المساعد الشخصي الرقمي

مشاهدة النسخة كاملة : أخت زوجي ملكت و أنا .... مقهوووووورة



lamsat fara7
03/05/2008, 10:43 AM
تخيلوا يا بنات
زوجي جاء قبل اسبوعين و قال لي ان اخته متقدم لها واحد و وافقوا عليه بس اهله موصينه هو و اخوته ما يعمون حريمهم بس زوجي قال لي ثقة بي لأني مو نقالة كلام و بحفظ السر
قلت الله يبارك لها بس غريبة ما يبون احد يدري و سكت قلت يمكن لما تملك نعرف
المهم ليلة الجمعة اللي فاتت جاء زوجي قال لي ان الليلة ملكة اختي و يبي يروح
بس طلع عندنا شئ طارئ ما قدر يروح وقتها
المهم امس قال لي نروح بيت اهله انا ما حبيت اروح و شرحت له وجهة نظري و اني متضايقة من اللي سووه
بس حسيته متضايق و ما حبيت ازعله و رحت
دخلنا و لقيتهم جالسين مع سلفتي قريبتهم و انا غريبة عنهم
و مبين من طريقة الكلام انها تدري
و انا سويت نفسي مثل الأطرش الزفة رغم اني كنت ميتة قهر:confused:
و جابوا لي كيك و حلى الخطوبة و هم ساكتين
و لا انا سألت كنت اكلمهم عادي
انتبهت لأخت زوجي تكلم امها بشويش كم مرة ( ما بتقولن للمسة؟؟؟) و عمتي مطنشة و لا كأنها تسمع!!!!!
ليييييش ؟؟؟ الحمد لله ماني حسودة و لا شرية و لا نقالة كلام!!!
و لا بناخذ عريسها منها الحمد لله أصغر خواتي مخطوبة ربي يتمم لها على خير
قمت لملمت كرامتي و قلت لزوجي ابي امشي وطلعت من غير ما يقولوا و لي:mad:
و في السيارة انفجرت و قلت لزوجي لا يكون اختك متزوجة مسيار و ...... الخ ... الخ

حاسة حالي متضاااايقة منهم و ما نفسي اسمع طاريهم و لا اروح لهم عمري كله
شلون اتصرف معاهم حاسة انهم قللوا قيمتيو انا كل شئ و لا كرامتي؟؟؟

سوسو
03/05/2008, 10:55 AM
يسعدك صباحك حبيبتى مدام زوجك واقف معك خلاص ابتعدى عنهم وخلى علاقتك سطحية معهم وطنشى ولا تهتمى لهم اصلالمى اطنشى وما تسالى همى بنقهرو منك مدام انت وزوجك مبسوطين ومتفقينم خلاص فخار يطبش بعضو واللة بوفقك ويسعدك تقبلى مرورى

سفيرة فوق العاده
03/05/2008, 11:07 AM
صباح الخير يا الغاليه

هدي هدي،، من الصبح وإنتي معصبه وأعصابك تعبانه

ما يستاهل الموضوع هذا كله،، خلك أكبر من هالشي

هم ما يبون يقولون على كيفهم خلاص،، كلن ينام على الجنب اللي يريحه،، ليه كل هالزعل،،

يعني زوجك مب مقصر وياج وقالج اللي صاير ،، من نفسه لأنه واثق فيك،، فخلاص

هدي هدي،، والموضوع ما يستاهل،، وبعدين أهل زوجك هم أهلك،، وأهل عيالك،، لازم تستحملين

شبتسوين يعني بتخانقين وياهم على موضوع تافه ،، والله لو نظرتي له بنظره أوسع شوي،، بتشوفين إن هالشي ما يستاهل حتى إنك تنفجرين في وجه زوجك المسكين

اللي عليك إنك تتبعين كلام رجلك،، وخل الأهل على راحتهم،، قومي بواجبهم ولا تقصرين من ناحيتك،، وتأكدي إن لما تسوين خير تلقينه،، فخلي قلبك أبيض ولا تتحسسين لأقل الأسباب

موفقه يا الغلا

:)

