المساعد الشخصي الرقمي

مشاهدة النسخة كاملة : ادعولي الله يخليكم



shooog55
07/12/2006, 12:37 PM
السلام عليكم
اشحالكم يالعرايس؟؟؟ عساكم بخير؟؟؟

والله اني حبيت هالمنتدى وااااايد لانكم تساعدون بعض وقلوبكم على بعض وهالمنتدى غير عن باقي المنتديات واتمنى انكم تقبلوني كعروس يديدة وان شاء الله استقيد منكم وافيدكم.
انا من شهر سجلت فهالمنتدى وعمري مارديت على حد بس كنت اقرا مواضيعكم وكنت ادعيلكم من كل قلبي.

الله يخليكم ادعولي اني احمل والله خاطري فيهال والله يرزقكم ان شاء الله . خلوني اقولكم قصتي اللي مستحيل انساها .

أنا معرسة من 10 شهور وحملت على طول وكنت وايد مستانسة وريلي بعد وايد كان مستانس . وادرس في الكلية وان شاء الله اتخرج هاي السنة قولوا امين. المهم الكلية بعيد عن بيتنا يعني بين البيت والكلية ساعة الا ربع وكنت اسير بالسيارة ويا بنت عمي وبنت خالها يعني ما كنت اقدر ارقد في السيارة وغير الدوام اللي يبدا من الساعة 8 لين الساعة 4 يعني ماشي راحة الا في البريكات . وعقب شهرين تقريبا نزل علي دم وسرت العيادة قالت لي الدكتورة الحمل ضعيف عندج وانا بعطيج تثبيت الحمل وتعالي عقب اسبوعين وخذت الحبوب والدم وقف. بس عقب كم اسبوع بطني عورني وايد ويوم سرت الحمام ( اكرمكم الله) وشفت الدم وايد ياني نزيف وقلت لامي وامي قالت لي لاتسيرين الكلية بس انا الغبية قلت لها بسير يمكن يخف وسرت الكلية بس بطني بعده كان يعورني واتصلت لريلي ومر علي وعلى طول سبحت وسرت المستشفى ويا امي واختي. وعقب يت الدكتورة شيكت وقالت لازم عملية وطلعت وانا من الصدمة مافهمت شي وقلت حق امي واختي يعني الياهل طاح قالت لي امي الله يعوضج بغيره وكل شي بيد الله بس زخيت عمري عسب ماصيح جدامهم . ويوم شفت ريلي ماقدرت استحمل اكثر قمت اصيح وهو يهديني ويواسيني فديته هو روحه مضايج وانا زدت عليه وسوولي عملية تنظيف وطلعت من المستشفى اليوم الثاني ولا سوولي تحليل دم ولا شي وقالت لي لاتحملين الا بعد شهرين .
ولين الحين ماحملت سرت الشهر اللي طاف العيادة وقالت لي الدكتورة كل شي عندج اوكي الا هرمون الحليب مرتفع وانا بعطيج حبوب وانتي خذي كل نص حبة فسبوع واذا يتج الدورة تعالي لي ثالث يوم الدورة ( شمعنة ثالث يوم؟؟) المهم انا طوفت 4 ايام من يوم دورتي لين امس للأسف يتني الدورة ولازم اسير باجر عندها. ادعولي الله يخليكم اني احمل ومايكوني فيني شي

اختكم
شوق

أم ناصر2007
07/12/2006, 06:35 PM
يارب يرزقج ويرزقني بالذرية الصالحة ويرزق كل محرومة

وثالث يوم من الدورة عشان تعطيج حبوب الكلوميد ولازم ثاني يوم او ثالث يوم بس عشان تنشط التبويض عندج

ام صلصا
07/12/2006, 06:54 PM
يا رب ما ادري شسنو السالفة نص الحريم عندهم مشاكل بالحمل اللهم لا اعتراض انا تقريبا نفس حالتج بس انا ولدت و الحين ابي احمل و مو قادرة يا اختي مالج الا رب العالمين و الدعاء و استشارة طبيب شاطر و اذا تقدرين روحي عند كذا دكتور و اذا العلاج كان واحد استمري شهر و اثنين لا تسوين مثل البنات يعالجون شهر و يملون ترى الله سبحانه قال اسعى يا عبد و انا اسعى معك مو انطر ببيتي و انسى العلم اللي ربنا سخره لنا

دلوعةزوجي
09/12/2006, 05:04 AM
الله يرزقني ويرزقك وكل محرومة
بالذرية الصالحة يارب

عبير 2006
09/12/2006, 05:18 AM
الله يرزقك الذريه الصالحه حبيبتي

مظلومه في دنيا بها الله ابتلاني
09/12/2006, 05:47 PM
يأخواتي نصيحه لا تهملون انفسكم تراني اول مثلكم كل يوم اقول باكر اروح واكشف المهم جت الجزمه ورحت لطبيب وقال كل شي تمام مأقتنعت بحكيه رحت لحرمه واخذت منه علاج والله بلاوي طلعت خفت وكلمته قالت هذا سددوالله انك محضوضه انك مكنتي نفسك لأن السدديسبب عقم :sad: قلت ليش مابين بلأشعه قالت طيب ابي اسألك احيانن يقولون لك حامل والطفل ماهومبين يعني كيس بدون جنين قلت لها والله انك صادقه وخذت منه مره ثانيه وانا هلحين حامل ادعوالله انه يتمم لي على خير فأنصحكن ياخواتي انكن لاتهملن الطب الشعبي وحنا مهملات انفسنا وقت الدوره وهذا يسبب تأثيرسلبي على الرحم

shooog55
10/12/2006, 07:20 AM
أشكر كل من رد علي ( أم ناصر- أم صلصا - دلوعة زوجي - عبير 2006- مظلومة في دنيا بها الله بلاني )
وفعلا رحت للدكتورة وعطتني كلوميد وحبوب ثانية وقالت لي خذيهن لمدة 5 ايام وتعالي لي الاسبوع الياي...
الله يرزقنا بالذرية الصالحة قولوا امين