المساعد الشخصي الرقمي

مشاهدة النسخة كاملة : انا متشائمة وحاسة اني مرفوضة ..!!!



ميــــــــس
04/11/2006, 08:50 PM
السلام عليكم


كيف حالكم يالعرايس الحلوين

والشابات الحلوات

والأمهات إلي هم أحلى الكل...


هذه أول مشاركة لي ... وأحب أطرح مشكلتي :sad: <<<<<<<<< من أولها جاية بمشاكلها :o


معليش ... استحملوني شوي ... والله مالي بعد الله غيركم

انا امي رحمها الله توفيت من 6 أشهر
وكنت وحيدتها ....وعندي اخون اولاد


المهم ... انا عمري 29 سنة .... حايسة مع الأهداف من ناحية الزواج
وبني وبينكم اعلت قبل فترة اضرابي عن الزواج :angry: من كثر ما اسمع من قصص خيانة وغدر


من الله علي بالالتزام والهداية

وصرت ملتزمة وأحب الالتزام :shy:

المهم


انا الآن .. بجد وحيييييييييييييييييييدة بعد امي رحمها الله

ووالدي تزوج من شهر

وصديقتي الوحيدة تزوجت في العيد وسافرت لمدينة أخرى :confused:



موهاذي المشكلة ..!!!


وانا مع الحالة النفسية الجسم صاير خريطة

سميــــــــــــــــــــــ ــنة جداً 120 كيلو بس طويلة 170 كيلو (r) ...!!!


طبعاً الأكل :gum: والقعدة على النت وقلة الحركة هي السبب (n)




ترى ولا هاذي هي المشكلة

ادري طولت عليكم


المشكلة اني تحدث مع الوالد شخص من الجيران قبل اسبوع تقريباً

بصراحة هذا الشاب مشهود له بالصلاح
والاستقامة ومتكامل في الأخلاق حسب مو مشهود عنه

كان خاطب فتاة تعمل طبيبة ولكن فصخ الخطوبة لأنه معترض على عملها في المستشفى


المشكلة يا جماعة <<<<<<<<<<<<< أخيرا جات المشكلة !!


المشكلة اني اشعر بأنه لن يتقبلني

لأنني سمنت كثيييييييييييييراً


أهله لا يعرفون عني سوى اني فتاة ملتزمة وهو يبحث عن ذات الدين

انا جداً متشائمة

وقلت هذا إلي برتاحلة أكيد ماراح يقبل فيني

لأن المتقدمين لي من قبل كانوا مع الأسف عدم حتى أقاربي كلهم معدومي الأخلاق والدين والعياذ بالله


لكن أنا متخوفة من هذه التجربة :(


خايفة أهله يجون البيت عندنا وموعدهم الأسبوع القادم وما اناسبهم


ما ادري اذا في احد ممكن يتفهم وضعي

وتكتب شيء ممكن استفيد منه

وعسى الله يفرج هم كل مهمومة :sad:

...

ام غسق
04/11/2006, 08:56 PM
ابصراااحه ومن راي انا الزوااااااااج ينبني على اسس تضمن الاخلاق والاصل الطيب والسمعه الطيبه
اما الشكل يا عيوني بصرااحه مو مهم لانه ياما تزوجوااا عارضات جمال وتزوجوا بنااات فائقات الجمال لكن اخلاقهم شييينه
انا ابييج يا قلبي تعطين لاهل اللي بيتقدم لج احلى ماعندج من الاخلاق ومن الحشمه والوقااار وصدقيني هم يبون الزوجه الصالحه ما يبون وحده لووحه فنيه مرسومه ومتنساقه لانه مهما كان الزوج يغير على زوجته وما يحب غيره يطالع فيها
من قلبي ادعي لج بالتوفيق وعقبال ما نسمع خبر اللي يفرج قلوبنا ويااج بالموافقه واعلان موعد الزفاف

حــرايــر
04/11/2006, 09:03 PM
مـيـس

قولي هذا الدعاء وإن شاءالله ربي يفرج عليك..

ياودود ياودود يا ذا العرش المجيد ، يا مبدئ يامعيد ، يافعّالاً لما يريد ، أسألك بنور وجهك الذي

ملاء اركان عرشك ، واسألك بقدرتك الذي قدرت بها على جميع خلقك ، واسألك برحمتك التي وسعت

كل شي ، لا اله الا انت ، يامغيث اغثني )).. ثلاث مرت..

ماسة دبي
04/11/2006, 09:15 PM
السلام عليكم و رحمة الله و بركاته

الله يرحم الوالده إن شاء الله

عزيزتي الثقه لازم تكون فيج و إذا لج نصيب راح تاخذينه إن شاء الله

توكلي على الله و الله يوفقج و إتفرحينا

ربى ملوح
04/11/2006, 09:15 PM
ياأختي لماذا هذا التشاؤم تفائلي بالخير

لاتخافين ياأختي أنت مشهود عليك بالإلتزام والحمد لله

والرجل إذا كان في نيته إمرأه ملتزمه يعني ملتزمه مايهمه الشكل

الكثير من الشباب تزوجو نساء أوزانهم أكبر من وزنك وتوفقوا والحمد لله


أقولك قلتي إنك الأسبوع القادم راح يشوفونك أهله طيب


أنت تجهزي من الآن وأستقبليهم وخلي الجلسه بينكم ممتعه


وإنشاء الله ما راح يرفضونك .....


ياأختي مايهمك الوزن الوزن يخف بعدين ... المهم الاخلاق والسمعه الطيبه

شاهدت الرجال كيف أوزانهم أكبر من أوزان النساء مع ذلك المرأه تقبل فيه

لأنه أخلاقه وسمعته والحمد لله ...


يلا بشرينا بخبر خطوبتك .... نريد نفرح معاك ياعروستنا

من الآن تفائلي ولا تتشائمي .......

وأبعدي الخوف عنك والوساوس ....


ها لا تنسين بشرينا بخبر خطوبتك .

خالة سارة
04/11/2006, 09:19 PM
ايش دراكى يوم الخطيب يحب السمينات وانتى ان شاء الله بعد ما تم الخطوبة ابدى بتخفيف الوزن

be_ cool
04/11/2006, 09:22 PM
وعليكم السلام ......

أختي الله يرحم الوالده ويسكنها الجنه وايانا انشالله

أول حاجه اذا جو يشوفوك حطي حاجه ببالك

((((( في خاطرك قولي هذي انا هذي انا هذي انا ))))

ووريهم قبل كل شي جمالك الداخلي ووريهم ضحكتك الحلوه وابتسمي لهم واضحكي معاهم

صدقيني ما راح يطالعون لجسمك بعدين باين عليك انتي بنت رووووووووووعه تجننين


المهم الله يوفقك انشالله ومبروك مقدما وعلميني بالأخبار ;)

ميمو m
04/11/2006, 09:33 PM
اختي العزيزة تفائلي واحسني الظن باللة واسال اللة الواحد الاحد ان يوفقك ويسهل امورك جميعها:clap:

ميــــــــس
04/11/2006, 09:34 PM
أم غسق


حلا


ماسة دبي

ربى ملوح


الله لا يحرمني منكم


والله بصراحة كلامكم مطمن

أنا ترى جميلة بشهادة الكثير يعني ( بياض وعيون وساع وملامح وسيمة )

بس السمنة دافنة الجمال <<<<<<<<<< مقهورة

بس والله مسوية حمية لي يومين <<<<<<<<<<<<<<< عشان لو قلتوا سوي رجيم


أدري

بتقولون توك ألحين ....!!!!

بس شسوي

نفسيتي كانت عدم


واضرابي عن الزواج كان مؤيد اني ما اهتم بنفسي

بس الحين والله مدري ليش مرتاحة لهذا الشخص بالذات
مع اني عمري ما شفته ولا سمعت عنه


بس هم خايفة من الموقف

وخايفة من شماتت عمتي إلي طلبتني لولدها ( معدوم المميزات والأخلاق ) وانا رفضت

...

!!!!!

