المساعد الشخصي الرقمي

مشاهدة النسخة كاملة : انا مبقتش انا .......



افرودييت
19/08/2008, 02:34 PM
السلام عليكم ..........

بجد انتى جتيلى نجده من السما ليا يااستاذه
متتصوريش انا محتاجه مساعدتك ليا قد ايه وفرحت قوى لما لقيت اخصائيه هنا فى الركن
ويارب متتجاهليش مشكلتى لانها بجد كبيره وان كانت النتايج فى شخصيتى اكبر
وده اهم من مشكلتى لانى بجد فى حاجه لعلاج ولحد يعرفنى الطريق الصح او الطريقه اللى استعيد بيها مافقدته مع الزمن وارجوا عدم اهمال مشكلتى ارجوكى ومتقوليش خارجه عن قوانين الركن انا معرفش شكل المشكله اللى تقصديها فى شروطك ايه لكن كل اللى اعرفه انى فى مشكله كبيره بجد مع نفسى اللى مش لاقياها وبالتالى كل يوم بخسر حاجه وكل يوم الكل بياخد عنى فكره غير انا وغير اللى انا كنت عليه وبيفتكروا انى دى شخصيتى بغض النظر عن الظروف المحيطه .............

طولت فى المقدمتى آسفه لكن مشكلتى متتحكي مرره واحده لانى شايفاها كبيره ولو اختصرتها هتشوفيها بسيطه وانا والله صدقينى وان كان ده قدرى الحزن وجرح القلب والغدر وعدم الامان فأنا ممكن اتحمل لكن شخصيتى متتأثرش وده اللى عايزاكى من فضلك تساعدينى فيه ..........

انا اميره ...
عندى 22 سنه وهتم 23 بعد شهرين
خريجه نظم معلومات وان كنت محبتش تخصصى كان نفسى اكون فى فنون جميله قوى .....
لكن للاسف حصلت ظروف كتيره ليا ايام الثانوى وحشه انا كنت فى السعوديه وكنت بتابع المنهج المصرى وامتحانى تابع لابنائنا فى الخارج (السفاره) وللاسف مكنتش بلاقى المدرسين يذاكرولى
ده غير انى اتمنيت اكون مذيعه لكن للاسف كان الشرط اقلع حجابى وكمان ظروف البيئه المحيطه بي منعت احلام كتيييييييره من تحقيقها .............
فى 2 ثانوى جبت مجموع وحش وده جعل بابا( استاذ جامعى) يعاملنى وحش قوى قوى ده غير انه كان قاسى قوى عليا فى السنتين دول واحنا فى الخارج وده من ضمن مسببات عدم المذاكره بتركيز وخوف ............
طبعا بعد المجموع انا حولت منهج سعودى انا كنت علمى وسمعت انه ممكن اروح ادبى عادى زى مصر هنا وده للاسف كان غلط ومكنش صح ..........
وبعد مابدأت استعيد ثقتى بنفسى وبدأت ارتاح فى جو المدرسه وحسيت انى مرتبه وحياتى منظمه (لانى فى 2 ثانوى مكنتش فى مدارس كنت منازل وبالتالى كانت الحياهوالمذاكره ممله)
وكنت شاطره جدا جدا فى المدرسه ..........آه نسيت اقولك انى فى مصر هنا كان المدرسين بيمتدحوا ذكائى لدرجه كبيره جدا والكل كان بيشهد بذكائى حتى زمايلى فى الجامعه كانوا معجبين بذكائى فى الحياه جدا وده طبعا عرضنى لصدمه قويه جدا جدا لما فوجئت بمجموعى فى الثانوى وخصوصا وانى اكتشفت ان المدرسين مكنش عندهم ضمير وكانوا بيدونى المنهج نصه بس على انه كامل (كنت باخد دروس خصوصيه لعدم وجود مدرسه) اتأثرت جدا واتهزت صورتى قدام نفسى وحسيت بظلم كبير لما عرفت ان السنه دى 2 ثانوى المنازل انظلمت ولانى كنت الوحيده المنازل فى المدرسه ورمونى فى لجنه كلها اولاد ( مدرسه مشتركه ) لكنى الحمدلله بأخلاقى كنت محور احترام الجميع ..............
لما روحت المدرسه فى السعوديه وحولت للادبى واتعرفت على بنات وكنت فرحانه جدا بحياتى الجديده وقولت انها فرصه جديده لاستعيد ذاتى واعوض كل الشماته اللى شوفتها من اصحابى فى مصر وقرايبى (انا الحمدلله جميله وده كان بيسببلى مشاكل مع البنات كانوا بيكرهونى من غير سبب وكنت وحيده برغم انى اجتماعيه جدا وبسبب مركز بابا دايما كانوا بيتخوفوا منى على انى مغروره وانا والله ماكنت كده البنات اللى بيكرهونى كانوا بيقولوا عنى كده وده اللى عرفته بعدين )

