المساعد الشخصي الرقمي

مشاهدة النسخة كاملة : هل يحقلى اطلب بيت بروحى



اميـ بوظبى ـره
12/11/2006, 12:10 AM
مرحبا بنات

بعد ان طفح الكيل ابا اسالكم :sad:

قانونيا هل يحقلى اطلب بيت بروحى منفصل عن بيت اهل الزوج ...

لأنى خلاص مليت ...

يعنى الله لا قال لو عصبت وطلبت وعزمت .. وإذا الله لا قال استوت مشاكل يكون لى عذر
ولا بكون غلطانه

وغصبن عنى لازم ارضى بهل الشى ؟؟

بنات ارجوكم اللى عندها لو معلومه صغيره تخبرنى بليــــــــــز :confused:

النجم الساطع
12/11/2006, 01:50 AM
أختي في الله
الشئ المتعارف عليه إن المرأة عندما يتقدم لها رجل يقوم ولي أمرها بوضع الشروط وأهمها
أن يكون لها بيت مستقل ..
فإذا كان زوجك مقتدر وتستطيعين التفاهم معه بالموضوع فلم لاتخبريه برغبتك في أن يكون لك
بيت أما إذا كنت تعلمين أن نقاشك معه سوف يسبب لك المشاكل فمن الممكن أن يتدخل أحد المقربين لديه جدا ويقنعه
وحاولي أن تبيني له وبطريقة غير مباشرة مزايا البيت المستقل..
مثلا لو كان زوجك من النوع إلي يحب إنك تلبسين القصير أو الشفاف قولي له لو كنت لوحدي
كان قدرت ألبس إلي تحبه...وأشياء كثيرة من خلالها تقدرين إقناعه بها بس بدون عصبية ومشاكل
أما إذا إنت شايفة إن حصولك على ما تريدين مستحيل فما عليك إلا الصبر وربك كريم

الورده المكنونه
12/11/2006, 04:30 AM
عزيزتي أنا مع اختي النجم الساطع والله يعينج أنا نفس حالتج في بيت أهل ريلي بس شقتي معزوله عنهم بس الوحده لازم اتحمل لأن وافقنا من البدايه واذا تسألين من الناحيه القانونيه يحق لج طلب بيت بروحج طبعا بس صدقيني التفاهم أحسن


http://www.arab-x.com/get.php?filename=1163294753.jpg (www.arab-x.com)

بحرينية أصل
12/11/2006, 08:46 AM
على حسب شروطج في العقد انا عن نفسي شرطت عليه سكن بروحي بس انا الحين عندي شقة في بيتهم بس عندي باب لبره يعني كاني بروحي

وردة العتبان
12/11/2006, 08:50 AM
والله حبيبتي يحقلج قانونيا بس مو حلوة تطلبينها بالقانون ابي اسالج انتي شلون نظامج يعني شلون ساكنه مع اهله

انا عندي شقة كاملة لي بروحي بس انزل بصالتهم عشان اطلع الله يعي خصوصا اذا كنتي بخلاف معاهم

والله اهم شي التوفيق انا بنت عمي تخيلي عايشة بغرفة وحدة تخيلي حتي الحمام عزكم الله مشترك بس مرتاحة وباجسن حال


مالج الا الدعاء

عذب القوافي
12/11/2006, 09:07 AM
البنات ماقصروا

فعلا على حسب العقد وايضا على حسب ظروف زوجك المادية والأجتماعية....

مجـدي
12/11/2006, 09:39 AM
هذا الموضوع مهم وهو اصبح ظاهره اجتماعيه .. بعض الدول وضعت نصوصا قانونيه لهذه الحالات بالتفصيل

وليس بشرط ان يكتب في شروط عقد الزواج ان يوفر الزوج مسكن مستقل .. ولكنه لازم حتى ولو لم يكتب

ومن الشروط القانونيه والشرعيه لدخول الزوجه في طاعة زوجها مايلي :


- وجود مسكن زوجيه ملائم وبين جيران صالحين

- ان يكون الزوج امينا على زوجته ويستطيع الانفاق عليها


وكلمة مسكن زوجيه معناه ان يكون مسكنا مستقلا للزوج والزوجه


وانا هنا لااحبذ فكرة اللجوء للمحاكم للمطالبه بهذا الحق ولكن يمكن ان يتحقق ذلك عن طريق حكماء العائله من الطرفين للوصول الى حل بالتراضي بينهما