حبيبة اولادها
03/05/2008, 11:15 AM
حبيبتي انتي لا تنقهرين ولا شي وترى ما يستاهل ان ريلج ينقث بالكلام لانه اهو ماله ذنب
ادري كنتي متضايقه ومعاج حق
اهم اللي سووه غلط 100%
وانتي سويتي اللي عليج وزياده
رحتي رغم معرفتج انهم مايبونج تعرفين
بس اختي اهم ودهم يقهرونج بس انتي بحكمتج وذكائج ليش تنولينهم إللي يبونه
اهم يبون يبطون جبدج >>> تروحين تالي لزوجك وتحنين عليه واهو بعدها يزهق منج
حبيبتي عليج عليج من زوجج وإلا اهم تحصيل حاصل >> متى مارضى اهو عليج بعد الله سبحانه انتي بخير
وبيني له انج تبين رضاه وخلي الغلط من صوبهم مو من صوبج
وإلا اهي تزوجت ولا حتى عنست انتي مو خسرانه شي مثل ما قلتي
ربي يريح بالج ويهنيج مع زوجك ويبعد عنكم كل مكروه

lamsat fara7
03/05/2008, 11:17 AM
يسعد لي ايامكم ياارب
حبيبتي سوسو انا فعلا علاقتي معاهم رسمية من قبل بدون سبب
ما احس انهم يحبوني و انا طبيعتي حساسة فابتعدت و اكتفيت بالزيارات المتباعدة بس يصير لهالدرجة يلبسوني ما كأني مرت ولدهم؟؟؟

الغالية سفيرة قاعدة احاول هدي بس ماسكني صدااع من البارحة لين ألحين راسي بينفجر
نفسي اعرف ليييش يسوون جذيه ؟؟؟

lamsat fara7
03/05/2008, 11:23 AM
حبيبة أولادها ..
وانتي صادقة شعلي منها الزم ما علي رضى زوجي بس تصرفهم مأثر علي كثييير و مأزمني
أنا ما شافوا مني الا الخير ليش يعاملوني بهالطريقة؟؟؟؟
و القهر اني اضطر اجاملهم لعيون زوجي بس ليمتى بتحمل تصرفاتهم ما ادري
كرهت اروح لهم و كرهت اشوفهم و حتى طرواهم صارت تضغط اعصابي
الله يرد كيدهم لنحرهم

صبـــاح
03/05/2008, 11:35 AM
هلا اختي

في البداية صباح الخير

ثانيا .. لا تستغربي من شي في هذا الزمن حتى الصديقة تخبي على صديقتها ...

وخلاص عزيزتي اذا قالوا لك باركي لها ولا تبينين شي وإذا ما قالوا لك الله يهنيها ... ولا تتضايقين وألزم ما عليكِ صحتك وزوجك وعيالك وقومي بالواجب معاهم وبس ...

ادري بتقولين اني ماخذه الموضوع ببساطة بس بالنسبة لي الحين وبعد اللي شفته ... ما صار فيه يسوى اني اتعب وامرض علشانه.... الزم ما علي رضا امي وابوي من بعد رضا ربي ... يا اختي هونيها وتهون

صوت نبضي
03/05/2008, 11:37 AM
الله يفرج همك يارب
حبيبتي ماعليكي منهم انتي سوي بأصلك
خليكي طيبه معاهم زي ماانتي وماعليكي بالباقي
الناس هادي الايام صايرين سيئين لدرجه فظيعه
طنشيهم ايش يعني ملكت ماصار شي
كل البنات بيملكوا
المهم لا تزعلي نفسك

سلامة راسك
كوني بخير
اختك
نبض

غرٍوٍب
03/05/2008, 11:39 AM
عادي ولا تزعلين

زوجك خبرك خلاص وماخبى عليك

بكيفهم بسلامتهم خل يخبون

حبيبة اولادها
03/05/2008, 11:41 AM
حبيبتي تبين اريحج اكثر

بقولج عني >> انا صرت بنت لام زوجي واخت لأخواته .. بس هل حبوني مثل امي وخواتي >> اكيد لا

