المساعد الشخصي الرقمي

مشاهدة النسخة كاملة : فرجوا عني كربتي



الكاسة
08/08/2007, 01:43 AM
السلام عليكم والرحمة
أنا عضوه جديدة أتمنى إنكم تساعدوني في مشكلتي لأني حيييل تعبت وماني قادره أتحمل أكثر من جذي

الموضوع : صارلي سنة متزوجة وأول زواجي كان ولا بالأحلام ، كنت بالنسبة له كل شي،حتى الدلع يدلعني جدام أهله وأشياء كثيرة يسويها بس ما أقدر أقوله ،أمه كانت تقوله ياوليدي شوي شوي عليها جدام الناس ترى ما يعطون خير . حملت وكان بطير من الفرحة لكن بعد حملي بشهرين تغير كل شي فوق ماتتخيلون.لا يطالعني ولايجيني ولا يصرف علينا أنا وبنتي.لما طلبت منه الطلاق ، قال مستحيل أطلقج أنا أبيج ليش إنتي ما تبيني ، قتله مو باين إنك تبيني .مشكلته إنه مو عارف شنو قاعد يسوي.لما رحت المطوع يعني الشيخ قالي إنتي محسودة وجتج عين قوية لما سألته يؤثر على زواجي قالي طبعا عالجني وردينا لبعض أنا وزوجي .لكن رد زوجي لحالته ونصحوني بقراءة سورة البقرة 40يوم لما قريتها ما حسيت في تغيير بس كنت دائما أحلم إنه يطلع من جسمي حشرات كثيرة.
حياتي يا بنات ألحين جحيم في جحيم وألاقي مضايقات من بعض أهله ومشكلة أخوه إنه حاط عينه عليه. بيني وبينكم زوجي دائما يقولي إخواني يحسدوني عليج.أحداث ومشاكل كثيرة صارتلي.أنا عايشه عند أهله يعني معاه بس والله كأنا مو متزوجين تخيلوا ماأدري عن حياته اي شي ولا يكلمني تخيلوا الإحراج جدام أهله.تدرون مانتكلم مع بعض باي موضوع كأنه ما نعرف بعض.أدري إنه يموت فيني وذابحني بالنظرات .لكن مالها فايده دام حياتنا جذي . حتى أهله قالوله طلقها لا تعذب البنت جذي .قالهم مستحيل أطلقها أنا ما أعيش بدونها

أبي منكم تقولولي شلون أرد لزوجي وشنو علاج العين والحسد والله نفس أكلم زوجي ويكلمني ونطلع مع بعض ونربي بنتنا مع بعض اعيش حياتي الطبيعية . شنو أحسن مطوع بالكويت يداوي عن العين والحسد

يارب أن تبني لكل من يساعدني أو يحاول مساعدتي بيتا في الجنة ويرافق الرسول صلى الله عليه وسلم




في انتظار ردكم:9_33:

four_seasons
08/08/2007, 01:52 AM
حبيبتي الله يعينش هده عين قوية وصابتك انتي وزوجك اله يكفينا شر الحساد يمكن هدا سحر انا اللي يمكن افيدش فيه دوري اختي على بخور اسمه الفسوخ يعني يفسخ العين والسحر والسحر مدكور في القران وبخري لفسك وبخري غرفتك وملابس زوجك واقراي المعودتين وانشاء الله يكون خير ولا تنسي دوري هدا معروف اقوى بخور يشيل السحر الله يوفقش

المتغشية
08/08/2007, 01:59 AM
الغالية مشكلتج اتعور القلب الله ايعينج


بس حاولي تتفاهمين ويا زوجج ابكل هدوء اتناقشي معاه في كل . التفاصيل كيف كان وكيف صار بعدين

وإذا مافاد حبيبتي خلي حد من الاهل علاقته قريبة منه ويكلمه عرفي منه شوه الأسباب لي خلته ايصير جذيه

ولاتنسين الغالية ادعي الله انه ايسخر زوجج ويرده مثل قبل اوصدقيني الناس مايقولون خير ايحسدون على أبسط الأشياء

اتحصني دايما اوحصني بنتج اوزوجج

والله يطعمكم السعادة والهنا ويخليلكم بنوتتكم وتتربى في عزكم انشاءالله

والله ليغير عليكم ويرد زوجج مثل اول وأحسن

الكاسة
08/08/2007, 01:59 AM
مشكوره إختي على الدوا . والله لو تدرين شلون انا عايشه مو بجحيم ألعن من الجحيم والله قاعده أرد عليج ودموعي تنزل. عمرج ما تصدقين شلون أنا عايشة والمشكلة إن المضايقات مو مخليتني

الكاسة
08/08/2007, 02:11 AM
[إختي المتغشية

حاولت أكلمه بكل هدوء ونحل مشكلتنا مع بعض . لكن المشكلة إنه يقول مافي شيء يكلمني وكأني مو موجودة . يدخل غرفتنا ويبدل ملابسه حتى الكلام ما يكلمني يعاملني كأن لاوجود لي. لما كلمت إخوي لاهي مع زوجتة وعياله وانا الصراحة ما عندي أم وأبو. لما حاولت أكلم أخوه الكبير راودني عن نفسة . طلع حاط عينة علي . طبعا ما قلت لزوجي عن هالسالفة. مالي أح عايشة بغرفتي أنا وبنتي بروحناز والله صابرة عشانا كاسرة خاطري ز الصراحة يعورني قلبي لما اشوف البنانت مع ابوهم . أتذكر بنتي الي ابوها حتى السلام ما يسلم عليها ولا يمسكها

four_seasons
08/08/2007, 02:13 AM
الله يكون في عونك يارب

شوشيتا
08/08/2007, 02:18 AM
الغالية الله يفرج عنج كربتج آمين



كثري من الاستغفار والدعاء .. وانا اتوقع انها عين قويه اسمعي اشرطة عن الرقية الشرعيه واقري على ريلج ... وخلي ريلج بعد يشرب ماي زمزم ويتمسح به لأنه يذهب العين مثل ما سمعت ..

الله يصلح أمورج يا رب

أميرة الصمت
08/08/2007, 02:26 AM
الكاسه هلا عناتي الصراحة قصتج غريبه الله يعينج والله

الله يفرج همج وينور دربج ويزيح عنج ضلالة الحساد


مب طبيعي تصرفات ريلج عن جد شو فيه ليش تغير وانقلب فجأة بنته ما يشلها ولا يسلم عليها ليش زوجج فيه شي أكيد سحر

بدعيلج فصلاتي

¶ۈد ξــٺ ﻍ ـآآلے••
08/08/2007, 02:46 AM
اختي العزيزة
يمكن الحسد هذا من اهله فانتي خوذي منهم يعني من قهوتهم او مسح بفوطه مبلله من جزمهم اعزك الله
ثم حطيه بقدر فيه ماء وترششي منه انتي وعلى زوجك وبنتك والغرفه بالكمل رشي وسمي
واسال الله يشفيك!!!!!!

تكتكه
08/08/2007, 02:52 AM
عفواً اختي قبل اتكلم في موضوعك ابي أسأل الأخت اللي تتكلم عن البخور اللي يفسخ العين,,,اختي وش الكلام ذا؟؟؟
انتي تدرين ان هذا البخور من السحر؟؟؟ لا يأختي مايجوز ابد استعماله ومو انا اللي احرمه...المشايخ هم اللي افتوا
واذا انتي مو مصدقه كلامي ارجعي لفتاوى السحر وتلقين اللي يثبت كلامي..ولاتزعلين مني ,,,انا مجرد اخت ناصحه,,


,,,,,,,,,,,,,,,,,,,,,,,,,,,,,,,,,,,,,

,,, اختي الكاسه الله يفرج همك وييسر امورك ويرد لك زوجك..بس جربتي انك تآخذين اثر اللي تشكين
انهم معطينك عين!!!يعني مثلا اخوان زوجك تقولين انهم حاسدين زوجك عليك..جربي انك تاخذين اي شي منهم
مثل...(( الباقي من مويه شربهم او زود قهوتهم اللي بالفناجيل او اكرمك الله نعالهم تاخذينها وتغسلينها وتاخذين
مويه الغسيل وترشين بها زوجك ونفسك ))) ومن الاشياء ذي ..وعليك اختي بالدعاء وان شاء الله ترجعون احسن من
اول...اتمنى اكون ساعدتك بشئ ,,,
اختك,,,
تكتكه...

*الناعمة*
08/08/2007, 03:19 AM
الله يفرج كربتج

وياااااااااااارب زوجج يرد لج مثل قبل
واتمنى هذا من كل قلبي


والله صيحتييني عليج

الله يبعد عنج الحساد وكل سمي بالرحمن

وصلي على النبي

ما فيه احسن من هذا

والله يخليكم حق بعض
ولا تتطلقين

زوجج يحبج بس ما يدري اهوه شنو يسوي

خبرج الحسد وعمايله

سارقه الاضواء
08/08/2007, 05:01 PM
قال رسول الله صلي الله عليه وسلم: " جاءني جبريل عليه السلام بدعوات فقال: إذا نزل بك أمر من أمر دنياك فقدمهن ثم سل حاجتك: يا بديع السموات والأرض, يا ذا الجلال والإكرام يا صريخ المستصرخين, يا غياث المستغيثين, يا كاشف السوء, يا أرحم الراحمين يا مجيب دعوة المضطرين, يا إله العالمين بك أنزل حاجتي وأنت أعلم بها فاقضها" صدق رسول الله صلي اله عليه وسلم

أم شيووخ
08/08/2007, 05:43 PM
الله يكون في عونك يارب

لحن الاشواق
08/08/2007, 06:29 PM
ما املك لك غير الدعااء الله يفرج همك وييسرامرك ويرد لك زوجك ياااارب عاجلا غير اجل يااااااااااارب...