وردة العتبان
12/11/2006, 09:52 AM
مجدي بس هالشي صعب ان تقول الواحد من العايلة الزوج اذا كان مقتنع راح يسوي هالشي وصدقوني مع الوقت بيمر عالزوج وقت وهو بيوافق انا زوجي كنت بس اطري هالشي ينفجر ويعتبر هالشي قلة ادب او شي مو زين ولما شاف الوضع مع الوقت صرنا نتناقش فيه بهدوء مع شوي من المشاحنات لما اتفقنا مع الشروط

مجـدي
12/11/2006, 10:07 AM
كلامك صحيح اخت ورده وانا اؤيدك تماما فيما تقولينه ولكن انا كنت اتكلم فقط من الناحيه القانونيه ولكن هناك بالطبع نواحي اجتماعيه اولى بالاعتبار

هدوية
12/11/2006, 10:37 AM
مرحبـــأ جميعـــــــــأ

عزيزتي اميرة ابوظبي :

انا اخالف الخوات ، مو ضروري اشترط هذا الشي من البداية ؟
في بداية الزواج ويوم وافقتي على السكن مع اهل ريلج ( الحمولة ) ما كنتى تعرفينهم عدل وماكنتى تدرين اذا راح تصير مشاكل ولا لأ عشان جذية وافقتى ،، لكن مع العشرة تكتشف الوحدة اشياء ما كانت تعرفها عن اهل زوجها : اطباعهم تصرفاتهم حتى اكلهم ، في اشياء الوحدة تطوفها عشان لا تهد بيتها بايدها وفي اشياء ما ينسكت عنها مثل التدخل السلبي في تربية الابناء التاثير على الزوج هذى اشياء تستدعي الوحدة تطلب من زوجها انها تسكن بروحها حفاظا على اسرتها من المشاكل والضياع اللى راح يصير اذا استمرت بالعيش مع اهل الزوج

كل واحد يدور راحتة وهذا شي مو غلط ، طبعا اذا كان الزوج قادر على انه يسكن زوجتة بروحها وامكانياته تساعدة

اذا ارتاحت الزوجه يرتاح البيت كله من اولاد وزوج ، واذا اتعبت يتعب البيت كلة

هدووووويــــــــــة

desert_girl
13/11/2006, 07:22 PM
طبعا حبيبتي يحق لك تطلبين بيت بروحك

انا نفس حالتك لما انخطبت كانت عندي رغبه شديده بسكن مستقل وقلت لأمي قولي لام
زوجي

بس ام زوجي قالت بنتك بتعيش في شقه مو معانا وفترة الخطوبه زوجي قالي بنسكن

مؤقتا عند اهلي قلتله شكثر قال بس شهرين طبعا مرووو الشهرين انا ماقدرت افاتحه خجلا

وهو ساكت على الموضوع والحين لي سنه ونص معاهم ساكنه بغرفه وحمام بس

لما تدخلين عند اهل زوجك زوجك يثقل ومستحيل يطلعك الا لو صارت مشاااكل

خلك عزيزه واشرطي من البدااااااااااايه احسن لك طيعيني لايصير فيك مثلي

شوووفي الظليمه مو حلوة يعني انا اهل زوجي في حالهم بس تدرين ان الاستقلاليه واااجد مهمه

ومريحه

والحمد لله على كل حال

أم نونية
13/11/2006, 07:46 PM
أنا من رأيي على حسب بعض النقاط:
1- مساحة المكان المخصص لك
2-الخصوصية في المكان
3-ظروف زوجك المادية
4-مكانته في العائلة
فلو كان الجناح الذي تسكنين فيه كبير
ويتسع لك ولأبنائك ويشمل خصوصيتكم ....
بحيث الدخول والخروج يكون منفصل ...كان بها
ولكن لو كنت في غرفة (يادوب)
ولديك من الابناء الكثير والغرفة في نصف البيت
بحيث أدنى صوت ينسمع فهذه مسألة فيها نظر...
وأيضا ظروف زوجك المادية اذا تستحمل فتح
بيت في هذه الفترةكما أن موقعه في العائلة مهم
يعني غير معقول أن يكون الابن الوحيد ويترك أمه؟؟؟
وعلى حسب وجود الجد وقوته...
على العموم المواضيع المهمة والحساسة
لا تؤخذ بعصبية وبسرعة
بل بدراسة وبتخطيط جيد.....
وبسياسة نفس طويل
حتى تكوني سعيدة مع سعادته
وليس على حساب سعادته...