هل تعاملني مثل بنتها ؟؟ لا >>>لو اعطيها عيوني المركبة

حبيبتي الكنة غير والبنت غير

انتي بطيبج وطيب اصلج ماقدرتي تغيرين تصرفاتهم مو لان الغلط فيج

لكن لان الغلط فيهم

وساعات فعلاً يكون صعب نغير طباع ناس اهم مايبون يتغيرون لأسباب منها الغيره والحسد >> الله اعلم

حبيبتي سوي الخير علشان الله سبحانه لان عنده ما بيضيع .. ولا اهم ناس إن رضوا عليج اليوم باجر بيزعلون وبينسوون إللي سويته سنين

وثبتي لهم ان انتي احسن منهم وانا عارفه انج احسن

وطنشي لأي تصرفات او حركات لانها تدل على قلة عقل صاحبها

والحين بسألج سؤال واحد ؟؟ يسوون عليج انج تنقهرين وتنبط جبدج واهم قاعدين ومستانسين ولا عليهم

مو معاهم بس مع الكل .. إللي يحبج حبيه واهتمي لأمره وإلا ما يفتكر فيج عطيه طناش وقولي ما يستاهل يمر مرور الكرام في بالي حتى

سامحيني يالغلا طولت عليج بس لاني كنت اول مثلج وايد اسوي حساب للناس تالي قلت منهو ذابح روحه علي علشان اذبح عمري عليه

][دخون][
03/05/2008, 01:10 PM
طيب هم احرار وحقهم يعلمون ولا مايعلمون حتى لو انتي قريبه لهم
واختي لو بتنخطب وتملك محنا بقايلين لاحد حتى اقاربنا وبكيفنا (استعينوا على قضاء حوائجكم بالكتمان) وبيعلمون بالوقت المناسب حتى لو حملت مراح ننشر الخبر بعدين بيعرفون مو من اول الشهور (f)
حتى لو اهل زوجي سوو كذا مراح ازعل بالعكس راح اتفهم واسكت :)

Ba7reneyah
03/05/2008, 01:20 PM
الله يعينج .. أتفهم مشاعرج و أسأل الله عز وجل أن يصبرج على هالتصرفات

الصراحة يحز في النفس ان الوحدة تحب أهل زوجها و تراعيهم لكنهم ما يقدرون

الله كريم

الروح
03/05/2008, 01:26 PM
عن نفسي مراح اعلم اذا جا عريس ....حتى وقت العقد أستعينوا على قضاء حوائجكم بالكتمان حتى لو هي صديقتي والقريبه
الافضل ان البنت ما تعلم احد الا لما يصير كل شي المفروض الوحده تتمنى الخير لناس وتقدر الظروف اذا ماعلموها كل شي

اللؤلؤه السوداء
03/05/2008, 01:35 PM
لا تزعلين يا الغاااليه
والله ما يسوى علييج تعورين رااسش عليهم

اهم شي زووجك ...... شووفي هو وااثق فييج واقال لج لو ما قال لج بيكوون ليش حق تزعلييين

وحااولي يا عمري لا تتكلمين عن اهله وانج تبيني زعلج منهم مهما يكوون هذولا اهله وما يرضى عليهم

انفينيتي
03/05/2008, 01:44 PM
لا تزعلين عمرج ولا تنقهرين الغاليه
شي منهم بسم الله يخافون من الحسد
يخافون العالم كله يحسدهم،


وهم مثل ما عاملوج بهالطريقه، عامليهم
بنفس الأسلوب في أي شي يخصج
وطنشي على قد ما تقدرين

أهم شي علاقتج بريلج

lamsat fara7
03/05/2008, 02:14 PM
تسلموا لي خوات و حبايب يا اغلى عرايس
جعلي ما انحرم منكم و لا يخليي من طيبة قلوبكم
و صحيح الزم ما على الوحدة صحتها
خليتوني اراجع نفسي ... صحيح منهم هم علشان اذبح نفسي علشانهم؟؟؟
يارب ينول كل وحدة فيكم اللي تتمناه و تشووف السعادة و الخير و الصحة في نفسها و زوجها و عيالها و اهلها و احبابها... ما قصرتوا

