المساعد الشخصي الرقمي

مشاهدة النسخة كاملة : دوم احل مشاكلي باسرع وقت... واحل مشاكل غيري بعد... بس هالمشكلة غيييير!!



Um.Abdullah
22/04/2008, 03:05 PM
السلام عليكم

بعد ما بديت اجن وراسي احسه بيشيب وقولوني الله يستر وش بيستوي فيه قلت اجي لصديقاتي حبيباتي بنات عروس...

بقول لكم قصتي الحزين باختصار << شدعوة البؤساء!!

انا من تزوجت كنت مقررة اني اكون زوجة وام، وهذا هدفي الكبير في الحياة، وقلت ما بخلي شغالة (خادمة) تسوي عني شغل البيت او التربية او او او... ولكن الزمن غدار، تخيلو اني وانا حامل وكرشي شكبرها كنت امسح الارضية واغسل الله يعزكم الحمامات، بس عقب الولادة هلكككككككككتتتتتت صرت ما اقدر اسوي شي والسبب غلطة ممرضة وهذي قصة طويلة ثانية لين قلت كل شي ما بخلص... المهم.. زوجي كان مقرر من بداية زواجنا يجيب شغالة للبيت بعدين غير الخطة وخلاها لي انا بس، ومن جات انصدمت صدمة عمري، ما تعرف لا عربي ولا انجليزي ولا لغة الاشارة بعد!! واستلموها شغالات البيت وقاموا يخلونها تسوي كل شي، انا كنت مقررة اني انا اعلمها التنظيف والغسيل وتربية العيال ووووو لاني اروح الجامعة بس المشكلة في البداية ما كانت مجتازة الفحص! وعقب ما اجتازته عنقزت ( صادها الجدري المائي)!! يعني طول هالفترة وما اخليها تقرب صوب بيتي، وعقب ما خلصت انصدمت ان عمتي علمتها كل شي :confused: وانا عاداتهم ما احبها بس استحي اقول لعمتي شي!! اخذت طريقتها في الترتيب وطريقة الشغالات في الغسيل!! كنت بستخف، بقطع عمري لييييييييييييييييش، انا من اشوف ترتيب عمتي احس اني بنفجر، وتصير الخدامة مثلها!! بتقولون ليش، بقول لكم لان عمتي ترتيبها مثل الفنادق، يعني كل شي مصفوق على الطوفة وكل شي مصفوف وكان نظام الجيش!! وانا احب كل شي وديزاينه الخاص (a) شي مايل وشي عوي... بتقولون مو مشكلة كبيرة!! بقول لكم الا... انا جبتها للشغل ولبنتي لما اكون بالجامعة، وهم معودينها عالشغل بس!! يعني بنتي ما تمسكها الا اذا خلصت شغل!!! و 24 ساعة تشتغل حتى لو عطيتها بنتي اذا ابي ادرس ياخذونها منها الشغالات الثانيات!!! يعني لو ابتلشت ببنتي مرة موصخة اكرمكم الله ما بتعرف تتصرف!!!
وفي مشكلة اكبر الحين، زوجي دايما يقول لي راقبيها تصلي والا لا لان صلاتها في ذمتج، وكل شي حطاه في ذمتي!! واليوم جات شغالة حماي وقالت ماما هذي هادية مافي صلي انا يقول لها تعالي هي تقول نو يبي يخلص شغل!! يا بنات طلع عندها الشغل اهم من الصلاة :confused: رحت ابي انصحها ابي افهمها خذت ساعة وياها!!!
بنات ابي اعرف شلون اقدر اتفاهم معاها وشلون اقدر انصحها؟؟ هي اثيوبية وما افهم للغتها!! وشلون اقنع عمتي ان هذي شغالي وانا ابي اعلمها مب هم؟؟؟ لان عمتي كل شي علمتها وكل شي سوت لها وخاصة اول ما جات رحت اشتري للبنت ملابس طلعت عمتي ماعطتها كل شي وما قالت لي!! شورو علي فديتكم واسفة عالاطالة

Candle
22/04/2008, 03:28 PM
والله من رايي تهونينها واتهون..
بس انتظري لما اتخلص مدتها, جيبي وحده ثانيه وعلميها تعمل كل شي على طريقتج...

