المساعد الشخصي الرقمي

مشاهدة النسخة كاملة : زوجي وزجة أخوه



شموخ بوظبي
26/01/2008, 10:30 PM
السلام عليكم اخواتي العزيزات

بصراحة مالي حد أشكيله غيركم

صارلي يومين زعلانه من ريلي اليكم القصة لتفيدوني لاني محتاجتكم

نحن بس مالجين يعني بعدني انا في بيت اهلي المشكله ان حرمة اخو زوجي كانت تبا زوجي لأختها بس زوجي طنشها وخطبني ومن هني أعلنت الحرب عليه

وتحاول دوم تدخل بينا اكثر شي يغيضني انها ما تتحجب جدام ريلي ودوم يصير خلاف بيني وبين زوجي لأنها ما تحتشم جدامه والشهادة لله ريلي ما قصر راح وكلم أخوه قاله خل حرمتك تحتشم جدامي حرمتي تظايج
بس طنشو وعادي واخو زوجي عادي عنده حرمته ماسكتنه واخو زوجي دوم يطلب من ريلي ان يوصل حرمته مثلا سوق أو عند أهلها وانا هالشي وايد مظايجني لان ما يصير وحرام يصير خلوة بينهم ورزوجي اكثر من مرة رفظ بس احيانا يستحي بس اخر مرة طلب اخوه ان يوصلها بيت اهله مسافة تقريبا ساعتين تخيلو يتم ساعتين بالسيارة بروحهم مع اني واثقة من ريلي وبصراحة انا وايد احلى واصغر منها وابد ما اغار من هالناحية بس بعد ما احب ان يحتك معاها المهم قلتله لاتوصلها والحمدلله ما وصلها بس طرشلي مسج وقالي انتي تفرقين بيني وبين اخوية ومرة ثانية اذا احتاجتني بوصلها انا وايد انقهرت وشدينا بالكلام وصارله يومين ما يرد علية ومازارني وطرش لي مسج كاتب فيه لا طرشين لي مسجات

بنات انا وايد نفسيتي تعبانه واي خلاف يصير بينا بسبب حرمة اخوه اللي اكرها ودوم

تخرب علاقتنا

قولولي شو الحل لان تعبت

فلورهـ
26/01/2008, 10:39 PM
انا حاسة باللي انتي فيه

لان امي وابوي مشاكلهم 25 سنة منس سبايب زوجة عمي الله يهديها نفس الحالة بس كانت تستغل ابوي ليصرف عليها لان راتب عمي مو شي
وانا حمدت ربي الف مرة لما انخطبت ان ماعنده اخوان بس خوات لاني تعقدت

انتي لاتدخلي بمشاكل مع زوجك بس ذكريه بكلام الله وباللي يحل له والي مايحل له وزوجه اخوه مو من محارمه
يعني لاتحاولي ان تخليه يشوف ان منك بكرة تروح تفر مخه ان كنا بخير جت وجابت المشاكل

ذكريه ان كلام ربك مو كلامك

وهو لما يخاف من غضب الله ( وبين ان في استجابة ) رح يخفف اختلاط معاها ويتجنبها ويتحجج ان مايوصلها

وبكرة لما يتمم لك ربي على خير وتتزوجوا رح يكون اقرب الك وتكوني في بيت واحد ويخاف على خاطرك ويداريه اكثر