المجدليه
03/05/2008, 02:32 PM
حبيبتي لا تزعلين امثالهم وااااااجد

انا الأسبوع اللي فات جاتنا مره تخطب اخت زوجي وانا على نياتي اسوي القهوه والحلا

وناداني زوجي علشان اطلع وما اضايقهم ويوم جينا ننام قال لي ان الحرمه جايه تخطب اخته تخيلي انا بالبيت وماادري

اخته الثانيه حملت ومادريت الا يوم شفت بطنها

عادي احقريهم ولا تهتمين ولا تعطينهم اكبر من حجمهم

أورفليم
03/05/2008, 02:38 PM
الله يعينك

ام عبدالعزيز 2
03/05/2008, 02:44 PM
الله يكون بعونك يااختي

نانا حلوة
03/05/2008, 04:23 PM
الله يفرج همك يارب

اصـيـلــه
03/05/2008, 07:36 PM
السلام عليكم

اختي انا اقول لج احسن حل

لاتقهرين روحج الا قهريهم ولين قالو لهم قولي لهم طيب الف مبروك وخلاص لاتغزرين

حسسيهم ان الموضوع مايهمج وخلاص سالي عادي ولاتبينين لهم انج زعلانة

واهم شي زوجج دامكم مرتاحين واهله الله يصلحهم

sss_12
03/05/2008, 08:11 PM
لمسات ودي اضربك على ايش تنقهريييييييييييييييييييي يييين والله انتي جالسة تقهرين عمرك دايم انصح البنات الي اهل الزوج مايحسبون لهم حساب انا اسحر زوجي السحر الحلال ولا اقطعة منهم لانه حرام بس انا مش ملزومة اني اروح لهم بكل مناسباتهم خليكي كتاب مقفل مايعرفون عنك شي لا حمل ولا ولا ولا كللللللللل شي


حتى بمناسباتهم مو لازم تروحين اتعذري روحي زيارة لهم بشهر مرة خطافي عشان يعرفون قيمة نفسهم احسن ماتشوفين العن من كذا الا والبنت معاها سكر لانك مهما قلتي مراح تهتمين فيهم بتكونين عندهم على نار من حركاتهم

ناديه يوسف
03/05/2008, 08:58 PM
حبيبتي ليه تحرقين اعصابك ودمك انا عارفه انه موقف يقهر بس انت الحمدالله لاحسوده ولا غيوره علشان يخبون اذا مابغوا يقولون كيفهم اذا قالوا لك قولي مبروك وبس ولا تحسسيهم انك زعلانه واهتمي بزوجك وعيالك وبس ولاتهتمين بالاشياء اللي تنكد حياتك

noora qatar
03/05/2008, 09:11 PM
بصراحة يا ختي مالج داعي تزعلين كلش لانج انتي مرت ولدهم مو اختهم بليز لازم تتوقعين انج تسمعين اخبارهم من الناس
وبعدين مو بس اهل زوجج جيه لا كل الناس الحين هالشكل

♥بنوته زايد UAE♥
03/05/2008, 09:18 PM
كبري عقلج شوي حبوبه ..

ليش مقهوره .. زوجج قالج .. وخلاااص ..

يمكن هم مايبون يخبرون حد .. مع ان غريبه المفروض انكم انتوا تعرفون .. بس مايخالف خليج عاديه ولا تقولين ان اختك ليكون متزوجه مسيار وما ادري شو .. عادي ..

وانتي ليش ما سألتيهم ان هالحلاوة شو المناسبه ؟؟ .. ساعتهاا بيقفطون وبيحسون انج عاديه وهم بينقهرون ..