اميـ بوظبى ـره
14/11/2006, 10:16 PM
بنات انا عندي غرفه وصاله وحمامين ... وفي ميلس اريايل عدال الصاله بينهم باب ا نا قلت عشان اخوانى يدخلون منه
وفى باب ثاني يدخلنى على صاله بيت اهل ريلى.
المهم انا مره فاتحته في هل الموضوع .... وعصب على وقالى اسمحيلى انا اهلى مابخليهم ...
والمره الثانيه قتله ان شاء الله لو طلعتلنا فيلا بسوي وبسوي ... بس لازم مكان للعيال (للعلم بعده ماعندي عيال )
قالى هلى بشيلهم معاي ......ونخلى هل البيت ايجار ب
قتله بااجر بيكبرون عيالنا وين نوديهم واهلك هنى ؟؟؟
قالى ماشى انا مااخليهم ..
سكت واتفقت بعد ان الفيلا كله تكون من تصميمى لأن تصميمهم فعلا فعلا قديم جدا ..
اقتنع عقب قلت ليش اصرف بالهبل ... على مكان الجميع .. لو يكون لى مكان خاص فينى
.........
اللحين افكر نكسر الباب ونسوي جدار وبس يطل على الميلس بس لو فيه ريايل شو اسوي :S
وبعدين المشكله الثانيه
اهم يدخلون في كل شى ... كل شوي يفتحون الباب يشوفونى شو اسوي

ويوم ادخل المطبخ اسوي شى الكل ييى ويتم يتفلسف هذا غلط وماادري شو ... ويدخلون في الطبخه

طلعاتى كله يبون يسرون وين مااسير
واذا طلعت لازم يعرفون وين رحت ...

..... وتعرفون بعد فرات الكلام اللى تستوي بين الحميات ...

غير جى انا لاحظت في بنت من بنات الجيران صغيرونه تى بيتهم ... تموا يعلمونها كيف ترقص
الرقص الخليع والكلام اللى مو اوكيه
... انا فكرت لو عيالى مكانهم هييل كيف بيتربون على هل الحركات !!!
طبعا لو قلت حق ريلى بيعصب على انا .. وبيسوي مشاكل ...

________________
انا ماابى الجأ حق القانون بس لا سمح الله اذا استوي شى وخلاص فقدت السيطره

خبرونى شو في ضنكم الحل :(

كريم كراميل
15/11/2006, 10:46 AM
والله ياختي الحال من بعضه ... بس انتي حالك احسن من حالي بكتييييير

الله يعينا ويصبرنا

^^روز^^
15/11/2006, 11:03 AM
اختي انا غرفه ودورة مياه وغرفه ثانيه نجلس فيها فيها كونتر صغير

اسوي اشياء بسيطه شاي حليب يعني كذا

وبموت من الضيق والطفش مااقدر اسوي ولاشي اخوة غرفته جنبنا يعني اي صوت اي حركة يسمع وحتى المناقشه

واذا علت اصواتنا يطقون الباب وش فيكم

؟؟
مع ذالك متحملة ماعندي عيال الحين والله يرزقنا ان شاءالله

وبالنسبه حق الدخله والطلعه واحس فشله امر ومااقول بتطلعون معاناااا

وبعدها انا للي اتضايق مااخذ راحتي في الكلام

بس
وغيررررر الكلام اللي ينقااال واسمعه

بس مطنشه لجل عين تكرم مدينة

اميـ بوظبى ـره
15/11/2006, 08:06 PM
نفس الشى انا عندي يوم حد يي الميلس عندهم اتم ساكته ولا اتكلم عشان صوتى ...

غير انى لازم اعلى الصوت على التلفزيون عشان مايستوي اي صوت ...

ويالحشره لين مايرحون ...

مانعرف شو الحل الحين