وانتي كل ماشفتيها قولي

اللهم اكفنيها بماشئت وكيفما شئت

Miss JO
26/01/2008, 10:49 PM
انا معاك ان الموضوع ينرفز مره..لكن طولي بالك أكثر وهدي شوي عشان ماتطفشين زوجك وبعدين يبدا يقارن بينك وبين زوجة اخوه ويقعد يقول هذي ماتسوي مشاكل وسلسه ومدري ايش....وغيره
انتي توك ماارتبطتي مع زوجك في بيت واحد لسى ..بعد الارتباط بيتغير الوضع وبيكون زوجك معاك وزوج اخوك بيستحي يطلب منه شي لأنك موجوده وحتى لو طلب انتي بتكونين مع زوجك في اي مشوار
انتي الحين يجي دورك هدي ع الاخر ولاتبينين انك مقهوره ومتنرفزه وتغيري 180 درجه وخليك بارده صدقيني بينهبل زوجك وبيقول شفيها ماتغار علي ولاتنقهر ويبدا هو يسئل وراك ووش فيك وكذا ..
وزوجك ماقالك انك تبين تفرقين بيني وبين اخوي الا لأنه قال لأخوه زوجتي تتضايق ..هو المفروض مايبين لأحد الي بينكم واحاسيسكم ومشاكلكم هذي اشياء خاصة وتحاولي تفهمينه بطريقه لطيفه انو انتي ماترضين الي بينكم حتى لو كان تافه يطلع لأحد
واذا تناقشتي معاه بالموضوع لما هو يفتحه مو انتي قوليله..عادي عندك اروح مع زوج اختي لحالنا يوصلني مشوار ؟! مااتوقع بيستسيغ الموضوع
بعدين لاتحاولين تقولين لزوجك احاسيسك تجاه زوجة اخوك لأنه مع الوقت بيبدا زوجك يقول انتي تغارين منها انتي وانتي ...فحاولي ماتوصلين له كل شي لأنه قال لأخوه زوجتي تتضايق ان زوجتك ماتحتشم يعني كل شي قاعد يقوله لأخوه وش هذا..اعملي كنترول لنفسك انه مو كل شي تقولينه لزوجك عشان مايقوله
وركزي على نفسك وعلى اسلوبك الي يخلي زوجك ينبهر فيك
لأنه بااسلوبك وبعصبيتك خليتي فكره عند زوجك انك تبين تفرقين بينه وبين اخوه حاولي تغيرين الفكره

الجوهره 2000
27/01/2008, 12:50 AM
السلام عليكم ورحمة الله وبركاته

اختي شموخ

شوفي عيني هالامور هذي بينك وبين زوجك تخلق لك المشاكل وتزيد الفجوه بينكم

ويمكن هذا اللي تسعى الله مرت حماك فانتبهي تعطينها الفرصه اللي تتمناها وخلي عقلك اكبر من عقلها

وخلي الحلم والحكمه دوم شعارلك ولا تتخلين عنها ابد مهما يكون وبكذا بتملكين عقل زوجك قبل قلبه

ولا تخلين الغيره تدمر حياتك عيوني

والمفروض انك عارفه بان هذي طبيعة حياته مع زوجة اخوه قبل لاياخذك وتعود انه مايعصي اوامر اخوه في شي

فما يبغي اخوه ياخذمنه موقف ويقعد يقول له زوجتك او مازوجتك فهمتيني

وحطي في اعتبارك حاجه وحده الرجال العاقل ماتاثر فيه لاهذي ولا اشكالها واذا هي ماستحت على وجهها

وراعت حدود الله في كل تصرفاتها وزوجها مطاوعها فزوجك مايقدر يغير شي هو اساسا ماهوبتحت تصرفه

والمفروض عليك في هالحاله الصبر واخذ الموضوع من جانب ثاني طيب

يعني ماتجين له بالخناق والزعيق وهذا يجوز وهذا مايجوز ولاتطيع اخوك ولاو لا ولا

هو هنا يحس انك تفرضين شخصيتك عليه وتفردين عضلاتك عليه وهذا من اقوى الاشياء اللي تضايق الرجال

ومايقدر ابداً يستحملها مهما يكون من نتايج

تاخذينه من جانب ثاني مثلا تقولين له يافلان انا والله ماودي باللي يضايقك وعارفتك وواثقه في اخلاقك

ولا ودي تلحقك ذنوب بسبب افلانه الله يهديهاويرزقها الصواب

والمراه اذا كانت ناقصه عقل فالمفروض انك في محل اخوها وتنصحها من ناحية لبسهاواعتقد اني لا صرت عندك