ميــــــــس
04/11/2006, 09:39 PM
خالة سارة

والله مدري ... يحب السمينات ولا لا ... يارب يطلع روحة رايضية ويحب السمينات ..هههههههههه!!!!


be_ cool

الله يسعدك ويرفع معنويات والله بصراحة وبدون غرور

انا فعلاً حبوبة ودمي خفيف :shy:

بس وزني ثقيل <<<<<<<<< مازالت متعقدة :sad:


الدلع 111


والنعم بالله ... ويكفي انه من علي بأني عرفت ناس حلوين وطيبين مثلكم

ويارب يتمم علي هالمرة وافرح الجميع

نوووسهUAE
04/11/2006, 09:41 PM
اختي ليش ماتبدين تسوين ريجيم

والله السمنة تدفن الجمال والملامح

وبالتوفيق

يعني تخلصي من 20 كيلووووو

وراح يتحسن شكل جسمك اكثر لانه ماشا الله طوولك حلووووو

ميــــــــس
04/11/2006, 09:47 PM
نوسة تسلمين ياقمر

انقص 20 كيلو


يسمع منك ربنا


ياريت


بس المشكلة ان الناس جايين الأسبوع القادم

يعني لو موت نفسي ما حينزل أكثر من 5 كيلو


انا اقوم الحين بعمل رجيم


والله يعين

...

عذبة المعاني
04/11/2006, 09:48 PM
يارب 0000000يسترك ويرزقك بولد الحلال اللي يقدرك ويغليك ويثبتك على الالتزام (f) (f)


ياعمري مثل ماقالو الخوات


الوزن مو مهم والشكل 0000صح الجمال والرشاقه مطلب كل انثى لكن ابد ماكان الجمال والرشاقه


سبب رئيسي لنجاح اسره اذا ماكانت مقرونه با الدين والادب والسمعه الطيبه

بس المهم تكوني استخرتي الله في هذا الرجل


وبلغينى وش سار معك ياالغاليه ترى والله ادعي لك من قلبي يوفقك في كل درب:shy: :salam:

حلوه بس متينه
04/11/2006, 09:50 PM
الله يوفقج ان شاء الله ويكتب لج الخير وين مايكوون
وان شاء الله يشوفج الخطيب واهله احلى بنت في الكون

آمين آمين آمين

يالله يارب تزرق كاتبة الموضوع الزوج الصالح الذي يكون خيرا لها في دينها ودنياها
ولاتحاتين، خلي ثقتج بالله كبيره، ولاتفكرين انه اذا الموضوع ماتم لانج سمينه لااا
هذا كله من الله نصيب قبل كل شي،
والله يا اختي انا شفت عرووووس شو اقول لج!!!! سمينه كنت افكر يمكن وزنها فوق ال 160 وقصيره!!!! بس حبيت اضرب لج المثل هذا عشان اقولج كونج سمينه مايعيق انج تعرسين ياما سمان عرسوا وخلفو
وبعد نسيت صديقتي وزنها 127 وهيه طويله مثلج تقريبا 169وعرست من سنتين ، وماشاء الله وعندها الحينه ولد وبنت زي العسل


ودعواتج إلنا العزوبيات اذا تمت الخطبه ولاتنسين تبشرينا ترانا ننتظر السبوع الجاي على احر من الجمر

ميــــــــس
04/11/2006, 10:09 PM
عذبة المعني .... والله ان معانيكي بجد عذبة

يارب يفج همك ويرفع معنوياتك


حلوة بس متينة .... وربي انك قمر

وانا عمري ما حسيت اني مقهوووووووورة من سمنتي غير هالمرة

يمكن لأن العريس عاجبني هالمرة

مدري

يارب يسهلها



أنا كمان شفت بنات تختوخات وتزوجوا

بس عاد انا متشائمة مع السف


بس يارب يفرجها


...


ويارب يرسل الفرحة على الجميع

اسيرة قلبه
04/11/2006, 11:13 PM
http://www.3roos.com/up3/asoorah.gif


الله يوفقك يارب ويتمم لك على خير ويسهل امورك

بس حبيت اقول لك شغله انتي ابدي ريجيم من الحين وان شاء الله اذا تمت الخطبه على خير كملي الين وقت العرس عشان يشوفك غير

مو اذا وافق تهملين وتقولين مب مهم هالشي

وخلي ثقتك بنفسك كبيره ولاتنسين تبشرينا :)



http://www.3roos.com/up3/asoorahe.gif

fnoora
04/11/2006, 11:45 PM
اولا اختي الله يرحم والدتج ويسكنها فيح جناته انشاءالله

وثاني شي اختي لازم تثقين بنفسج وتثقين بالله تعالى
واذا لج نصيب فيه راح تاخذينه
وادعي الله دائما


وبالتوفيق انشاءالله

ياارب أعرس
05/11/2006, 02:16 AM
الله يعطييج الي يريح قلبج يالغاليه ....

الله يرحم الواالده ويسكنها فسيح جناته ان شاء الله ...

