم عن ايش يريدو بيسأل أخته والزوجه ما معطاية وجه هذا حتى لما يريد يطلع بنته بيخبر أخته أن فلانه معاي .

وأكتشفت بعد انه يكلم بنات كثير ويكلمهن بأمور الواحد يستحي يقوله.. وخذت بعض من هذي الأرقام وحاولنا أحنا نساعدها وعرفنا وحده منهن وكلمناها وطلعت من هذول البنات اللي أستغفر الله منهن وتعرفي أختي مرموم شو ردت على بنت عمي قالت لها لمي زوجك زوجك ما مخلي وحده بحاله هذا حتى العجوز يغازلها . المهم بنت عمي صبرت وأحتسبت عشان خاطر بنتها الصغيرة تخيلي من أيام كانت عروس بشهر عسلها وزوجها يكلم بنات .

وأعتقد والله اعلم انه ما يجي لزوجته لأنه شبعان من برا وبنت عمي جميلة وكثير مهتمه بشكلها لدرجه فوق العاده يعني أهتمامه بنفسها وخاصه أنها تحبة وباقيه على العشرة يعني مستحملتنه ومستحمله أشياء كثيرة منه ومن أخته بس بعد أخته بربها يعني يوم كذا ويوم كذا


اللي ألحين أحنا مستغربينه أن كيف هذاك الحب اللي بينهم ينقلب كذا ؟؟؟ لكره شديد ؟؟ والله أنها مضيعه علينا فرحتنا لأن الواحد يصعب عليه مثل هذي الحالاات وخاصة انه بينهم بنت صغيرة ؟؟

فشو نصيحتك أختي لبنت عمي تبقى معاه وتستحمل او انها تطلب الطلاق مع العلم أنه يهينها لأنه ما يبيها بس يريد الكلمة تطلع منها بس هي مستحمله عشان الطفلة. "

بانتظار آراءكم و حلولكم و دعواتكم يا بنات...

nodoo
21/08/2004, 11:38 AM
والله يا أختى عورتي قلبي وتشقق عليها ، الله يصبرها من قلبببببببب
عفي على أعصابها انها ما جنت الى الحين لكن انا انصحها تحتسب امرها حق الله سبحانه وتعالى وتشتكي له ، محد يقدر يساعدها غير الله سبحانه وتعالى ، ولازم تفكر بالبنت ، خليها تكلمه مرة ومرتين تشوف ليه يعاملها كذه بس لا تجيب سيرة الطلاق ، يمكن يحن قلبه عليها وتشوف اذا هو بايعها بس خلها تنفصل على رايي ، مع العلم اعرف هذا القرار صعععععب جدا جداً وخصوصاً هي عندها بنت ، خلها تقرأ عليه سورة البقر ة وتصلي قيام الليل وانشاءالله يفك كربتها يالله يا كريم ، وخلها تقرأ عليه أيات فك السحر يجوز مسويين له عمل ، وخلها تغير من لون شعرها ولبسها تلبس له مثل باقي البنات اللي يلبسون له في الشارع والمقاهي ، الله يعزكم والله يهديه انشاءالله ويعمى عينه عن هالبنات ويفتح يفتح يفتح عينه على زوجته وبنته يارب.

rawdh aljenan
21/08/2004, 11:54 AM
بسم الله الرحيم

أعتقد هي لما حبته وكان عمرها 13 سنة كانت صغيرة وااجد, ما اعتقد انها فكرت فيه زين بعقلها وهي في هالسن الصغير, لكن بعد كم سنة وعقب ما كبرت وبما أنها ما تواصلت وياه في الكلام أكيد هالشاب تغير وتغيرت نظرته للحياة , كان لازم تخبر أهلها بالحقيفة بعد..

المهم , أنصحها ما تطلب الطلاق بهالسرعه, وتصبر ترى مصيره بيعرف الفرق بين كلمة زوجة وبين بنات صايعات, ومصيره بيعرف ان سعادته مع زوجته وبنته أهم من لعبه ويا البنات, وادعوا الى الله ان يهديه ويهدي أمثاله.