زي الـــسكـــر
22/04/2008, 04:01 PM
مرحبا قلبو ...انتي تقدرين تبرمجيها من جديد وهي اكيد ان شالله بتتعود على شغلك انتي واسلوبك وطريقتك ... وبالنسبه للصلاه احسن لك تاخذين اجر فيها وتحاولين معاها بشتى الطرق ... واذا ما انصلح حالها او انك حسيتي انها مرررررررررره مابتتغير وما بتريحك روحيها احسن وجيبي بدالها انتي جايبه شغاله عشان ترتاحي مو عشان ترفعين ضغطك ... والله يقدملك اللي فيه الخير ويصبرك عليها .....

احلى البنااااااات
22/04/2008, 04:41 PM
يوووووووووووووووووووووووو وووووووه اختي ذكرتيني

انا في سنتين جبت 6 شغالات ماغير استقبل واسفر 000000لان الشغل زي ماقلتي كله مايل وكلع عوي

وعمتي ماشالله تعطيهم حتى الملابس والصابون يعني انا اتفرج بس فيهم واسفرهم

وبعدين موضوع الصلاه انا إذا دخل وقت الصلاه اقول لها بسرعه قدامي فجي اللي في إيدج وروحي صلي لين ماتتعود

و نصيحة مجرب 000000مدام عمتج تدخلت فيهم ماراح يسلكون عندج خليها لين ماتخلص مدتها واصبري

وإذا يات بعدها وحده يديده لا تشوفها عمتج ولاتكلمها وروحيلها انت عند باب الشارع ودخليها بيتج على طول

انا اللي يجون عندي وتستقبلهم والله مايسلكون ابد واصلاً مايعتبروني انا كفيلتهم يحسبونه هي

وبعديــــــــــــــــــــ ـــــــــــــــــن ترى قرفنا من سواليف العمات الطماعات اللي يغارون من زوجة الولد

ياليت احد من البنات يحط في المنتدى موضوع ينصحهم فيه ويخليهم يتركون الطمع

ولاياكلون زمنهم وزمن غيرهم 00000000000ولاتقولون مرت الولد مفتريه والله العظيم زمانا هاذا استخفوا فيه العمات اكثر من حريم عيالهم

Um.Abdullah
22/04/2008, 05:38 PM
حبيبتي شمعة ادري اني لو هونتها وتهون، بس اللي صار اليوم بط جبدي، فقع مرارتي، تخيلي اقول لها سوي كذا وكانها مبرمجة على طلب عمتي، قالت لها عمتي روحي فوق غرفة المدام ورتبيها وغسلي الحمام، ما رضت تطلع من الحمام الا عقب نقاش طوييييييييل!!!

زي السكر ادري اني لازم اعلمها بس ما اقدر افهم لها!! يعني بالحركات وبالله تفهم، وبعدين انا قلبي معورني عليها مسكينة تحب الشغل حرام اسفرها، وخاصة انها يتيمة مسكينة

احلى البنات والله حرام عليج وبيشهد لسانج ضدج على كلمتج هذي يوم القيامة، ام الزوج هي الأم وبالعكس لو تدخلت هي تبي راحة عيالها وزوجاتهم، وبعدين انا ما اقدر اقول لها حرف كفاية اني قاعدة في بيتهم واكل واشرب ببلاش!! وتبيني بعد اوقف ضدها! صعب والله ما اقدر، ما اقدر اقول لها اي شي، يعني قلت لها لا تخلين الشغالات يعلمونها تغسل الحمامات لانهم ما يعرفون يغسلونه عدل، احسها تضايقت من كلامي وكاني قلت لها انتي ما تعرفين تسوين هالشي وما عرفتي تعلمين شغالاتج، وراحت اليوم الثاني وجابت نفس الصابون اللي انا استخدمه وتهاوشت مع الشغالات علشان يغسلون عدل
بنات ترى عمتي وايد تتاثر من هالسوالف فما اقدر اقول لها شي، والله صعب...
احاول اني اوصل لها ان شغالتي لا تسوي شي في البيت علشان متى احتجت لها تكون جاهزة مو ملتزمة بشغل البيت كلة، بس مو قادرة اقول لها، ما اقدر هذي مثل أمي فصعبة

بحرينية وأفتخر
22/04/2008, 06:20 PM
اختي انا بقولج فكرة
انج تتفقين مع عمتج وقت اللي انتي تبين الشغالة تنادينها وتشتغل لج .. وحاولي انج تعلمينها شلون طريقة تنظيفج وترتيبج قدام عينها أكيد بتعرف قولي لها إن نظفي وعدلي مثلي الحين شنو راويتج!! ومع الأيام بتعرف أكيد

