المساعد الشخصي الرقمي

مشاهدة النسخة كاملة : متزوجة وحب قديم!!!



حائرة يادنيا
28/01/2008, 01:36 PM
السلام عليكم ورحمه الله

خواتي العزيزات اتمنى تسمعوني في مشكلتي ذي وتقولن لي شنو الحل!؟
لانه نفسيتي تعبانة

باختصار من تخرجت من الثانوية كنت احب شي اسمه شغل
فخبرت ابوي بعد ما خلصت الدراسة الثانوية انه يدور لي اي شغله واشتغلت في محل كانت احلى ايام عمري بصراحه على الرغم من بساطه العمل إلا ان الي معاي كانوا يشتغلون جنسياتهم مختلفة واكتسبت منهم خبرات ومهارات ولغة.

بعد اقل من شهر>>> صار يتردد على المحل شخص ما اعرفه
سبحان الله ما اعرفه بس ما ادري ليش من يطالعني يرقع قلبي بقوووة
الحمدلله اهلي كانوا محصنينا عن الافعال الشينة. والحمدلله ما صار شيئ إلا اللهما نظرات وبس
ظل هالشخص يتردد على المحل الي قبالي مده اسبوعين كان كل يوم اشوفه الصبح
بس بعد 3 ايام صارت اشوفة الصبح والعصر!!
اهني زاد خوفي >>> اقول ياربي شنو الفكة منه هذا بسوي لي مشاكل
البلوة ان حتى الي معاي يشتغلون صار من يزور المكان واكون مشغولة بشغله، يقولون لي هذا هذا! وصل!!
قلت انا ولييييييه!! حتى الي يشتغلون معاي صاروا يعرفون انه يزور المكان بس عشان يشوفني ويمشي
ظل على هالحالة 3 اسابيع ورى بعض دون كلل او ملل

صار اني بعدها طلعت من هالشغلة، يعني قعدت فيها شهر ونص بس
لاني كنت بعدها بروح ادرس بالجامعة.



من طلعت من المحل إلا واسمع تلفوني يرقع طول الوقت
الفلبينية الي تشتغل معاي تقول لي ان صار يروح لهم المكان يقول لهم الي تشتغل اهني وينها!؟؟
الفلبينية صارت تخاف منه لانه صار يلزم عليها، وانا محرصة عليها من قبل ان لو اي كان قال لها يبي تلفوني ما تعطية اياه ابدا ابدا، وهي المسكينة كانت فاكره هذا الشيئ لين ما طلعت من الشغل.

ظلت فترة متأذية المسكينة تقول انه يجيها المحل ويحن على راسها بالساعات .. كم رقمها ويم بيتهم ؟؟؟ واسأله مالها اول ولا تالي والفقيرة ساكته ما تتكلم
الي ما فاض بيه الامر قال لها خبريني شنو اسمها ؟ شنو اسم ابوها ؟ انا والله ابي اتزوجها
هني ظلت تتصل فيني وايد .. وانا من شدة خوفي اقول لها ما عليش منه خله يولي وانا راح ازوركم ان شاء الله بالمحل

وصج بعدها بيومين زرت المحل اسلم عليهم .. يالله على وحشتنا ظلينا نبشي على بعضنا
وقعدت تسولف لي المسكينة شلون كانت متأذية لدرجة ان البعض من المحلات الي مشاهدتنا فكرة انه يجي لها! وهي ساكته الفقيرة. وخبرتني انه يجيها يتكلم ويطلب منها بطريقة تحزنها وما تقدر تساعده بشيئ لانه توصايتي عليها حافظتها


مر الوقت ومرت الايام نسى ونسيت


وانخطبت بطريقة تقليدية وهو انه تقدم لي شخص على دين وخلق ولله الحمد فرضيت به والحمدلله هو يحاول قد ما يقدر انه ما يقصر معاي بشيئ.
بالصدفة شفت هالانسان الي من سنين بمحل >>> رجع قلبي يرقع مثل هذيك الرقعة الي من سنوات طويلة ما شفتها فيها ومدري ليش قلبي عورني بزوده!!! لما شفت معاه وحده على طول خمنت انها زوجته ظل يطالعني واطالعه بس وكأنه عيونا تحكي حزن شديد اثنينا مو قادرين نتكلم عنه.



حاليا تزوجت لله الحمد
مع انه زوجي اخر ايامه بالخطوبة صار يضربني ضرب مؤذي لاني كنت انشغل بالدراسة واعصابي تفلت ونفستي تعبانة اخاف ما انجح للاسف هو يبيني طول الوقت اضحك معاه ومقابلته وهذا ما يجوز، والله يعلم اني من ارتبطت ومعدلي بالجامعة ينزل وينزل
واذا اقوله يزعل يقول لي قصدش مني! وهو بالفعل منه

وعدني ما يرجع يطقني وخصوصا اني بصراحه قبل الضرب كنت احترمه جدا لكن بعد مدت يده صرت لا احبه ولا اكره! وخصوصا اني ماخذته عن علاقة حب او معرفة سابقة لا خذته لانه انسان سألوا عنه اهلي وطلع انسان اجودي ويصلي ويصوم وفروضة كلها بالمسجد وهذا بالفعل فيه
المهم خبرت امي واختى انصدموا انه يمد يده علي! وصارت امي كثير تحاتي ودايما تنغز له انه ما يمد يده علي مرة ثانية. المهم ان استغل انشغالي بشغل الجامعة وراح رتب امور الزواج وصارت امه دايما تتكلم وياي عن شنو تبي تسوي. وانا كنت اقول ياليت ما يتم! لانه نفسيتي صارت ما تتقبلة.
مع انه يرجع يستسمح مني بس صرت ما اتقبل منه
لاني عرفت ان حتى وعوده لي كذابة

صرت عايشة معاه حياتي الزوجية واني خايفة ايب منه مولود!
لانه ما ابي شيئ يربطني فيه مدري ليش تولد عندي هالاحساس!!
وجالست فترة اختبر حاله للاسف لا يتعدل ولا يسوء.. يعني مستقر

المهم صار الفترة الاخيرة اني نزلت العمرة .. و في يوم مكتوب! بعد ما صلينا في بيت الله انا وعمتي - ام زوجي - وبنتها رحنا على المطاعم عشان نتغدى .. رحت اخذت لي شوربة متونسه عليها بشربها قبل الاكل عشان اكل زين لانه طول الرحلة اكلي شيئ يذكر.
توي باكل إلا ارفع راسي شان اشوف هذا الشخص الي من سنييييييين!!
اقسم بالله ان رجع قلبي يدق مثل دقة هذيك السنين ونفس الخوف الي ممزوج بخجل.!
ومن دون قصد وربي شاهد صرت خايفة لكن بنفس الوقت تبسمت وهو لاحظ للاسف
وظل يطالعني وهالمره كان يطالعني ومصر اني اطالعه بعد ولما غيرت جلستي جاء ووقف قبالي
تخوفت اكثر .. صرت استعجل عمتي بالاكل عشان نمشي
وقلت ياربي ليش بعد اشووفه هني! اهني بالذات وانا بزيارة مباركة! استغفرت ربي
تركت الاكل ولا شربت ولا اكلت وعمتي استغربت! تشوفني جاية مشتهية بس وربي شوفته حسستني اني ماكله غوزي توي!!


ما انكر ان دقت قلبي هذيك السنين كانت حب
وما انكر اني انا الي صديته ولا عطيت ادنى فرصة
مع اني كنت ابادله الشعور وهو كان مقصده شريف

بس الحين انا تزوجت .. ليش يجي على بالي واتحسر مدري!!!
شالفايدة الحين!!!
اتذكر وقلبي يعوررني!

كلنا نعرف خواتي ان الانسان يقدر يتحكم في كل شيئ فيه.. إلا القلب
لانه القلب مساحه حره .. اذا احد دخل حتى ما نقدر نقول له ليش انت داخل اهني!

يا بنات شاسوي!!
نفسيتي تعباااااااااااااااااااااا انة والله

مكسورهـ الخاطر
28/01/2008, 02:06 PM
قلت ماراح اطلع وانا مارديت على مشكلتك..


شوفي انا اقولك الحل..

انتي ادعي ربك باللي تبينة وصدقيني بتتيسر كل امورك..

وخلي قلبك طاهر من اي ذنب لو صغير وبتشوفين خير ان شاء الله..

¶ۈد ξــٺ ﻍ ـآآلے••
28/01/2008, 02:22 PM
الله يكون بعونك اختي الغاليه
لكن الفات فات وهذه وساوس من الشيطان تخليك تفكرين باسلوب خاطئ ومادام انك تزوجتي عن حب وين حبك واخلاصك ولاتخطين خطوه غلط بالعكس فكري بزوجك وبس وهذا الشخص لو شفتيه فهميه انك تزوجتي من خلال الدبله او اي اشي ثاني واستخيري الله بهالامور ان الله يشيله من بالك مول
وبالتوفيق حبيبتي وانا جاهزه لاي استفسار او سوال
وبتابع ردودك وموضوعك ان شاء الله

نا را
28/01/2008, 02:53 PM
يمـه عورتي قلبي ..لكن غلط تندمين وتظلين تطالعين وراك..لأنك بتتعبين كثير.. صدقيني لو انك لاقية الزوج اللي يحتويك ويحبك ويملي عليك فراغ العاطفة كان يوم شفتيه حتى لو قلبك رجع يرقع بتضحكين على ذيك الايام وبتقولين في كل مرة تشوفينه وش هالصدف..لكن انتي مالقيتي من زوجك الا الضرب وقلة التقدير والاحترام..احد يضرب زوجته قبل الدخلة في الخطبة..المهم اختي اياك والغلط..ونصيحتي لك كثري من الدعاء..ادعي ربك بتضرع وخشية ناجيه كلميه بلهجتك العادية بثي شكواك وارمي بهمومك عليه ولاتمنعين دموعك من النزول ولو ما بكيتي تباكي امام رب العالمين وطلبي منه انه يصلح حالك ويبعد عنك كل حيرة وينور لك طريقك ويدلك ويكتب لك اللي فيه خير وصلاح الدارين..صدقيني مجرد تناجين ربك بقلب صادق وبلهجتك العادية من غير تكلف وتشكين له بتحسين براحة وحتى لو رجعت الحيرة والقلق رجعي بثي لربك شكواك مرة ثانية..ترا الدنيا كلها ابتلاء..

ماتدرين يمكن بصدك لهالانسان ربي دفع عنك شر عظيم.. يمكن بيتزوجك وبتشوفين معاه بعد الزواج الويل في اخلاقه او تصرفاته او معاملته لك.. ومو شرط اللي يحسه تجاهك حب ممكن يكون اعجاب لااكثر ولا اقل..(لو اطلعتم على الغيب لأخترتم الواقع)..وماحد ياخذ الا نصيبه بهالدنيا..

وانا مااقول الا الله يكتب لك اللي فيه خير الدارين اللهم آمين وييسر لك كل امر عسير ويفرج لك كل كربة وحيرة انه سميع مجيب الدعاء.

احلام فتاه
28/01/2008, 03:22 PM
قصه حزينه بس خلاص الي فات فات
فكري بزوجك واعيالك بالمستقبل وتركي عنك وسواس الشيطان

GhaDo0o0sh
28/01/2008, 03:50 PM
الله يسهلك كل اموورك يارب ويكت لك ما فيه الخيره ما اعرف وش اقول ما عندي الا اني ادعيلك ان الله يصلح لك شأنك يارب ويوفقك ويسعدك ويبعد عنك الهمووم يارب

ظبى داري
28/01/2008, 05:02 PM
ماعرف شقولج حبيبتي بس ادعي ربج كثر ماتقدرين واترجيه انه يسرلج امورج ويبعد الحيره عنج ..ترى الشيطان يبى يخرب بيتج فلا تعطينه فرصه وكثري من الاستغفار وحاولي تعيشين مع زوجج حياة يديده وحلوه...
الله يوقفج ياختيه ويكتبلج اللي فيه الخير ويفرج همج ياربي

ندايم
28/01/2008, 05:08 PM
اختي هذا ابليـــــــــــــــــــــ ــــــــــــــــس...

بيطلع عيوب زوجك و بيحلي هذا الغريب...

زوجك غلطان انه يضربك...و ماله حق...

بس لا تخلين هذه النقطه تكون عذر عشان هذا الغريب...

طيب و بعدين فكري؟؟؟ لو تعرفتي عليه...

اصلا بتصغرين في عينه لانج خنتي ربج و زوجك...

و ترى مجرد التفكير بس تفكير تعتبر خيــــــــــــــــــــانه ...

فما بالج تحطينه في قلبج و تفكرين فيه و يشغلج!!!!

تعوذي من ابليس... و اعتبري محاربته جهاد...

بسمـة أمـل
28/01/2008, 05:13 PM
يارب ييسر لك كل ما فيه خيررر

الجوكره
28/01/2008, 05:18 PM
والله قصتك تعور القلب
بس انا اقولك خلاص لحين تزوجتي ولي صار صار وهذا نصيبك وجذي كتب عليك الله
انتي حاولي لاتفكري بهذا الانسان لانه حتى ولو فكرتي فيه ماراح يفيدك بشي انتي لحين متزوج وعندك زوج وبيت والانسان هذا ما راح تستفيذي اذا فكرتي فيه
اهم شي انه تطلبي ربنا ييسر امورك وان شاء الله مع الايام راح تنسيه
الله يوفقك حبيبتي

sss_12
28/01/2008, 06:25 PM
مافهمت يضرب وهوة خاطب يعني هذا يمد يدة قبل الزواج كييييييييييييييف اخذتنية ؟؟؟؟؟؟

sarah_uk
28/01/2008, 08:36 PM
اولا انتي غلطانه على الضرب انك كان يضربك وساكته شوفي الزوج لما مايعامل المره كويس يخليها تشوف لغيره من غير شعور بس حاولي تشغلي نفسك والله ماعرف شنو اقول لك بس ربنا يعينك يارب

حائرة يادنيا
28/01/2008, 08:36 PM
قلت ماراح اطلع وانا مارديت على مشكلتك..


شوفي انا اقولك الحل..

انتي ادعي ربك باللي تبينة وصدقيني بتتيسر كل امورك..

وخلي قلبك طاهر من اي ذنب لو صغير وبتشوفين خير ان شاء الله..


شكرا اختى
صدقيني ما انسى فريضة ولا انسى واجب بعون الله
وصعب علي انسى ووراي حسيب ورقيب
بصراحه اخاف من ربي
وصدقيني لولا خوفي من الله
ومن الحساب شان ما ادري شنو صار!
الحمدلله على نعمة العقل
دعواتي ما تتوقف بس شيئ مو بيدي قلبي ما يوقف بعد

حائرة يادنيا
28/01/2008, 08:45 PM
الله يكون بعونك اختي الغاليه
لكن الفات فات وهذه وساوس من الشيطان تخليك تفكرين باسلوب خاطئ ومادام انك تزوجتي عن حب وين حبك واخلاصك ولاتخطين خطوه غلط بالعكس فكري بزوجك وبس وهذا الشخص لو شفتيه فهميه انك تزوجتي من خلال الدبله او اي اشي ثاني واستخيري الله بهالامور ان الله يشيله من بالك مول
وبالتوفيق حبيبتي وانا جاهزه لاي استفسار او سوال
وبتابع ردودك وموضوعك ان شاء الله


اختى والله اني اتعوذ من بليس تكرار ومرارا
واذكر الله تسبيح واستغفار
وعلى فكرة زوجي ما اخذته عن حب
اصلا قلبي دق للي دق له وخلاص ما عاد اي انسان شفته حرك لي ساكن بهذا القلب

وهذاك الانسان اكثر الي عجبني فيه وقارة هيئته شكله وهو ملتحي والدليل لما شفت بالعمرة كان مع جماعة يداريهم ويقدم لهم الاكل والشرب واسلوبة مع الاطفال جدا لطيف

مع ان زوجي يعتد به وسيم، اقسم لك بربي ان كل البنات الي اعرفهم يقولون لي زوجي وسيم
بل حتى اخواني يعترفون انه وسيم بس صدقيني انا مش شايفة هالوسامة ابدا!!
عندي لو كان الانسان شديد السواد وجسمه باي هيئة ما تفرق
هو انسان دخل القلب خلاص هذا كل ما تتمناه البنت
تعيش مع انسان في لش شي بقلبه، لو صار ما صار تتحمل الوحده عشان الحب الي بقلبها يجبرها تتحمل

حائرة يادنيا
28/01/2008, 08:46 PM
قصه حزينه بس خلاص الي فات فات
فكري بزوجك واعيالك بالمستقبل وتركي عنك وسواس الشيطان

اشكرك اختي
اتمنى انسى لاني ما ادري ليش اتذكر!

حائرة يادنيا
28/01/2008, 08:54 PM
يمـه عورتي قلبي ..لكن غلط تندمين وتظلين تطالعين وراك..لأنك بتتعبين كثير.. صدقيني لو انك لاقية الزوج اللي يحتويك ويحبك ويملي عليك فراغ العاطفة كان يوم شفتيه حتى لو قلبك رجع يرقع بتضحكين على ذيك الايام وبتقولين في كل مرة تشوفينه وش هالصدف..لكن انتي مالقيتي من زوجك الا الضرب وقلة التقدير والاحترام..احد يضرب زوجته قبل الدخلة في الخطبة..المهم اختي اياك والغلط..ونصيحتي لك كثري من الدعاء..ادعي ربك بتضرع وخشية ناجيه كلميه بلهجتك العادية بثي شكواك وارمي بهمومك عليه ولاتمنعين دموعك من النزول ولو ما بكيتي تباكي امام رب العالمين وطلبي منه انه يصلح حالك ويبعد عنك كل حيرة وينور لك طريقك ويدلك ويكتب لك اللي فيه خير وصلاح الدارين..صدقيني مجرد تناجين ربك بقلب صادق وبلهجتك العادية من غير تكلف وتشكين له بتحسين براحة وحتى لو رجعت الحيرة والقلق رجعي بثي لربك شكواك مرة ثانية..ترا الدنيا كلها ابتلاء..

ماتدرين يمكن بصدك لهالانسان ربي دفع عنك شر عظيم.. يمكن بيتزوجك وبتشوفين معاه بعد الزواج الويل في اخلاقه او تصرفاته او معاملته لك.. ومو شرط اللي يحسه تجاهك حب ممكن يكون اعجاب لااكثر ولا اقل..(لو اطلعتم على الغيب لأخترتم الواقع)..وماحد ياخذ الا نصيبه بهالدنيا..

وانا مااقول الا الله يكتب لك اللي فيه خير الدارين اللهم آمين وييسر لك كل امر عسير ويفرج لك كل كربة وحيرة انه سميع مجيب الدعاء.

احسك فهمتيني يا اختى
ماهو بالفعل لو زوجي احسن الي وتصبر علي اخلص من شغل الجامعة
شان كبر في عيني..
لكني كنت اروح الجامعة واحمل على ايدي اوراق وادوات حديدية صعب علي اشيلها
وبعد الضرب الي اعطاني ياه صرت اصحى من النوم كأني مشلولة ما اقدر الم نفسي عشان الم اغراضي وكنت اروح للجامعة وانا ابكي بالطريق
بس اذكر الله واتصبر

الصراحه قاعده اصيح الحين لانه مش بس ضربني هو مسك رقبتي كان يبي يخنقني!
كان يضربني بقوة كأني مش بنت.!
وكل هذا صار لما جا يزورني بغرفتي
والبيت كبير وصوت انيني ما كان يطلع من الغرفة
خفت لا احد يسمع من البيت وتصير مشكلة كبيرة
وخصوصا اني كنت على وشك اتخرج ونزلت موادي كلها اقول عشان بعد الزواج افتك، وما كنت ابي افشل دراسيا دكاترتي كانوا حاطين علي امل ان اقدم الافضل

ما اقدر خنقتني العبرة

حائرة يادنيا
28/01/2008, 08:59 PM
الله يسهلك كل اموورك يارب ويكت لك ما فيه الخيره ما اعرف وش اقول ما عندي الا اني ادعيلك ان الله يصلح لك شأنك يارب ويوفقك ويسعدك ويبعد عنك الهمووم يارب

اشكرك اختى الشكر الجزيل جدا
دعواتك لي مشكورة
وربي يسهل لك كل عسير

حائرة يادنيا
28/01/2008, 09:04 PM
ماعرف شقولج حبيبتي بس ادعي ربج كثر ماتقدرين واترجيه انه يسرلج امورج ويبعد الحيره عنج ..ترى الشيطان يبى يخرب بيتج فلا تعطينه فرصه وكثري من الاستغفار وحاولي تعيشين مع زوجج حياة يديده وحلوه...
الله يوقفج ياختيه ويكتبلج اللي فيه الخير ويفرج همج ياربي

مشكورة اختى
وهذا الي قاعده اسويه
ماهو ما بيدي حيلة!
ما عندي الا بيتي وزوجي
ادعي له وادعي من الله ان يزرع حبه بقلبي
كل ما احاول اتقرب منه. يرجع بعد فترة يصدمني برفع يده علي!
ارجع مكسورة من جديد ويكسر كل شيئ احاول ابنيه له
هو بنفسه يكسر الشيئ الزين الي اكنه له
بعد اكثر من اني احاول اهادية وافكر في راحته واوضب له كل شيئ بالبيت
هذا في حد ذاته خدمه له مع اني طلعت من بيت هلي وانا ما اعرف لامور المنزل
لانه كان عندنا خدم، بس تصبرت واشتغلت في بيتي لانه بيتي، ما انكر اني بسرعة اتعب بس احاول اجزء اموري

حائرة يادنيا
28/01/2008, 09:09 PM
اختي هذا ابليـــــــــــــــــــــ ــــــــــــــــس...

بيطلع عيوب زوجك و بيحلي هذا الغريب...

زوجك غلطان انه يضربك...و ماله حق...

بس لا تخلين هذه النقطه تكون عذر عشان هذا الغريب...

طيب و بعدين فكري؟؟؟ لو تعرفتي عليه...

اصلا بتصغرين في عينه لانج خنتي ربج و زوجك...

و ترى مجرد التفكير بس تفكير تعتبر خيــــــــــــــــــــانه ...

فما بالج تحطينه في قلبج و تفكرين فيه و يشغلج!!!!

تعوذي من ابليس... و اعتبري محاربته جهاد...




مرحبا اختى
ادري بيه ابليس الشيطان
بس فكري معاي؟ ماذا لو احببتي وانتي مخطوبة او متزوجة؟
هم فكري ان هذا شيئ قديم كان .. نسيته بس القدر مخليه يطلع بوجهي صدف
لانه ما يعرف دربي ولا اعرف دربه!
ولما اشوفه اشوفه صدف

واني اتعرف عليه هذا من رابع المستحيلات
يا اختى .. لاني انسانة مؤمنة بالله وهذا الشيئ غلط اكيد
واكيد انا ما راح اسوي شذي

الالم الي عندي نفسي بنفسي احترق فيه
محد يدري عنه.

dody mody
28/01/2008, 09:11 PM
لا إله إلا الله

أنا عارفة إن صعب التحكم فى منطقة الأحاسيس والمشاعر لدى الإنسن ولكن حاولى

إتكلمى مع زوجك فى كل شىء مضايقك منه وكل اللى حرجك وقدراتك فى البيت وشوفيه عايز إيه

وحاولى تريحيه بقدر الإمكان وفهميه كده وخدوا أجازة سافروا فيها واعطى نفسك فيها فرصة تريحى مشاعرك