الجوهرة السعودية
03/05/2008, 09:27 PM
لاتزعلين كل واحد حر بخصوصياتة انتي بكرة عندك موضوع ولا سالفة لاتقولين لهم طالما هم معتبرينك غريبة

عامليهم بالمثل اضحكي واهرجي بس لاتعلمينهم باخبارك وحدة بوحدة وخلاص

رومانسية مووت
03/05/2008, 09:39 PM
يوووووووووووووووووووووه

حبيبتي تضيقين نفسك عشانهم ماعليك منهم ابدا الحمدالله ان زوجك يحبك وقالك وماخبى عليك

..★شـــااانيل★..
03/05/2008, 10:23 PM
هههههههههههههههههههه
ضحكتيني ذكرتيني بحال جماعتنا يحبون يخبون ويدسون ولا يعلمون احد وكل شي عندهم بالسر
مثل حالتك لكن ما عليه منهم مطنشه ومكبره مخدتي
والي ما يبيني ابيعه في السوق

متزوجه وتعبانه
03/05/2008, 10:29 PM
حبيبتي معظم اهل الزوج جذي الله لا يراويج شيء انتي بعدج مشكلتج نقطه فى بحر ماعليج منهم هاذي مشكله بسيطه ماتسوي صج شيء يقهر وحاسه فيج بس دام اهم يبونج بيعده عنهم اما انتي قهريهم لزقي فيهم وسألي عنهم علشان ماياخذون عليج نقطه انج فيج عيب علشان يعرف ريلج ان العيب من اهله وبتكبرين في عينه لما يشوفج طيبه معاهم واهم اشلون معاملتهم معاااج وبتكسبينه وبتصيرين الأولي والأخيره فى حيااته.

ام عزوز^الكويت
04/05/2008, 05:09 AM
حبيبتي ولاتضايقين نفسج ولاتقهرين عمرج دام ريلج معاج زين طنشيهم وخلي زياراتج لهم قليلة وعلاقتج معاهم سطحية اللي ما يبيج ماتبينه بهالزمن صراحة لا اهل ينفعون ولا اهل ريل المهم ريلج وبيتج وعيالج وسوي خير وقطيه بحر ولا احد يستاهل ضيقة الخلق اللي انتي فيها.... والله يسعدج حبوبة ويبعدج عن ضية الخلق والكدر وتقبلي مروري

Barbie Q8
04/05/2008, 05:19 AM
يا عمري ..

والله ماتستاهلين ..

انا أقول ريلج ممعاج وخلاص ماله داعي تكبرين الموضوع ..

خليه يمر مرور الكرام ...

والحقران يقطع المصران .. >>مثل كويتي <<

وخلي روحاتج لهم بس بالمناسبات والأعياد ..

وخلي زوجج يشوف إن أهله مايبدونج .. ؟

وطنش تعش تنتعش والله العظيم ..

ولا تكدرين بالج عشان ناس مايبونج ...

lamsat fara7
04/05/2008, 07:21 AM
و الله العظيم فرحتوني يا أحلى و أغلى خوات ... من جد ريحتوا بالي و شرحتوا صدري
فديتكم .. جعلنا دوم ان شاء الله
مثل ما قلتوا صحيح الحقران يقطع المصران و خليني ألبسهم مثل ما يلبسوني ...
بس بالذمة مو تنكسرون لما تصير مناسبة لأهلكم و حمولة خواتكم موجودين و مثل الأهل وياكم إلا حمولتك انتي ما يبينون و لا حتى من باب الأدب و الواجب؟؟؟؟
الله يجبر بخاطركم مثل ما جبرتوا خاطري و يقوي نفسيتي علشان أتقبل حركاتهم بالذات ان عرس اختي قريب

اللي محسسني بالمشكلة زود اني كنت متزوجة قبل و تطلقت و تصوروا الفرق
كانوا أهل طليقي أهلي و أمه أمي و محبتهم لليوم بقلبي و محبتي بقلوبهم ما تغيرت
لليوم أسأل عنهم و يسألون عني ...
الله يسامح أهل زوجي و يروي خواته حمولة مثلهم علشان يحسون
حسبي الله و نعم الوكيل فيهم