وعلى خير ان شاء الله

سحابة صيف عابرة
21/08/2004, 12:14 PM
[ALIGN=RIGHT] السلام عليكم ورحمة الله وبركاته
قرأت القصة ..
ولقيت بعض الاشياء الاساسية المهمة...
أول شيء هي عندها طفلة منه..وثاني شيء هي تحبة
لذلك ..مالها حل إلا انها تصلح زوجها وتغيرة
لان زوجها الحين مثل المدمن ...تعود على هذا الشيء من وهو صغير وما يقدر يتخلى عنه..علشان كذا..لازم تمشي معاه خطوة خطوة..وانا واثقة
انه راح يتغير..بما انه فيه بينهم بذرة حب..وبما ان حبه لها كامن في نفسه من ايام المراهقة..بدليل انه ما قدر يتخلى عنها وتقدم لها وتزوجها
لكن مثل ما قلتي يا اختي ..هو شبعان من كثر الطلعات مع البنات ..
وهذه مشكلته
وهذا موقع للمختصين في البرمجة العصبية ..تقدر من خلال
متابعة المتخصين لها ان تغيرة وتغير سلوكياته
هذا هو الموقع

http://go.3roos.com/MUY5Zx93eO2

واتمنى لها كل التوفيق ان شاء الله
أختكم/سحابة

محبة الحياة
21/08/2004, 07:50 PM
ويقول لها انا أشوفك مثل البومه

هذي الجملة شدتني جدا ..

يشوفها مثل البومة؟!؟!

الموضوع إذا فيه ...























سحر ...

والله تعالى أعلم .. أو يمكن حسد .. أو عين ..

خذي هذي النصيحة لبنت عمك .. وخليها تبدا فيها على طووووول ..

سورة البقرة .. سماع وقراءة يوميا ..

وأرجوك اسمعي سلسلة قلوب مأسورة للشيخ خالد الجبير .. من هذا الموقع www.islamway.com

خاصة الشريط الأخير واللي قبله .. وسمعيها إياه وخليها تطبق اللي فيه ..

والله يصلح ما بينهم يا رب ..

محبة الحياة
21/08/2004, 07:50 PM
هذا رابط المحاضرات ..

http://go.3roos.com/lVC2XjpN4G6

أو اشتريها لها من التسجيلات ..

سحابة صيف عابرة
21/08/2004, 11:05 PM
لالالالا أبدا ياأختي الموضوع ما فيه لا سحر ولا شيء

كل ما في الأمر ..ان الرجال طاقة كبده من كثر ما يروح مع البنات
فيجي البيت على آخر نفس .. فتكون كبده لايعه
فما يكون له خلق يشوف بعد اكثر من اللي شاف..
فهو يقول لها كذا....
ومثل ما قالت اختي محبة الحياة ...حاولي دائما تشغلي القرآن في البيت
بس هي تكثر من تشغيل القرآن في البيت
يمكن الله يهدي باله ويريح نفسه...ويخاف ربة فيها
وتشيل فكرة السحر من راسها..لان والله راح تدخل في متاهات
لها اول ما لها آخر...وراح تتوهق مع ناس نصابين ومشعوذين وناس ما تخاف الله...وأنا متاكده انه مشكلته مثل اللي قلت لكم...
بس هي خل تقعد وتتكلم مع واحد تثق فيه..مثلا اخوها اللي اكبر منها ..ولا خالها ولا عمها..المهم ان يكون واحد يتفهم ضروفها ويسمع لها
ويكون رجل متفهم وواعي...يقعد معاه ويصاحبة لحد ما يرده عن طريق الحرام...ومثل ما قلت لك يا اختي انتي حاولي معاه خطوة خطوة..والموقع اللي حطيته لك راح يفيدك ان شا ءالله
وندعو من الله يهديه ويبعده عن طريق الحرام

وبالتوفيق ا نشاء الله
:smile:

مرموم
22/08/2004, 07:25 AM
السلام عليكم ورحمة الله وبركاته

أشكر لكم تفاعلكم يا بنات...جزاكم الله خيرا...

و أتمنى أن أرى مزيدا من التفاعل...لنخدم أختنا السائلة...

:smile:

عيون السهد
22/08/2004, 08:18 AM
مرحبا

يا ويلي تخيلت نفسي بمكانها .. ماشا الله عليها صابرة ومحتسبة لو أنا مكانها ما بقدر أكمل معاه ست شهور على بعض :down:

هذا الإنسان عينه فارغة وما يملاها إلا التراب والحرام .. والشيطان ما قصر فيه ولعب فيه لعب ونساه الحلال ..

أول شهر من الزواج لمسها بس؟؟ :confused: .. يعني كان يعتبرها شي جديد يلعب فيها شهر ويتركها ويدور على غيرها شهر والثانية شهر والثالثة شهر والظاهر إنه اللي يلعب معاها شهر يتركها بدون رجعة .. حياته كلها شهور عسل .. طيب ليش تزوج هذا اللي حارق قلبي!! ليش يلعب ببنت الناس ويدمر حياتها وحياة طفلتها؟؟ .. وين أهلها ما سألوا عليه قبل الزواج واتطمنوا على سلوكه .. على العموم كل شي نصيب ..

ورأيي هو مادام إنها قدرت تتحمل للحين وبعدها تحبه وصابرة عليه عشان بنته خلها تحتسب عند رب العالمين وتكمل المشوار وربي ما يضيع تعبها وصبرها ويمكن تنقلب حاله ويصير هالزوج المستهتر الأناني من أفضل الناس نتيجة صبرها ورحمة رب العالمين ..

وبما إنه ما يلمسها أنا أقول يمكن يكون هالشي أفضلها لأنه يمكن يلقط له مرض من هنا او هناك وهو في الحرام يعدي منه زوجته وتتحسر بعدها .. وإن شا الله ربي يهديه ويرجع لها بكامل صحته ويكون لها نعم الزوج :up:

أهم شي إنها ما تيأس من رحمة الله وتستجير من هالعذاب بالدعاء لله بأنه ينزل عليها رحمته ويرجع لها زوجها بعد توبة نصوحة .. وأنا ما أعتقد إن هالزوج بيسمع من حرمته كلمة حتى لو حاولت تكلمه وتهديه لطريق الصواب لأنه أصلا مب طايقها ولا طايق يشوف ويهها .. فمالها غير اللجوء لله الواحد القادر على كل شي وتتمسك بتعالميه وتنتبه على نفسها أكثر لأن الحرمان بهذا الشكل ممكن يخليها تدور على العطف والحنان خارج أحضان زوجها .. الله يصلح أحوالها ويهدي لها زوجها يا رب.

أما الطلاق فالظاهر الريال يريدها هي اللي تطلبه لأن هالشي بيعطيه الحق إنها ما تطالب بحقوقها بعد الطلاق من مؤخر ونفقة وهذا الأمور القضائية الله يجيرنا ويبعد كل بنات المسلمين عنها ..

أنا أعتذر للإطالة لكن هالحرمة غمضتني وحزنت عليها وايد .. الله يرحمها ويرحمنا برحمته

KiM
22/08/2004, 10:56 AM
أنا أعتبر كل رد على مشكله يجب أن لا يكون عشوائياً

ويجب فيه تحكيم الضمير لأنه يحمل نوع من المسئولية

رغم أنه مجرد تقديم للرأي وليس فرضه على صاحب المشكلة

للذلك أحاول الإبتعاد عن أبدأ رأيي عادةً

حتى لا أحمل نفسي ثقل الشعور بالمسئولية


ولكن في هذه المشكلة زاد التأثر في نفسي

بسبب وجود طفلة بين ثنايا هذه المشكلة

لو كان هنالك بصيص أمل في صلاح هذا الزوج

لناشدت صاحبتها بالصبر والدعاء وأحتساب أمرها عند الله

ولكن هل تستطيعين أيتها الزوجة المهضوم حقها

أن توفري جواً هادئاً يعم حياة هذه الطفلة

في أثناء تواجدكم مع بعضكم البعض؟؟!!