وتركزى حبك كله لزوجك فبما إنك لا تكرهيه ولا تحبيه فمع مرور الوقت تستطيعى تقبله وحالاعجاب به الى ان

تصلى للحب بالعشرة والمعاملة الطيبة ولا تدعى نفسك لوساوس الشيطان



وادعى ربنا يبعد عنك الشر وينجيك

dody mody
28/01/2008, 09:12 PM
أنا معك إذا كان القدر يضعه أمامك فاعلمى أنه إمتحان لكِ لابد أن تنجحى فيه حتى يرضى عنكِ الخالق

الله معك

المملوحهss
28/01/2008, 09:17 PM
..لكن غلط تندمين وتظلين تطالعين وراك..لأنك بتتعبين كثير.. صدقيني لو انك لاقية الزوج اللي يحتويك ويحبك ويملي عليك فراغ العاطفة كان يوم شفتيه حتى لو قلبك رجع يرقع بتضحكين على ذيك الايام وبتقولين في كل مرة تشوفينه وش هالصدف..لكن انتي مالقيتي من زوجك الا الضرب وقلة التقدير والاحترام..احد يضرب زوجته قبل الدخلة في الخطبة..المهم اختي اياك والغلط..ونصيحتي لك كثري من الدعاء..ادعي
انا مع اختي نا را حاولي انك تشغلين نفسك باي شي عنه الله يوفقك ويسرلك امرك
وبمكن عرف من احدمني مناك انك رحتي للعمره ماادري احس انها مستحيل انها تصير صدفه

عاشقة حتى البكاء
28/01/2008, 09:35 PM
اي حب هذا


حبيبتي انتي بوهم


مافي شي اسمه حب من خلال نظرات


ومن دراك يمكن سوالفه مو زينة ويمكن مايعرف ربه


انتي ماتعرفين عن هالشخص شي كيف تقولين انه حب

ومن عرفك ان مقصده شريف


لانه قال ابي اتزوجها معناها قصده شريف


هذي وساوس انه حب وانه قصده شريف وليش اتسرعت واتزوجت وليش ماعطيته فرصه


حبيبتي اصحي لنفسك


انتي الحين متزوجه


مجرد نظرتك لرجل غريب هذا حرام


مجرد ابتسامتك له حرام


الحين متضايقه ومو طايقه زوجك لانه ضربك


لو عمتك ام زوجك لاحظت هالشي ايش بيكون موقفك قدامهم


استغفري ربك وحاولي ترجعين المياه لمجاريها بينك وبين زوجك


وتراك انتي متعبه نفسك


انسي هالشخص ولا يطري على بالك


وخليك مع زوجك وادعي ربي يرزقك الذرية الصالحه

ولا تقولين كرهه لانه ضربني


ياما تصير بين الازواج

بس مو كل وحده زوجها ضربها تجلس تتحسره على وهم من ايام المراهقه ايام الثانوي


والله يصلح الحال

احلامي خيال
28/01/2008, 09:59 PM
اختي والله قصتك اثرت فيا
ربي يبعد عنك كل شر وييسر لك امورك

littleangle
28/01/2008, 10:11 PM
قصه حزينه بس خلاص الي فات فات
فكري بزوجك واعيالك بالمستقبل وتركي عنك وسواس الشيطان

و اتقي اللة عشان ربنا يسترها عليكي و ابعدي عنك الشيطان بالتقرب من اللة عشان خطري اسمعي الكلام

تووجة
29/01/2008, 12:21 AM
اختي الغالية .........
مافات قدفات ولكن بدل من التحسر والندم فكري لو انك تعرفتي به ربما لم يكن ليتزوجك او ربما هو من شياطين البشر الذين لايكلون ولا يملون بل العكس لديهم طولة بال الى ان يوقع ضحيته احمدي الله الذي سترك بزوج راعي دين وصلاة هالأيام نادر تلقين شاب في المسجد وصاحب الدين وان تعامل معك بقسوة فأنه يراعي الله فيك
واعذريني ولكن كيف سمحتي له بضربك وانتم في ايام الخطبة كان لابد من اتخاذ اجراء صارم من قبل اهلك ليرتدع وتعوذي من الشيطان فأنه يشوه الحلال ويزين الحرام
واتمنى لك الخير

حائرة يادنيا
29/01/2008, 01:55 AM
يارب ييسر لك كل ما فيه خيررر





تسلمييييييين اختى
ربي يبارك فيش

حائرة يادنيا
29/01/2008, 01:59 AM
والله قصتك تعور القلب
بس انا اقولك خلاص لحين تزوجتي ولي صار صار وهذا نصيبك وجذي كتب عليك الله
انتي حاولي لاتفكري بهذا الانسان لانه حتى ولو فكرتي فيه ماراح يفيدك بشي انتي لحين متزوج وعندك زوج وبيت والانسان هذا ما راح تستفيذي اذا فكرتي فيه
اهم شي انه تطلبي ربنا ييسر امورك وان شاء الله مع الايام راح تنسيه
الله يوفقك حبيبتي

مشكورة اختى ما قصرتي والله
احاول احاول انسى
بس القدر لمن يطلع بوجهي فجأة يجيني الاحساس غصبا عني مو بيدي امسك قلبي
لكن بيدي اني اسارع بنفسي بالانتصراف
مرات اشوفة بالاسواق صدفة
ومرة اشوفة بالعمرة صدفة ..
وكفايانا صدف ما ابي اشوفة وخصوصا انه بعد هو متزوج وعنده حياته
اه بس

حائرة يادنيا
29/01/2008, 02:02 AM
مافهمت يضرب وهوة خاطب يعني هذا يمد يدة قبل الزواج كييييييييييييييف اخذتنية ؟؟؟؟؟؟

صار واخذته يا اختى وش بيدي!
تدرين احنا بالخليج الخطوبة يعني ملجة يعني عقد قران! اكتب على نفسي اسم مطلقة وانا توي ببداية عمري! خبرت امي ما نصحتني انفصل اطلاقا وقالت لي انه زين بس فيه حركات عصبيه وما يحاسب.

غير كذا كنت منشغله بامتحانات وبحوث وبلاوي والله للجامعة
كنت انظر للضرب الي حصلته شيئ تفاه ما يستحق مني التفكير واضيع وقتي عشان افكر في ضربة .. الاولى كان عندي كيف اخلص من دراستي على خير ولله الحمد خلصت بس مش بالنجاح الي تمنيته بس الحمدلله على كل حال

حائرة يادنيا
29/01/2008, 02:07 AM
اولا انتي غلطانه على الضرب انك كان يضربك وساكته شوفي الزوج لما مايعامل المره كويس يخليها تشوف لغيره من غير شعور بس حاولي تشغلي نفسك والله ماعرف شنو اقول لك بس ربنا يعينك يارب

مشكورة يا اختى
اني ادري مليون بالمية من الكلام الي تقولينه
اهو سبب تحسري ولا ليش راح اتحسر لو لقيته الانسان الي يحتويني ويعاملني كويس
يفكر انه يوفر لي حياة وهدايا وماديات هذي الغاية
المشكلة طبعي غير طبعي حتى بوردة ممكن يملكني ولما اطلب منه يقول لي اجيب لك شيئ تستفيدين منه افضل! الوردة تذبل!!
اي بس احساسي بيها ما يوصف
صار يجيبها لي بين كل فترة واحسها ان مش مقتنع انه قاعد يقدم لي شيئ حلو
يفكره شيئ سخيف
مع انه كل يقول عن نفسه انه رومانسي!!
اي وين الرومانسية!
وممكن يجيب لي هدية كبيرة بس في عيني صغيرة جدا لانه ما دخلت قلبي!

حائرة يادنيا
29/01/2008, 02:13 AM
لا إله إلا الله

أنا عارفة إن صعب التحكم فى منطقة الأحاسيس والمشاعر لدى الإنسن ولكن حاولى

إتكلمى مع زوجك فى كل شىء مضايقك منه وكل اللى حرجك وقدراتك فى البيت وشوفيه عايز إيه

وحاولى تريحيه بقدر الإمكان وفهميه كده وخدوا أجازة سافروا فيها واعطى نفسك فيها فرصة تريحى مشاعرك

وتركزى حبك كله لزوجك فبما إنك لا تكرهيه ولا تحبيه فمع مرور الوقت تستطيعى تقبله وحالاعجاب به الى ان

تصلى للحب بالعشرة والمعاملة الطيبة ولا تدعى نفسك لوساوس الشيطان



وادعى ربنا يبعد عنك الشر وينجيك



مشكورة اختى
بالفعل كلمته اليوم .. قلت له فاكر الضرب الي اخذته منك قبل! للاسف بعدين يقولون المرأة خاينه؟ ماهو لازم الشخص يشوف حاله بالاول ؟؟
ظل يطالعني ويقولي انتي وش قصدش ؟؟؟؟؟ قلت له لما تمد يدك علي احس اني مو غالية عندك ولما افكر ان قبل ما اخذك في ناس اغلتني وكنت بعيش مع ناس ثانية حياة سعيدة اتحسر!
سكت وقعد يفكر !!!
وبعدين قال هذا موضرب يلا انسى انا كنت امزح!
قلت له هو مش بمزاجك تقول انسي وانسى!
هو صعب علي انسى لانك توك قبل يوم اخذت يدي وضربتها بالجدار وصرت حتى القلم لما امسك اكتب يدي تنتفض!

لا إله إلا الله
تعبانة عن جد تعبانة
مدري شلون اعيش حياتي
تعيسه هكذا طوال حياتي!!!
محتاجة حالي حالي اي بنت للحب نفسي اعيش بحب
صايرة عديمة الاحساس .. حتى احساس الامومة ما عندي اياه!!!

حائرة يادنيا
29/01/2008, 02:15 AM
..لكن غلط تندمين وتظلين تطالعين وراك..لأنك بتتعبين كثير.. صدقيني لو انك لاقية الزوج اللي يحتويك ويحبك ويملي عليك فراغ العاطفة كان يوم شفتيه حتى لو قلبك رجع يرقع بتضحكين على ذيك الايام وبتقولين في كل مرة تشوفينه وش هالصدف..لكن انتي مالقيتي من زوجك الا الضرب وقلة التقدير والاحترام..احد يضرب زوجته قبل الدخلة في الخطبة..المهم اختي اياك والغلط..ونصيحتي لك كثري من الدعاء..ادعي
انا مع اختي نا را حاولي انك تشغلين نفسك باي شي عنه الله يوفقك ويسرلك امرك
وبمكن عرف من احدمني مناك انك رحتي للعمره ماادري احس انها مستحيل انها تصير صدفه

مشكورة اختى
ما قصرتي
الله يصبرني ويزيدني صبر عشان اتصبر

حائرة يادنيا
29/01/2008, 02:35 AM
اي حب هذا


حبيبتي انتي بوهم


مافي شي اسمه حب من خلال نظرات


ومن دراك يمكن سوالفه مو زينة ويمكن مايعرف ربه


انتي ماتعرفين عن هالشخص شي كيف تقولين انه حب

ومن عرفك ان مقصده شريف


لانه قال ابي اتزوجها معناها قصده شريف


هذي وساوس انه حب وانه قصده شريف وليش اتسرعت واتزوجت وليش ماعطيته فرصه


حبيبتي اصحي لنفسك


انتي الحين متزوجه


مجرد نظرتك لرجل غريب هذا حرام


مجرد ابتسامتك له حرام


الحين متضايقه ومو طايقه زوجك لانه ضربك


لو عمتك ام زوجك لاحظت هالشي ايش بيكون موقفك قدامهم


استغفري ربك وحاولي ترجعين المياه لمجاريها بينك وبين زوجك


وتراك انتي متعبه نفسك


انسي هالشخص ولا يطري على بالك


وخليك مع زوجك وادعي ربي يرزقك الذرية الصالحه

ولا تقولين كرهه لانه ضربني


ياما تصير بين الازواج

بس مو كل وحده زوجها ضربها تجلس تتحسره على وهم من ايام المراهقه ايام الثانوي


والله يصلح الحال



اهلا اختي .. بالهون علي اشرح لش
حتى لو ما عتبرته حب .. واعتبرناه وهم! على الاقل الاوهام المفروض ما تكرر على القلب دقاته
هذا لو اعتبرنا وهم

وعرفت ان مقصدة شريف من خلال سؤاله الملح عن اسمي واسم عيلتي واسم ابوي بالذات
ما في واحد يبي اسم الابو عشان يقوله انا معجب ببنتك! في البداية طلب رقمي .. بس بعدها طلب فورا اسم الوالد ورقمه. وهم هذا ما تحصل عليه

انا ما تسرعت يا اختى بالزواج
مرت علي ظروف صارت نفسيتي تعبانة .. بصراحه تعودت من تخرجت من الثانوية
وكل شهر شهرين اسمع امي تقول متقدم لي واحد
ومن صرت بالمرحلة الرابعة بالجامعة اشوف هالشي قل!!
بس لما اجاني زوجي كان متقدم وقتها 3 تحيرت بينهم
ماخذت الاحسن ولاخذت الافضل .. خذت الي قاعد يشتغل بنفس تخصصي الجامعي
مع ان واحد فيهم شخصيته كبيرة جدا بالمجتمع بس ما فكرت بشي من الغرور او الانانية
والي اشهد عليه ان الي اجوني قبله كانوا افضل منه والدليل حياتهم الان الزوجية والعملية افضل بكثير من زوجي

فتزوجت لانه هذاك الشخص اصلا ما صرت اشوفة بحياتي

واني طول مرحلة الجامعة هذاك الشخص ما شفته ابداً ولا طلع لي
بدأت اشوفة مرتين صدفة بس مره بخطوبتي ومرة بزواجي
فرأياه تعيد لي الحنين من جديد وكأنه كان الساعة وكأني بعدي الي بثنوي

كل اقتناع باني متزوجة .. لذلك انا متألمه
لانه الزواج يفرض عليا ما هو واجب وما هو حلال وحرام
لذلك انا اتألم لانه الذي في قلبي ليس لي يد عليه وإلا لمزقته تمزيقاً
ولكن القلب حر اً !

وعن عمتي الله يحفظها مالاحظت
وحتى لو لاحظت، ياليتها كانت لاحظت شان يعرفون لي قد، تفكر ان لو لا ولدها محد اجاني
وولدها هو الي قعد يبكي لما قلت احتمال ارفض. وهو الي دق بابنا. حتى ما توقعت انه رزقي!
لكن الله عز مكاني عندهم، صرت من اروح مكان وهي معاي يخطبوني منها يفكرونها امي!!
بزواج اخوي اهل مرت اخوي خطبوني فخبرتهم امي اني مخطوبة!! وبحضور عمتي شافت وسمعت
ولما اروح معاها السوق يصادفونها ناس ويتصلون فيها يطلبوني منها يفكروني بنتها الكبيرة!!
وحتى بالعمرة خطبوني منها! لانها تمشي وتقول اني بنتي فالناس صارت تخطبني منها
وقعدت تخبرهم اني زوجه ولدها شلون بعد!!!

اهني صارت تعرف لي قد وااااايد
بس ما انسى انها اساءت لي بالعمرة جداً ، وهذا الي زيد الطين بله
كانت تروح الاسواق واقعد انا بالاجتماعات الدينية الي نظمتها الرحلة
فصارت النساء تقول لها بنتك تجي وتسمع المحاضرات وانتي كله بالاسواق!
اهني زعلت وقلبتها علي! وصار اذا احد يبلغنا بالمحاضرات تروح ولا تبلغني وانا ابحث عن الناس الي معانا عشان يدلوني! وين قرائه الدعاء واين المحاضرات واين دراسة القران الجماعية

وحتى الي معانا بالرحلة خاصموها لافعالها معاي
وطول الرحلة خذتني حرمه معاها وقعدتني مع بناتها وحاولت تعطيني اكل لكني كنت ابكي بحرقة قلب عميقة! والسؤال في بالي انا شسويت!؟
كنت امسك لها بنتها الصغيرة طول الرحلة وهي تطلع وانا اخذها معاي لفروض ببيت والله وبيت حبيت الله!!
حاولت السيدة الطيبة تأكلني اي شيئ لكني صمت رحلة العودة كلها

شاقول يا اختى
الله واسع الرحمه

حائرة يادنيا
29/01/2008, 02:50 AM
اختي والله قصتك اثرت فيا
ربي يبعد عنك كل شر وييسر لك امورك

اشكرك اختى
الله كريم
تسلمين

بثنـــه
29/01/2008, 03:08 AM
أولا ... اسمحي لي اني أهنيج لانج قاومت الخطأ وماغلطتي في زمن أغلب الناس اللي تعيشه عايشه على أخطاء وزلات ...