وأحمدي بج عندج عمة شايلتج اختي .. ترى العمة نعمة والله وناس محرومة منها وناس مب عارفة شلون تعاملها .. الله يخلي لج عمتج وريلج وعيالج وهلج.. الحمد لله الوحدة اذا صارت زينة وياعمتها بين أصلها وتربية أهلها فيها .. واللي تدخل وتعتبر هالعمة أمها اكيد العمة بتحطها فوق رأسها

أهم شي إن خلي الخدامة تتعلم شوي شوي او مثلاَ أثناء ماانتي في الجامعة قولي لعمتج علميها كذا كذا وقولي لعمتج ابيها مثلا تنظف لي الحمام بهالطريقة بضبط مااعتقد بتزعل لأن أكيد تبي راحتج.. وانت اذا عندج أهلج خدامة اثيوبية عندها خبرة في الشغل خل يكلمونها يعلمونها وأكيد بتعرف أهم شي هي تبي تشتغل؟؟ وهذا المهم.. لأن هم مايتعلمون الا بعد مايذبحون صاحبة البيت ويعلون قلبها بس اذا تعلمت أكيد بتريحج

الله ييســـــــر أمورج.. وسامحيني على الرد المخربط لأني مستعيلة بروح أصلي

وطمننيــنا غناتي

مرموم
22/04/2008, 06:24 PM
هلا بك أم عبد الله...

شوفي هذه المسألة بتاخذ لها وقت...يعني أكيد بيجي يوم تفهمي على شغالتك و تفهم عليكي...

و طالما هي تتلقى الأوامر من عمتك...و واضح إنه عمتك حنونة و تخاف على زعلكم...

قولي لها عمتي فهمي الشغالة إني أريدها تمسك البنت...أو عمتي عليمي الشغالة كيف تمسك البنت ( مع إني ما أؤيد بشكل مطلق أترك عيالي عند الشغالات مهما كان السبب )...

يعني روحي لعمتك و خليها تطلب منها...قوليلها عمتي قاعدة أفهمها تنظف بهذه الطريقة و هي مش راضية تفهم علي...

بهذا الوقت عمتك بتفهم لوحدها إنك محتاجة شوية خصوصية لشغالتك...و بتساعدك و ما تزعل منك...

و الله يكون في عونك...

حدائق بابل
22/04/2008, 06:26 PM
حبيبتي شمعة ادري اني لو هونتها وتهون، بس اللي صار اليوم بط جبدي، فقع مرارتي، تخيلي اقول لها سوي كذا وكانها مبرمجة على طلب عمتي، قالت لها عمتي روحي فوق غرفة المدام ورتبيها وغسلي الحمام، ما رضت تطلع من الحمام الا عقب نقاش طوييييييييل!!!

زي السكر ادري اني لازم اعلمها بس ما اقدر افهم لها!! يعني بالحركات وبالله تفهم، وبعدين انا قلبي معورني عليها مسكينة تحب الشغل حرام اسفرها، وخاصة انها يتيمة مسكينة

احلى البنات والله حرام عليج وبيشهد لسانج ضدج على كلمتج هذي يوم القيامة، ام الزوج هي الأم وبالعكس لو تدخلت هي تبي راحة عيالها وزوجاتهم، وبعدين انا ما اقدر اقول لها حرف كفاية اني قاعدة في بيتهم واكل واشرب ببلاش!! وتبيني بعد اوقف ضدها! صعب والله ما اقدر، ما اقدر اقول لها اي شي، يعني قلت لها لا تخلين الشغالات يعلمونها تغسل الحمامات لانهم ما يعرفون يغسلونه عدل، احسها تضايقت من كلامي وكاني قلت لها انتي ما تعرفين تسوين هالشي وما عرفتي تعلمين شغالاتج، وراحت اليوم الثاني وجابت نفس الصابون اللي انا استخدمه وتهاوشت مع الشغالات علشان يغسلون عدل
بنات ترى عمتي وايد تتاثر من هالسوالف فما اقدر اقول لها شي، والله صعب...
احاول اني اوصل لها ان شغالتي لا تسوي شي في البيت علشان متى احتجت لها تكون جاهزة مو ملتزمة بشغل البيت كلة، بس مو قادرة اقول لها، ما اقدر هذي مثل أمي فصعبة