أقصد هل خلافاتكم تكون على مرأي ومسمع هذه الطفلة؟؟!!

إذا كان الجواب لا

فصبري وعيشي على أمل هداية زوجك

مع مساهمتك في محاولة إصلاحه

وإذا كان اسلوب معاه طول هالفتره ما نفع

غيري أسلوبك

جربي اللين وجربي الشده وجربي المسكنه

المهم تلاقي طريقة تنفع معاه

وحاولي أنك تتجنبين أأأأأأي شي يثير غضبه

وهذي أكيد تقدرين عليها بما أنك مستحمله العيشه معاه

وعسى ربي يهديه ويعرف قيمتك

ويعرف الفرق بينك وبين أي وحده يعرفها برا البيت

أما إذا كان الجواب نعم

فما هي فائدة الصبر من أجل البنت

وهي تنمو في جو قد يسبب لها عقد نفسية

يصعب عليها التخلص منها مستقبلاً

بل وقد يصعب عليها أن تعيش حياة طبيعية

بعد أن تربت في أجواء مشحونة بالخلافات الزوجية

والإهانات بين أمها وأبيها

؟!!

نسمة الحياة
22/08/2004, 01:19 PM
أنا أقول مافي دخان بدون نار ........






يعني : أكيد أكيد في سر بالموضوع ...






لأنه من المستحيل أن يهين الزوج زوجته بدون سبب ...


يعني مو معقوله يقول لها : لو عندك كرامة كان رحتي لبيت أهلك ... ولما أشوفك كإني أشوف بومه ...

أكيد في مشكلة صارت بين الزوجين ، عشان جذي يتجرأ ويقول هذا الكلام الجارح ..
معقوله يقول مثل هذا الكلام وهي مو مسوية شي ؟؟؟؟؟ :eek2:




واذا هو مايحبها وقاعد يهينها : طيب ليش انتظرها سنين ، وتزوجها؟؟
طيب ليش جاب منها طفل؟؟؟






لا لا




أكيد في شي بالموضوع ...


خليها تراجع نفسها من أول يوم تزوجت ...وتشوف أخطائها ... يمكن تلاقي سبب المشكلة ...

صـــارع
22/08/2004, 04:17 PM
اعتقد ان لازم تروح لمصلح اجتماعي

او مستشار اسري يكون موجود في المحاكم الشرعية

وتعرض المشكلة عليه

ترا فوق الإهانة في الكلام والسب

ترا بينهم قطيعة عن الفراش مدة 3 سنوات

وهذي الفترة مقارنة بالهجر الشرعي فترة غير محتملة

حتى لو كان في حب

ريووووووف
22/08/2004, 04:28 PM
انا اشوف بيت اهلها ولا الذل والاهانه مع واحد تعود على الحرام ومستحيل

ينصلح حاله:up:

minimony
22/08/2004, 04:39 PM
بسم الله الـرحمن الرحيم

عزيزتي كاتبة الرســــــالة .........و صــــاحبة المشــــكلة

أنا مع الاخـــوات Kim & Omboz

تحــــــتاج هذه المـــرأة الي أن تجـــــلس الي نفـــــسها و تحـاسـبها حساب الملكين .
أنا أتحدث هنا عن علاقته بها ......... خاصــةً

ربــما وصـــــــــــــل الي مســــامعه عنها ما يكره

ربمـا أســـاءت اليه من بعيداو قريب

ثم بعد ذلك تجلس الي زوجهـــا ... جلســـــة طويلة و تطلب منه ان يعلمها ماذا فعلت و ماذا أخطأت بحقه
ولا تتطرق لسلوكه مع الاخرايات هذا تتركـــه لجلســة نقاش أخري
و أهـــم شئ ان تحاول ان تستمع اكثر من ان تتكلم لانه ربما أثناء حديثه سيعلمها بطريقة او أخري .... بماذا أخطأت .