على خير مانت براضي علي اتصرف بمثل هالتصرفات اواطلع قدام اخوانك بهالشكل والا امشي مع الواحد منهم

مشوار لحالي اكيد لانت براضي ولا انا ارضاها على نفسي


ثاني شي هالوقت الواحد يالله يضمن نفسه واسمح لي وحده بهالتصرفات بصراحه ماينوثق فيها بكره تسوي

مصيبه بعد وتحطها براسك واللي مايخاف الله خفه

واذا كنت تداري خاطر اخوك ولا ودك تزعله مالومك ولا ودي يصير بينك وبينه شي بسببي لكن اقل حاجه اخذ معك

احد من اخوانك او من خواتك اذا صرت بتوديها لمكان وراع حدود الله في هالموضوع

ووالله لو لاقدر الله صار لك معها خير بلا شر ماحد ينفعك غير عملك فلا تخشى فالله لومة لائم

ولا تخلي الله اهون الناظرين اليك

ولاتنسى حديث الرسول صلى الله عليه وسلم (لا يختلي رجل بامرأه الا كان الشيطان ثالثهما ) والحمو الموت

فلا تترك للشيطان مجال في هالامور وانت الحمد لله رجال عاقل وفاهم في هالامور ومايعلم بالمغيبات الا الله

طيب

وبعد كذا اتركي منك التهور والعجله والعصيبه اذا شفتي ماتغير شي في تصرفاته

اصبري واتحملي لين الله يكتب ويتم عرسك على خير و انتي هنا بتقدرين تغيرين الكل واولهم مرة حماك

بالحشمه والعفه والذرابه في المعامله مع الحمو بحدود سلام عليكم السلام ابد لاتتجاوزينها

حتى يحسون بالفرق بينك وبينها

طيب واراهنك بعد كذا زوجها لاشاف طريقتك ابيجبرها غصب تحتشم وتستحي على نفسها

واذا صار واحتاج زوجها لاخوه في مشوار والا شي اكيد طبعا بتكونين معه

وانتبهي لروحك ولا تضيعين عريسك منك باسباب وحده استغفرالله.....الله العالم وش وراها

وكثري من الاستغفار وعاملي زوجك بالحسنى والذكرى فقط (وذكر فأن الذكرى تنفع المؤمنين )

وانا بصراحه ما الومك ابد لان اللي متعود وعايش في بيئه تخاف الله في جميع امورها

مايستحمل يشوف شي غلط ويخل بالدين الحنيف وتوجيهاته ويشوف كل شي كبير في عينه

ويهتم ويضيق لكن في نفس الوقت مايقدر يغير شيء الا بالحكمه والموعضه الحسنه

(وجادلهم باللتي هي احسن ..... ولا تكن فضا غليظ القلب فينفضوا من حولك )

اسمحي لي اختي اطلت عليك وودي باللي ينفعك ويريح بالك


وربي يعينك على تجاوز هالمحنه ويزيدك حكمه ورجاحة عقل وتغيرين الجميع للافضل

والله يسهل دربك وييسر امرك ويسخر لك قلب زوجك ويهديه للصواب اللهم آمين ...

بحرينية أصل
27/01/2008, 12:58 AM
الله يصلح اللي بينكم وينحل الخلاف ان شاء الله

بس اختي في شي حبيت اقوله لج

اذا في شي مو عاجبج من تصرف صار لا تحاولين تستخدمين اسلوب الامر مع زوجج لان اغلب الرجال مايحبون هذا الاسلوب
حاولي تاخذينه من جانب ثاني وتفهمينه اكثر

sss_12
27/01/2008, 02:55 AM
الحلال بين والحرام بين


الحموووووووووووووووووو المووووووووووووووووووووت كلام سيد الخلق صلى الله علية وسلم