المهم ...
فوجئت وبعد امتحانات الشهر وكنت طالعه التانيه فى الفصل انى مرفوضه :rolleyes: وكانت المدرسه بتضحك وهى بتعرفنى الخبر كانت زى اللى بتدينى سكينه وبتضحك والمصينه انه كان فاضل على امتحانات نص السنه شهر ...............

رجعت مصر بحسرتى وبعد مرور شهووور على الدراسه هنا وانا فاقده الامان من الدنيا كلها والغريب ان بابا كان بيعاملنى وحش لظروفى وانه بيتدايق كل مايشوفنى لانه بيفتكر اللى بيحصل ........
ده آثر شويه عليا وقتها لان الكل كان بيتعامل معايا على انى مجرمه مستحقش الحياه ..........

المهم حاولت اعدى السنه وانا خلاص فقدت احساس انى ممكن اعوض كل ده وانى ادخل كليه كبيره وسلمتها لله ...............

شيلت طبعا ماده تاريخ (لكبر التاريخ المصرى) ولانى ملحقتش اخد فرصى فى التذكار زى الباقى .......
لكن انا فاكره بابا اليوم ده بالذات اول يوم احس حنيته لانه خلاص مش عارف ليه بيحصل كده قاللى انى هتفضلى بنتى مهما حصل ولازم ده ميهزكيش ابدا وتفضلى راسك مرفوعه ........
وطبعا اتعرضت للشماته من تانى وكل ده وانا مش بايدى حاجه .....................

دخلت جامعه خاصه بعد مناوشات كبييييييييييره جدا جدا وخناقات مع بابا وتدخلات من العيله
والحمدلله دخلت ..................وكنت لسه بشخصيتى وقتها

لوسمحتى لو هينفع اكمل عرفينى انا والله ماقصدى فضفضه انا بحاول اوضحلك المشكله من اولها وليه شخصيتى بقيت مهزوزه وبقت منعدمه لدرجه ان اى حد بيلاحظ نى من غير شخصيه بعد ماكنت معروفه بقوتها ...............
لموضوعى بقيه بس انا للاسف لازم اقوم دلوقتى وهكتبلك تانى بس تابعينى الله يخليكى .........

تحياتى

ساعة غروب
21/08/2008, 02:11 AM
تابعي

افرودييت
02/09/2008, 03:48 PM
http://www.3roos.com/forums/t377048.html

متشكره جدا جدا
بس بستأذنك حاليا انا نفسيتى تعبانه قوى ومش قادره اكتب ده رابط لمشكله من ضمن مشاكلى بعانى منها حاليا
زى كل سنه او زى كل خطوبه
ودى من اكبر المشكلات (تعدد الخطوبه) اللى هزت شخصيتى
بنجرح جامد قوى ارجوكى ادعيلى علشان ميحصليش حاجه
حاسه انه معدش عندى مقدره اتحمل متاعب وفشل برغم ايمانى بانى استحق النجاح
لكنى فعلا بقيت بكره نفسى وشايفه انى مستحقش اعيش لانى فشله ونفسى اوصل لنقطه واحده السبب فى فشلى فى كل شئ كده حتى خطوبتى مش عارفه اخليه يتمسك بيا

افرودييت
02/09/2008, 11:02 PM
طيب ممكن تقوليلى اى حاجه تطمنى او تعرفينى اتصرف ازاى فى مشكلتى دى اللى بعتلك الرابط بتاعها ؟
علشان تعرفى دى جزء بسيييييييط من مشاكلى اللى واجهتها .........
بس بجد مبقيتش بعرف افكر

افرودييت
29/09/2008, 11:14 PM
استاذه انا فسخت خطوبتى الرابعه
وخلاااااااااااص تعبت
اكيد العيب فيا
اكيد انا اللى مش بعرف اخليهم يتمسكوا بيا
انا اللى فاشله اكييييد
ساعدينى الله يخليكى اللى زيى يستاهل الموت والله