وانتي تغلبتي على وساوس الشيطان .. والشكر لرب العالمين وتربية هلج والنعم فيها ..

يمكن الصدف تلعب دور كبير في حياة كل الناس لكنه يبقى مجرد دور نحن نستغله ونفكر فيه بالطريقة اللي تناسبنا

وانتي الحين على ذمة ريال ثاني .. لابد من انه فيه حسنات وعيوب .. حاولي اتفكرين في الزين اللي فيه اذا خليتي مع نفسج .. ويمكن حسناته اتكون أكثر من سيئاته .. مع العلم انه سالفة الضرب أبدا مو هينه .. ونصيحة من أخت اذا مد ايده مره ثانية خلي الموضوع يكبر ويعرفون فيه أهلج وأهله لانه بيستحي من نفسه وهذا بحد ذاته علاج لمشكلة الضرب ...

إلا إذا زاد الأمر عن حده فأنتي أدرى الناس بمدى قدرتج على التحمل وهذي حياتج انتي أدرى الناس فيها ..

سمراءالسودان
29/01/2008, 03:13 AM
عزيزتي شكلك صغيره في السن

صدقيني يا غاليه الحب مو كل شي

انا وزوجي اتزوجنا عن حب ودحين انا عايشه اسوأ حياه ومني سعيده ابدا

حاولي ركزي على حياتك وعلى عملك ان وجد ولما تحملي ان شاء الله بتنشغلين غصب

ويا رب يسعدك ويهديك ويهديني

بكبك
29/01/2008, 03:19 AM
الله يفرج عليك اكثري دوما من الاستغفار

اسيل!
29/01/2008, 03:23 AM
سبحاااااااااااااااااااااا اااااااااااااااان الله

والله حزنتيني

الله يهديك

ماودي اعور قلبك على شئ فاتتتتتت

واقوووووووووووول كان شفتي ايش يبي؟؟؟؟؟؟؟؟؟؟

بس قدر الله امكن فيه خييييييييييييرة انك ماتقابلينه

عموما صرتي متزوجه شيليه من بالك خلاص

ةالله يوفقك

نجمة الرضا
29/01/2008, 04:27 AM
اختي هذا ابليـــــــــــــــــــــ ــــــــــــــــس...

بيطلع عيوب زوجك و بيحلي هذا الغريب...

زوجك غلطان انه يضربك...و ماله حق...

بس لا تخلين هذه النقطه تكون عذر عشان هذا الغريب...

طيب و بعدين فكري؟؟؟ لو تعرفتي عليه...

اصلا بتصغرين في عينه لانج خنتي ربج و زوجك...

و ترى مجرد التفكير بس تفكير تعتبر خيــــــــــــــــــــانه ...

فما بالج تحطينه في قلبج و تفكرين فيه و يشغلج!!!!

تعوذي من ابليس... و اعتبري محاربته جهاد...






مثل ما فكرت في هالحل

كلام سليم 100%

حائرة يادنيا
29/01/2008, 05:16 AM
أولا ... اسمحي لي اني أهنيج لانج قاومت الخطأ وماغلطتي في زمن أغلب الناس اللي تعيشه عايشه على أخطاء وزلات ...

وانتي تغلبتي على وساوس الشيطان .. والشكر لرب العالمين وتربية هلج والنعم فيها ..

يمكن الصدف تلعب دور كبير في حياة كل الناس لكنه يبقى مجرد دور نحن نستغله ونفكر فيه بالطريقة اللي تناسبنا

وانتي الحين على ذمة ريال ثاني .. لابد من انه فيه حسنات وعيوب .. حاولي اتفكرين في الزين اللي فيه اذا خليتي مع نفسج .. ويمكن حسناته اتكون أكثر من سيئاته .. مع العلم انه سالفة الضرب أبدا مو هينه .. ونصيحة من أخت اذا مد ايده مره ثانية خلي الموضوع يكبر ويعرفون فيه أهلج وأهله لانه بيستحي من نفسه وهذا بحد ذاته علاج لمشكلة الضرب ...

إلا إذا زاد الأمر عن حده فأنتي أدرى الناس بمدى قدرتج على التحمل وهذي حياتج انتي أدرى الناس فيها ..



مشكورة اختى ما قصرتي
وشكرا على كلامش اللطيف
اليوم قررت ان هذي اخر مره اسكت فيها!
مع اني قبل ما سكت خبرت هلي بس الوالده واختى لصغيرة
بس اني ما ابي ازعجهم .. يكفي مشاغل الحياة لوحدها تلاهي
وهم حاولت انغز لاخته مره ان يمد يده دايركت قالت لي ليش ما خبرتيني! شان كلمناه
بس اخته لكبيرة اوردي صغيرة صج جامعية بس صغيرة

ومره اتصلت في ابوه لانه ضربني وقال لي طلعي بنفتر بالسيارة
بس انا كنت اصيح واااايد! يعني ما ينفع اصلا اطلع برى باب البيت!
فمن فتح الباب طلعت امشي لحالي ما ابي اطلع معاه السيارة.
راح مسك تلفونة كعادة المثل "ضربني وبكى وسبقني واشتكى" وقال لاخوي لكبير ان اختك طلعت في الشارع تعصب وانا ما اقدر اسيطر عليها! ووهذي فشلة! ووو
لكن وربي ظلم
كانت ردت فعلي، بدل ما اتصبر رحت اتصلت في ابوه وهني هو تخوف وللاسف ابوه همه بشغله
قال لي يبه ردي البيت وانا بحاول اوصلكم
لا وصلنا ولاشفنا
من تزوجما حتى زيارة ما زارنا
ولاشاف حتى مكانه
دايما هو بزنس ومشغول
ودايما لو في مشكلة هله يتباعدون، ولكن لو هلي يشمون خبر
يجوون يركضون
وحضر اخوي وتكلمنا وهدى المواضيع
ومشى ومشى الحال فترة

الحين صار لي فترة والله ما اروح بيتهم!
وهو كمان ما ياخذني على بيتهم!
مدري ليش!
يقول لي الي علي اني اوديش بيت هلش كل اسبوع لكن بيت هلي انا ازورهم! انزين وانا؟؟
شبقولون؟؟
حتى ما يفتكرون يرفعون السماعة شلونش يافلانه!!

والله ان ايام الخطوبة كانوا عاضين علي بيدهم واسنانهم
ومعاملتهم كان ما فوقها معاملة
ومن تزوجت!! حدث ولا حرج!
وطبعا عند الناس انا الغلطانة الي ما ازور وانا الصغيرة الي علي اقوم بالواجب! اعرف كل هذا ! لكن شاقول اذا اخبر ولدهم يوديني لهم يقول لي ما يحتاج!

