المساعد الشخصي الرقمي

مشاهدة النسخة كاملة : كيف اثبت لخطيبي اني احبه



جمان
07/04/2003, 12:56 AM
السلام عليكم ورحمة الله وبركاتة
احب اعرض لكم مشكلتي وهي انه قد تم عقد القران منذ 3اسابيع وزواجي ان شاء الله في الصيف لكن مشكلتي هي اني خطيبي غايه في الرومانسيه ودائما يعبر عن مشاعره بصدق معايه بس انا مااقدر اعبر له عن مشاعري رغم اني احس اني احبه اكثر من حبه ليه بس مشكلتي ما أقدر اقوله هذا الشيء وكلامي معاه فقط بالهاتف لانه بعيد ومو في نفس المدينه اللي انا فيها وهو يقولي كل اللي في نفسه ويبغاني اكون زيه واقول كل اللي في نفسي وانا خجوله جدا جدا جدا لدرجة انه صار يقول لي يلله قولي لي كلام حلو واذا مره اصر عليه اقول له احبك بس كل مره اجلس اقول له احبك؟؟واكثر الاحيان اسكت وما اقول له شيء بس احس انه يزعل مني واليوم الثاني مايكلمني ويجلس قلبي يتقطع (u)(u)واحزن طول ذاك اليوم لاني والله من جد ماني عارفه اش اقوله فياليت تساعدوني ببعض العبارات الحلوه اللي ممكن أقولها له وأرضيه لانه مايستاهل بس فعلا انا ماني عارفه اش اقوله لان عمري ماكلمت ولد وما تعودت اني اقول كلام حب لاحد لدرجة انه صار يقولي انك ماتحبيني وانا مو بس احبه اموت فيه فارجو منكم انكم تقولو لي كلام اقوله له لاني مره تعبت وانا اكتب هذا الكلام اليوم لانه ماكلمني ومره نفسيتي تعبانه وان شاء الله ماراح تبخلوا عليه

شيخة الزين
07/04/2003, 01:14 AM
:confused: :confused: :confused:

عورتي قلبي..انا راح اساعدج وله يهمج حبيبتي

اسمعيني
أولاً..نصيحة مني لاتكررين عليه كلمة((أحبك)) كل مرة ..لان بين فترة وفترة تصير الكلمة احلى من انها تنقال كل يوم..

ثانياً..اكيد عنده جوال وانتي بعد..طرشيله مسجات فيها كلام حب وممكن اتعبرين فيها عن مشاعرج..اذا كنتي مستحية..(هذي الطريقة اتبعا مع خطيبي:o )..واذا ماكان عندج جوال ممكن تفتحين موقع الرسالة وطرشين منه مسجات..

ثالثاً..وانتي تكلمينه وتسولفين معاه..تقولين له حبيبي..حياتي..روحي..قلبي..عمر ي..الله لا يحرمني منك :o ..واكيد مادامج اتحبينه بتطلع الكلمات باحساس ومن قلبج..

اتمنى اني اكون افدتج..والله يوفقج ويجمع بينكم على الخير ان شاء الله

تحياتي:)

yn1
07/04/2003, 03:21 AM
اختي الكريمة أنا كنت مثلك قبل ما أتزوج وما زلت أبغي أدور أشياء تحرك الحب بينا .. هو كان يقول كلام حلو أيام العقد ... وأنا ما أعرف وأستحي .. ولكنه كان يزورني وكنا نتبادل الهدايا فكنت أكتبله في بطاقة كبيرة أبيات وخواطر عن الحب والشوق كما علمتني صديقتي المتزوجة وكنت أدور من المجلات أو رسائل النقال وأراسله بمسجات الجوال التي ترسلها لي أختي المتزوجة وكنت أحيانا آخذ المسجات من صديقاتي وأخواتي ... تقدرين اتسوين هذه الحركة كما قالت لك الأخت شيخة الزين ... وإذا هو ما يزورك تقدرين اطرشيله على البريد .. وتقدرين تكتبيله كلمات الحب وتخبرينه أنك تستحين ومع الوقت واعتيادكم على بعض بتتعودين عليه وبتطلع الكلمات منك ... ولكن نصيحتي لك أن لا تنسي هذه الحركات بعد الزواج وانجاب الأطفال وتابعي فالرومانسية بعد الزواج أهم وأتمنى من الله التوفيق بينكما ....