مسك وعود
27/01/2008, 03:08 AM
كلميه زوجك يمكن هذي اليومين متنرفز من الموضع بس صديقني ما تهوني عليه

كلميه واساس وبصراحه ما كان مفروض زوجك يعملك ويزعل

الواقع بيظل واقع والغيره موجوده طبيعي

يعني لو عكستي الموضوع عليك اكيد راح يزعل ويعصب منك

فجلسي معاه وتناقشي تحاوروا ما فيها شي

الزوج حوار وثقه وتفاهم مو بس حب وغرام

وقولي له ما مستاهل كل هذا الزعل منك عشان حرمه ما ساويه

خبري بكل ما تشعري انتي وخليك حكيمه وحاسبي على كلامك خليك موزونه وراقيه هو كذي حاس يعني بملل وفراغ وضغوطات لو تقربوا موعد زفافكم ابرك لكم



والله يوفقكم ان شاء الله

عنفوان أنثى
27/01/2008, 05:09 AM
أختي حطي أعصابك في مويه باااااااااااااااااااااااا اااااارده

وطنشي على الأخر ولاكنك سمعتي شــي

انا خطيبي يوصل زوجة اخووه وامووووووت من القهر واسوي مشاكل

بس بعدين فكرت ليه مااطنش وفعلا حل مؤقت حلوو

على البال
27/01/2008, 07:21 AM
وعليكم السلام ورحمة الله


اختي طرشيله مسج واضح مافيه لبس ولا مجامله

قوليلة انت زعلت مني لاني خفت عليك من غضبك ربك عليك ... وهذا ابسط حق لك علي اني اكون لك زوجة تعينك على حفظ حقوق الله


عشان يحس ان غيرتج على حدود الله مب غيرت دلع و حركات حريم


خليه يذكر اخوه انه مسئول عن زوجته وتقويم تصرفاتها قدام رب العالمين واذا ما بيخاف على اخوه عيل منو يخاف عليه



عسى الله يهديه وينور قلبه ويبعد عنه شر هالانسانه

نتالي6
27/01/2008, 07:47 AM
بصراحه ماعلى كلام خواتي الله يحفظهم زود

كفوا ووفوا

بيني انك غيرتك في حدود الله فقط
وقولي له اذا انت عادي عندك كيفك ومن ثم هو بينحرج من نفسه


ومرده بيرجع لك لاتدورينه خليه على راحته لين هو يتصل

**ام يارا**
27/01/2008, 08:23 AM
اساس مومن حق زوجك انو يزعل منك لان موقفك كاموقف اي واحده يسير معاها كذا

انتي خذي خطيبك بالهداوء والسياسه لان الرجل كاطفل يحتااااج لسياسه والكلام الطيب عشااان يجي تمام

وبعدين اذا كلمتي بالطيب اكيد راح يسمح كلامك لان الي تقووليه صح وعين العقل مايجوز الخلووه بين الرجل

وامراه ....وماتوقع ان زوجك مو عاارف انو الي يسوويه غلط وحرااااام

كلمي زوجها اذا كان زوجها من النوع العاقل ومايعصب بسررعه ويتفهم وضعك بس اذا كان من النووع الي مايتفااهم لاتكلمي يمكن كلامك يخرب بين الاخ واخوه ...

الله يهدي سركم انتي وخطيبك ويبعد عنكم الشيااطين

Bint -qatar 2008
27/01/2008, 08:44 AM
مرحبا حبيبتي انا مع البنات في اللي قالوه

بس انا في شي لفت انتباهي المسج الاخير اللي طرشه لج ؟؟؟ ليش هل انتي في هاليومين زعجتيه
بالمسجات
واذا ايوه شنو في هالمسجات لوم وعتاب ولا ترجي علشان يرجع

على العموم يالغاليه اسمعيها نصيحه الرجال يحب الوحده الثقيله اللي تحل الامور بالعقل من غير الحنه والاتصالات اللي مالها داعي