عنفوان أنثى
29/01/2008, 05:19 AM
من

جد حزنتيتي

أكثري من الدعااااااااء

butterfly_newba
29/01/2008, 05:24 AM
عزيزتي


صح انه زوجك غلطان لما يمد يده وحاولي توقفيه عن الضرب

بس ترى زوجك جنتك ونارك واهم شئ رضاه

حاولي تكسبي زوجك وادعي ربنا انه يحنن قلبه عليكي ويصلح مابينكم ويكتب لكم الخير في حياتكم


اما سالفة الحب القديم >>>>>>>>>>شئ فات وانتهى >>>شيليه من راسك >>>>>>ولو ربنا كتب نصيب كان صار لكن مالك نصيب معاه وزوجك الحالي قدرك ونصيبك

ارضي بما قسم الله لك تعيشي مرتاحة ومتهنية

واعلمي ان الله ماكتب لك شئ الا وهو خير لك وان رايت الخير بعد امد طويل
قال تعالى:
(وعسى ان تكرهوا شيئا وهو خيرا لكم وعسى ان تحبوا شيئا وهو شر لكم والله يعلم وانتم لا تعلمون)



ربَّ أمـرٍ تـتـقيـه *** جـرَّ أمـراً تـرتضـيه
خـفي المحـبوب منـه *** وبـدا المكـروه فيــه





الله معاكي وعليك بالدعااء

حائرة يادنيا
29/01/2008, 05:25 AM
عزيزتي شكلك صغيره في السن

صدقيني يا غاليه الحب مو كل شي

انا وزوجي اتزوجنا عن حب ودحين انا عايشه اسوأ حياه ومني سعيده ابدا

حاولي ركزي على حياتك وعلى عملك ان وجد ولما تحملي ان شاء الله بتنشغلين غصب

ويا رب يسعدك ويهديك ويهديني

لا يا اختش
عمري 24 سنة
وين صغيرة. إلا ما باقي من العمر شي

يمكن صج انتي متزوجة عن حب
بس اكيد انتي تتفقين معاي ان حب عن حب يكفي
في ناس على الرغم من حبها تختفظ بكرامتها
ولما يتم الزواج يكون من اروع ما يكون

وطبيعية الاختلافات الزوجيةـ اصلا صحية

بس يختلف!
لما الوحدة تحب هالشخص تتصبر وعلى قلبها احيانا مثل العسل
لكن اذا ايهانات وما في حب اساس مجرد تساهيل، انكتبنا لبعض وسلمنا!
اي مشكلة تحسين الدنيا ضيقة وسووووووودة وفرااااغ عاطفي رهيب
من يحتويش هذاك الوقت!

صدقيني انا حتى لامي نادرا ما اتشكى
ولا تدري عن حال واحوالي غير الحمدلله وبخير
وهم خواتي واخواني بالمثل

rose_rose7788
29/01/2008, 09:09 AM
ابليس شاطر يا اختي ...

حاولي ما تفكرين بهذاك .. وخليه في طريجه .. والله يسهل عليكم كلكم ... انتي تزوجتي والحين على ذمت واحد ليش تفكرين بواحد ثاني خليه يعيش حياته ولا تفكرين فيه خلاص اللي صار صار ....

وبالتوفيق ان شاء الله

رووووووووووووز

**ام يارا**
29/01/2008, 09:47 AM
قصتك جدااااااا موثره ولكن انتي بااين عليكي وحده عاااقله من تصرفااتك..

الله يكوون في عونك وتعووذي من ابليس الي يطلع مسااؤى زوجك في الفتره هاذي ويحلي يعينك الشخص الثااني .

الله يكتبلك الي فيه الخير في الدنيا والاخررره

حائرة يادنيا
29/01/2008, 10:51 PM
مشكورين خواتي

لله الحمد صاينة نفسي وزوجي
ومأدية واجبي بعون الله في حياتي الزوجية

لكن هذا الاحساس يخالجني احيانا
واشعر بالاسى

الشيخه فطامي
29/01/2008, 11:10 PM
الله معاج حبيبتي
انا اقولج انتي لمن قلبج رقع اول مره تشوفن الشخص ماكنتي متزوجه كنتي بنت او هذا احساس كل بنت طبعا اذا ماكانت مخطوبه او متزوجه فانتي كانج تعرفين الشخص من زمان او كما ذكرتني انه يتردد عل المحل كل يوم فتقريبا ارتكزت الصوره في عقلج الباطن او لمن شفتي عقب هذا عقلج الباطن مع مشاعرج اللي هي دقات قلبج في رايي طبعا انا مو محلله ولا اخصائيه بس اتوقع انه رده الفعل اللي ارتسمج في بالج نفسها تتكرر كل مره لا اكثر ولا اقل...
او اتوقع مادام زوجج يسأسف منج اذا ضربج يعني هذا شي وايد زين فلا تخسوينه ولا تفكرين انج ماترتبطين معاه لا تهدمين بيتج بأيدج انتي حاولي لانج مو خسرانه او حاولي تتقبيلين الوضع اللي انتي في او مصيرج الا الله كاتبه لج يعني لبسيله وتكشخي يوم او يوم درسي طبعا مو كل يوم دراسه او خبرينه شو يصير....

قطرة ^ ^ الندى
29/01/2008, 11:23 PM
http://www.3roos.com/uploaded2008/78644/11200923775.gif

السلام عليكم ..

حبيبتي فات الاوان انك تتزوجي لانك صرتي متزوجة فعشان هيك حافظي على زوجك
وقوي علاقتك بزوجك وحاولي تنسي والي الله كاتبه بيصير وكل خير ان شاء الله بيصير
وصلي ركعتين عشان ترتاح نفسيتك

والله يوفقك يا رب بحياتك

http://pix.nofrag.com/4/4/e/66ac19d66c0c11ec6fff49d6c1c83.gif

¶ۈد ξــٺ ﻍ ـآآلے••
30/01/2008, 01:20 AM
اختى والله اني اتعوذ من بليس تكرار ومرارا
واذكر الله تسبيح واستغفار
وعلى فكرة زوجي ما اخذته عن حب
اصلا قلبي دق للي دق له وخلاص ما عاد اي انسان شفته حرك لي ساكن بهذا القلب

وهذاك الانسان اكثر الي عجبني فيه وقارة هيئته شكله وهو ملتحي والدليل لما شفت بالعمرة كان مع جماعة يداريهم ويقدم لهم الاكل والشرب واسلوبة مع الاطفال جدا لطيف

مع ان زوجي يعتد به وسيم، اقسم لك بربي ان كل البنات الي اعرفهم يقولون لي زوجي وسيم
بل حتى اخواني يعترفون انه وسيم بس صدقيني انا مش شايفة هالوسامة ابدا!!
عندي لو كان الانسان شديد السواد وجسمه باي هيئة ما تفرق
هو انسان دخل القلب خلاص هذا كل ما تتمناه البنت
تعيش مع انسان في لش شي بقلبه، لو صار ما صار تتحمل الوحده عشان الحب الي بقلبها يجبرها تتحمل

اختي الغاليه صدقيني انا مقدره شعورك بس الندم مايفيد ايش برايك راح تسوين الحين بس ربك اللي اختار لك كذا والخيره فيما اختاره الله لكي وعسى ان تكرهوا شي وهو خير لكم ولا تسمحين للشيطان يدخل من مدخل لاك ولاتنسين ان ((ليت ...و....لو,,,,,))مفاتيح للشيطان لنفرض انك تتخيلين انك تتركين زوجك وتطلقين لاقدر الله هل سوف يرجع لك شي او ترجعين شي لالالالالالالاوراح تندمين عز الندم ادعي الله بالليل وكل ماحسيتي انك ضايقه صلي ركعتين وراح تشوفين ان شاء الله وادعي ربك يشيله من راسك
والله يصلح حالك ولاتنسين اني متابعه معك حتى ترتاحين باذن الله

آآآآآهات الصمت
30/01/2008, 01:41 AM
أختي أنا مستغربة من تصرفك تجاه خطيبك

يعني أنتي قلتي انه كان يضربك آخر ايام الخطبة وأنك ما حبيتيه فكيف أتممتي الزواج ؟؟؟!!


