المساعد الشخصي الرقمي

مشاهدة النسخة كاملة : بنات دبي أو الامارات أو حتى دوله ثانيه....بليييييييز ساعدوني



fhosani
05/02/2008, 03:14 PM
بنات أنا عندي مشكله و هي الدوام إلي محيرني..من فتره قررت أن أطلع من دوامي الحالي و السبب ساعات الدوام الطويله من 8 لين 5. و أنا عندي بنت سنه و ثلاث شهور و أبا أحصل وقت أهتم فيها و في نفسي بعد...الحمدلله طلعتلي و ظيفه في تنميه الموارد البشريه كمساعد اداري..المهم مفروظ يكون راتبي11000 درهم بس قالولي بما إني متزوجه فراح يسحبون عني كل العلاوات فصار معاشي 8900 درهم فقط و الدوام من 7:30 لين 2:30..المهم وافقت و قلة ان شاء الله راح اتي الزيادات و ترفع راتبي..بس إلي قهرني هو اكتشافي أنهم حاطيني في وظيفة مساعد اداري اول..مع أن خبرتي تفوق الثلاث سنوات كظابط اداري و عندي بكالوريوس..و في ناس عندهم دبلوم و خبرتهم أقل مني و حاطينهم ضباط...المهم مت من القهر..فقدمت اماكن ثانيه و قلة اذا طلعتلي وظيفه احسن راح اوافق و في نفس الوقت اذا ما طلعت و ظيفه ثانيه راح اشتغل في تنميه فتره و بعدين برفع رسالة تظلم اطالب بتعديل وظعي..المهم الحمد لله اتصلو فيني من مؤسسه محمد بن راشد..و عرظوا علي و ظيفه و هي علاقات عامه والراتب 12000 و ما ينقص منه ولا شيء و غير التذاكر و الضمان الصحي في كل شيء(First Class) و انتوا عارفين يعني هذي مؤسسه تابعه لشيخنا محمد بن راشد يعني المستقبل مفتوح و مع العلم أن المدير خبرني أن هم أهم شيء عندهم تطوير الموظف و يهتمون أن يرفعون الموظف يعني الموظف ما يتم في و ظيفته أكثر من سنه أو سنتين بالكثير ألا وهو مترقي لوظيفه أفضل..بس للأسف ساعات الدوام من 8 لين 4 و مرات في تأخير إذا اطلب الأمر...بس وقعت العقد معاهم..يعني أحين صرت موقعه عقدين و دوامي في المكانين لازم يكون تاريخ 17 فبراير..يعني ما باقي شيء لازم أقرر المستقبل ولا الدوام القصير...و الي زاد الطين بله هو اتصال المديره نفسها من تنميه و تبليغي أنهم ينتظروني و ان الزيادات يتلهم فصار معاشي 13600 ؟؟؟؟
مع العلم إني راح انتقل لبيت اهل زوجي يعني حتى بيكون أفضل لبنتي عشان حد يشوفها الصبح و أنا في الدوام..
أنا محتاره بين أمرين شو أسوي وشو أقول للمكان إلي ماراح أشتغل فيه وكلهم يتريوني بفارغ الصبر تنميه و مؤسسة محمد بن راشد..؟؟
وين الأفضل و المستقبل و الأضمن لي
بليز ساعدوني

دلوعته وبس
05/02/2008, 03:24 PM
اختي والله حبيت اساعدج

بس مول ماعندي خبره في الدوامات والاماكن اللي ذكرتيها

صلي استخاره وشوفي وين بترتاحين وشوفي بنظرج شو الافضل؟؟؟

موفقه اختي

fhosani
05/02/2008, 03:43 PM
بس أنا كأم وين أفضل لي؟؟
وكوحده درست و تعبت و حابه يكون لي وظيفه مستقبليه قويه؟؟
وين يارب وين؟؟

لب لفواد
05/02/2008, 03:51 PM
ختية أستخيري وأذا الله كاتبلج الخير بتلقينه.......

دلوعته وبس
05/02/2008, 04:03 PM
شوفي كأم وعندج ياهل اكيد الافضل انج تختارين الدوام الاقصر عسب تلحقين على بيتج وريلج وبنتج

واكيد دام عندج خبره وشهاده تبين الراتب الاعلى صح ..!