بــيــســان
07/04/2003, 03:52 AM
والله نصائحكم مرة حلوة
وانا عندي نفس المشكلة
الخجل والحياء وما اقدر
اتكلم بكلام الحب ابد000



:)

عروس للأبد
07/04/2003, 02:49 PM
السلام عليكم و رحمة الله و بركاته

:) شوفي فديتج هذه ماهي مشكله عوده وااايد لنه مرات ..يكون الصمت أبلغ من الكلام...و حاولي تعترفين له انه يلي في القلب أكبر و أكثر من انه ينقال و انه السبب الوحيد يلي يخليج ما تقولين له كلام حلووو هو انج تستحين ...مب انج ما تحبيه ...و لازم هو يقدر كونج بنت لج حياء خاص فيج و ان شاء الله مع الزواج راح تنفك العقده لنا تقريبا كلنا مرينا بهذه التجربه و انا اقصد هنيه البنات يلي ما كان لها سوابق في الهاتف لنه هذه اكيد تكون خبره ;) لكن يلي في حياتها ما كلمت شاب في التلفون من وين يا حسره تجيب جرأة او شجاعه انها تقول كلام حلو....لكن عموما صدقيني بعد الزواج راح تنفك عقدة الخجل....:D ..بس الحين انتي ركزي على المسجات و الكروت و البطاقات التي تحمل من كلام الحب ما يعجز عن حمله جبل..<< تعرف تعبر :D ............................المهم فديتج لا تضايقين روحج...و برهني له انه سكوتج من ذهب....:)

جمان
07/04/2003, 02:52 PM
الاخت شيخة الزين:
انا عندي جوال وارسله مسجات بس المشكله انه يبغى يسمع الكلام مني انا حتى لما ارسله رسائل جاهزه يقول لي اكتبي لي انتي ابغى كلامك انتي وبالنسبه لقول حياتي عمري .....احس اني ماأقدر اقولها :o:o
وكمان هو يبغاني اقول كلام كثير مو بس حياتي وعمري وبس والله انه مره متعبني لدرجة اني صرت اخاف اذا اتصل عليه

yn1:
شكرا على ردك بس زي ما قلت للاخت شيخة الزين هو يبغى الكلام مني انا ويسمعه مايبغى رسائل جوال اتخيل لو هو موجود في نفس المدينه اللي انا فيها ممكن اهديه هدايا ورسائل بس للاسف انه بعيد وبالنسبه لرسائل البريد مااقدر ارسله لان مين يوصل لها لي غير ابويه وانا استحي منه وانا قلت له اني استحي ومع الوقت باتعود بس مافيه فائده مستعجل واحس ان الوحده بعد الزواج تقدر تكون رومانسيه مع زوجها اكثر لانه بيكون معاها تقدر تفاجأه كل مره بحركه حلوه بأكله تعجبه باشياء كثيره تقدر تعملها له لكن انا ماعندنا وسيله غير الكلام وان مااقدر اتكلم :confused::confused: فارجوكم ساعدوني


بيسان:
شكرا على ردك يعني المشكله ماهي عندي بس فيه ناس زيي بس صدق ان الخجل اذا زاد عن حده انقلب ضده.


عروس للأبد:
والله ان الكلام اللي قلتيه كله قلته له بس للاسف مافيه فائده ودائم يقول لي شفتي انك ماتحبيني زي ما انا احبك ذبحني بالكلمة هذي مع العلم اني واثقه100%انه عمره ماكلم بنت في حياته عشان كذا يبغى يسمع مني كل كلمه حلوه.
وفيه سوال دائم يسألني اياه يقول اش اللي يعجبك فيني ؟؟؟؟؟واذا قلتله كل شيء يعجبني فيك يقول لا حددي وهو يقول انه يعجبه فيني شعري وعيني وجسمي وهكذا, طيب انا اش ممكن اقول هوه رجال اقول يعجبني شعرك وعينك؟؟؟؟؟؟؟والله انه مره محيرني

واشكركم على الرد السريع وياليت باقي البنات يساعدوني

رنيم المشــاعـر
07/04/2003, 03:08 PM
:(:( شوفي حبيبتي لايأس مع الحياه <<<<:D


عندي لك طريقه ...أول شي ابدأي معاه بالتديج ... يعني اذا كلمك مثلا اليوم تكلموا تكلمو تكلموا بأي شي وفي نهاية المكالمه أكيد راح يقولك تبين شي -- توصيني بشي يعني شي من هالكلام قوليله سلامتك ياعمري ... (حاولي تقولينها بأي طريقه )..

المكالمه الثانيه اذا جيتي تردين عليه : هلا حبيبي ....اذا مره ماقدرتي خلاص قوليله وحشتني واسكتي ...

وبعدها شوفي راح تتأقلمين مع الوضع وبيصير انشالله عادي الموضوع...

بالنسبه للرسايل الموبايل ..ارسليله مثلا وهو في الدوام : حبيبي الله يوفقك انشالله ..وحشتني موت ..لاتتعب نفسك :o:Dيعني شي من هالكلام ...[/أرق تحياااااااااااتيALIGN]

جمان
07/04/2003, 03:33 PM
رنيم المشاعر:
اشكرك على الرد بس هو دائم قبل ما يقفل يقول لي يلله قولي لي حاجه حلوه واحس اذا قالي كذا ينعقد لساني اكثر ولا اقول له شي عشان كذا احس انه يتضايق ويقول اني مااحبه مع العلم ان من حبي له افكر فيه في كل لحظه ويقول خلاص انا زوجك المفروض كل اللي في نفسك تقولينه ليه زي ما انا اقول لك كل اللي في نفسي واذا قلت له بعد الزواج ان شاء الله راح اتعود عليك ويروح خجلي يقول لا ابغى الخجل يروح من الحين والله انه مجنني :confused::o:mad:
اش اصلح معاه ؟؟؟؟؟؟؟
وممكن اقوله زي ماقلتي وحشتني لان له يومين ماكلم وفعلا وحشني موت

nrlove4ever
07/04/2003, 06:50 PM
يحب الريال إن يحس بقيمته عند اللي بيتزوجه حسسيه باهتمام انت اتصلي فيه حسسيه إن الدنيا ما تسوى من دونه حسسيه إن أنت تحتتاجينه . يوم هو تعبان عطي كم كلمة تريحه و يوم ملان حاولي تسلينه شوية و يوم متكدر حاولي تخففين عنه بكلام حلو بس لو منفجر أحسنلج :mad: لا تكلميه
تحياتي

لميس
07/04/2003, 10:44 PM
وعليكم السلام ورحمة الله وبركاته

ألف مبروك جمان الملكه
الله يوفقكم ويجمع بينكم بالخير

شي طبيعي انج تخجلين بالبدايه.. والحياء من صفات المرأة المسلمه :)
بس بحركات صغيره تقدرين تتغلبين على خجلك وبإذن الله تسعدين زوجك

حركة المسجات الي قالولك عليها البنات حلوه بس طبعاً هو يبي الكلام منك.. ممكن الكلام الي ماتقدرين تقولينه تكتبينه.. جيبي ورقة وقلم وقعدي ألفي له مسجات ;)
إذا ماتقدرين تقولين حبيبي وعمري قولي الغالي، فديتك، تسلم لي، لين تتعودين وشوي شوي يطلع الباقي
وبدل رسايل البريد إستعملي الإيميل.. ارسلي له بطاقات رومانسيه رقيقه وأشعار وخواطر حب يتفاجئ فيها لا فتح إيميله
بالنسبه للهدايا.. مافي شي يعبر عن الحب كثر الورد الأحمر.. روحي محلات الورد وإختاري الي تبين وإكتبي البطاقه الي تبين وهم يرسلونه له وين ماكان.. إذا ماتقدرين تقولين كلام رومانسي عوضيه بحركات رومانسيه :)
قبل لا تنامين دقي عليه.. واول ماتصحين هم دقي عليه.. قولي له عشان انهي يومي معاك وابدا يوم جديد معاك

إكسبيه بالمواقف الي تبين له حبك :)


بارك الله لكما وجمعكما في خير الدنيا والآخر
ربي يتمم لكم على خير ويرزقكم ذريه صالحه

جمان
08/04/2003, 01:49 PM
شكرا لك ياأخت لميس على النصائح وان شاء الله راح اطبقها ووالله اني فرحت لما شفتك رديتي على موضوعي الله لايحرمنا من نصائحك القيمة