دلوعةحناني
04/05/2008, 07:55 AM
انا مستغربه انتي ليش مقهوره لهذه الدرجه
الشئ هذا يخصهم وما ضرك بشي ابددددددددددددد
لا تزعلين نفسك وتغثين زوجك على امور ما تهمك بشي ولا تخصك
كيفهم وانتي اتبعي معهم نفس الاسلوب بالستقبل خلي كل سوالفك اسرار باسرار ولما تزوجين بناتك او لادك انشاء الله لا تقولين لهم وخلاص وحده بوحده وماعليك من احد
تحياتي

الحب الأجمل
04/05/2008, 09:16 AM
هلا حبيبتي ....
لا تهتمين لهم ابد ولا توجعين قلبك اهم شي زوجج معاج ويعرف حركاتهم البايخه وعلى قوله المثل (اذا صفى القمر ما عليج من لنجوم )
واذا هم ما يبون يعلمون كيفهم انتي سوي روحج ولا تدرين بشي ولاااااا تباركين لهم

فتاة المستحيل
08/06/2008, 03:57 AM
والله يا االغالية انا صار لي نفس اللي صار لج ...........والمر والامر انهم ملكاو لبنتهم واخوها اللي هوا ريلي وانا ما ندري تصدقين ؟؟؟؟؟؟؟؟؟ دريت من الناس عاد تصدقين هذي ...؟؟؟؟

اخت زوجي تقدم لها واحد واخته هالشخص تصير رفيجتي ........وراحوا ملكوا بالمحكمة وكانوا الشهود اخوانها ......وبعدا بكم يوم سكيتي سووا ملكة ورقص وفرفشة وانا ما ادري لا انا ولا ربلي اللي هوا اخوها الكبير ما ندري عن شي .........والله اني احترييييييييييييييييييت حيييييييييييييل على نفسي وحيييييييل حيييييييييل على ريلي لانه ولا كانه ولدهم !!!! وانا دريت من رفيجتي اللي هيا اخت العريس ....اتصلت علي ثاني يوم تقوللي وينج امس ما كنتي بالملكة اقولها ملكة مين تقوللي ملكة اخوي واخت زوجج ؟؟؟ والله اترفع ضغطي حييييييل وازيدج من الشعر بيت في زواجها طلعوا خواتها وبنات خالها ورفيجاتها يتصورون معاها وانا وسلفتي كاننا شقول بس ...........رغم اني انا اصير بنت عمتها يعني اصير لهم مو غريبة عنهم مثل سلفتي .......والله ما كلفوا على خاطرهم ينادون علينا نتصور معاها مع المصورة ثاني يوم يقولون والله نسيناامس نناديكم تتصورون معانا ....!!!!!!!!!! نساكم الموت قولوا امين ........والله ثاني يوم ارتفع ضغطي وتفور دمي ........والمشكلة انها شاااااااااااااااااايفة نفسها ومتكبرة حيييييييييييييييل حيييييييييييييييل بصراحة اهيا جميلة بيضا وشعرها طويل وممشوقة القوام بس هل هذا يعطيها الحق انها تتكبر وتعاملنا بنفس شينة ؟؟؟؟؟؟تعاملني بنفس خاااااايسة رغم اني والله اتعامل بحذر شديد وياها عشان ما ابي اغث نفسي بسببها ..........

shoog2006
08/06/2008, 04:13 AM
حبيبتي تبين اريحج اكثر

بقولج عني >> انا صرت بنت لام زوجي واخت لأخواته .. بس هل حبوني مثل امي وخواتي >> اكيد لا

هل تعاملني مثل بنتها ؟؟ لا >>>لو اعطيها عيوني المركبة

حبيبتي الكنة غير والبنت غير

انتي بطيبج وطيب اصلج ماقدرتي تغيرين تصرفاتهم مو لان الغلط فيج

لكن لان الغلط فيهم

وساعات فعلاً يكون صعب نغير طباع ناس اهم مايبون يتغيرون لأسباب منها الغيره والحسد >> الله اعلم

حبيبتي سوي الخير علشان الله سبحانه لان عنده ما بيضيع .. ولا اهم ناس إن رضوا عليج اليوم باجر بيزعلون وبينسوون إللي سويته سنين

وثبتي لهم ان انتي احسن منهم وانا عارفه انج احسن

وطنشي لأي تصرفات او حركات لانها تدل على قلة عقل صاحبها

والحين بسألج سؤال واحد ؟؟ يسوون عليج انج تنقهرين وتنبط جبدج واهم قاعدين ومستانسين ولا عليهم

مو معاهم بس مع الكل .. إللي يحبج حبيه واهتمي لأمره وإلا ما يفتكر فيج عطيه طناش وقولي ما يستاهل يمر مرور الكرام في بالي حتى

سامحيني يالغلا طولت عليج بس لاني كنت اول مثلج وايد اسوي حساب للناس تالي قلت منهو ذابح روحه علي علشان اذبح عمري عليه



بسلم فااااهك حبيبة اولادها.....

كانك انا سبحان الله بني ادم مايخلى من الهم وهم الي حواليه

والوحده منا لازم تتعود انها تطنش وتعيش حياتها لانوا ماحد راح ينفعها

والله ينصرك عليهم امين

#روحـ مغليها#
08/06/2008, 04:19 AM
وعادي يعني بسلامتها تبي تقول ولا مو ميته على اخبارها
صحيح حركة تقهر بس ماعليك منهم
طنشيهم وسوي الموضوع عادي ولا كنك تدرين عن شي
لاتكبرين ترى الموضوع تافهه جدآ ومايسوى تخربين اخلاقك عليه .!
ودم زوجك واثق فيك وخبرك هذا اهم شي
الله يسعدك ويوفقك يالغلا

lamsat fara7
08/06/2008, 11:32 AM
تسلمون يا بنات
فتاة المستحيل الله يعينك و يعيني

عاد تصدقون من يومها ما طبيت بيتهم ؟؟؟؟

و لا حتى فكروا يتصلون و يسألون ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟

الله يعطيهم مثل ما يسوون

كلمات من قصائد
08/06/2008, 12:10 PM
(f)اختي حبيبتي

هونيها ولا تعصبين بهالطريقه

يابنت الحلال اهم شي انتي وزوجج متفاهمين وماعليج من اي شي يسوونه اهله

سوي مثلي اسمع واطنش ولا كني شفت ولا سمعت شي والله ترى راحة بال

غير يوم انج تدققين على كل شي ترى انتي التعبانة في الاخير

وموفقه وتقبلي مروري غاليتي(f)

.. لوليـ ..
08/06/2008, 12:21 PM
لا تتعبين راسك خليهم يطسووووووووووووووون


اهم شيء زوجك علمك وما خبى عنك شيء خلاااااااااااااص انتي مالك فيهم عيشي حياتك

halakhaled
08/06/2008, 01:02 PM
الموضوع ما يستاهل كل دة
عادى
فكك منهم مش عايزين يقولوا عنهم ما قالوا وانتى ما تحرقيش دمك والله ما يستاهلوا

&شهد&
08/06/2008, 01:10 PM
والله أهل الريل هذول الواحد مايدري شيسوي عشان يعدونه من أهل البيت؟؟؟؟؟
نصيحتي لج...صادني نفس هالموقف مع اني كنت على قولتهم أقرب الكنات لهم ومن يومها وآنا علاقتي معاهم أقل من سطحية والحمدلله أي شي يسونه في حقي صار عاااااااااااااااادي ولا يهمني لأنهم هم أصلاً مايهموني صج في البدايه حسيت بتعب نفسيتي وتأزمت بس بعدين خلاص تعودت مثلهم مثل أي ناس ومعرفه عادية وترى زوجي هو اللي ساعدني اني أكون سطحيه معاهم من اللي شافه!