الله يعوض وحدج وصبرج خير ويرزقج اكثر واحسن مما تتمنين ان شاء الله ....

يااختي الدين اهم من كل شي وحطي في قلبج انه ربج مااابخليج ابد مادام انتي استعنتي بالله واخترتي طريقه الله بيرزقج وبيعوضج بأكثر مما تتمنين ان شاء الله ....

ماتهاااب
05/11/2006, 02:25 AM
ياعسى ربي يوفقك ويسعدك

اقول فيه ناس اسمن منك واعرسوا لا ورجاجيلهم حاطينهم فوق رؤؤسهم اها بس

ال5 كيلو حلوة مب شينه اذا راحت هذا واحد

والشي الثاني باللبس تقدرين تطلعين بمظهر اكثر نحف

وصدقيني مابيكون هذا سبب يردهم دام الدين والجمال موجود وش يبون بعد

بتلاقينهم يقولون ابد بتنحف قبل العرس استعدادا له

وهذا اللي حاصل مع اغلبيه البنات

وحدة اعرفها من بعيد يمكن مثلك كذا

ويقولون لها انحفي قبل عرسك قالت ماني مكلفه على عمري انحف اللي اقدر عليه

وهاذي لها 4 سنوات معرسه ورجلها على قولهم رهن اشارتها

وبالنسبه للولد انتي استخيري قبل توافقين

ربي ييسر لك الرجل الصالح اللي يصونك ويحفظك

لاتنسين تبشريني هااااااااه ياتختوخه :gum:

أنا الشوق
05/11/2006, 02:29 AM
حبيبتي
انتي استخيري وتوكلي على الله وان شاء الله مابيصير الا الخير
وهو اذا كان شاب يبيك عشان دينك واخلاقك فهذي الاشيا مابتهمه
اعطيج مثال بنت عمي وزنها مو ثقلج واااايد اثقل منج وتقدم لها واحد وانا الصراحه الصراحه اقولها ماتوقعت انه يقبل بها، هي صج متينه لكن طيبه وحبوبه، بس سبحان الله شافها وشافته وتوافقوا

وانتي ماتدرين شنو بيكون نصيبج، مرات تصيدج اشيا ماتتوقعينها اعرف وحده وهي اختي :smile: كلش ماكانت واثقه من نفسها لما تقدم لها واحد بس سبحان الله أول ماشافها على طول عطى اخته اشاره بالموافقه خخخخخخ
وهو كان أول واحد يتقدم لها
يعني شوفي سبحان الله بس انتي تفائلي بالخير وان شاء الله مابيصير الا الخير

زهرة الربيع3
05/11/2006, 03:18 AM
السلام عليكم ورحمة الله وبركاته
اختي ميس ::shy:
انا لي قربيه تقريبا مثلك بس ربي هداه ولتحقت بدار تحفيظ القران
وبعدين صارت مدرسه وسبحان الله تقدم لها واحد ملتزم مثلها وكان دايم يقول لامه انا
مايهمني شكل الهم تكون ملتزمه مع انه قبل مايلتزم كان يتشرط علي امه يبغي وحده
ولا ملكات الجمال
وخطبوها وصار القبول وربي وقفها وبعدين اهي اهتمت بنفسها وسوت رجيم وصار
جسمها مره حلو :ok:

فياختي ميس
لا تخافي ان كان لك فيه نصيب بيجيك بس الله الله بالدعاء والاستخاره والروح الحلوه والبسي واهتمي بنفسك ولاتكلفين خليكي بسيطه وانت عيش التجربها ولا تزعلين اذا ربي ماوفق كل شي قسمه ونصيب

ولاتنسين تقولينه اش صار معك وربي يوفقك
ودمتي (f)

al 3zezh
05/11/2006, 08:03 AM
الله يرحم الوالده و يدخلها في فسيح جناته يارب

اولا شي مبروووووووووووووووووك يا عزيزتي خليج واثقه من نفسج و حطي في بالج الي يبيج لازم يرضى فيج مثل ما انتي ما شاء الله عليج بنت محافظه و حبوبه و اخلاقج عاليه

وادعي بالدعاء الي كتبت لج الأخت والله يسعدج ان شاء الله ..........الله يتمم عليج ان شاء الله و يسعدج يارب يارب يارب