يااختي ياحبيبتي والله انه موضوعج موضوع ملااين الزوجات اللي عايشين مع اهل ريلهم ومن كلامج حسيت انج تحبين ام ريلج وماتبين تزعلينها ,,والصراحه عندي احساس قوي انه ام ريلج تبي راحتج بعد والدليل انه يوم قلتي لها على سالفه الخدامات على طول شرت صابون نفس اللي تحبينه وهاوشتهم

عندج حل بسيييييييط وسهههههههل
اول شي عشان تنحل سالفتج لازم تتنازلين عن بعض الاشياء ,, وتتمسكين عن بعض الاشياء

انتي مايعجبج تنظيف ام ريلج او ستايلها على قولتج كنه جيش ,, تنازلي عن هالشي وحاولي تتعايشين معاااه وهالشي ممكن تحصلين له مزايا يااختي الكريمه ,,وانتي بنفسج بعد ماتطلع الخدامه سوي تعديلاتج برووحج في مكانج ((يعني سوي العوي والسيده ع كيفج )) وطبعاهالشي اسهل بوايد من التنظيف بحد ذاته ومااراح ياخذ وقت منج ,,

الشي الثاني اما تبين حد يمسك بنتج (الخدامه) اذا انتي ماتقدرين تخلينها تمسكها روحي حق ام ريلج واشكي لها انج تبين شورها ,,قولي لها انا تعبانه من الخدامه وابي حل معاها ,, انا عندي دراسه وعندي جامعه والخدامه مب راضيه تطيعني عشان تمسك البنت,, واشكي لها كانها امج,, قولي لها انها ماتسمع كلامج وقولي ,,صدقيني كان ماتاخذ البنت وتمسكها وتداريها عن الخدامه ,, وهاي توقعاتي الصراحه,, خلي ام ريلج اتكلم الخدامه وتفهمها انها لازم تسمع كلامج جي بتستنع وبتمشي سيده ,, مدام هي خايفه من ام ريلج خلي ام ريلج تكلمها ,, وصدقيني بتعمل لج الف احساب ,,

اذا في شي ام ريلج تسويه وانتي مضايقه منه مثل الخدامه ماتنظف الحمام عدل او ماتسمع كلامج ,, روحي اشكي لها ,, بس موتشكين عليها او منها ,, هالشي يضايق ام الريل ,,

اتمنى اني افدتج والصراحه انا ضد انه انتي تحطين الحاجز مثل ماقالو خواتي تاخذين الخدامه من باب البيت وماتخلينها تروح لام ريلج ,, احسها حركه بايخه واهل ريلج بينقدون عليج ,, او انج تشتكين منها نفس الاخت الثانيه اللي قالت ,,شدعوه

كل ام ريل تحب جنتها وماترضى عليها ,, ارضيها وعامليها كانها امج واشكي لها وفضفضي لها والله ماراح تحصلين الا صدر رحب يسمعج ويوقف معاج حتى ضد الزمن ,,

اتمنى اني افدتج واي استفسار انا حاظره

احلى البنااااااات
22/04/2008, 09:02 PM
ختي اشكر لج ردج علي بس انا مستغربه وش الكلمه اللي بيحاسبني ربي عندها يوم القيامه !!!!!!!!!!!!!!!!!!

العمات اللي يخافون على حريم عيالهم قليل ويمكن يكونون نادر وجودهم واغلبهم ادخلي في المنتدى و تفرجي

على مصايبهم توصل معاهم لدرجة خراب البيوت 0000وانا عني والله يشهد على كلامي اني طول حياتي

ماشفت عمه تخاف على حريم عيالها ولا سمعت اصلاً

وبعدين انا استغربت كلامج انج جالسه عندهم في بيتهم وتاكلين وتشربين ببلاش !!!!!!!!!!!!!!!!!!!!!!!!!!!

