المساعد الشخصي الرقمي

مشاهدة النسخة كاملة : دوامي بيرسلوني دورة لمدة اسبوع....



بدرووووووووووه
24/07/2004, 11:49 PM
السلام عليكم ورحمة الله وبركاته

يا بنات انا بدخل للموضوع مباشرة في الدوام من كم يوم ترشحت لدورة في دبي لمدة اسبوع وموعدها في رمضان وبصراحة رفضتها لان الوقت ما يسمح وثانيا انا بخاطري اروح عمرة وبما اني مو متزوجة لحد الحين يعني لازم اكسر خاطر اهلي وخواني يمكن يودوني عمرة ويمكن لأ

هذي مو المشكلة

المشكلة ان الدوام اليوم سألوني مرة ثانية تبين تروحين لان الموعد تغير وانتي المرشحة الاقوي انا قلت لهم اشاور ابوي بالاول عاد انا توقعت انه بيرفض على اساس ان ما عندي احد يروح معاي اخواني ما يقدرون الا بشور حريمهم ....

الله يرزقني بالزوج الصالح اللي يغنيني عن الحاجة لحد

المهم لما قلت لابوي قال لي كيفك اذا الدورة مهمة انا ما اقدر امنعك عنها بس انا ما اقدر اروح معاك ( ابوي توه مسوي عملية بعيونه ولحد الحين متضايق منها) ولا عندي احد يروح معاي

المهم انا سكت ولما صار الليل قعدت افكر بالسالفة اشلون بروح ابروحي واقعد بالفندق بروحي واروح الدورة صبح وعصر وارجع للفندق بروحي لمدة اسبوع

المشكلة ان الدورة هذي لها علاقة بترشيحي لمنصب اعلي وما ادري شسوي ؟؟؟

اولا خايفة اروح بروحي لاني ولامرة سافرت بروحي صحيح اني قادرة ادبر نفسي بس هم السفر بدون محرم وبروحي احسها صعبة

صديقاتي يقولون روحي استانسي وتسوقي وتعالي كلها اسبوع بس انا مترددة وصليت استخارة ان ربي ينور لي دربي وييسر لي امري وبخاطري تشورون علي شسوي اروح اسبوع وارجع عادي واخ المنصب الاعلي
ولا
اقعد بالديرة وغيري اللي اقل مني ياخذها

ام ميرال
25/07/2004, 12:20 AM
الله يوفقك عزيزتي لما يحب ويرضى اهم شي انك استشرتي واستخرتي


شوفي هي الدورة اذا على قولتك بتفيدك روحي لها واسبوع منها تستفيدين وتغيرين جو العمل والروتين وترجعين بروح جديدة

بس اتوقع لو كان وحدة معك مثل يا اما زميلتك بالشغل عشان تروحين وتجين انتي وياها يكون افضل من ان تروحين لوحدك خصوصا انها اول مره

شوفي احد زميلاتك بالعمل اذا الدورة مشتركه او اختك خالتك احد مقرب لك يعين ويعاون وصدقيني هي اول مره بس بتحسين بالمسؤوليه وبتتوهقين ببعض المواقف بس راح تصير من الذكريات الحلوه والتجارب بحياتك

اذا اهلك مو رافضين توكلي على الله وروحي

واذا تبين اروح معك ماعندي مانع بس قولي لي متى:D2

الله يسهل امرك اختي وخبرينا شو بيصير معك


ام ميرال

بدرووووووووووه
25/07/2004, 12:37 AM
حبيبتي ام ميرال

انا ودي اروح ومعاي بنات من الدوام بس كل وحدة معاها اهلها واصلا العلاقة بينا لك عليها اشوي من زمان والحين زادت علشان المنصب اللي الكل يبيه وانا المرشحة الاولي له بس اذا لقوا علي سالفة اكيد بتصير حرب لها اول مالها اخر ... وتبين الصج ودي اروح واغير جو بس بروحي اخاف هذا غير ان ما معاي محرم تعودت اسافر مع ابوي هو اللي يسوي كل اوراق السفر والحجوزات وكل شيء بس اذا صرت بروحي بخاف :s2عموما انا استخرت واللي ربنا كاتبه ان شاء الله يصير انا ماو دي اروح هناك واتوهق لاني بسأل فلان وعلان وتدرين الناس اجناس ما تدرين اللي بيساعدك ولا بيقص عليك واخاف احد يتلزق فيني وابتلش جدام زميلاتي لاني بصراحة ما اعطيهم ويه من عقب سالفة صارت لي العام وكارهتهم من هذيك السنة والحين اللي صاير لنا منافسة على هالمنصب