واذا من ناحيه الوزن وايد بنات اتزوجوا ووزنهم اكثر منج ارد واقولج الأخلاق و الأدب اهم شي في البنت الله يرزقج و يفرحنا معاج يارؤوف يا اللطيف

ننتظر منج الأخبار الحلوة و ادعيلنا لا تنسينا

RoOoOmy
05/11/2006, 08:04 AM
اختي ميــــــــس الله يرحم الوالدة ويغفر لها ان شاء الله

عزيزتي لازم تعززي ثقتك بنفسك .. انا معاك وماراح اكذب عليك ان عندك مشكلة في الوزن
لكن اكيد هم ما راح يتقدموا لك الا عارفين ... ولو مو عارفين اكيد راح يكتشفوا هالشي يوم يزورونكم

أهم شي انك ما تحسسي نفسك بالنقص وعدم الثقة بناء على نتيجة هذه الزيارة
لو صار نصيب ... خير وبركة
ولو ما صار
خلي الموقف دافع لك انك تنتسبي لنادي رياضي وتغيري من نظامك الغذائي عشان تنحفي وتغيري نفسيتك لمن تطلعي وتشوفي الناس وتتعرفي على صديقات جديدات في النادي
الرياضة والحمية الصحية راح تفيدك جسميا ونفسيا وراح تكتشفي ان مع كل كيلو ينقص ان نفسيتك تصير أحسن وأحسن

سواء تم الموضوع ( ان شاء الله يتم ) او ما تم ابدأي من الحين بوضع خطة لتغيير نمط حياتك للأحسن .. حاسة فيك لانك وحيدة وما عندك اخوات وبسبب سفر صديقتك
لكن ليش ما تشوفي لك شي يشغلك بدل الاكل والنت وقلة الحركة ؟
اطلعي
ادرسي
انتسبي لدورات في اي مجال يهمك ( دين ، رسم ، كمبيوتر ، لغة )
تعرفي على ناس جدد
زوري اهلك وصاحباتك
ولا تنسي الرياضة اولا واخيرا

راح تغير فيك الكثير
وجدة بلد حلو وعيشتكم فيها حلوة بعد ... تفائلي ... الحياة قصيرة وحرام ما تستمتعي فيها

بالتوفيق

نبض قلبي
05/11/2006, 08:59 AM
انتي بس حابه تدلعي علينا :shy:

والا مافيك شي .. عارفه انك عسل وحبوبه بس تبين تطيرين من المدح (r)

لاتشيلين هم وانتي قمر بنفسيتك وروحك وشكلك ولا تتركين اي شي يهز ثقتك بنفسك

ومافي احد بيظل على حاله كل الناس لازم تتغير بشكلها وهذه مو مشكله

يالله ياقمر نستنى تبشرينا بالخطوبه لاتخبين علينا (f)

هدوية
05/11/2006, 09:33 AM
هاى every one

اول شي الله يرحم الوالدة

ثاني شي كل شي بالدنيا قسمة ونصيب اذا هذا الشخص من نصيبج راح تاخذينة باذن الله ، واذا مو من نصيبج الله يعوضج باللى احسن منه خلق ودين

المهم نصيحتى لج انج تسوين رجيم ، وصدقيني اذا تغير شكلج راح تغير نفسيتج وااااايد وتصيرين احسن شكلا واكثر ثقة بالنفس ولا تنسين ان الرشاقه صحه واى انسان يبي يتقدملج اكيد راح تواجهج معاه نفس المشكلة ( الوزن ) حافظي على صحتج وشوفي شلون راح تزيد ثقتج بنفسج ويكثرون خطابج


ومع تمنياتي لج بالتفويق

غداري
05/11/2006, 09:34 AM
البنات كفو وفو وماخلو لنا شي نقوله

وان شالله يكون من نصيبك يارب

وطمنينا عليك

رتـــاج
05/11/2006, 09:42 AM
وعليكم السلام ورحمة الله وبركاته

انتي تقولين انه رجال اخلاق اذا اخلاق ويبي بنت اخلاق

شلون يفكر بجسمج راح يفكر باخلاقج قبل كل شئ

وبعدين السمنه مو عيب واذا خيره لج بأذن الله تاخذينه


أسأل الله لك التوفيق

بس مو معنى هذا انج تكملين مسيرة الاكل

لاحبي سوي رجيم

ابي المره الجايه يشوفونج ولاجسم نانسي عجرم


\\


//

ريتــــــــــــــــــاج