المساعد الشخصي الرقمي

مشاهدة النسخة كاملة : نصائحكم لسنتي الجديدة في الثانوية العامة؟



جرناسة
13/07/2003, 07:05 AM
السلام عليكم ورحمة الله وبركاته ..
بصراحة حبيت استيشيركم في الموضوع الي شاغل بالي ومحير تفكيري..
ابي كل من جرب الثانويةالعامة يقول لي ايش سوى وكيف كان جدوله الدراسي ..وحتى الي ماجربوا الثانوية العامة يفيدونا بنصائحهم.. :up:
بصراحة انا افكر كثيري الموضوع هذا لان جميع افراد عائلتي يقولون لي ما نبي اي نسبة.. :confused:
ومشكلتي الثانية مااعرف شلون اتعامل مع المدرسات بسياسة..:o
ويصدقوني راح ادعيلكم ..
وكمان ابي اعرف رايكم عن المذكرات الي نشتريها تنفع والا لا..
PLEASEابي كل شي يخص الثانوية العامة..

:eek2::eek2::eek2:

sad memories
13/07/2003, 10:37 AM
انا برايي ان الثانويه احلا و اصعب مرحله دراسيه و الله بتعيشين احلا ايم دراسه خصوصا 3 ثنوي روعه و اقول لا تفكرين وايد في هذا الشي و كوني طبيعيه مع المدرسات و البنات و تصرفي على راحتك و بطبيعيه بس لازم ديرين بالك و تحطين على نفسك عدل لان لاوم تجبين معدل و نسبه قويه من اول كورس حتى يظل معدلك قوبيو لا ينزل بسرعه لان الثانويه تعتمد من اول كورس اوكي
اختي اتمنى انك استفدتي من كلامي

mshklchyah
13/07/2003, 12:02 PM
هلا جرناسه

أول شي بقوولج ياجرناسه المذكرااات انا ماانصحج فيه أبدااااا وانا بقوولج لييش واايد ايقوولون هالكلام انه الكتاب يساعدج انج تتذكرين الاجابه يعني تتذكرين شكل الصفحه الان الكتاب فيه صور عرفتي لكن المذكره مافي شي ايميزها والله لان كل الصفحات متشابهه يعني كل الكلام على ورقه بيضه لا صور ولا هم يحزنون..
نصيحه مني لج عشان اتييبين نسبه عاااااااليه وعشان ماتتعبين في النهاايه اول شي حطي في بالج انج تبين نسبه عاليه ودايما حضري وشاركي مع البنات فب الصف ويوم بترجعين البيت راااجعي كل اللي خذتوووه مراجعه سريعه وبعدين ابدي في التحضير حق اليوم اللي عقبه ...
وحطي في بالج شي واااااحد انه وقت الجد جد ودوووم اول ماتردين من المدرسه ادرسي يعني ارتاحي شوي وبعدين ادرسي والله وبتحصلين عمرج مرتاااااااحه لانج بتخلصين دراستج من وقت والله صدقيني انا دووم جيه كنت اسوي ودوووم شوفي اللي مستوااهم اعلى عنهم وقولي انا بعد اقدر اكون مثلهم لأني ماينقصني شي وأقدر ايب نسبه عاليه..
بس مثل ماقلتج حطي في بالج انج انتي تبيييين نسبه ومش اي نسبه انتي تبيين نسبه عاااليه وصدقيييييني مابتتعبين في النهايه تراني مجربه ومع المدرسات خلج طبيعيه لو مافهمتي شي اساليها لاتستحين لانها لو حسستيها انج مهتمه في الدرااسه واايد بتعزج وبتعرف انج مهتمه في الدرااسه...
واتمنى اكون افدتج حبييبتي :)
mshklchyah

وافي حزن
13/07/2003, 12:13 PM
هاااااااااااااااااي



شحااااالم يااحلويييين عساااكم طيبين


حباااايبي بعد انا ابا اشاااركم .. ابا بعد ابا نصاايح :smile: ابا مثل مااقالت الاخت سياااسه للتعاامل مع المدرسااات .. :up::up::up: ... وتشكرووون :cool2::cool2::cool2::cool2::cool2::cool2:

جوووري
13/07/2003, 12:55 PM
شوفي حبيبتي .. لا تسوين مثلنا ..

ذاكري أول بأول .. حاولي تخلين الواجبات آخر شي أهم شي المذاكره

حاولي تحفظين كل حرف لاتقولين ما أحفظ بالغصب لازم تحفظين ..

حاولي تجمعين أكبر قدر من الدرجات في التيرم الأول


والترم الثاني حاولي تركزين في كل شي .. كل شي مهم ..



حاولي ماتسمعين كلام صديقاتك مدرسات خصوصيات ومن هالخرابيط

حاولي تجمعين درجات في المواد السهله ..


لو صعب عليك شي .. حاولي تقرين مره أو مرتين .. وصلي لك ركعتين


إنشاء الله بيفتح عليك ولاتنسين كل صباح

حسبي الله الذي لا إله إلا هو عليه توكلت وهو رب العرش العظيم


كمان وإنتي طالعه من بيتكم .. أقرئي دعاء الخروج من البيت

وأول ماتطلعين من البيت طلي في السماء وقولي بسم الله توكلت على الحي الذي لايموت

يرد عليك الله سبحانه وتعالي .. أن حفظت وكفيت ..


حاولي تبتعدين عن التلفزيون والإنترنت .. يعني السنه الجايه لاأشوفك هنا

أوكي ...


أتمنى مايزعلك كلامي ولو في شي انا بالخدمه

جرناسة
16/07/2003, 06:19 AM
اشكر الجميع على المساعدة..
وردة الحب..شكرا لك وبالفعل اروع سنة 3 ثانوي..بس انا اتكلم عن 4 ثانوي..
mshklchyahوالله انج صاجة انا الي يساعدني على تذكر الاجوبة في الامتحان هو موقع الاجابة في الكتاب نفسه..من حيث تحت او فوق الصورة..ومشكورة على النصائح القيمة والله اني استفدت منها..
جووري..مشكورة حياتي..واناعجبتني فكرتج( حاولي تخلين الواجبات آخر شي أهم شي المذاكره) ..وكلامج ابدا مايزعل وانا بدون ما تقولين التلفزيون مو متعلقه فيه وايد..لان هالايام مافيه شيء يجذب..اما بالنسبة للكمبيوتر راح اقاطعه الا في حالة الحاجة منه في الدراسة لاني استفدت منا وايد في 3ثانوي..سمعي يااختي انا مستعدة اني ماخليج ماتشوفيني هنا بس بشرط اذا خلصت الدراسة تقولين لي كل شيء صار من الالف الى الياء في المنتدىOK
اضحك معاج بااايااات يا احلى جوووري ..
{اللهم اجز من اعانني، واعنه وكن معه وارزقه الفردوس الاعلى}

Daisies_island
16/07/2003, 09:06 AM
السلام عليكم ورحمة الله
هلا والله بختي جرناسة...

لا تشغلين بالج وايد بسالفة الثانوية العامة واستانسي بالإجازة ...ولا تفكرين تراجعين أو تذاكرين لثانوية العامة في الإجازة لأني عن نفسي كنت وقت الدراسة دراسة وقت الإجازة إجازة...هذا عشان يبدا الفصل اليديد وانتي معنوياتج مرتفعة ومتحمسة حق الدراسة...

صدقيني مب مسألة وااايد صعبة انج تيبن نسبة عالية وأنا بقولج خلاصة تجربتي:

1- لاتنسين الصلاة وصلة الرحم والعبادات هذي حطيها في الأولويات ... لا تهملينهم حتى لو كان عندج امتحان..وخصصي ورد يومي من القرآن

2- صدق التوكل على الله وإخلاص النية لوجه الله انج تتطلبين هذا العلم لوجه الله عشان تعبج تحصلين عليه ثواب الدنيا والآخرة.

3- توجهي لله بالدعاء وخصوصا الثلث الأخير من الليل وفي السجود بأنه يوفقج ويوفق أخواتج في الله..والأدعية المأثورة عن الرسول(صلى الله عليه وسلم)...وسبحان الله خلي ثقتج بالله كبيرة...

3- مع بداية العام الدراسي اهم شي نفسيتج لا تتعبينها بالتفكير انتي سوي الي عليج والباقي على الله..

5- المذاكرة أول بأول من أول يوم يبدا فيه العام الدراسي ..

6- مواد الفهم: حاولي تفهمين المواد أول بأول والفهم مهم جدا ...دايما تدربي على المسائل بشكل يومي (رياضيات مثلاً) و اذا اي نقطة ما فهمتيها لازم تسألين المدرسة أول بأول..حلي نماذج اسئلة خارجية عشان ايدج تاخذ على المسائل وتحلين بشكل اسرع..

7- مواد الحفظ: مب ضروري يكون الحفظ يوميا لكن خصصي يوم او يومين في الاسبوع لمواد الحفظ بحيث انه مايي اي امتحان الا وانتي راجعتيه من قبل..

8- حاولي انج لما تذاكرين ما تقطعين مذاكرتج كل فترة والثانية بتلفزيون أو انترنت (لا تيلسين لفترة طويلة) لأنه يشتت .. لا خصصي اوقات للمذاكرة واوقات للاستراحة..وطبعا ما تكون الاستراحة اكثر عن وقت المذاكرة..

9- بالنسبة لوقت المذاكرة كل واحد وحسب طبيعته بس لازم تريحين جسمج قدر الامكان ولا ترهقينه بالسهر والمواصلة لليوم الثاني هذ عادة سيئة وما تنفع..افضل النوم من وقت واذا ما خلصتي مذاكرة تذاكرين قبل الفجر بشوي أوبعده..فعلا وقت مبارك

8- لا تنسين التغذية أهم شي.. خصوصاً الفواكة الطازجة..وجبة الفطور لاتهملينها..

10- وسوي جدول مرتب فآخر العام وامشي عليه بدقة..

وأتمنى أني أكون أفدتج ولو بالشي القليل واذا عندج اي شي أنا حاضرة...

مع تحياتي
daisies_island

Daisies_island
16/07/2003, 09:57 AM
صح نسيت أقول لج شي

لا تنسينا من دعائج الصالح حبيبتي :)

أختج في الله
daisies_island

قارئة
16/07/2003, 11:42 AM
أختي جرناسة..
بالنسبة لخلاصة تجربة اختج خريجة الثانوية العامة الفريش .. راح أقولج شو اللي سويته
وكم كانت نسبتي..
كنت حاطة في بالي إن ما في شي مهم في المدرسة إلا كتابي.. يعني كيف؟؟.. اوضح لج.. يعني اذا المدرسة ما تحبني مايهم .. ربيعاتي يحبون المدرسة الفلانية بعد ما يهمني.. الناس تقول عني احووط وايد بعد ما يهم .. انييب صفر في امتحانات الquiz بعد ما يهم .. نرسب في الامتحانات اللي تحدد مستوى الطالب بعد ما يهم.. اللي كنت اعرفه واللي كان يهمني هو اني اوصل لشهر الامتحانات واكون عديت على كل اللي في الكتاب وتمرنت على التمارين كلها.. فعشان جذي بالنسبة لي فالثانوية العامة كانت اريح سنة لأني ما اكون شايلة غير هم الكتاب ..
وبالنسبة للمذكرات فانا بعد ما انصح فيها بس اللي انصحج اتسوينه انج اتحلين الامتحانات السابقة بس لمجرد التمرين ..
وأخيراً مع بداية العد التنازلي لأيام الامتحانات حرصت على قراءة سورة يس يوميا قبل البدء بالمذاكرة.. وحتى ايام الامتحانات حتى لو ما كنت مخلصة الكتاب بعد اقراها وابديها على اي شي ثاني..
وفي النهاية حصلت على نسبة 98% علمي.. :o :) عقبالج..
وعلى فكرة في كثير من الناس كانت معارضة طريقة مذاكرتي لكني كنت فاهمة انا شو المطلوب مني فليش اهتم باشياء ثانية ما راح تنفعني ( أقصد حب المدرسات واعجاب الطالبات) هذا كله سوي له libsing والله يوفقج..
تحياتي..
وأي اسفسار نحن بالخدمة..
وعلى فكرة افضل طريقة لكسب ود المعلمة واحترامها هي الجدية والتركيز في حصتها..

جرناسة
19/07/2003, 01:36 AM
السلام عليكم ..

بصراحة هالمنتدى كل يوم ويزيد اعجابي فيه وباعضاءه :clap:


الاخت Daisies_island شكرا على نصاءحك القيمة والمفيدة ..وافكارج وايد حلوة ومهمة لانج بديتي بالمهم وهو الرابط بين العبد وربه..وتسلمين حياتي.

عزيزتي قارئة ماشاالله عليج نسبتج وايد حلوة ادعيلي بنفسها.. :shy:

بس اختي لو توضحيلي فقرتج الاولى اكثر..يعني شلون مااهتم بدرجات الامتحان..ارجوج وضحيلي ولا تنسيني :o في انتظارج.. :up:



الله يوفقكم اجمعين والله اني مانسيتكم بالدعاء لان هذي مشكلتي وانتو حليتوها.. :up: