المساعد الشخصي الرقمي

مشاهدة النسخة كاملة : شو رايكم ندردش مع بعض شوي؟؟؟؟



عروس قديمه
15/03/2002, 04:11 PM
يا جماعه خلونا ندردش...ومستفيد من آرائكم....


بالنسبة للصراحه بين الزوجين؟؟؟

الى اي مدى تكون و اي درجه....واي اي حد تقف...بالنسبة للزوجه وبالنسبة للزوج....

وما هي الاشياء اللي مفروض ما يتعدونها بصراحتهم؟؟؟
وهل يضايقك...او يحز في خاطرك ان زوجك يخفي عليك بعض الأمور؟؟؟اللي ممكن ان يكون من حقه ان يخفيها عليك؟؟؟

وهل انتي ايتها الزوجه تخفين بعض الأمور على زوجك؟؟؟؟
وهذي الأمور تتعلق بماذا؟؟؟؟

شو رايكم بالعربي اليوم؟؟ماشالله علي.....ألعلع فيه...:)


الموضوع عن الصراحه بين الزوجين...
وابيكم تردون علي بكل صراحه

غدي
15/03/2002, 04:55 PM
أختي عروس قديمة

يعني أكيد عندك خبرة كبيرة في موضوع الصراحة بين الزوجين ;)

قولي لنا وش رأيك الأول في الموضوع وأنطباعاتك عنة مع بعض المواقف

عروس قديمه
15/03/2002, 08:48 PM
هلا ...

انا بالنسبة لي....

اسرار بيت اهلي مستحييييييييييييييييييييي ل...اقولها لزوجي...
ودايما احب ابين له ان اهلي احسن ناس في الدنيا.....

ونفس الشي زوجي...ما يقولي اسرار بيت اهله....مع اني مرات اتضايق من هالشي رغم ان من حقه....بس تعرفون عاد فضول الحريم؟؟؟؟ونفس الوقت يجيني شك انه بعده في حواجز بينا؟؟او انه ما يثق فيني؟؟؟ابليس اعوذ بالله منه؟

بس انا ...ما احب اخبي عليه شي ابدا...ما تتصورون كيف....كل شي اقوله له....
ولما اخبر حد من صديقاتي او خواتي يقولون لي؟؟؟يالهبله حد يقول لزوجه هالسوالف؟؟؟بتفتحين عيونه؟؟ وما شابه....

استغرب من الزوجات اللي يخبون كل شي عن ازواجهم؟؟؟خوفهم من انه يغير نظرته فيها؟؟؟ااو ما شابه

بس تصدقون...
احس مرات كلامهم صدق...

ليش

مرة...
كنا نطالع التلفزيون انا وزوجي...
الممثله لابسة باروكه؟؟
قلت لزوجي؟؟؟يلعن ابو الشعر؟؟؟قاصين علينا؟؟؟لابسه باروكه؟؟؟
زوجي استغرب؟؟؟: :eek:

ومن يومها...الحبيب كل ما تطلع وحده عالتلفزيون...يقعد يطالع في شعرها؟؟ويقولي هذي باروكه؟؟؟؟؟؟:s :s

جود111
15/03/2002, 09:56 PM
سلام للغالية والغاليات...

موضوع جميل ومهم وشكراً على طرحه يا عروس

بالنسبة لي أنا كمان ما أحب أخبي عن زوجي شي بس أوافقك في موضوع الأهل لازم الوحدة ما تحش في أهلها أو حتى تشتكي منهم لزوجها مهما كانت علاقته فيهم كويسة.

بالنسبة لزوجي يشكيلي من أهله بس عمري ما أقول شي عنهم أسمع منه وأحاول أهدّيه وأدافع عنهم أو أسكت لأنه متأكدة إنه ما حيتقبل مني أي كلمة عن أهله زي ما أنا ما أتقبل هذا الشي.

زوجي صريح معاي بس مشكلته إنه قليل الكلام ما يحب الحكي الكثير يعني أي شي مو مهم ما يقوله وأنا صراحة أحب أعرف كل شي حتى عن الشغل فكنت أساله كثير بس إلحين قاعدة أحاول أتعلم منه وأحياناً أكون مقهورة فسوي زي ما يسوي ما أقوله إلا الشي المهم أو أستناه يسأل بس ما أتحمل وقت طويل وأرجع أحكي له كل شي عاد الحريم وكثرة الكلام:p

شكلي طولت بس المهم في الموضوع إن الصراحة شي مهم بين الزوجين. هذا شي بس الزوجة كمان لازم تكون ذكية تعرف إيش اللي ينقال ومتى تقوله وإيش اللي ينسي أحسن لأنه لا حيقدم ولا حيأخر وبس.:D

عروس قديمه
17/03/2002, 12:09 AM
مشكروة يا جود على الرد الحلو هذا...استمتعت و انا اقرا اللي كتبتية....ويا ليتك طولتي اكثر...

طيب قوليلي اذا زوجك من النوع الكتوم؟؟؟كيف تعرفين تتطلعين منه الكلام؟؟؟او تتطلعين اللي بداخله؟؟؟

اديب
17/03/2002, 12:18 AM
اهـ اهـ اهـ منكم يالنسوان


تآ مروا واتفقوا على الضعافا والمساكين


وصدق (( ان كيدهن عظيم ))



اديب

جود111
17/03/2002, 12:21 AM
الغالية عروس...

صراحة هو والحمدلله مو مقصر في الكلام الحلو وأعرف والحمدلله إنه يحبني وما يخبي علي شي مهم وهذا شي مريحني وبالنسبة للكلام أنا أبدأ أساله إذا حسيت إن عنده استعداد يتكلم أسأل أكثر وإذا جاوب إجابة معناها إن الموضوع مو مهم أدور موضوع ثاني نتكلم فيه ... يعني بالعربي أنا سلمت إن طبعه كذا وقاعدة أحاول أتعامل معاه بطريقة تريحه وتريحني .. هو يحب يسمع أخباري ويسأل إذا ما تكلمت فهذا الأسلوب اللي أستخدمه لأني مؤمنة إن الوحده لازم تتأقلم مع طباع زوجها إذا ما قدرت تغيرها ... هي ترتاح وهو كمان يرتاح وتحافظ على بيتها وزوجها وتقلل من المشاكل ..

وتحياتي لك يالغالية

}{الـرقـيـقـة}{
17/03/2002, 09:20 AM
<center>
هلاااا وغلاا اختي العزيزه وحبيبت الجميع عروس قديمة

اولا ً اسمحي لي اعبر عن إعجابي بجميع مواضيعك المطروحه

مميزه فعلاً الف شكر لك

ثانيا ُ عن جد اعجبتوني وفعلا ً حتى لو صار شي يزعلها من اهلها ماتقول هذا حبيبي وزوجي بقوله وافضفض

بكره ترضى على اهلها تجي تمدحهم الا زوجها مانسا الي صار اول

يعني عن جد اغلب الرجال فيهم شي كذا من الاطفال

ماكذب الي قال الرجل طفل كبير :D

عموما انا متابعه له الموضوع ويارب تفيدونا اكثر خاصة المتزوجين والمتزوجات

تحياتي لكم

visitor
17/03/2002, 10:58 AM
.. هلا بأختي عروس قديمة..

بصراحه أنا عضوة يديده.. و عجبني هالمنتدى و كافة أعضاءه الطيبين..

و حابه أدردش معاك.. في أول جولاتي فالمنتدى..

أعتقد أختي أنه "الصراحه" دايما مطلوبه بين الزوجين..
و كل قلب لازم يتحمل الثاني و يستقبل شكواه بقلب رحب..

فنفس الوقت و مثل ما قالوا خواتي قبل..
بشرط إنها تكون ماهره في اختيار الوقت و المكان المناسب..

لأنه أحيانا يحدث شجار أصل موضوعه تافه.. لكن.. العيب في اختيار الوقت.. مثل يكون الزوج راجع من الشغل ينتظر كلمه حلوه.. و يعطيك العافيه..إلا هي تستقبله بالصراخ و الشكوى من العيال..

و طبعاً.. أنتم معشر المتزوجات أدرى..
نحنا مازلنا نبحر في العزوبيه..;)


أختي سامحيني على ثرثرتي الزايده..
أختك تـــو:)ــيان

أم أمونة
17/03/2002, 11:20 AM
السلام عليكم ورحمة الله وبركاته
تحياتي لكم جميعا

ترددت في الاشتراك في المنتدى بس الموضوع شدني

المهم زوجي قريب لي ( يصير ولد خالتي ) فمعظم الامور بين اهلي واهله معروفة واذا في موضوع يخص اهله هو يخبرني به والا فواحد من الاثنين اما هو لا يريد ذلك (موضوع حساس ) او هو يحس ان الموضوع تافه .
وتعودت ما اساله ابدا لاني ما احب اضايقه وما احب احرجه (ولو اني اضط على فضولي شوي)
وما هي الا فترة بسيطة و يخبرني بالموضوع ويندهش ويثني علي يوم يعرف اني على علم بالموضوع واني فضلت السكوت وبصراحة احس اني اكبر في عينه اما عن اهله فدائما ما اقف محام دفاع عنهم لانهم اول شي اهلي وبعدين هم اللي يوقفون وياي ويخلون زوجي يحترمني اكثر .

اما المواضيع المتعلقة باهلي وهو لا يعلم بها فلا اخبره وقد ياتي ويسالني فاقول كنت اظن انك عارف بالموضوع.
والمواضيع المتعلقة بي اخبره بها ولو فيها شي يضايقني لاني اريده ان يكون اول العارفين وبعدين بعد 3 سنوات صرت انا وهو واحد فلا اتحرج من اخباره بظروفي وخاصة انه ممكن في مواضيع تاثر علي وعليه

طولت عليكم...
مواضيعه هو ما يريد يخبرني به وما لا يريد يسكت عنه طبعا اساله بس بدون حشرية وا أقف عندما اشعر بانه يتضايق من الموضوع ودائما احب اساله عندما نكون وحدنا واساله بدلال لا بتحقيق و هجوم...

بس بصراحة ترى مواضيع الصراحة تسبب نوع من الحساسيه بس الايام
تعدي والبشر تنسى بسرعة

وان شاء الله تكون مشاركتي مفيده لكم

عروس قديمه
17/03/2002, 04:38 PM
يعطيكم العافية يابنات...والله من جد كل وحده فيكم افادتنا بشي وبأشاء كثيرة.,,,,

انا كثير مستانسة .....

:)

بس تدرون بعض الرجال من طبعهم انعم يسمعون اكثر من انهم يتكلمون و هذيل هم المشكله...صعب شوي تديرين معاهم حوار....صح؟؟؟

بالنسبة لزوجي الله يحفظه ان شالله ...كان في البداية من هالنوع....وكنت اتضايق كثير..كان يحب اني انا اتكلم عن نفسي و هو يسمع؟؟؟؟

بس الحمدلله الحين غير...بس اعتقد ان اغلب الرجال كذا؟؟؟

بس متى تكسرين هالحاجز او هالعتبة تكونين فعلا شلتي هم كبير عن صدرك و صدر زوجك....

بالنسبة لأسرار بيت الاهل؟؟؟اغلب الناس تنصح انا الزوج او الزوجه ما يبوحون فيها ...ليش؟؟؟عشان بيجي يوم يعايرك بأهلك؟؟؟معقوله؟؟ما اعتقد....

بالرغم من كذا لازم بعد نتحفظ باسرار الاهل...مو عشان شي...عشان هذي اسرارهم تخصهم اكثر من انها تخصنا؟؟واللا شو رايكم؟؟؟؟؟


بالنسبة انك تفضفضين لزوجك بكل اللي في خاطرك؟؟؟مرات تصير منها مشاكل؟؟؟كيف؟؟؟

تيجي في يوم تمدحين صديقتك...بطيب خاطر....وانتوا عارفين خيال الرجل و اااااسع....
الرجال بينه و بين نفسه يتخيل شخصيتها..ويبدا يتلطفها؟؟؟؟وبعدين يقولك هذا الصديقة احسها و الله مثل اختي؟؟؟

:(

ياليت ندردش بعد و تقولونا...الى اي حد تقف صراحتك مع زوجك...والى اي حد تقف صراحته معاك؟؟؟؟؟

بنت السعودية
17/03/2002, 06:39 PM
سلامي للجميع00

بالمختصر المفيد00


الصراحة بين الزوجين لازم تكون بحدود00


اهم شئ اذا كان شئ يخص حياتهم هم الاثنين او البيت00


فهنا يجب على الزوجين التحدث عنه بكل صراحة00


اما انهم يتكلمون عن الماضي 00

او عن اهلهم ومشاكلهم00

فانصحهم بالابتعاد عن هذه الامور00

ومشكورين00;)

ام لمى
18/03/2002, 07:40 AM
شدتني مناقشتكم كثيرا احببت ان اضيف ان الصراحه ضروريه بين الازواج ولاكن بحذر كبير جدا:)

انا لاخفي عن زوجي الا الاشياء المهمه فمهما كان الرجل يضل رجلا ولاكن المراءه في نضري الاذكى

بنسبه لزوجي من النوع الكتوم جدا وخاصه في بدايه حياتنا اما الان فهو لايخفي عني شيئ
وصدقوني المراءه تتعامل مع الزوج با الخبره والذكاء خذي ماتريدين

علا فكره ترا مالي كثير من يوم انا متزوجه ولاكن قسوة الحياة علمتي الكثير;)

وترى نصيحه لا تامنو الرجال مهما صار ابداااااااااا(u)

فاتنه
20/03/2002, 02:35 AM
الوووووووو.........
مساء الخير..........
ممكن اشارك...........؟؟؟
والله انا زوجي ما يتكلم ابدا ..............فهو علامة استفهام داخله وعلامة استفهام طالعه ..........................
استحاله انه يعلمني بشيئ دايما اسمع الاخبار من القرايب ......اما هو فمستحيل ......................................
اما انا ..........فشغاله ...في القرقر على طوووووووووووووووووووول ....
واذا شفته كذا اقول لنفسي خلاااااااااااااص يا بنت ......لاتقولي له مره ثانيه اي حاجه .......................لكن ابو طبيع ما يخلي طبعه ......وكل مره احكي له اقول هذي اخر مررررررررررررره ....:(
بس ما تصير اخر مرره...وش اسوي ما اقدر؟؟؟؟؟؟؟:s :s :s :s

عروس قديمه
20/03/2002, 10:18 PM
:) :)

ضحكتيني يا فاتنه..اسلوبك حلو..
وانصحك تبدأي بالحوار الهادي بينك و بين زوجك....وصارحيه و حاولي تكسبين قلبه و ثقته فيك....
مشكورين يا جماعه على هالمشاركات الحلوه...

بس ياليت كل وحده تقولنا كيف طلعت زوجها من حالة الصمت...والكتمان؟؟؟؟؟؟يعني علمونا من لؤم الحريم؟؟؟؟الله يجزاكم كل خير ان شالله....