وعموماً مدام انت تحبين عمتج لهاذي الدرجه ماكان دورتي لمشكلتج معاها حل في المنتدى وحليتيها ودياً بينكم

غرٍوٍب
22/04/2008, 09:42 PM
انا من راي مافات عليك شي علميها طريقتك ترا كل الشغالات كذا ياخذون وقت

وعاد الله يعينك لحقي قبل لاتتعود

Um.Abdullah
22/04/2008, 09:58 PM
هلا اختي بحرينية، مثل ما قلتي الحمد لله رب العالمين عمتي احبها واعتبرها مثل امي وما ازعل ابد من كلامها او معاملتها بالعكس، كفاية انها هدت بنات الديرة كلهم واصرت على ولدها الا ياخذني والا بتحاربه
بس انتي ما تعرفين عمتي، انا من النوع اللي احب كل شغلي يكون بروحي، يعني انا منظمة حياتي بنفسي، نظامية، اي شي ابيه اعرف مكانه، الشغالة تدخل وتشتغل في وقت معين راح الوقت خلاص راح عليج الشغل وما تكملين، هي لا، الشغل اللي عليج تخلصينه تخلصينه لو تموتين، المشكلة تحسب الكل فسها ما شاء الله عليها دوم تشتغل في البيت بدون تعب، والمشكلة الاكبر انها ترتب غرفتي مع الشغالات وانا عندي اشيا خاصة مثل ملابس النوم والملابس الداخلية ما احب حد يشوفها او يرتبها لي، وهي تحسب انها جذي تساعدني
اما بالنسبة للشغالة ما عندنا اثيوبيات، انا اول وحدة تجيب اثيوبية، وما عندي وقت الحين ابد اعلمها لانها خلاص تبرمجت على ان عمتي هي الامر والناهي لها!!
مرموم فعلا انا معاج في كل شي قلتيه، المسألة يبيلها وقت، وانا بعد ما احب ان الشغالة تشيل بنتي بس مرات يكون عندي ضروف، لما اروح الجامعة شغل البيت كله على عمتي ما اقدر اجبرها تمسك بنتي، ووقت عندي اختبارات ابي الشغالة تنزل بنتي وتلعبها مع اليهال، ووقت ما اتعب او تجيني الدورة ما اقدر اشيل نفسي فتهتم هي فيها، واذا وثقت فيها وشفت شغلها زين بخلي بنتي عندها لما احمل المرة الجاية ان شاء الله وانا اتنسى، يعني ابي الشغالة لاعب احتياط بس مو اساسي
اختي حدائق بابل انا معاج بس انتي ما تعرفين عمتي، مرات اشتغل واكسر ضهري بالترتيب اروح مشوار ارجع القى شي ثاااااااااااني، يعني مو بس الكماليات متحركة لااا، الاساسيات بعد واشيا وايد تغير اماكنها، عاد انا اتضايق وهذا شي طبيعي بس احاول اني ما ابين لها واقول لها الله يهديج ليش تعبتي نفسج انا مرتبة وخالصة، تقول لي ما احب هالترتيب، احب هذا!! يعني تبي ستايلها يمشي في كل البيت!! والله حاولت اتعايش مع الموضوع بس في مشكلة ثانية وهي زوجي، انا قلت بسكت عن امه وما بقول شي علشان ما ازعلها وهو كل يوم والثاني قايل لي ما احب اشوف ترتيب امي في الغرفة، شالفايدة انا متزوج، اقول له والله رتبت قبلها وهي جات غيرت!!
زوجي لحد الحين من تزوجنا وهو على سالفة الترتيب والغسيل وكماليات البيت، وان شاف شي متغير من مكانه يقول لي شوفي هذا مكانه مب هني، وان سالني عن شي قلت له مادري وينه او دورته ما لقيته انا الملامة، لاني صاحبة البيت!! فما اقدر اتعايش مع حنة زوجي بعد!!
وانا بعد مو من المؤيدين اني امسك الخدامة عنهم بالعكس، خلها تتعايش وياهم وتسوي اللي يسوونه هم، وبكرة بتجي اخت زوجي وتاخذ شغالاتها، وحماي بيطلع وبياخذ شغالته، وعمتي بيزيد عليها الشغل وانا بيجي اليوم اللي ما بحتاجها فيه وايد فلازم تتعلم على شغل البيت بس المشكلة انها تتعلم من الشغالات مو من عمتي
احلى البنات، حبيبتي معها كان ومهما سوت العمة هي جتج ونارج، مثل امج، وصدقيني في عمات وايد يحبون حريم عيالهم ويعتبرونهم مثل بناتهم، وبالعكس، كنت اقدر اقول لعمتي لو سمحتي هذي حياتي وهذي خصوصياتي وانتي وقفي بعيد، ولو سمحتي لا تدخلين فيها وانتي مالج شغل واحل مشكلتي صح والا لا؟؟ انا ادور حل لاني ابي حل دقيق يخليها ما تزعل مني او تتضايق، وحبيبتي لا تعممين فكرة على الكل، يمكن في بنات شكو من عماتهم بس هذول اللي عندهم مشاكل، اما اللي مابينهم وبين عماتهم مشاكل ويحبونهم ما بيذكرون هالشي
انا معاج ان في عمات حقودات وحسودات بس ليش هالشي؟؟ اكيد ما لقت من ولدها كلمة طيبة او هدية او حب من اللي يعطيه لزوجته فلازم تغار، وفي منهم الله يكافينا ويعافينا مراهقات مو عمات، بس لا تعممين هالشي على العمات بشكل عام
احلى البنات ان قلت لج اني اقرب لعمتي من امي! ما راح تصدقيني، بس هذي هي الحقيقة، في اشيا اشكيها لعمتي وما اشكيها لامي لاني احسها اقرب لي...

Um.Abdullah
22/04/2008, 10:00 PM
شكرا غروب على ردج وبحاول، والله كريم

بس بنات محد لقى لي حل، شلون انصحها تصلي وتتعبد؟ وانا ما اعرف لغتها ولا اعرف حد يفهم لها!!
تخيلو مرة صارت مشكلة اتصلنا حق اللي جابها تكلم وياها، مو كل يوم والثاني بتصل له وبقول لها كلمها تصلي كلمها تسوي كذا!

حلى البنات
23/04/2008, 12:05 AM
هلاا ام عبدالله بصراحه احسدك على عمتك :) تذكرني بأمي لو صار وتزوجت اتمنى ربي يرزقني بعمه مثلهم

بس عمتك ما شاءالله عليها شايله البيت كله حتى غرف نومكم تدخل بترتيبها حلو تكون مهتمه فيكم وتداريكم بس بشكل عـام موب حلو الخدامه ترتب غرفة النوم ابد .. وانا ضد هالشي .

ابسط شي ممكن يحصل منها الحـسد .. وهالشي صار لو سألتي الحريم اللي خداماتهم يرتبون غرفهم يوميا بتلقين خدمهم اكثر جرئه عليهم او بتلقينها صايده ع الخدامه شي بعد فتره من شغلها مثل سرقه لبعض قطع الملابس او غيرها ومن غير انها ممكن تشوف شي خاص المفروض محد يشوفه وانتي تقدرين تفهمين عمتج هالسالفه وان شاءالله بتتقبل الموضوع ولو حسيتي انه هالموضوع بيضايقها لا تفتحينه معاها على اساس ما تصير مشاكل .

ثاني شي ياقلبو تأكدي الخدامه مسلمه وش كثرهم يزورون دياناتهم لأنهم يشوفون اكثر طلبات الخدم مسلمين .
وهالشي صاير لنا طلبنا خدامه اثيوبيه مسلمه ووصلت واكتشفنا بعد كم يوم من وصولها تسأل عن القرآن ماسكته بيدها وتقول شنو هذا !! انتي تأكدي انها مسلمه وبعد ما تتأكدين ممكن تاخذين لها اشرطه كاسيت او كتب بلغتهم اذا تعرف تقرا بلغتهم وهالاشياء تلقينها بمركز الدعوه والارشاد وبعد ما تسمع الكاسيت نبهي عليها اذا دخل وقت الصلاه توقف الشغل وتروح تصلي .. وان شاءالله بتفهم عليك :)

أختي ام عبدالله .. اسمحي لي اقول دام انتي طلبتي خدامه للبنت المفروض طلبتيها مربيه مو خادمه يعني المفروض حرصتي ع المكتب يجيبون مربيه متعلمه ومشتلغه من قبل عشان يسهل التعامل معاها .. لان بجد حرام تطلبون خدم لعيالكم انتي او اي وحده من البنات وتجي وحده مو متعلمه جاهله وماتعرف بأصول التربيه
يعني اخذ وحده من الشارع من انولدت هايته واقولها استلمي ولدي او بنتي .. صعبه والله !!
من غير انه عاداتهم سيئه جدا وبيئتهم تحسينها قذره .. يعني بجد لو لاحظتي الخدم اللي يجونا احنا نعلمهم ع النظافه والترتيب يعني ما بعد صادف انه وحده تجي تشتغل وتكون متعلمه النظافه من بلادها بالعكس قذرين احنا نعلمهم .. حتى في لبسهم مبهذلين احنا ننسقه لهم ونعلمهم كيف يلبسون .. اسمحي لي طولت بالكلام :)

اتمنى اني ساعدت بحل المشكله

دمتي بـود يالغلا

Um.Abdullah
23/04/2008, 12:57 AM
هلا حبيبتي حلى بالعكس ما طولتي ولا شي،، بس عمتي صعب اقول لها هالشي، تخيلي ان زوجي مرة قال لها ان دخلتي ورتبتي غرفتي بهاوش زوجتي، انا الحين متزوجها ليش بالله؟! وليش ما ترتب هي؟ طبعا حاولت تفهمه ان انا ارتب بس هي تساعدني قال مافي، هي ترتب وان رتبتي انتي مرة ثانية بتفاهم وياها بطريقة ثانية، طبعا هذا الكلام قدام امه بس يعني يقول لي بقول لها كذا وكذا علشان ما ترتب، ومافي فايدة!! شوي تعصب وتقول انا اللي ابي راحتك وراحة زوجتك تقول لي جذي؟ خلاص مالي خص فيكم ولا برتب لكم، وبعد يومين او 3 ترجع على نفس الحالة!!
وفعلا بالنسبة لترتيب الشغالات لغرف النوم انا بعد ما اطيقها، لاني اسمع سوالف وايد تطلع برع البيت واسرار والسبب ترتيب وتنظيف الشغالة لغرف النوم
وصج بحاول اروح الدعوة والارشاد والا التعريف بالاسلام، زين افدتيني، بس ما اضن انها مو مسلمة لانها ما تعرف تقول شي بس تسلم وتقول ما شاء الله وتعرف حرام... الله يهديها
وبالنسبة ليش طلبت خدامة انا بقول لج، انا من حملت قلت ابي وحدة للبيت يعني عيالي لا، وبس الضروف هي اللي اجبرتني اعتمد على الشغالة بعد الولادة وهذا ذكرته قبل، والمشكلة الاكبر اني طلبت شغالة من وانا حامل وبنتي كملت سنة وما جات!!! فكنت ابي وحدة ضروووووووري بحكم ضروف العيلة القاااااسية والمشاكل اللي مرينا فيها الله لا يبليكم كنت ابي وحدة بسرررررعة وهذا قال لنا اسبوعين وهي عندكم فعلى طول وافقت،، وبالعكس الاثيوبيات بسرعة يتعلمون وما شاء الله عليها اول ما جات تحط الفوط على البانيو!!! بس الحين صارت ارتب وانظف :)

دلوعةحناني
23/04/2008, 03:58 AM
اول شي صلاتها في ذمتها هي مش ذمتك هي لا طفله ولا بنتك علشان في ذمتك
وثاني شي زوجك الي يدفع لها الراتب؟
اذا كان اى خذيها بغرفه لحالكم انتي وزوجك وقولي لها بابا يدفع لك راتب علشان بيبي اول شي
مش شغل وعلميها من اول وجديد وصدقيني اذا ركزتي عليها شوي تتعدل
بالذات اذا عرفت راتبها منكم بتسمع كلامكم وبس
والفتره الجايه خلي بنتك دوم بيدها تحت نظرك طبعا وخليها تسوي لها كلشي وبعدين الشغل
وكذا بترتاحين
تحياتي

umjana79
23/04/2008, 09:46 AM
السلام عليكم اختي ام عبدالله شلونج ..

اختي .. الله يهداج بس .. انا الحين صار عندي خبره ومناعه من الاثيوبيات ... يبي لهم صبر لان هم بطيئات فهم ...

عموما .. بالنسبه للصلاه هم المسلمات بالذات يعرفون بعض الكلمات العربيه والسبب انهم يعرفون القران واغيره .... ...

بعطيج بعض المصطلحات عشان تتفاهمين معاها .. وبتشوفين علامات الاستغراب علة ويهها اول ما تتكلمين ...

وكلامهم لو بتلاحظين ... يشبه كلامنا ... هم عندهم اكثر من لهجه .. بس الاغلب الي يجون ..

يتكلمون ( ارومنيا ,,, وامارنيا...


اول درس .. سأليها ... وقولي لها بالحرف الواحد وبتفهم .. كرري عليها وبتفهم لان هذي بتكون لهجتهم ...

1- أنتي تنك .... أرومنيا .. امارنيا ...

Tank >> الي هو اللسان .. باللانجليزي,, وهو يستخدمونه في لهجتهم ... ورقم واحد يعني انتي لهجتك اي وحده فيها ..

2- كلمه __ غبره ____ تجي من كلمه غبار .... أو كوشاشا ... يعني وصخ ....

3- كلمه بــــزو .... يعني وايد .... وللعلم يعرفون كلمه حرام ,, وجهنم ... والجنه ..

فتكوني الجمله ...

مثلا = مني في بزو كوشاشا / أو غبره ...

4- حق الملابس ..... ( يسمون الملابس ____ لبس ) يعني ما يفرق عن العربي وايد لو تلاحظين .....

5- بالنسبه حق الصلاه قلتي ... بقولج نفس الكلمات وقوليها لها ..

( حرف الذال ينطقونه ز )

وكلمه سرعه يعني شغل ...

قولي = ازان فيه .. الله وأكبر ... سرعه بكا .. سوي وضوء ... صلاه بعدين سوي سرعه ....

وبعدين قولي .. أنتي صلاه مافي ... أنتي جهنم ... في ....
وكلمي قولي : أنتي صلاه مافي ... أنتي أثيوبيا GO

كلمه الباب عندهم _ ( نيي )

مثلا حتى كلمه أخرج .. يعرفونها .. لان عندهم كلمات عربي .. وجربيهم .. هالكلامات وصدقيني بتشوفين انبهار من عيونها ..

واذا ما فهمت لغتها تطلع غبيه بمعنى الكلمه ....

خليني اتذكر .. اي .. كلمه ( بر ) يعني فلوس ...

مثلا ... كلمه تاكلين ... ( دبين ) او تبين ... نفس الشي ...

أنتي هي نفسها الكلمه يستخدمونها .. أنتي .... يعني عربي لغتهم نفس الشي ..

واذا تبين شي اختي حاضرين عندي بدل الوحده ثنتين .. وترى هم صج شغولين ... بس يبي لهم صبر ....

اتمنى افدتج

تحياتي
ام جنى

umjana79
23/04/2008, 09:59 AM
نيت اقولج .. بكا .. يعني بس ..

و كاكا .. يعني لمه بنتج توصخ نفسها ... في الحفاظ ...

اي نسيت اقولج بعد ... رقم سته ... يسمون سدست

والساعه .. ..... سئت ....

وقولي لها .. ( اسم بنتك ) وللعلم هو يفهمون إشاره ... اشري على عينج ... وقولي لها شوفي ...

فلان في كاكا بمبرز ... علميها شلون تفتح البامبرز وتشوف الياهل ... اذا موصخ نفسه ..

اختي هذولاه يتعلمون .. خدامه امي ... والله انها تنفع الحين تصير مربيه ..تعلمت عن بنتي كل شي .. في ست شهور ... والحين .. ما شاء الله تبارك الله .. احسن من المربيات .. مع انها خدامه ...

اي نسيت شغله .. لو تبين تشوف البنت وماتشتغل ..

= بيبي في .. انتي سرعة بكا.. بيبي .. شوفي واشري على عينك ...

انا في .... انتي سرعة سوي ... انا مافي سرعة بكا .... ,وسوي تجربه .. وانتي بالبيت سوي نفسج بتروحين مكان وطلي عليها من مكان تشوفيها ما تشوفج .. وصدقيني مع التعليم ... بتعرف ...
انا حتى احيانا اعصاب تجيني ... بس يفهمون بالموت بالغصب يفهمون ..

تحياتي

Um.Abdullah
23/04/2008, 01:24 PM
دلوعة كلامج صح، بس ما تعرفين السوالف والكلام والنغزات اللي بتجيني، الله يستر

هلا حبيبتي ام جنى ردج بفيدني وااااااايد ان شاء الله، بس ارجع البيت وبجرب، والله يعين اخاف لما اقول لها سمعي كلامي لان معاشج في يدي تتمرد على عمتي ههههههههههه... وترى انا ما استحمل الضغوط النفسية يعني اي شي يمر بعكس هواي اتنرفز واتضايق، وهالشي ياثر على صحتي وااااااااايد.. الله يعين، بجرب وبقول لكم النتيجة