والتنميه قالولج بيزيدونج
بس انا من رايي ومن كلامج اللي قلتيه اشوف مؤسسة محمد بن راشد افضل عسب الضمانات ولانه نظرتهم للموظف بعد افضل مثل ماذكرتي انهم يرقونه للوظيفه الاحسن وبالتالي مابتملين من الشغل يعني مابتمين على نفس الروتين واكيد مع الترقيات بتحصلين على امتيازات احسن
اما هناك مدري انتي قلتي شهادتج وخبرتج تستحق اكثر من الوظيفه اللي بيعطونج اياها

لكن مشكلة ساعات الدوام وايد من 8 لين 4 اممممم والله احترت انا بعد وياج
لو كنت مكانج بحتار صدق

شوفي اختي اكيد الافضل لج بيكون انج تاخذين الدوام الاقصر يعني التنميه بس كامتيازات مب ذاك الزود

مؤسسة محمد بن راشد صح الدوام طويل شوي بس انا اشوف امتيازاتها وايد احسن واكيد يوم بتترقين بيخف الشغل عليج

بالتوفيق

حلمي اكون عروسه
05/02/2008, 04:40 PM
والله يا ختي أنا بعد احترت ,,

ما عليج الا صلاة الاستخاره ,, و ان شاء الله ربي بيوفقج للأحسن

بالتوفيق اختي

اسيرة قلبه
05/02/2008, 05:40 PM
عزيزتي تشاوري مع زوجك وشوفي وجهة نظره

واذا ماعنده مانع انك تداومين لين 4 توكلي على الله وخذي هالوظيفه

اما لو رافض انك تداومين لوقت اطول وبيشوف انها تاخذ وقتك عن البيت فأختاري الوظيفه الاولى

ولاتنسين الاستخاره سبحان الله ربي يرزقك بدون ماتحتارين وبيرزقك الافضل

fhosani
05/02/2008, 11:52 PM
والله بعدني محتاره بس كل الدلالات تقول مؤسسة محمد..الله يسهل علي الأختيار الصح يا رب الله يهديني للصواب و الخيار الصحيح قولوا امييييييييييييييييييييييي ييييييييين

عاشقة حتى البكاء
06/02/2008, 12:07 AM
والله انا اشوف


بما انك راح تنتقلين بيت اهل زوجك وفي حد يهتم ببنتك اتوكلي على الله بمؤسسه الشيخ محمد لانها من وصفك للوظيفتين اشوف مؤسسه الشيخ محمد هي الاضمن


اما بخصوص ايش تقولين لاصحاب الوظيفه الثانية

ممكن ببساطه تقولين لهم انك اتوظفتي بمكان ثاني وتعتذرين عن الوظيفه

والله يوفقك

أم الحارث
06/02/2008, 01:02 AM
السلام عليكم اختي ..

صراحه الموضوع يحير ...لو انا مكانج ما بعرف شو اختار... استخيري احسن لج واللي فيه الخير لج بصير ان شاء الله...

المؤمنة دائما
06/02/2008, 07:04 AM
الله يوفقج ان شا الله
استخيري الله

و انا لو مكانج اختار مؤسسة محمد بن راشد

lololancome
06/02/2008, 07:43 AM
استخيري الغالية رب العالمين هو احسن حل ... انا عن نفسي تركت الدوام الطويل علشان خاطر اليهال مافكرت في شي اسمه راتب .. الحين الحمدلله مرتاحة اكون في البيت الظهر واتغدا معاهم وارتاح بعدين ايلس معاهم .. الصراحة الدوام الطويل متعب وااايد وخاصة اذا عندج اطفال والحين ما بتحسين بها لشي إلا بعدين لما بيكون عندج اكثر عن واحد لأن الأعباء والمسؤليات تزيد.
(اعذريني طولت عليج بس هذي وجهة نظر) ..