ما ادري شسوي :pain:

الورد_الأحمر
25/07/2004, 01:04 AM
بس جذه
دبي !
افا عليج في الخدمه نحطج بعيونا تأمرين أمر والله :smile: بتنور دبي اصلا

انا من رايي اتودين وياج مرافق دوري حد جريب منج عشان يونسج خصه اذا هاي اول مره لج تسافرين يعني دوري حد دوري عدل الا هي مده بسيطه يمكن اتحصلين والسالفه فيها مستقبل مهني باهر والله لا اتضعين الفرصه عشان لا تندمين بعدين وزين سويتي يوم استخرتي احسن حل وخير ان شاء الله




لو منج ها رأيي خاص يعني

ما اتردد وبروح على اجرب طياره وما بضيع فرصه ترييتها طوول عمري عشان لا اندم اشوف غيري مش كفىء يأخذها بس بعد بفكر وبفكر
والله بيني وبينج لو يلسنا عالاخوان ما بنوصل لمكان لنه اخوانج نفس اخواني شورهم عند حريمي واغلب الرياييل هالايام جذه ونادر جدا اتحصلين العكس :cool2:

وتعودنا انسوي امورنا ارواحنا :cool2: فلا تخلين ضميرج يأنبج
لنه تبين محرم وياج لنج ما بتسوين شي يعني من وين نييب ؟؟ :eek2: اعتقد اتكفي الصحبه الطيبه على ما اظن هالظرف متشابهين انا وانتي
يعني ها اذا على سالفة المحرم


بس بعد لا تستعيلين على هونج

وسلامتج :smile:

ام ميرال
25/07/2004, 01:14 AM
طيب وحده من خالاتك خواتك

احد محرم لك ممكن تاخذينه معك يجسرك وتشاورينه وتتكلمين معاه باطريق

مذهلة البحرين
25/07/2004, 08:02 AM
اخ

صج لين قالوا ((يدي الحلق للي بلا ودان)):rolleyes:

اسبوع ودبي وخايفه وعاملتها مشكله ليه.........!!!!!!!!!!:o

روحي وثبتي روحك وقوي شخصيتك.

وإذا انتي خايفه من حضور دوره لمده اسبوع لا ووين في دبي ..عجل اشلون بتديرين منصب....؟؟؟؟؟؟؟؟؟:pain:

ام ربى
25/07/2004, 08:26 AM
طيب وين امك.......روحي ياعمري واستانسي ولا تخلين في بالك شي

خلي واحد من اهلك يخلصلك اوراق السفر والحجز...وبعد كذا سافري

بامان الله ياعمري .....ولا تقلقين من ناحية المحرم.....خليني قدوتك

ثلاث سنوات بغربة دبرت نفسي ولا احوجت نفسي لاحد........

لا تضيعين الفرصة اللي ما تجي الا مره واحده..ومنها اضربي عصفورين

بحجر "عمل وسياحة"

الله يوفقك

kholoud_sa
25/07/2004, 09:25 AM
خذي حد من عيال اخوانك او خواتج

او من بنات جماعتج

niraan
25/07/2004, 09:26 AM
فدرتا روحج بدرووووووووووووووووووه...ل تاخذين بشور أحد ..لأنج بكل بساطةطلبت شور ربج!...شوفي شو كانت صيغة سؤالج لربج في الصلاة
- اذا كانت على أساس تروحين- فمعناتها توكلي على رب العالمين وحطي في بالج انج رايحة ..لأن اذا ربج مب رايد ... بيحط جدامج مية عقبة وعقبة وبتعرفين في النهاية..


واذا الله راد ورحت - حتى لو كنت خايفة ياعمري لا تظهرين هالشي-
لأن الواحد يوم بيشوفج قوية ما بيسترجي يفكر فيج بالسوء...