و ان تقول دائما ...دائما ...دائما

حــــسبي الله و نعم الوكـــيل

و الله قادر علي ان يبعد عنهــا بنات الســـوء و يهديه الي الصراط المستقيم

وعليها بالصــــبر ثم الصبر

sicily
22/08/2004, 11:39 PM
مش كل غلط في الحياة الزوجية مسئولة عنها الزوجة ...

الله سبحانه وتعالى أجاز الطلاق لأنه أصلاح إذا تعذر الإصلاح ..

والعيشه الي عايشتنها الأخت مب عيشه يستاهلها إنسان ..

وإذا كان هذا حال الزوج فالعيشه بدونه أرحم للزوجة والبنت ..

مرموم
23/08/2004, 08:16 AM
السلام عليكم ورحمة الله وبركاته

و الله بنات مش عارفة كيف أشكركم على تفاعلكم الحلو...

العضوة اللي بعثت المشكلة لي قالت لي أشكركم جدا...و هي راح تطبع كل الردود لبنت عمها...و تقول لكم جزاكم الله كل الخير يا رب

:smile:

nodoo
23/08/2004, 08:25 AM
أختى الغالية ريووووووف بالعكس وايضاً كلام البنات اللي يطلبون منها الطلاق ، عزيزاتي الطلاق شي مش سهل ، اذا هي تحبه تعتقدون بتستطيع تعيش من غيره بعد الطلاق بالعكس والله انها راح تجن من فراقه وخصوصاً هي تعرف بخيانته ساكته وبالعة ، وبعدين ما في شي بعيد من الله ...... الله سبحانه وتعالى يغير الحال ألى الأحسن والله بس هي عليها تتوكل على الله ، مرده انشاءالله وبإذن الواحد الأحد راح يفتح عينه عليها ويندمممممم ندم شديد ، لا تفتحون عينها على موضوع الطلاق يا بنات هي عندها بنت صغيرة ، صدقوني انشاءالله هالبنت راح تكبر وتتكلم وتغير أبوها الحال ما راح يبقى كما هو ، واتمنى انكم تحثونها على الصبر لأن الزوجة وخصوصاً انها (ام ) لازم تصبر على زوجها مهما كان ، كفايه اسمه على راسها وراس بنتها ، لو افترضنا لا سمح الله تطلقت وما حصلت نصيب بعدين من بيقى لها بالدنيا ، طبعاً الله يعطى امها وابوها الصحة والعافية ويخليهم بس هي الدنيا الكل مشغول راح يوقفو معاها يمكن شهر شهرين بعدين راح كل واحد ينشغل بحياته ، هي لازم تحط هدف بحياتها وانشاءالله تحققه ، انها راح تغير هالزوج وترجعه للبيت ، وصدقينى ان الله راح يضربه ضربه قاضية اذا هو ما تاب راح ياخذ حقك منه(((( تره عزيزتي الله ما ينسى عبده ابداً يشوف كيف اهيها مذلولة منهانة فراح يعطيها انشاءالله الأحسن
وآسفة للإطالة بس ارجوك يا مرموم ساعديها تتخطى هالمرحلة الصعبة الكل مر بها وانا واحدة منهم اعتقد قرأتي موضوعي وساعدتيني كثير كثير بس علينا بالصبر والحكمة.

مرموم
23/08/2004, 10:04 AM
السلام عليكم ورحمة الله وبركاته

أشكرك أختي nodoo على كلامك...

بالإشارة إلى موضوعك الموجود على هذا الرابط...

الموضوع من هنا (http://www.3roos.com/forums/showthread.php?threadid=82257)

أتمنى أختي تقولي لنا النصائح اللي اتبعتيها...و كيف استطعتي تحلي هذه المشكلة ؟

lura
23/08/2004, 10:35 AM
:eek2::eek2::eek2::eek2:


:pain::pain::pain::pain: