المساعد الشخصي الرقمي

مشاهدة النسخة كاملة : أمي زعلانه مني أو أنا زعلانه منها ..مدري !!



مقهوره
06/02/2004, 05:59 AM
السلام عليكم ورحمة الله وبركاته


اليوم كنت اتكلم مع امي وحنا جالسين بالصاله المهم انا كنت اتابع برنامج معين فقالت امي رجعيه على المحطه اللي قبل قلت لها انا بس انا اتابع البرنامج قالت قلت لك حطيه على المحطه اللي قلت لك عليها


قلت لها طيب بحطها بس بروح غرفتي وماراح اجلس هنا ومابي احد يجي عندي قالت يعني ماتبيني اجي اجلس عندك بالغرفه قلت لها انا قلت مابي احد يجي عندي بالغرفه وخلاص


فقالت لي زين روحي وبتشوفين اذا ماعلمت الناس وعيال اخوانك واي احد اشوفه عن اللي كنت اسويه لك وانتي صغيره يوم كنتي مريضه ونا اشيل واحط واسوي لك لو احد غيري ماقام فيك


طبعا انا جالسه اذكر لكم الكلام اللي قالته عني بشكل خفيف مره لان اللي قالته لي كلام جارح مره مافيه حنيه ولا مراعاة لشعوري نهائيا


وقالت بعد انتي مين يبغاك اصلا ولا يفكر انه يتزوجك ومن هالكلام وبعدها انا رحت لغرفتي فجا اخوي وقالي انها صارت تبكي وتقول اني طردتها من الغرفه وقلت لها ماتجين مع اني ما سويت هالشي فانقهرت كثير انا لهالتصرف من امي خاصة واني مو حاسه بقربها مني بذات انها مو متعلمه في كل حاجه بحياتها حتى بالاسلوب لما اوجها تزعل وتبكي لو اقول كلمه صرت انا الغلطانه


بجد مو عارفه وش اسوي وبنفس الوقت مابيها تزعل لانها هي اللي باقيه لنا من بعد وفاة ابوي الله يرحمه ووجودها بالنسبه لي ولخواني هو الخير والبركه وما انكر انها تحبني مره وترتاح لما تجي عندي بالغرفه بس انا ماحب التعليق على الناس ولا على فلان سوى وفعل انا ما اجي لغرفتي الا للراحه ونا اشوف ان طول الجلسه فلان سوى وفعل وهذا مدري وشو يعني هي ماتواجه اللي متضايقه منهم ولا من تصرفاتهم بس تتكلم قدامي انا واذا شافتهم رحبت وهللت فيهم ونا ماحب هالاسلوب


وبنفس الوقت ماعندها اسلوب حوار لامعنا ولا مع الناس يعني معانا تتعامل بأسلوب انا سويت وفعلت لكم بذات لو انها مسويه لنا حاجه في حالة مرضنا تجلس تقول ماتذكرين انا وش سويت لك وفعلت لك ومن هالكلام ومع الناس تستحي ولا تعرف تتكلم وترتبك وكل شي وبس تجي للبيت تنطلق بالكلام عنهم


بجد مرات كثيره اغبط الناس اللي عندهم امهات قريبات منهم ويحسون انهم يفهموهم ويمكن يشكون لهم انا مره وحده شكيت لها وبعد ماسمعتني ودعت لي بالتوفيق لما جا مره مدري وش سويت على طول جلست تذكرني بالكلام اللي قلته لها وجلست تقولي انتي مين يبغاك وانتي راح تجلسين بهالبيت ماتتزوجين وكلام كثير بجد احس قلبي يعورني على هالاسلوب في التعامل معي مع كذا احاول اصبر واتحمل ....


صحيح ان الموضوع اللي صار يمكن تافه ومايحتاج هالكلام هذا كله بس دائما النار تبتدي من شراره .. واسفه على الاطاله بس متعوده منكم تسمعوني :(

الريم ه
06/02/2004, 10:56 AM
مقهوره حبيبتي انا ما بطول هالمره بالكلام معج لاني حاسه شو كثر انتي متضايقه.... وعارفه انج كارهة نفسج لانج زعلتيها...

مقهوره اول شي روحي استسمحي منها وحبي على راسها وقوليلها انتي عارفه اني انا وغرفتي وكل شي فيني لج بس الله يلعن الشيطان وانا غلطانه... لا تحاولي تبرري فعلج قدامها خليها تطلع اللي بداخلها...

مقهوره....أنا عارفه انا مرات نتضايق من اهلنا وهم يتضايقوا منا لانه اساليبنا تختلف بس هم يقدروا يوجهونا وينصحونا ويامرونا لكن احنا ما نقدر غير نلفت انتباههم للي يضايقنا منهم او نصارحهم اذا كانوا وايد قريبين منا بس في النهايه هو شورهم.... وكل شي يصير بالحسنى

تاكدي يا قلبي انه امج ما تقصد تعايرج وانها اكيد في داخلها تدعيلج وتحاتيج بس هي حياتنا بمجتمعاتنا تشكلت بهالطريقه.... وانها في داخلها يمكن تعتبرج صديقه فعشان كذا تفضفضلج بطريقتها بس ما تقدر تقولج انج صديقتي لانها تبا تحفظ مكان الام

خلي الموضوع ياخذ وقته بس انتي سيري استسمحي منها لين ترضى وقوليلها ما بدخل غرفتي ولا برقد فيها لين انتي تدخليها واحلفي عليها.... قوليلها كل دنياي ما تسواج يا امي

وتذكري انج انتي بس يمكن متضايقه من المواضيع الثانيه فتطلع في الاشياء الثانيه

وتذكري شي يمكن هي بعد تذكركم بالاشيا اللي سوتها يمكن لانها حاسه انه محد يقدرها بطريقتها هي ... هذي الفروقات بيننا وبين اهلنا بس لازم نستوعبها

سيري يا قلبي لها وقوليلها مابا اطلع لين تسمعيني دعوه من قلبج وانج ما زعلانه علي
الله يديم محبتكم يا رب وبشريني عنج يالغاليه:smile:

ذكريات
06/02/2004, 11:53 PM
.. السلام عليكم ورحمة الله وبركاته ...
اختي المقهورة ... اتمنى لو تغيريين اسمج قبل كل شي ....
اولا أمج المفروض تستسمحين منها ... وبعدين اي شي تقوله الوالده حتى لو ما عاجبج ارضي فيه .. لانها امج اولا وثانيا لانج ذكرتي انها ما تتقبل وجهة نظرج ... ارضي بكل شي تقوله ..والله يطول بعمرها ان شاء الله. وأكثري من الاستغفار و عبارة لا إله إلا انت سبحانك اني كنت من الظالمين.. وسبحان الله والحمدلله ولا إله إلا الله والله أكبر ...
وأتمنى لو تغيرين اسمج ..رجاء .. اتمنى لو تسمعينه ..

al3enaweya
07/02/2004, 12:21 AM
sallam e5te maqhora atmna etkonen b5eer el7en mahma kanat el2sbab hathe om ow bs allah eykon fe 3onag e5tee
bs plz 5yree esmag ok(nick) ok
:o

مرموم
07/02/2004, 10:14 AM
http://www.crearecountry.com/flowerdivider.gif


أختي العزيزة مقهورة....


قرن الله تعالى الإحسان إلى الوالدين بالأمر بعبادته وتوحيده ، فقال سبحانه : { وقضى ربك ألا تعبدوا إلا إياه وبالوالدين إحسانا } [ الإسراء : 23 ]

وقال : { واعبدوا الله ولا تشركوا به شيئا وبالوالدين إحسانا } [ النساء : 36 ]

وهذا دليل على أهمية بر الوالدين والإحسان إليهما.


وبر الوالدين يكون بطاعتهما واحترامهما وتوقيرهما ، والدعاء لهما ، وخفض الصوت عندهما ، والبشاشة في وجوههما ، وخفض الجناح لهما ، وترك التأفف والتضجر عندهما ، والسعي في خدمتهما ، وتحقيق رغباتهما ، ومشاورتهما ، والإصغاء إلى حديثهما ، وترك المعاندة لهما، وإكرام صديقهما في حياتهما وبعد موتهما .

ومن ذلك ألا تسافري إلا بإذنهما ، وألا تجلسي في مكان أعلى منهما ، وألا تمدي يدك إلى الطعام قبلهما ، وألا تفضلي زوجك أو ولدك عليهما .

ومن البر : زيارتهما ، وتقديم الهدايا لهما ، وشكرهما على تربيتك والإحسان إليك صغيرا وكبيرا.

ومن البر: أن تسعي في تقليل الخلاف الواقع بينهما ، وذلك بالنصح والتذكير قدر الاستطاعة ، والاعتذار للمظلوم منهما ، وتطييب خاطره وترضيته بالقول والفعل .

ومهما كان أسلوب والدتك معك ، فكوني متخلقه بما سبق من الآداب ، مجانبة لكل ما يغضبها أو يحزنها ، ما لم يترتب على ذلك إثم أو معصية لله ، فحق الله تعالى مقدم على حقوق العباد .


و مهما كان رد فعل والدتك...و مهما كانت عيوبها ...فلن تدخلي الجنة إلا برضاها عنك....و هي عندما تقول لك أنا عملت لك و عملت لك...فهي فعلا كذلك...يكفيها فقط مدة حملك..يكفيها صرخة من صرخات الولادة...و يكفيها تربيتك و السهر عليك...


اذهبي أختي و استسمحيها و اصبري عليها...فربما لما ترضى عنك...يوفقك الله و تجدي كل أمورك أصبحت ميسرة بإذنه تعالى...:smile:


( المادة الدينية منقولة )



.................................................

http://www.k4ic.com/daily/30.jpg

http://www.crearecountry.com/flowerdivider.gif

salasil
07/02/2004, 10:41 AM
حبيبتي اقولك المتفائلة احسن من اسمك الاول, ما ابغاك تزعلي من امك وروحي استسمحي منها امك الحين تبي احد يدللها لان مثل ما تقولين ابوك اتوفى الله يرحمه ,وهو الي كان يدلل امكم حتى لو انتو ماتشوفون يس امكم كانت تحس بها الشي لما توفى ابوكم امكم تبي تحس بالاهتمام منكم انتو دللوها جلسي معاها اتكلمي معاها شوفي الاشياء الي تحب سويها طلعي معاها طلعات رفهو عن نفسيتكم ,واذا جات تتكلم على احد انت وعيها قوليلها لا امي ترى هذا حرام الكلام على الغائب كانك تاكلي لحمة ويكون الكلام بطريقة سلسة تتقبلها امك . امك الحين حبيبتي عامليها كانها طفل يبي دلال . ولا يهمك من كلامها ترى هذا كل كلام في حالت غضب, ولا يمكن للامن تتكلم على ابناءها الا اذا كانت فاقدة الحنية منهم , ترى الوالدين هم جنتنا وهم نارنا , اتمنى لك السعادة.

الســــاهـــر
07/02/2004, 10:57 AM
مقهوره

والله لو قريتي رأي الأخت مرموم

والله كان اقتنعتي ما شاءالله عليها يعطيها الف عافيه

لكن انا بقلك شي

يمكن مشكلتك اهون لكن انا مع امي هي عصبيه زياده عن اللزوم

يعني اقل شي يعصب فيها

وهي متعلمه اوقات القاها في الصالة والله العظيم علشان

احسسها إني ابغا رضاها والله العظيم والي خلقني وخلقك من طين

إني انسدح عند رجلها وبدون ما تدري اسلم على رجلها والله العظيم

بس علشان احسسها إني انا ابي رضاها

وهي نايمه اسلم على رآسها انا صح ازعلها لكن ما اطلع لين ارضيها

لكن


بقلك شي اختي


حاولي تسايرين امك في كل شي وراعي إنها ماهي متعلمه

يعني لو نصحيتها بالأحاديث

يعني كلامها على فلان وفلان قوليلها يمه هذي غيبه

او نميمه على حسب الكلام

وقولي لها الحديث حق الرسول عليه افضل الصلاة والسلام

واشرحيه لها يمكن تتعلم منك

على فكره البنت او الولد مو من حقه إنه يزعل من أمه لو مهما

تكون

تدرين حتى الأم الكافره والأبو الكافر لازم ترضيهم في غير معصية الله

يعني تطيعهم في كل شي إلا معصية الله

فما بالك في عدم رضاها وهي مسلمه


روحي اطبي السموحه من امك وإنت مالك غيرها في هذي الدنيا

و ولا تآخذك العزة بالإثم

لو مهما كان بقلك إنت غلطاااااااااااااااااااااا ااااااااااااااااااااانه

وسامحيني على كل حال


تحياتووووووو

الســـــــــاهـــــــــر

بنــ زايد ــت
07/02/2004, 11:02 AM
ياختي العزيزة حرام عليج تسوين جي في امج

هي صح يمكن تكون قاسية معاك اوقات بس انتي مالج حق تقولين انها ما تعرف تتكلم ولا ما تعرف تتعامل

كفاية ياختي الغالية انها ربتكم بروحها بعد وفاة الوالد يعني كانت بالنسبة لكم الام والاب في نفس الوقت ... ياختي ديري بالج على امج لانه مالج غيرها
على الاقل حاولي تفهمينها وبعدين بتشوفين انها صارت تفهمك وتحبك اكثر من الاول

أوركيـــــــــد
07/02/2004, 11:20 AM
اختي المقهورة وانتي فعلا تقهرين،،،،
الغالية بالنسبة لي اشوف انه اسلوبج في الكلام وياها كان غلط وسمحيلي فيه عدم احترام،،، كيف تقولين لأمج انا بروح الغرفة وما ابغي حد يجي عندي،،، الصراحة قوية،،، كيف تطردين امج؟!!! يعني شو شايفه عمرج عليها؟!!!،،، الصراحة لو كنت مكانها كنت بقول نفس الشي :"على شو شايفة عمرج" ولا على امج بعد؟!!!!،،،،الصراحة الصراحة اشوف فيها وسمحيلي على هاي الكلمة "قلة ادب" وانا ما بستحي منج ،،، يعني كان بإمكانج تقوليلها ما يخالف امي انتي تابعي البرنامج اهنيه وانا بكمل في غرفتي بكل بساطة وما كان فيه داعي لهاي الرمسة،،،،الغالية والله ادري انج تعانين من معاملة امج والله يعينج لكن اللوم دايما مب عليها هيه لانها مهما سوت بتظل امج ولازم تحترمينها لو غلطت عليج،،، والله انه يوم اشوف اختي تقل ادبها على امي والله اني اهزبها وقولها في ويهها انها قليلة الادب وما استحي منها حتى مرة كنت بضربها من كثر ما حسيت بالقهر انها تتجرأ وتغلط على امها،،، اكثر شي اكره يوم الوحدة تعامل امها بهاي الطريقة،،، استغفر الله العظيم ،،، والله انه شي عظيم،،،

الغالية سامحيني اذا لهجتي قوية بس غصبن عني،،، وانا أأيد كلام اختي ذكريات وهو:
" اولا أمج المفروض تستسمحين منها ... وبعدين اي شي تقوله الوالده حتى لو ما عاجبج ارضي فيه .. لانها امج اولا وثانيا لانج ذكرتي انها ما تتقبل وجهة نظرج ... ارضي بكل شي تقوله ..والله يطول بعمرها ان شاء الله. وأكثري من الاستغفار و عبارة لا إله إلا انت سبحانك اني كنت من الظالمين.. وسبحان الله والحمدلله ولا إله إلا الله والله أكبر ..."