عروس الحب
08/06/2008, 04:54 PM
خلاص مو لازم تعرفين منهم

و حقريهم و قولي حق زوجج ان مرتي زعلانه عليكم

لانها سمعت من بره ان فلانه ملجت

و انتوا ما خبرتوها

و لا تباركيلهم ولا تروحيلهم ليمن يراضونج

وريهم منوا انتي

واذا ما راضوج لا تحضرين لهم فرح ولا يمعه

خلي ينقص ويهم بين الناس

بريستيج
11/06/2008, 12:00 PM
صباح الخير يا الغاليه

هدي هدي،، من الصبح وإنتي معصبه وأعصابك تعبانه

ما يستاهل الموضوع هذا كله،، خلك أكبر من هالشي

هم ما يبون يقولون على كيفهم خلاص،، كلن ينام على الجنب اللي يريحه،، ليه كل هالزعل،،

يعني زوجك مب مقصر وياج وقالج اللي صاير ،، من نفسه لأنه واثق فيك،، فخلاص

هدي هدي،، والموضوع ما يستاهل،، وبعدين أهل زوجك هم أهلك،، وأهل عيالك،، لازم تستحملين

شبتسوين يعني بتخانقين وياهم على موضوع تافه ،، والله لو نظرتي له بنظره أوسع شوي،، بتشوفين إن هالشي ما يستاهل حتى إنك تنفجرين في وجه زوجك المسكين

اللي عليك إنك تتبعين كلام رجلك،، وخل الأهل على راحتهم،، قومي بواجبهم ولا تقصرين من ناحيتك،، وتأكدي إن لما تسوين خير تلقينه،، فخلي قلبك أبيض ولا تتحسسين لأقل الأسباب

موفقه يا الغلا

:)


يسلمو حبيبة قلبي كلامك اكثر من رائع ويدل على فكر اسلامي راقي بارك الله فيك وسخر لك خلقة..وترى الدنيا ماتسوى جناح بعوضه..وهم حرين يقولون للي يبون..انا متزوجه وسلفت تدري عن حاجات انا احيانا ماادري عنها..مو مشكله عاااااااااااااااااااااااا ادي اهم شي ابو الشباب..:15:

هيتاف
11/06/2008, 01:50 PM
اذ علاقتك زينه مع زوجك بخلي علاتقك بهله سطحيه ورسميه

ღღ دريـــم ويــب ღღ
11/06/2008, 02:53 PM
حبيبتي شرايج انا يوم كانت ملكتي بكرا .. ابوي قال لخواته .. وامي قالت لخواتها واخوانها وزعلوا ... بس هذا شي خاص في كل احد ..

مدري انا احس ان الملكة تكون سرية احسن ..


هاذي وجهة نظري ...

rose_rose7788
11/06/2008, 03:11 PM
الله يكون في العون اختي بس البنات ما شاء الله ما قصرن معاج

صمت الجرووووح
11/06/2008, 07:01 PM
حبيبتي تبين اريحج اكثر

بقولج عني >> انا صرت بنت لام زوجي واخت لأخواته .. بس هل حبوني مثل امي وخواتي >> اكيد لا

هل تعاملني مثل بنتها ؟؟ لا >>>لو اعطيها عيوني المركبة

حبيبتي الكنة غير والبنت غير

انتي بطيبج وطيب اصلج ماقدرتي تغيرين تصرفاتهم مو لان الغلط فيج

لكن لان الغلط فيهم

وساعات فعلاً يكون صعب نغير طباع ناس اهم مايبون يتغيرون لأسباب منها الغيره والحسد >> الله اعلم

حبيبتي سوي الخير علشان الله سبحانه لان عنده ما بيضيع .. ولا اهم ناس إن رضوا عليج اليوم باجر بيزعلون وبينسوون إللي سويته سنين

وثبتي لهم ان انتي احسن منهم وانا عارفه انج احسن

وطنشي لأي تصرفات او حركات لانها تدل على قلة عقل صاحبها

والحين بسألج سؤال واحد ؟؟ يسوون عليج انج تنقهرين وتنبط جبدج واهم قاعدين ومستانسين ولا عليهم

مو معاهم بس مع الكل .. إللي يحبج حبيه واهتمي لأمره وإلا ما يفتكر فيج عطيه طناش وقولي ما يستاهل يمر مرور الكرام في بالي حتى

سامحيني يالغلا طولت عليج بس لاني كنت اول مثلج وايد اسوي حساب للناس تالي قلت منهو ذابح روحه علي علشان اذبح عمري عليه

بصراحه اااايد هذا الراي بقووووووووووه وهذا الواقع الله يوفقج