ونصيحة أخيرة ...دامج بروحج حافظي على عمرج ..يعني من الدورة للفندق..ومن الفندق للدورة..عالأقل هالمرة لا تطلعين أماكن انت ما تعودتيها لأنج بروحج...لين تعرفين شو هو الوضع..وتاخذين عنه فكرة


وتامرين أمر يا بعد قلبي ..وبالتوفيق:up:































أقول ..متى بيرفعونج ؟..تعرفين عشان نصيبنا من الحلاوة ما يروح...:bigsmile:

مرموم
25/07/2004, 09:43 AM
السلام عليكم ورحمة الله وبركاته

لو إنتي من سكان الإمارات...يعني أبوظبي أو الشارقة...فدبي كلها ساعتين بعيدة عن أبوظبي...

أنا مش شايفة فيها مشكلة...و جربت هذا النوع من الدورات...اصلا يادوب تصحي الصبح تفطري...تروحي الدورة...راح تتغدوا هناك....و بعدين ترجعي على المغرب...و على النـــــــوم...من التعب...

بس يكون أحلى و أضمن لو أي أحد من قرايبك جاء معاكي و ونّسك في الرحلة...و لو عرفتي مع أي أحد من أخواتك أو محارمك...

بالنسبة للحجوزات...الشركة هي اللي تسوي كل شيء...المفروض !

أما لو كنتي من بلد ثاني غير الإمارات...فهنا فعلا لازم يكون في حد معاكي...و هذه مش صعبة أختي...سهل الواحد يلاقي رفيق للرحلة...

استخيري الله...و ما خاب من استخار....و إن شاء الله ربك يقدر لك الخير وين ما كان...

بالتوفيق إن شاء الله...

بدرووووووووووه
25/07/2004, 03:11 PM
يا بنات مشكورين على الردود الحلوة وال... بس تري عندي ودان اللي يسأل هههههههههه

السالفة اني في بلد ثاني وبروح دبي يعني انا سافرت دبي كذا مرة بس مع ابوي او اخواني لاكن بروحي لا وبعدين اللي اعرفه ان البنت لازم يكون معاها محرم يمكن يصير شيء لاسمح الله منو يدبرني والبنات اللي معاي نحس وكريهين يدورون الغلط علي باي طريقة حسبي الله عليهم

بس انا استخرت وخليتها على ربي اذا الله كاتبها لي بتتيسر واذا لأ الله يعوضني باحسن منها ... بالنسبة للي تسأل اشلون خايفة من السفر بروحي واشلون بمسك ادارة هذي يا حبيبتي غير لما تصيرين قد المسئولية راح تعرفين الشغل وادارة الاعمال غير والسفر لحالك غير

انا كل اللي ابيه احد يونسني بالطريق واذا بروح سوق او شيء يكون معاي اخذ راية يعني من هالاشياء وامي وابوي كبار بالسن مالهم بالسوالف هذي

واخواني عند حريمهم وانا مو متزوجة بعدي .... والسفرة كانت برمضان بس لما رفضتها جدموها اشوي قبل رمضان باسبوع يعني ارجع اول يوم من رمضان منو اللي فاضي يروح معاي وتدرون التجهيزات اللي حق رمضان اشلون هذا غير انه وقت مدارس

نجمة الفجر
27/07/2004, 12:48 PM
وديني معاك:cool2:

يابختك والله

انا لو يرسلوني دبي ابيع سيارتي علشان اسواق دبي:D2

يابنت الحلال روحي وغيري جو دام ابوك موافق


طيب خذي حد من خواتك

او خذي امك ..وبععدين كلها اسبوع

انا مرة رسلوني الكويت 3 اسابيع..وكنت طايرة من الفرح


وتمنيتها شهر..سنة.هههههههه

الله يوفقك..ولاتنسينا من الهدايا:cool2:

الزاهية
28/07/2004, 06:35 AM
صدق انها صعبه شويه بس اذا كانت هذي الدوره فيها مصلحه فلا تفوتيها الا بتحصلي حد يروح معاك شوفي حد من صديقاتك المقربات او خوالك تعرفي لو انا منك وكانت هذي السفره خير لي وما حصلت اي احد يريد يروح معاي كنت باخد معااي خدامتنا على الاقل حد يكون معاي ههههههههه عاد لا حيله اندور الحلول من وين ما تكون نحن الحريم انا اتكلم جد باخذها معاي الا اذا كانت السالفه فيها اجراءات سفر غير عن اجراءاتنا بخليها مكانها شوفي حتى صديقات امك