المساعد الشخصي الرقمي

مشاهدة النسخة كاملة : معاناتي من ينقذني منها



نسيت اسمي
03/07/2004, 01:18 PM
مرحبااا

قد تكون مشكلتي ليست جديدة عليكم بمعنى اخر قد يكون هناك العشرات ممن يعانون منها .... مشكلتي ايها الاعزاء هي : :down:

انا امرأه متزوجة منذ ثلاث سنوات وشاءت ارادة الله ان اسكن مع اهل زوجي كانت الايام الاولى جميلة بحكمي زوجة جديدة وضيفة جديدة عليهم في نفس الوقت .. ولكن مع مرور الايام والاشهر بدت خبايا النفوس تظهر على حقيقتها فعانيت ما عانيت منهم ( ام واخت زوجي ) لقد سقوني العذاب .. واليوم وبعد مرور هذه السنين اعلنت لزوجي بنفاذ صبري واتخاذي قراري الا وهو الخروج ... نعم اقولها باصرار اريد الخروج والبحث عن مسكن اخر .. والحمد لله بأن زوجي مقدر معاناتي ولكن المانع الذي يعيقنا هو المادة نوعا ما ... :eek2:

فبماذا تنصحوني هل ابقى في العذاب الذي لا يطاق ام اشتري راحة بالي والله سبحانه سوف يغنينا ويتكفل بنا ( ان كنتم فقراء يغنيكم الله من فضله )

انتظر ردودكم وتفاعلكم ...

مرموم
03/07/2004, 01:30 PM
http://www.crearecountry.com/flowerdivider.gif


السلام عليكم ورحمة الله وبركاته

شوفي أختي...و إذا عزمت فتوكل على الله...

يعني إنتوا إعقدوا النية على الخروج...و ابدأوا من الحين إن شاء الله رتبوا أموركم و دبروها...و استعينوا و توكلوا على الله...و إن شاء الله راح تلاقوها فرجت من حيث لا تحتسبوا...

أهم شيء خلّي الموضوع في بالكم...و اسعوا له من الحين...

و إن شاء الله تتوفقوا...و نسمع عنك كل خير قريب....:smile:


http://www.crearecountry.com/flowerdivider.gif

aya2006
03/07/2004, 01:37 PM
انتو بس فكرو ودورو لكم شقه بس بشرط انها تكون رخيصه عشان تقدرو على باقي المصاريف ومااقول الا الله يهديهم العمات وبناتهم صايرة موضه انهم يلعوزو مرات ولادهم واخوتهم واحمدي ربش انهم مومن اللي يسوو السحور او غيرها

فتوووووووووون
03/07/2004, 01:47 PM
الله يفرجها عليك من اوسع ابوابه ان شاء الله انا من راي انج تتوكلين على الله وتطلعين وشو اللي يبقى عندكم من الراتب دبروا فيه اموركم بس المهم انكم مرتاحين البال انتي وريلج الله لا يغير عليكم والمهم الراحه النفسيه صدقيني وان كان على الماده صدقيني ربي يفرجها وتهون لانج ان صبرتي اكثر بتصير المشاكل بينج وبين ريلج لان لما تكون نفسيتج تعبانه ما تقدرين تعطين اي شي حق ريلج.

الله يعينكم ان شاء ويفتحها في ويهكم ويهون عليكم يارب .

**selen**
03/07/2004, 02:18 PM
هايوووووو
حياتي انا اقول اذا حاليا الماده مضايقتكم ..حرام تضغطي على زوجك

حاولي تكسبيهم وتطنشيلهم
ولاتنسي ان الكلمه الحلوه تلين الحجر
واذا سوولك شي قولي جزاكم الله خير
ولاتبيينيلهم زعلك بالعكس اظهريلهم لامبالاتك
الين ما يستحوا وينعدلو مع ان فيه ناس (عفوا على الكلمه)مايستحو
واذا كانوا كدا ساعتها مالك حل الا الخروج
واالله المستعان

روزالينده
03/07/2004, 02:41 PM
انا انصحك بانك تطلعين من البيت باسرع وقت ممكن

وتحاولين انك تخففين من طلباتك وتوفرين من راتب زوجك

حق الشقه وبالنسبه حق الشقه خذوا لكم شقه متواضعه

الله يكون في عونك

sicily
03/07/2004, 04:36 PM
راي أطلعي من بيت حماتج ...
وحطي ميزانية لتصريف الراتب
ودوري بيت صغير يناسبكم
قللي من الكماليات قدر المستطاع

لأن راحة البال أهم شيء...بس انتبهي علشان وزنج ما يزيد من الراحة النفسية ...:D2

صـــارع
03/07/2004, 04:58 PM
http://www.al-wed.com/pic-vb/114.gif

الله يعينج على هذي المشكلة

والله مقدر معاناتج، كونج ولو كنتي زوجة ولدهم، تظلين غريبة بينهم، ولكن

اللي استغربه ان كيف بعد مرور ثلاث سنوات وما صار حب بينكم غريبة.

انتي خذي راي الوالد و الوالدة وان شاء الله راح يكون في رايهم المصلحة

واكثري من الدعاء و خصوصا في السجود كي يفرج الله هذي المشكلة

http://www.al-wed.com/pic-vb/114.gif

الوزيرة
03/07/2004, 05:18 PM
استخيري اختي على الخروج واذا نويتي الخروج همي في امرك واعلمي ان الله ماخلق نفس الا مدبرلها رزقها

عشق الروح
03/07/2004, 06:01 PM
السلام عليكم ورحمه الله وبركاته

حبيبتي لما قريت قصتج حسيت انج تصفين لي حالتي انا لاني اعيش مع اهل زوجي بس عمتيه واخت زوجي عوظوني عن أهلي
عمتيه حنونه وطيبه واخت زوجي كذلك
خلي الكلمه الطيبه واللمسات الحنونه والجميله في البيت باينه عشان يحسون بج وما يقسون عليج
ريلج معاج وموجودج وحاولي تبينين له حالتج عشان اذا جربتي انج تظلين وفاض الكيل يكون مستعد نفسيا" للخروج بدون تردد

الله يعينج ويسر لج امرج واهم شيء عندج ريلج وما عليج من اهله
:smile:

وردة الشارجة
03/07/2004, 06:36 PM
شوفي اختي نسيت اسمي لازم بتنسين اسمج من الغصه :smile:
المهم اذا بمقدور ريلج انكم تطلعون اطلعوا وبعدين اذا كنتي تشتغلين بتقدرين تشلين وياه نص المصاريف واذا كنتي ما تشتغلين حاولي انك تدورين لج شغل لسببين 1- تقدرين تساعدين ريلج وتطلعون يعني اذا هو خذ سلفيه من البنك معاشج بيسد 2- بتفتكين من الصدعه من اهل ريلج يعني من الصبح الين الظهر تراج في الدوام وبتين بتتغدين وبترقدين الين المغرب وبعدين اطلعوا الين العشا لا بتشوفينهم ولا بيشوفنج
واذا ما تبين تشتغلين احسن لج ما تطلعين لهم يعني يوم ريلج بيسير الشغل تمي في حجرتج الين ما هو ايي من الدوام وتراج بتسيرين وياه عندهم حق الغدا وتقدرين بعد تتغدين في حجرتج عوديهم علي هذا النظام وتراه عقب الغدا بترقدون الين المغرب وبعدين أطلعوا الين العشا وردي ايليس في حجرتج شو تبيبهم تيلسين وياهم خليهم ابروحهم واذا ريلج طلع العصر خليه يوصلج بيت اهلج وعقب ما يخلص من شغله ياخذج واذا اهلج ابعيد عنج وايد ايلسي في حجرتج وشوفي التلفزون والا عدلي في حجرتج يعني سويلج اي شغله وخلي بابج دومه مقفول عليج عوديمهم علي هذا الاسلوب والله يوفقج

hyooof
04/07/2004, 04:08 AM
اختي الغاليه ،،
انا من رأيي اذا كان زوجك مقدر اللي انتي فيه وموافق على الطلعه ،، اطلعو ،، لانكم مهما طالت الايام وتحملتو ممكن تفكرو تطلعو بعد سنين ويكون عذركم نفس العذر ،، ماتضمنين اذا حالت زوجك الماديه بتتحسن والا لا .... فافتكي من العيشه مع اهله واطلعي وانتي معززه مكرمه قبل ماتكبر المشكل بينك وبين اهله ،، وتجين تزورينهم رسمي ، وتأدين واجبك معاهم وترجعي لبيتك ...

لكن لازم تعملي حساب لكم شي عشان زوجك ما يندم انه سمع كلامك وطلع من البيت :
1- انك تقدري توفري بين السكن والمصاريف اليوميه ، وتعملي حساب انه انشالله حيجيكم اولاد
2- انك تعوضي زوجك عن كل اللي كان ناقصه في بيت اهله ، عشان يحس انك تستاهلي اللي عمله عشانك
3- تخصصو يوم في الاسبوع تزورو فيه اهل زوجك عشان مايزيد كرههم لكي ويحسو انك بعدتي ولدهم عنهم

وانشالله اكون افدتك،،،،،،،،،،
سلااااااااام:shy:

مملكة القلوب
04/07/2004, 07:01 AM
Gd,lhttp://heoonh.jeeran.com/purplelaceflwrule.gif

السلام عليكم ورحمة الله وبركاته

الله يفرجها عليك أختي

أنتي حاولي أنك تكسبينهم وعاملي السيئه بالحسنه

حتى الله يفرجها عنك وتطلعين في بيت لوحدك وترتاحين

ولك مني كل التقدير والأحترام

http://www.arabcastle.net/vb/uploaded/LONE.gif


http://www.moonandbackgraphics.com/onmykneescornerblock.gif مملكــة القلوب http://www.moonandbackgraphics.com/onmykneescornerblock.gif

http://www.3roos.com/forums/attachment.php?s=&postid=690673

نسيت اسمي
05/07/2004, 12:10 PM
مرحباااا

اشكر كل من قام بالرد على معاناتي شكرا جزيلا واحب ان اضيف بأن ردودكم اثلجت صدري وزادت من اصراري وعزيمتي على الخروج وانشاء الله تسمعون عني كل الاخبار الحلوه والله يوفق الجميع ..... :up:

lura
05/07/2004, 12:25 PM
الله يعينج اختي

استخيري واتوكلي على الله