اثقلي عليه شوي ولا تطرشين مسجات واذا اتصل لا تردين على طول اصبري وتصبري لانه لازم يحس انج انتي الزعلانه وان انتي اللي ممكن ماتردين عليه مب هو اللي يسفهج وعلى شان ايش علشان مرت اخوه اللي نيتها واضحه

انا اقولج هالكلام بحكم اني مع خطيبي اسوي نفس الشي التطنيش لازم تفهمينه من البدايه ان هو اللي لازم يداري خاطرج ويدور رضاج وانتي فالمقابل بتعطينه على قد ما يعطيج

اسمعيها نصيحه مني وانااختج على قد ما يعطيج من غلا عطيه لا تزيدين ترى يقلب ضدج

اسفهيه وطرشي له مسج اخير ولا تردين على اي رد هو يطرشه اذا صار في خاطره كلام خله يجي لين عندج

طرشي له (( يالغلا انا حاولت اراضيك وانت مارضيت مع ان انا المفروض اللي ازعل اذا عاجبك وضع زوجه اخوك
خلك معاهم وانا الصراحه مااقدر استمر مع حد ممكن في المستقبل يرضى اني (((((( اطلع جدام اخوه من غير غطى ))))))) تحمل بعمرك


وبس وخليه يفكر انج بعتيه وانج ماتبينه خله يحس ان هالمره انتي من جدك مو لعب ولا غيره ولا بتموتين عليه

وخليه اذا اتصل لا تردين عليه واذا طرش مسج حتى لو كان يستفزج فيه لا تردين ولين جاء بيتكم لا تطلعين وخلي حد يتفاهم معاه وتشرطي واذا رضى بشرطج كان بها واذا ما رضي صدقيني يا اختي هاي شخص بيكون سلبي في المستقبل وماراح ينفعج في شي وبيكون هله لهم الاولويه في اي شي وصدقيني بتتعبين وووواجد

rose_rose7788
27/01/2008, 09:09 AM
اختي العزيزة ... انا مريت بنفس موقفك بالضبط جنج ترمسين عني ...

ونفس المواصفات اللي ذكرتيها .. بس يدام ريلي تتمكيج وتيلس ويعني ها .. بس الحمد لله ريلي مو من النوع اللي يعبر وااايد وانا كلمته كذا مرة ومن عقبها تم يعتذر وهي كانت تتصرف .. وتخبر ريلها اللي هي سكانه وباقي اخوانه يوصلوونها ... صدقيني والله لي يومج هذا لا هي ادانيني ولا انا ... دايما تتحسف وتبا ريلي يكون ماخذ وحده من خواتها ... دووم اسال ريلي يقولي انا مينون ؟؟ كفاية وحده مطلعه لاخوي قرون بعد اييب الثانية عشان يتحدوووون وعمتي تقول كفاية اللي موجوده بعد الثانية من نفس الطينه عشان يدمرون البيت عدل ...

الحمد لله على كل حال بس بقدر الامكان ياسه اطنشها وهي تحترق زياده ... والمثل يقول الحقران يقطع المصران .. وانتي خليج مع ريلج بس الصراحه هاي ينخاف منها ... وهاي النوعية ما منها امان .. وما شاء الله ياقي الخوات ما قصروا ...

روووووووووووووووووووووووز

حبيبه حبيبها 29-3
27/01/2008, 10:04 AM
حبيبتي لا تخريين علي نفسك وعلى زو جك حياتكم اول شي صالحي زوجك وارجعي لبيتك من نفسك وفهميه انك كل الي تسوينه من حبك له وخوفك عليه واتفقي معه على انه يقلل من مشاوير زوجه اخوه وانتي بشطاره حببيه انه ياخذك معه لكل مشوار واقلبيها ونااااااااااسه