الغالية ااكد على نقطة ارضي بكل شي تقوله وانتي ساكته حتى لو تغلط عليج،،، اسكتي ولا تراددينها واصبري عليها والاجر لج ان شاء الله،،، ولو حتى تبينين انج غلطتي حتى لو ما غلطتي بعد احسن لانه في النهاية بتحس بشي من الرضا واهم شي رضاها الغالية وهو اللي بيدخلج الجنه،،، نصيحة حطيها في بالج دايما،،، عودي نفسج دايما من يحدث اي خلاف بينج وبينها في قرارة نفسج دايما قولي هاي امي وبصبر عليها وكل شي تقوله لج دخليه منيه وطلعيه الصوب الثاني بدون ما يأثر فيج حتى لو كان جارح،،، والله والله اقولج من دافع التجربه لاني مريت وايد بها الشي من اميه واستوى ها الشي عادي عندي واقول دايما في خاطري يالله هاي امي والله يسامحها بدون ما اعور راسي وافكر،،،، الله يهديج ويهديها ويهدي الجميع ان شاء الله وانا اولكم

نبض الحيارى
07/02/2004, 11:45 AM
كاتب الرسالة الأصلية : salasil
حبيبتي اقولك المتفائلة احسن من اسمك الاول, ما ابغاك تزعلي من امك وروحي استسمحي منها امك الحين تبي احد يدللها لان مثل ما تقولين ابوك اتوفى الله يرحمه ,وهو الي كان يدلل امكم حتى لو انتو ماتشوفون يس امكم كانت تحس بها الشي لما توفى ابوكم امكم تبي تحس بالاهتمام منكم انتو دللوها جلسي معاها اتكلمي معاها شوفي الاشياء الي تحب سويها طلعي معاها طلعات رفهو عن نفسيتكم ,واذا جات تتكلم على احد انت وعيها قوليلها لا امي ترى هذا حرام الكلام على الغائب كانك تاكلي لحمة ويكون الكلام بطريقة سلسة تتقبلها امك . امك الحين حبيبتي عامليها كانها طفل يبي دلال . ولا يهمك من كلامها ترى هذا كل كلام في حالت غضب, ولا يمكن للامن تتكلم على ابناءها الا اذا كانت فاقدة الحنية منهم , ترى الوالدين هم جنتنا وهم نارنا , اتمنى لك السعادة.

المميز
07/02/2004, 12:07 PM
ماعندي كلام ازيده على كلامك
مقهورة قال رسول الله صلى الله عليه وسلم عندما سأله الإعرابي من احق في صحبتي قال الرسول صلى الله عليه وسلم أمك وكررها ثلاث مرات لان الجنة تحت اقدامها والله انج راح تحسين بالامومة وبأنها صح بعد انجابج وتعبج على تربيتهم

الله يوفقج انشاء الله

حلم المستقبل
07/02/2004, 12:11 PM
[ALIGN=JUSTIFY]السلام عليكم ورحمة الله وبركاته ،،،

أختي المقهورة يمكن فعلاً أحياناً الشخص ينقهر إذا سمع من شخص عزيز عليه هالكلام بس أكيد الوالدة مو كان قصدها تقول لج هالكلام بس يمكن لأن حست فيها مهانه لها أو أنها ما تقدر تستغني عنش وأنها محتاجه انها تتردد عليش في الغرفة وانت صديتيها بكلامش من غير قصد فحبت أنها تذكرش باللي تسويه علشانش عشان تروحي تعتذري منها وأكيد هي أحين مو هاينه عليها انتي .

وبعدين إذا انتي تتضايقين من كلامها عن فلان وعلتان ذكريها أن الله سبحانه وتعالي حرم هالشي وهذا يعتبر غيبة و قولي لها مرة ومرتين وثلاث بس لا تستخدمين معاها الأسلوب الخشن لأن تعرفين في هذا السن الأمهات يحتاجون رعاية وحنان مثل اللي عطتش اياه من قبل وهذا من حقها عليش .

والحين أول شي تسوينه روحي اعتذري منها مثل ما قالوا لج الأخوات أكيد راح تحن عليش وتسامحش وحاولي تتبعين معها اسلوب ثاني يفيد بدل النقاش الحاد .

والله يرضى عليش وعلينا.


أختك ( حلم المستقبل)

مقهوره
08/02/2004, 03:25 AM
السلام عليكم ورحمة الله وبركاته

اخواني واخواتي اشكر كل واحد منكم على رده علي وعارفه اني غلطت ويمكن لاني حساسه بعد أتأثر بسرعه من الكلام الجارح بذات لو كان من اقرب الناس لي ... الله الشاهد اني ابي رضاها لان هي الخير والبركه لنا بهالبيت ومحد محسسني بالحب والحنان غيرها بس لما تعصب من توجيه لها مني ولا كلمه على طول تجرحني بكلامها بس فعلا مثل ماقلتو لازم اتحمل لانها امي ونا ماجيت هنا وشكيت الا لاني ابي ارتاح واقول اللي بخاطري وعارفه ومتأكده من توجيهكم لي واليوم والله استسمحت منها والحمدلله رضت علي وقالت انا احبك وانتي الصغيره مازعل عليك شفتو الدلع عاد صغيره ونا كبيره بس ترى انا اموت في الغنج وانبسط لما تقولي انتي الصغيره ههههههههههه والله انبسط تعرفون ليه لاني اصغر اخواني عشان كذا دوم تشوفني صغيره بنظرها :o مدري شكلي مبسوطه اليوم عشان امي رضت عني :confused: وبجد احبكم موت بنات عروس لانكم دوم ماتتركوني وتوجهوني وماتخلوني بلحالي محتاره بهمي دايم تساعدوني قد ماتقدرون الف شكر لكم كلكم يا اغلى اخوات لي وما انسى اخواني اكيد على توجيهم لي بعد :up:

الريم ه
08/02/2004, 04:34 AM
يارب دوم مستانسه يا قاهرتني :mad2:
:D2:D2:D2:D2:D2

عسى يارب دوم ضحكج ووناستج وعسى ايامج كلها هنا وفرح :smile:

عاد الحين احنا نبا عزيمه على مقهوره وياريت تكون سمك مشوي لاني مشتهيه سمك مشوي لانه في امريكا البقر انجنوا وما صرنا ناكل لحم والدياي صارفيهم انفلونزا :cry: ياربي شو ناكل عيل :D2:D2:D2

ماعليه مقهوره دخلت عرض بس انا يوم افرح اخرف :D2:D2 وانا فرحت لج يختي

يالله باي

حلم المستقبل
08/02/2004, 01:26 PM
:up:
:up:
:up:
:up:
:up:

الحمد لله رب العالمين والله اني استانست لك من كل قلبي وفرحت لك ، ايه جدي اضحكي وفرفشي والله يهنيكي معاها يارب ويبسطك ربي دايماً وتغنجي عليها ليش لا مو أمك ( الله يطول لك في عمرها ويخليها لك دوم يااااااااااااارب )

ولا تعصين ليها أمر

تدرين ليش ؟؟؟؟


أول طالعي تحت قدمها


ها جفتي الجنة

الله لا يحرمك منها

:D2:D2:D2:D2:D2:D2:D2:D2:D2

إن شاء الله ما أكون بيختها بس والله فرحانه عشانك

اختك ( حلم المستقبل)