بالنسبة للشخص الثاني بصراحة مش عارفة شو أقولك يمكن يكون اعجاب كونك في مرحلة المراهقة


والله ييسر أمورك

ام فدوكة
30/01/2008, 03:53 AM
اختي
اسمحي لي الغلط غلطك من البداية لانو بايام الخطوبة انتو لسه عالبر
كيف تسمحين له يمد يده عليج
كان والله اكسرها واجيب عمامي وخوالي واخواني يقطعوونه
قطططططططططططططططططططططططع

والمشكلة الحقيقية
لازم تستغفري ربج
وتنسيه وتتقربي لريلج
وتحاولي تتفاهمي معاه وتقولي له لا يمد يده عليج ابد

حائرة يادنيا
30/01/2008, 10:40 PM
الله معاج حبيبتي
انا اقولج انتي لمن قلبج رقع اول مره تشوفن الشخص ماكنتي متزوجه كنتي بنت او هذا احساس كل بنت طبعا اذا ماكانت مخطوبه او متزوجه فانتي كانج تعرفين الشخص من زمان او كما ذكرتني انه يتردد عل المحل كل يوم فتقريبا ارتكزت الصوره في عقلج الباطن او لمن شفتي عقب هذا عقلج الباطن مع مشاعرج اللي هي دقات قلبج في رايي طبعا انا مو محلله ولا اخصائيه بس اتوقع انه رده الفعل اللي ارتسمج في بالج نفسها تتكرر كل مره لا اكثر ولا اقل...
او اتوقع مادام زوجج يسأسف منج اذا ضربج يعني هذا شي وايد زين فلا تخسوينه ولا تفكرين انج ماترتبطين معاه لا تهدمين بيتج بأيدج انتي حاولي لانج مو خسرانه او حاولي تتقبيلين الوضع اللي انتي في او مصيرج الا الله كاتبه لج يعني لبسيله وتكشخي يوم او يوم درسي طبعا مو كل يوم دراسه او خبرينه شو يصير....

مشكورة اختى على ردش
واشكر تحليلش
لكن ا اختلف معاش في جزءيات واايد
مش موضوع نقاشنا اهنى
زوجي مش ناوية اخسره والله بس الظاهر هو ناوي يخسرني من اسلوبه الفض
وعن لبسي وكشختى هذا شيئ ثانوي عند زوجي
اصلا هو يفضلنى في ملابس البيت العادية دايما
مش هذي نقطة الخلاف .. الخلاف في مجابلته وقتها
بس الحين المشكلة في اسلوبه معاي انا على طةل فاضية
بس تجي اوقات يعصب ويطلع القهر علي ! ليش!!

حائرة يادنيا
30/01/2008, 11:12 PM
http://www.3roos.com/uploaded2008/78644/11200923775.gif

السلام عليكم ..

حبيبتي فات الاوان انك تتزوجي لانك صرتي متزوجة فعشان هيك حافظي على زوجك
وقوي علاقتك بزوجك وحاولي تنسي والي الله كاتبه بيصير وكل خير ان شاء الله بيصير
وصلي ركعتين عشان ترتاح نفسيتك

والله يوفقك يا رب بحياتك

http://pix.nofrag.com/4/4/e/66ac19d66c0c11ec6fff49d6c1c83.gif


مشكورة اختى
وعملت بنصيحتش
باركالله فيش
وتسلمين على المرور

rدلوعة باباتها
30/01/2008, 11:39 PM
انا مع الاخت ندايم في كل كلمة قالتها ...

اختي المرأة بطبيعتها عاطفية .. و تحن للي يحن لها و تحب الي يحسسها بانوتثتها و هذا الطبع فينا كلنا نحن الحريم ...


نتحسس اذا مانحس بالانوثة عند الي نرتبط فيهم و اكيد ساعات ايي الشعور بالنقص ...

و اهني دور الايمان و الحكمة عند المرآه ... انه يجب ماتخلط الاوراق ببعض ...

فلنفترض زوجج عاملج احسن معاملة و عيشج احلىى عيشة و انتي تحبينه .. بيطري على بالج هذاك الشخص؟؟

بيطري على بالج تكتبين هل موضوع في هذا القسم؟؟

بتكونين انتي مضايقة و تبين تفظفظين؟؟

اكيد لا .. لانه نفسج بتكون مرتاحة .. وانتي الحين نفسج مو مرتاحة لانه الي تعانين منه مو الريال الغريب الي تكلمتي عنه لا ..

لانه لو صج ... جان صممتي عليه من اول الايام الي بدت النظرات بينكم فيها ... مو الحين عقب سنين تذكرين هل شي


الي تعانين منه ضيقة و نقص حاد تركه في قلبج زوجج من معاملة قاسية و سوء فهم .. الي انتي بحاجته هو وضعية الاستقرار مع زوجج .. و حياة زوجية مستقره .. و الي يخليج متردده .. هو خوفج من هل زوج و عدم رغبتج بالتقيد فيه اكثر من انجاب اطفال و غيرها من السمؤوليات و هذا شعور طبيعي لانج انضربتي منه و حسيتي انج انصدمتي و انخذلتي من شخصيته و تعامله معاج و عدم تفهمه لنفسيتج ...

العلاج حبيبتي مو انج تتذكرين الي فات بالعكس .. انتي جي بتكرهين زوجج اكثر لانج تقارنينه بغيره لا شعوريا .. حطي في بالج انج متزوجة و على ذمة واحد الحين و حرام تفكرين بغيره و هل شي يعتبر خيانة.. وانتي اكيد ماتبين هل شي فديتج ...

حاولي ماتفكرين في هل انسان بتاتا و حاولي تشغلين بالج ابمعالجة العلاقة الي بينج و بين زوجج لانه واقعج يقول خلاص ارتبطتي ... و انتي على ذمة واحد ثاني الحين و الي انتي محتاجة له الحين هو وضع مستقر بينج و بين زوجج و حياة زوجية مستقره .. حاولي تصلحين الامور و تفتاحين زوجج .. تكسرين الحاجز الي بينج و بينه .. تدعين في صلاتج انه يحنن قلبه عليج و انشاءلله خير

حائرة يادنيا
30/01/2008, 11:42 PM
أختي أنا مستغربة من تصرفك تجاه خطيبك

يعني أنتي قلتي انه كان يضربك آخر ايام الخطبة وأنك ما حبيتيه فكيف أتممتي الزواج ؟؟؟!!


بالنسبة للشخص الثاني بصراحة مش عارفة شو أقولك يمكن يكون اعجاب كونك في مرحلة المراهقة


والله ييسر أمورك


مشكورة اختى على اهتمامش
طيب يا اختي فكري معاي!!
اني كنت بضغط دراسي ما يعلم بيه إلا رب العالمين
وهو استغل انشغالي بالدراسة وقعد يحضرون للحفلة هو وامه
تدرين ان الوقت الي كان عندي عشان اجهز فيه للزواج نص شهر بس!
وبعدين ما حبيت اتسرع واتطلق! وللاسف الظروف ما كانت مناسبة اننا نطول بالخطوبة لانه هو بلغني انه يحب ان يستقر من ايام الخطوبة وكان يبي زواج دايركت

وعن الشخص الثاني
يا اختى يمكن اعجاب! مدري!!
عاد اعجاب من ايام ثنوي للحين!!
هذا اعجاز مو اعجاب!

أخت دحووووم
31/01/2008, 01:11 AM
الله يعونك أختى
أنصحك بكثرت الاستغفار

فديت بنتي الغالية
31/01/2008, 02:23 PM
الله يسرك كل الخير ان شالله

-بنت الجزيره-
31/01/2008, 04:14 PM
والله قصتك تعور القلب
الله يصبببرك اختي وربي له حكمه سبحان الله لا علم لنا فيها


ويبعد عنك وسوسة الشيطان

بنت وجدة
03/02/2008, 01:58 PM
الحمد لله انك متزوجة الحين

اللي راح راح

الله يوفقك في حياتك

بيان البيان
03/02/2008, 02:20 PM
ادعي ربج كثر ماتقدرين
الله يوفقك حبيبتي

wed
04/02/2008, 11:17 PM
انسيه لللأبد- وخلك في حياتك والله يعطرلك الأيام بالخير.

جـ22ـوري
05/02/2008, 02:11 AM
قصه حزينه بس خلاص الي فات فات