وردة جده
27/01/2008, 10:41 PM
اختي لاتسوين معاه مشاكل بسبب زوجة اخوه لان انتي قلتي بنفسك انها تبيه لاختها فانتي تعطيها فرصه بزعلك اللي مالو داعي حاولي ماتسوي مشاكل وتعجلي بالزواج ولما تكونوا ببيت واحد ان شاء الله ماراح يوصلها وانتي تقدري تتحكمي بالامور لانك معاه اهم شي الحين حاولي تنطشي وعاتبيه بذوق وحب مو زعل وهو الحين يحس انك تفرضي شخصيتك عليه وهذا الشي مو بصالحك ممكن يكون ضدك لاقدر الله ويصير شي ماتحبيه وربي يتمم زواجكم على خير ويسعدكم ويهنيكم

شموخ بوظبي
29/01/2008, 06:22 PM
حبايبي والله كلامكم ريحني

فلورينا الدعاء دوم بقراه وبدعيلج حبيبتي مشكووووووورة

Miss jo حبيبتي رمستج ريحتني مشكوووووووووورة قلبي

الجوهرة ماطولتي حبيبتي بالعكس وايد استفدت الله يريحج حبيبتي مثل ما ريحتيني

دموع الكوثر كلامج كله صح وزدتي ثقتي بنفسي مشكورة حبيبتي

SSS-12 كلامج صح ومشكوورة والله يوفقج حبيبتي

مسك العود أشكرج لاهتمامج وردج مشكورة عيوني

عنفوان أنثى أشكرج ردج أرحني جدا عزيزتي

على البال طرشت المسج اللي قلتيه ومشكورة لحلج العملي

نتالي6 حبيبتي استفدت من ردج اللي رفع معنوياتي مشكووووورة

أم يارا كلامج صح وواضح مشكووووووووورة حبيبتي

manoo44244مشكورة حبيبتي ونصايحج ثمينه جدا وفكرتج عجبتني

rose- rose 7788 اشكرج حبيبتي والله يوفقج ردج رايع

حبيبة حبيبها الله يوفقج وكلامج سليم مشكورة

وردة جدة مشكورة عالرد ونصايحج فادتني

هيتاف
29/01/2008, 06:51 PM
يوه والله قليلة ادب وقوية عين الحل يأختي شموخ ابو ظبي ان تكلمين ام زوجك اكيد راح يكون لهى تاثير قوي لانها اكبر منك اأم زوجها

افرودييت
29/01/2008, 06:59 PM
السلام عليكم........

حبيبى اولا عايزه اقولك انك كده مبدئيا عشان علاقتك بيها وحشه
متهيألى لو هى كويسه معاكى مش هتغيرى كده هتقولى زوجه اخوه وزى اخته وكده (ده اكيد) لكن طبعا بتحفظ مش جامد قوى ........

كمان زوجك معزور برضه موقف وحش قوى من اخوه هو اكيد خايف يخسره
بس اكيد بعد الجواز ان شاء الله اخوه هيعمل ليكى حساب .....
بس المفروض برضه خطيبك يوصله انك بتدايقى وهو بيدايق او كل مايقوله يقوله والله مافاضى ........
وصلها انت .......

بس اكيد الوضع ده هيتغير وانتى متنكديش على خطيبك لانها اكيد هتغيظك وخصوصا لو عرفت انك بتدايقى
انا مقدره موقفك الله يصبرك الغيره وحشه قوى ربنا يهديلك خطيبك ....

ويهديلى خطيبى برضه اللى مطلع عينى هههههه

قصة حب!
29/01/2008, 09:07 PM
شموخ بوظبي شوفي الخاص... أتمنى أن تجربتي تفيدج

الله يوفقج...

شموخ بوظبي
29/01/2008, 10:54 PM
هيتاف حبيبتي مشكووووووورة عالرد الرايع وبصراحة نبهتيني لان عمتي وايد طيبة
أفرودييت الله يهدي خطيبك حبيبتي والله يبعد عنكم الشر مشكورة حبيبتي

قصة حب مشكورة حبيبتي أكيد بقرا الخاص ومشكورة وايد الله يوفقج ما قصرتي