افرودييت
03/10/2008, 02:44 AM
ارجوكى حسسينى انك متابعانى حتى
والله انا اتدمرت خلااااااااااص
محتاجه اعاده تأهيل علشان اقدر اتعامل مع الناس انا
مبقتش بعرف اتعامل مع حد ومش بآمن حتى لاهلى دايما حاسه ان كل القريبين منى هيغدروا بيا
اعمل ايه ؟

افرودييت
07/12/2008, 02:04 AM
استاذه
ماما ماتت وفسخت خطوبتى
حاسه انى محتاجه علاج نفسى
بقيت بعيده قوى عن ربنا برغم انى كنت بصللى كل الفروض وقريبه قوى منه حتى قيام الليل مكنتش بتأخر عنه
بس مش عارفه مالى عندى تمرد فظيييييييع على حياتى وخصوصا بعد موت ماما الله يرحمها...
استاذه انا عايزه كل الامهات اللى فى الكون كلهم يموتوا
وكتييير بحس انى مش عايزه احس ان فى بنت مبسوطه زى منا بعانى فى حياتى كده ...
اه لو تدينى فرصه وتحسسينى انك هتساعدينى وتقوينى وتوقفينى على رجلى لان اللى كانت كده معايا امى والله يرحمها ...
ارجوكى متستهونيش بمشاكلى لانى بجد بقيت مريضه نفسيا..

ساعة غروب
09/12/2008, 07:01 PM
هلا اختي

ان الله مع العبد مدام العبد مع ربه

شوفي الجأي إلى الله وبدأي تصلي فروضك وكوني مع الله

وعليك بسورة البقرة انها ذات مفعول عجيب

رحم الله والدتك وجعل مثواها الجنه قولي آمين


اما بالنسبة للي اتحملتيه فانا اشوف انج مو محتاجة لطبيب نفسي لانك ماشاء الله كل ده مستحملاه وصابرة يعني انتي عندك ثقة عالية بنفسك بس انتي متأثرة من التجربة القاسية اللي انتي مريتي بيها


مثل ما قلت لج انتي تلجأين إلى رب العالمين هو اعلم من اي دكتور وهو اعلم من اي شخص باللي فيه صالح لك

اقرأي سورة البقرة

يارب يا كريم ارحها وارحمها واغنها بفضلك ورحمتك وجعل مثوى امها الجنة واجعل قبر امها روضة من رياض الجنة وسخر لها عبادك واطرح المحبه في قلوب من حولها يا رحمن برحمتك اناجيك ان تحبها مثل ما تحبك وترزقها من يستر عليها في الدنيا والآخرة

افرودييت
10/12/2008, 11:44 PM
ياااااااااااااااااه اخيرا رديتى ...........
شكرا جدا على كلامك ودعائك
بس بجد انا تعبانه
عارفه
انا بقيت على طول فى حاله تمرد
من بعد موت ماما باسبوعين كده انقطعت على الصلاه بعد ماكنت ملتزمه جدا على فروضى وعلى اقامه الليل وقراءه سوره البقره يوميا لكن مش عارفه مالى
بعدت على ربنا وكمان عندى يأس من كل شئ ومفتكرش انى هتجوز ولا انه هيجيلى حدكويس اساسا
كذا واحد يبعتوا وميجوش ..........
ماما ماتت
خطيبى سابنى كالعاده
طيب حياتى روتين مميت وزهقت منه بجد وكتير بدعى ربنا انه يرحمنى
طيب اقولك على سر
انا بجد محتاجه اتجوز يااستاذه والله تعبانه محتاجه احس بحضن الزوج نفسى قوى احس بانوثتى معاه .........
تعرفى حاجه تانيه
ساعات بحس انى محتاجه اسمع ان كل البنات فسخوا خطوبتهم او امهم ماتت
علشان محسش انى لوحدى فى همومى دى اللى بتزيد كل يوم
على فكره الاحساس ده جديد متفتكريش انى وحشه والله ابدا ............
انا معنديش امل فى الدنيا دى خالص
ولا امل فى نفسى ومش عارفه اتعامل مع الناس ازاى ؟؟؟
وبقيت بعيط بسرعه فظيييييييييييعه وعلى طول مكتئبه وحاسه انى بقيت عجوز ...............

ومحسوره على حالى وعلى جهازى اللى اتركن جمبى
نفسى ادلع تانى زى ماما ماكانت بتعمل سابتى وحدى ولا عارفه اعمل حاجه ...............

افرودييت
27/12/2008, 01:32 AM
استاذه تصورى بقيت عايزه كل الامهات تموت
انا زعلانه قوى من نفسى ..........

ساعة غروب
28/12/2008, 09:21 AM
الله يهديك ويصلح شأنك كله