المساعد الشخصي الرقمي

مشاهدة النسخة كاملة : الرجال ما يلفون الا على المطلقه



القلب الصبور
31/01/2008, 07:42 AM
السلام عليكم..
بنات نفسيتي تعبانه واجد
المفروض الصديقه تواسي صديقتها اذا صارت عندها ظروف صعبه لكن صديقني اني غير
كله ترمي علي كلام جارح واخر الكلام تقولي ان الرجال ما يلفون الا على المطلقه قصدها يسوون وياها علاقه
والله اكتب ليكم والغصه في حلقي
حاسه ان ما ليي معنى في هالحياة
حاسه بضيق ما يعلم في الا الله
ادعوا لي بنات ان الله يخفف عني همي ويفرج ليي

سماء الحياة
31/01/2008, 07:51 AM
الله يفرج همج حبيبتي ويحفظج
مافهمت ليش صديقتج تقولج هالكلام ، هل أنتي مطلقة مثلا؟
يالغالية إن كانت إجابتج بنعم فلا تزعلي من كلامها مب كل المطلقات سيئات الأخلاق
وكثير منهن حافظات لفروجهن وسمعة أهلهن والله عقب كذا يعوضهن كل خير
عيل في بنات متزوجات ويخونن وفي بنات ماعرسن بعدهن ويسون علاقات
الله الحافظ يالغالية
البنت اللي تحفظ نفسها ما يتجرأ عليها أي ريال
والسموووحة

القلب الصبور
31/01/2008, 07:55 AM
نعم اختي انا مطلقه

سماء الحياة
31/01/2008, 08:03 AM
اذا اختي أوكد لك ماكتبته سابقا وتذكري
البنت اللي تحفظ نفسها ما يتجرأ عليها أي ريال

وَجَعّْ البَوُح
31/01/2008, 09:09 AM
{ْ~ومطلقه يعني هي عار الحين ...
خليها تستغفر ربي أحسن ..
ولا تاخذي على كلامها ..كله كلام فاضي..ياقلبي..
المطلقه هي ضحية ..وبنفسها تقدر تتغير ..وربي يعضوها ..داومي ع الاستغفار..وقراة القرآن..وربي يعوضك باللي أحسن منه..لو انتي حابه ترجعي له او هو حاب يرجع لك هذا شي ثاني
بس مو من حقها تقول لك كذا ..وقولي اصعابك مو سوى..والله يستر عليك ياقلبي..
موفقه~ْ}

Bint -qatar 2008
31/01/2008, 09:27 AM
امممممممممم حبيبتي انا جيت يعني شنو يعني مشكلتج انحلت :cool2:

شوفي حياتي انا بنصحج بنصيحه ما ااتوقع حد ينصحج بها غيري اخوانا المصريين جزاهم الله خير

كله يقولون

(( كبـــــــــــــــــــــــ ــر دماغك )) :yes:

ياحبيبتي على وشو تغثين عمرج مع هالمعقده شوفي حياتي هي الظاهر انها محتره هههههههه ولا اكيد صاديها موقف

بعدين الحريم شعندهم (( اخاف انطق )) لين تزوج صغيره قالوا بس العبت عليه :D_smil1:
لين تزوج وحده من هله ولا ما تناسبهم قالوا بس مسويه له عمل :D_smil1:
لين تزوج وحده اكبر منه بس قالوا تصرف عليه :D_smil1:
لين تزوج وحده حلوه وتناسبه وشكلهم موووووووت مع بعض قالوا بس يعرفها :D_smil1:
لين تزوج وما ابتسم في الكوشه قالوا بس ما يبيها :D_smil1:
لين تزوج مطلقه قالوا بس ساحرته :D_smil1:

حبيبتي الرجاجيل عنده مثلنا قلب يحب وعين تشوف واذن تسمع وعقل يفكر بعد

وصج ان ظاهره الرجاجيل (( حلوه صح الرجاجيل )) :21_131:اللي يتزوجون مطلقات منتشره بس بعد لها اسبابها