rose_rose7788
06/02/2008, 08:01 AM
هلا اختي .. جنج تتكلمين عني بالضبط ... بس انا دوامي لي 5 العصر وذابحه عمري عسب احصل مكان ثاني بس مو محصله يمكن رب العالمين كاتب لي اني اتم في هل الدوام .. الحمد لله على كل حال .. بس بيني وبينج اختي انا حاطه في بالي ان شاء الله بعد ما اربي واقوم بالسلامه بشد حيلي وبدور عدل ووايدات نصحوني بمؤسسه محمد بن راشد .. ولو انا مكانج بختار هاي المؤسسه لانه فيها ترقيات وعلاوات يعني ها وبطور نفسي اكثر وانا الصراحه اتمنى واحلم انه دوامنا يكون اقصر بساعه على الاقل يعني لي 4 صدقيني احس حياتي بتكون غيييير بطلع وبهتم ببيتي وعيالي اكثر وبحس اني عايشه في هل الدنيا مو الساعه 5 اخلص ولي ما ارد البيت استوت 6 وعقبها الصلاه ويلسي في البيت لانه الشوارع زحمه .. بس لو انا مكانج اختي بختار مؤسسه محمد بن راشد ... والله ايسر عليج اختي ... يا الله اتوظفي اهناك وعقب سويلي واسطه ^___^

وموفقه الغالية

ماسة
06/02/2008, 08:08 AM
انا بما اني مزوجه

واشوف من واقع الحياة وبالنسبة لظروفج

الدوام في تننمية افضل

ان كثرتي تردين البيت الساعه 3 وعندج وقت حقج وحق بنتج وحق ريلج

والمعاش اوكي

احس من تصكين درب لموسسة محمد بن راشد
والوقت متاخر الين ما تردين بيتج

وااايد صعبه


يمكن واااايدين قالولج مؤسسة محم بن راشد افضل
كلنا مع ها الشي صح مب غلط بس انتي شوفي ريلج وبنتج وشو الانسب لج



الله يوفقج

laleeta
06/02/2008, 08:13 AM
هلا أختي


انتي شوفي شنو أولوياتج هل البيت وعيالج وزوجج أو الشغل والمعاش؟


ومنها تقدرين تشووفين الأحسن لج


يعني انتي مادورتي شغل إلا لأنج تبين دوام قصير فخلاص حصلتي دوام قصير


بس بعد مو تروحين هناك وماترتاحين وعقب تندمين لأن مهم انج تكونين مرتاحه في مكان شغلج



الله يوفقج أختي

لوٍن المطرٍ
06/02/2008, 08:27 AM
الله ييسر اللي فيه خير لك يارب

صدى الامارات
06/02/2008, 09:03 AM
بصراحه الغاليه

اذا وقعتي العقد ما تقدرين تتراجعين والله يكون فعونج بس ياختي ضناج الغاليه عند منو ام ريلج او الخدامه
واخذري يالغاليه من الخدام مشاكلهن ما تخلص

حوري
06/02/2008, 09:31 AM
حبيبتي خبريهم انك حصلتي عرض افضل من التنمية ممكن يعدلولك راتبك وتبقين مكانك وانتي ربحانه ..

واذا ما صار تعديل في الراتب انتقلي للموسسة ودوام ساعتين زيادة ما فرقت ...

والله يوفقك

سماء الحياة
06/02/2008, 09:39 AM
هل اذا ظليتي بمؤسسة محمد بن راشد وترقيتي بيقصر دوامج ؟
لأن أحيد المسؤولين الكبار مايداومون لحد 4
تأكدي من هالنقطة
ولو طلع مع الترقيات بيخف وقت دوامج توكلي ع الله ورحي هالمؤسسة

fhosani
06/02/2008, 10:07 AM
صراحه أنا استخرت ووايد احلم بتنميه و ان مكان مب مريح...حتى أمس حلمت أني يالسه أناقش المديره في موظوع الوظيفه أن لازم أكون ضابط إداري بدل مساعد اداري..بس لقيت الجواب منها بالرفض و أنا أخترت ووافقت في البدايه فمب مفروظ اني اناقشها..حتى نشيت و قلبي مقبوظ من الداخل..

احزان-6
06/02/2008, 10:48 AM
أنا لو مكانج أتم في نفس المكان لان أهم شى راحتي و راحت بنتي لان الدوام لين 2 وايد زين صح الراتب قليل بس مو يايد قليل يعني زين وتقدرين أتعيشين وأنتي مرتاحه
فكري شوي شو فايدة الدوام الطويل ترجعين تعبانه ومو فياقه لحد لا زوجج ولا بنتج ولا بيتج بس أدورين الفراش عشان ترتاحين يعني بتخسرين زوجج و بنتج صح بتحصلين فلوس بس ما بتحصلين وقت تستانسين بالفلوس
و الانسان دايما يدور راحته
و أسمحيلي

الجوهرة السعودية
06/02/2008, 10:57 AM
المفروض ماتوقعي على عقدين اسالي اهل الاختصاص وايش هي شروط سحب العقد والاتفاق وانصحك بموسسة راشد المستقبل افضل ومو مهم الراتب راح يزيد مع الوقت في شركة لها مستقبل اما الشركة الثانية يمكن تقعدين سنين على نفس المرتبة قدمي اعتذار

fhosani
06/02/2008, 11:07 AM
أنا ما أفكر في الوقت الحلي كثر تفكيري في المستقبل...يعني تفكيري بعيد المدى شوي..وصراحه ما أبا أدفن عمري في وظيفه و بعدين ما أحصل لا ترقيه و لا شيء..أنا طموحي عاليه..حتى فكرت دام أن أحين عندي بنت وحده فليش ما أجرب المؤسسه لأن بكره راح يجون أخوانها و راح يصعب علي أن أشتغل في مثل هذي الأماكن

fhosani
07/02/2008, 09:12 AM
رايكم يا بنات مهم بالنسبه لي و راح يحدد مصيري
لأن ما خاب من استخار و ما ندم من استشار

fhosani
10/02/2008, 02:05 PM
محد غير رد علي :(

rain
10/02/2008, 11:31 PM
ماعندي غير الدعاء لك ..
الله يوفقج للي فيه الخير لج ان شاء الله

mokaneh_al5ali
11/02/2008, 06:20 PM
انصحج تختارين الدوام القصير عسب يكون عندج وقت لريلج وبنتج ترى هم لهم حق عليج ولازم ماتقرين عنهم بشي...!!!

شو فايدة الدوام والراتب وانتي مقصره في بيتج...!!

بنـت بـلادي
11/02/2008, 07:00 PM
أهلين اختي شلونج وشخبارج الغلا طمنينا ان شاء الله اخترتي ورسيتي عالبر؟؟

انا برأي توزنيها زين شوفي احوالج المادية كيف وأحوال ريلج ؟
اذا احوالكم زينة ومستقرة ليش تدورين على وظيفة وراتب عالي واضيعين لا سمح الله بيتج واسرتج؟؟
اهم شي اختى تهتمي فبنتج وتقعدين معها فترة اطول وخاصة بهالفترة من العمر,,وبعدين ما شاء الله
راتبج فالوظيفتين يعتبر زين ومع الزيادة رح يتعدل الراتب الاولاني..
اكتبي فورقة ايجابيات وسلبيات كل وظيفة واختاري الاحسن لج ولظروفج انتي..
وأنا رأي لو احوالج زينة اتركي مؤسسة محمد وشوفي الوظيفة الاخري
وركزي احسن في بيتج وريلج لانهم الاهم بالدرجة الاولي <<<< واتركي الوظيفة الثانية لوحده عزابية هههههه
وبعد ما تختارين الوظيفة خلاص صلي صلاة استخارة وان شاء الله تتوفقين باختيارج اتمنى اني افدتج بشي,,,


ولاتنسي طمنينا عليج الغالية الله يحفظج ويوفقج في حياتج باذن الله

fhosani
12/02/2008, 10:53 AM
مشكورييييييييييييييين وااااااااااااااايد...صراحه خلاص أقتنعت بالدوام القصير في تنميه و الله يوفجني يا رب

mokaneh_al5ali
12/02/2008, 06:59 PM
مشكورييييييييييييييين وااااااااااااااايد...صراحه خلاص أقتنعت بالدوام القصير في تنميه و الله يوفجني يا رب

بالتوفيق يالغلالالالالالا

والله يسهل عليج .. ويسمح لج ادروبج

rose_rose7788
16/02/2008, 11:21 AM
بالتوفيق اختي ...