اول شي هالمره ماره بتجربه وتعرف الاغلاط اللي يطيحون فيها الازواج الجدد واللي هي طبعا راح تبتعد عنها

ثاني شي المطلقه تبي تحافظ على حياتها الجديده مب نفس الصغيره اللي اول ما تهوش مع ريلها قبضت الباب
وراحت بيت ريلها

ثالث شي كيفه الريال يتزوج مطلقه يتزوج بنت بنوت هو حر :sm215:

اف والله مشكله

وسعي خاطرج وحبيبتي مب على كل شي تضايقين وان لو منج اشوتها من الباب اف ناقصين احنا عوار راس

اشوفج على خير:21_140:

نبع الحب
31/01/2008, 09:51 AM
ربي يعوض عليك بالزوج الصالح اللي يسعدك

مجدولين 11
31/01/2008, 10:04 AM
اختي يمكن صديقتك قصدها خايفه عليك
وبهالطرايقه على بالها بتساعدك
يمكن نيتها زينه بس طريقتها غلط
فيه حديث للنبي صلى الله عليه وسلم يقول في مامعناه
التمس لاخيك بضع وسبعون عذرا فالم تجد فمن نفسك
انتي خلي ثقتك بنفسك عاليه وماعليك من احد
انتي مو اول ولا اخر وحده تتطلق
ولا تخلين كلام احد ياثر بنفسيتك
الله يرزقك امين

احلام فتاه
31/01/2008, 10:10 AM
اختي يمكن صديقتك قصدها خايفه عليك
وبهالطرايقه على بالها بتساعدك
يمكن نيتها زينه بس طريقتها غلط
فيه حديث للنبي صلى الله عليه وسلم يقول في مامعناه
التمس لاخيك بضع وسبعون عذرا فالم تجد فمن نفسك
انتي خلي ثقتك بنفسك عاليه وماعليك من احد
انتي مو اول ولا اخر وحده تتطلق
ولا تخلين كلام احد ياثر بنفسيتك
الله يرزقك امين
اوافق كلامها

men_gady
31/01/2008, 11:30 AM
خير ياطير مطلقه مب اول وحده ولا اخر وحده تتطلق

حبيبتي لاتخلين كلمه مطلقه تاثر عليج بالعكس حبيبتي انتي اكبر من جيه وكملي حياتج طبيعيه واذا في نصيب بتتزوجين مرة ثانيه وبتنسين انج عرستي قبل بعد

ربي يوفقج ان شاء الله ويعوضج يااااااااارب

أم كرومي
31/01/2008, 01:29 PM
و شنو يعني اذا مطلقه !!

حبيبتي هذي ما تستحق تسمينها صديقه

لان الصديقه الحقيقيه هي اللي توقف مع صديقتها بكل شي

فنصيحه اختي لا تظايقين نفسج و لا تفكرين فيها وبكلامها

عسى ربي يعوضج بالزوج الصالح اللي يعوضج خير و يسعدج (f)

اسيل!
31/01/2008, 03:37 PM
حسبي الله عليها

قولي لها ترى الدنيا دوارة يوم لكــــ

ويوم عليييييك

وخليها تحط لسانها في حلقها وتنكتم

والله الهادي

القلب الصبور
31/01/2008, 03:39 PM
يعطيكم العافيه كل اللي ردوا

الله يريحكم

دمعه الـــم
31/01/2008, 04:12 PM
شوفي اختي اول شىء هذا ما يمكن تقولين عليها صديقه ...لان الصديق عمره مايقول كلام جارح
هذا انسانه معقده ..واذا صرت مطلقه فيها مطلقات افضل من كثير من بنات في بيوت اهلهم
اختي الطلاق مو عيب ولا ذنب ممكن طلاقك خير ..وتاكدي ان الله يكتب لك الخير بس قوى ثقتك بالله
ها لانسانه اقطعي علاقتك فيها نهايه ...الصديق ما يجرح يدوي الجرح


ترمي علي كلام جارح واخر الكلام تقولي ان الرجال ما يلفون الا على المطلقه قصدها يسوون وياها علاقه

بعد هالكلام لو تموت لاترجعين لها لازم تكون ثقتك بالله قويه وبعدين ثقتك بنفسك اقوى وحاولي تشغلين وقتك سواء بدراسه واو العمل اذا كنت تعملين حتي لو كنت في البيت تقدرين تستغلين وقتك في تعلم اشياء جديده حتي لو كان عن طريق النت
وقلبي معك والله يوفقك يارب

غلا روحي mm
31/01/2008, 04:21 PM
وخير اذا مطلقة ترى المطلقة سوقها يكون واقف اكثر من البنت ليش ؟ لان يقولون اطلقت من فلان اكيد تبيني يبي يجرب حظه ويخطب وبعدين المطلقه يحبونها لان عندها خبره اما البنت لا هذا رايييي مع اني بنت واشوفه من واقع عندي وبالتوفيق حبيبتي عليج بالدعاء بالستر والله يرزقج الزوج الصالح ولا عليج من كلامها اهم شيء التزمي بدينج واحصني نفسج

حبيبة جيمي
31/01/2008, 04:51 PM
اولا الله يعوضج خيررررر ويسر امورج ويفرج عنج

وثانيا هذي مو صديقة ولازم تتهربين منها وتقطعين علاقتج فيها

-بنت الجزيره-
31/01/2008, 05:30 PM
ربي يعوض عليك بالزوج الصالح اللي يسعدك

M!ss Paris
31/01/2008, 07:14 PM
ربي يعوض عليك بالزوج الصالح اللي يسعدك

yasimine_2007
31/01/2008, 07:30 PM
كلام الناس لا يقدم ولا يؤخر يا اختي ليش تاخذين بكلامها اصلا خليها تقول اللي تحبو لا انتي اول ولا اخر وحدة تطلقت يمكن انتي عندك حساسية من طلاقك وبتحسسي من اي كلمة يا اختي عيشي حياتك طبيعية ولا تاخذي بكلامها وفي مثل بيقول الباب اللي يجي منو الريح سدو واستريح

توت بري
01/02/2008, 01:42 AM
صح كلام صديقتش ....... وهذا لان العيب مو في المطلقة لا ....... العيب في بعض الرجال اللي يعتبرون المطلقة فريسة سهله ......... يا اما يلعبون بمشاعرها لانهم يدرون انها فاقدة حضن يحتويها ففي بالهم انه سهل اللعب عليها..........او يطمعون في المطلقة علشان الزواجات السرية مثل المتعه او المسيار علشان يشبعون غرائزهم اللي ماتنتهي.......... يعني يا حبيبتي العيب مو في المطلقة العيب في هالنوع من الرجال اللي يبون يستغلون المطلقة...........

وانتي لازم تاخذين الامور ببساطة ولا تخلين اي كلام يأثر عليش ......... ويمكن ماكان قصد صديقتش انها تضايقش بس لانش حساسه من ناحية هالموضوع ففهمتينها غلط

والله يعوضش خير ان شاءالله..........

بسمـة أمـل
01/02/2008, 01:50 AM
المرآه المطلقه هي ضحيه المجتمع

ولأسف الكل يلقي عليها اللوم ويحملها المسؤواليه في الطلاق

لكن أختي لا تهتمي لكلام الناس فهو لن يزيد أو ينقص شيء

في الأخير يبقى مجرد كلام وخلي إيمانك بالله قوي

وإن شاء الله سيعوضك الله بما هو خير


يارب

القلب الصبور
01/02/2008, 04:04 AM
جزاكم الله خيرا بنات

توت بري

اختي حتى لو كلامها صح ما يحق لها ان ترمي عليي هذا الكلام لان هذا كلام خطير يعني اني ما قلت الى اهلي علشان ما تطيح من عيونهم ويا ما كلام رمته عليي وكله اقول هذي عشره وماني قايله لاهلي بس هي مصختها تشوفني اسكت عنها فتتمادي وعلى اي اساس تقولي هاالكلام شايفتني ادور في الشوارع واسوي علاقات اصلا هي ما لها حق ترمي الكلام هذا الاولى اذا تبي تقول هذا الكلام عندها مطلقات في اهلها ومن اقرب الناس لها خله تقوله لهم بس هي مستقويه عليي

هذا شرفي وعرضي اختي

اذا كنا بروحنا ترمي الكلام الا ما ليه داعي لكن اذا كنا جماعه قاعدين تسوي روحها حليوه وانه هي تحاسب الى مشاعري تبي تراوي اهلي ان هي صديقه وفيه وتحبني اذا هي تشوف ان الكلام اللي تقطه صحيح ليش ما تقوله قدام الكل

غصون444
01/02/2008, 04:37 PM
مثل العبارة اللي تقول يا ما في المساجين من مظاليم كذلك يا ما فيه مطلقات مظلومات

والعاقبة الحميدة والحلوة لأهل الصدق بالنهاية ما عليك من كلام هالصديقة ويمكن انتي موعودة بخير الدنيا والآخرة.

ندايم
01/02/2008, 04:52 PM
قل لن يصيبنا الا ما كتب الله لنا...

هذا نصيب...و مكتوب...

لا تخلين الكلام يأثر فيج...و الا بتتعبين و بتنهارين...

وهذا بياثر في شكلج و قدرتج على العطاء...

بالعكس... الكلام اللي بياثر فيج...

قولي ما يهمني و ارميه و راى ظهرج...

و رددي اللهم استرني فوق الارض و تحت الارض و يوم العرض...

و اكثري من الاستغفار...

و الله يرزقج الزوج الصالح اللي يسعدج و يهنيج...

انفينيتي
01/02/2008, 07:02 PM
أعوذ بالله كلامها مثل السم

يا اختي الرياييل بيلفون على أي وحدة منحرفه

سواءا مطلقه ، بنت، أرملة ، أو متزوجه وأم عيال بعد

ماله خص الوضع الاجتماعي،
أهم شي الأخلااااااااااااااااق، واللي أخلاقها واطيه بتنحرف
بغض النظر عن حالتها الاجتماعية

بتحصلين الطيب والفاسد في كل نوع

ماعليج من كلامها، وكما تدين تداااااااااااااااااان


الله يفرج همج ويرزقج بالزوج الصالح

كازابلانكا
01/02/2008, 08:59 PM
انا مطلقة ومع ذلك عمري ما خليت الكلمة هذي يأثر فيني صح ان طلاق شي صعب
ولكن قدر الله وماشاء فعل
الي تبي تحافظ على شرفها وعلى سمعتها تحافظ عليه سواء كانت بنت او متزوجة او مطلقة والي تبي
وخلي ثقتك بالله اولا وبنفسك ثانيا قوية

بنية العين
01/02/2008, 09:11 PM
أختي ،،، هونيها وتهون


بس ال اقدر اقولة لج انج تصبرين وتداومين على الاستغفار ،،، والله يا اختي ان الاستغفار بيفرج عنج هممومج ويرزقج من حيث لا تحتسبين

وكونج مطلقة لا عيب ولا حرام لكن اذا ال حولج تفكيرهم قاصر ،، خلي تفكيرج اكبر

وحطي في بالج ،،، لا يضر السماء :cool: نباح ...

محترمه
02/02/2008, 05:20 AM
اقلبي موانتي اول وحده تطلق كذا الحياه ماياخذ الواحد الانصيبه في كل شي احمدي ربك على كل حال ولا يهميك كلام احد وهذا نصيبك الي يشوف مصيبت غيره تهون عليه مصيبته انشاء الله يجيك نصيب زين وسعي صدرك الناس تفكيرهم للاسف صار.........خليها على الله اتمى لك الخير...

NEW SOUL
02/02/2008, 09:24 AM
حبـــــــــــــــيبتي

انتي لستي

(مطلقه)

انتي

(منطــــلقه)

اسمحي لي هذي ماهي صديقه..والطلاق يعني الإنطلاق..انتي حره..وماهو عيب ولاحرام..لايضيق صدرك ولاشيء..اهم شيء انتي واثقه من نفسك..خليها تلمح وتقول..الله سبحانه عالم ومطلع..صراحه قليلة حيا هذي البنت..اسمحي لي..ووقحه بعد..كيف تقول مثل هالكلام..

إلتجأي لله وربي بيفرج همك..وبيرزقك بالزوج اللي ترتاحين معه..وقبل الزوج..المهم الراحه الداخليه للإنسان..لأن سعادة الإنسان تنبع من داخله..السعادة بالإيمان وطاعة الله موفقة اختي.

حلمي اكون عروسه
02/02/2008, 11:52 AM
كلام خواتي صحيح ,, مليون ف الميه
انت اللي عليج أختي خلي بالج من نفسج وأهلج ,, وما عليج من حد
لا صديقه ولا يحزنون ,, بالعكس أختي عيشي حياتج مثل انت ما تبين مب همّ أو الناس
عندي زميله تشتغل معاي ف الدوام وهي مطلقه من قبل 15 سنه ,, وعايشه حياتها عادي
كأنها ما تزوجت ومهتمه ف نفسها كأنها عروس لا تسمع كلام هذا ولا ذاك ,,
لأن الواحد حر في نفسه وساير في طريق ما ينخاف عليه ,,
وهي الحينه تزوجت مره ثانيه وسوّت فرح كأنها أول مره بتتزوج والحين عايشين مع بعض
الله يوفقهم ويوفقج أختي اللي فيه الخير ويبعد عنج أصدقاء السوء امين ,,
وان شاء الله بتكوني عروسه مره ثانيه وطول عمرج عروس في نظر أهلج ,,

ام عمـار
02/02/2008, 02:04 PM
تركيها خليها تولي

منو هي عشان تجرحك و تاذيك؟؟

الله يوفقك و يرزقك بالزوج الصالح امين

القلب الصبور
03/02/2008, 01:22 AM
مشكورين بنات ما قصرتوا بردتوا الحره اللي فيني

وتسلمون

القلب الصبور
04/02/2008, 12:14 PM
up
.
.
.
.
.

فجرالليل
04/02/2008, 06:39 PM
اختي الكريمة

لا تاخذي بكلامها

عيشي حياتك بدون الافكار السلبية

الطلاق ليس عيب .. كان يسكون محرما


ثقي في الله اختاه ولا تاخذي بكلام الناس او صديقتك


الله اكبر

الله يسعدك ويرزقك زوج صالح

الخرشة
09/02/2008, 02:46 AM
لا تاخذينها بحساسية حبووبة

ياما الحين استغفر الله مب امعرسات ورايحات فيها

بالنهاية اذا انتي واثقة من نفسج لا يهمج كلام حد

اخذي الموضوع بحسن نية

اختج

الخرشة

مرقة
10/02/2008, 04:57 AM
انا لما قريت العنوان ان الرجال مايلفون الاعلى المطلقه قلت صدق
احسبها تقصد مايخطبون لان وبصرااااااحه خطااااب المطلقه اكثر من البنت
لكن المريضه اللي قالتلك هالكلام قوليلها والشاب يرقم وش عرفه ان هذي مطلقه ولا متزوجه ولا بنت صديقتك مسكييييينه

nasnusa
10/02/2008, 08:05 AM
ربنا يعوضك بالرجل الصالح عن قريب يا رب اللي يهنيكي و يعوضك عن كل شي . ان شاء الله

سلومي
10/02/2008, 07:18 PM
سيبك منها من الواضح انها معقده . ايه يعني مطلقة دا ليس عيب فيك ولا ينقص منك شيئا .وبعدين انتي لو ضققتي علي كلام الناس مش هتخلصي. و لو وجهت ليك مثل هذا الكلام مره اخري ردي عليها وقوليها انتي اي قصدك بالكلام دا علشان لو سبيتيها تتكلم كده هتتمادي في الكلام السخيف . انا عارفه النوعيه دي من الناس مبتجيش الا لو وقفتيها عند حدها وخليكي قويه من الداخل واعلمي ان الطلاق ليس نهاية المطاف وطمنينا عليكي يا حببتي .