المساعد الشخصي الرقمي

مشاهدة النسخة كاملة : هذي قصة معاناة امي وظلمها من طرف ابوي واهله اتمنى تقروا قصة امي المظلومة



ماريتا
01/11/2006, 10:40 PM
السلام عليكم

خواتي بقولكم قصة امي المظلووومة ومااتمنى منكم الا الدعاء انه الله ياخذ حقها من اللى ظلمووها قولوا اميييين

بحاول اختصر كثر مااقدر

الله يسلمكم

امي متزوجة ابوي من ثلاثة وثلاثين سنة تقريبا ويابت من ابوي تسعة
امي انقرصت اول شئ من اهله و الثانية من حرمته الثانية حسبي الله عليها وعليه ابوي ايمانه مو قوي يعني مراهق في الاربعين

امي تزوجت ابوي وهي صغيرة عمرها يمكن 16 سنة المهم ويابها بيت اهله وكان ذيج الايام اخوانه (اعمامي) صغار في السن

تخيلو امه شغلتها خدامه حقها وحق عيالها تنظف وتطبخ وتكوي كان البيت كله على ظهرها المسكينة في هذاك الحر كان ايامها مافي خدامات ولا في تطور ايام السبعينات كانت يدتي الله يهديها تطلع مومخلية بقعة وكانت تروح العمرة وتقعد شهرين وامي المسكينة كانت صابرة

على فكرة ماعندي الا عمة وحدة من قد امي بس كانت متزوجة ذيج الفترة وكان البيت كله اولاد يعني ستة اولاد ( ستة اعمام) ياريت المشكلة وقفت على جذيه وبس

يدتي كانت تعامل امي مثل الحثالة عزكم الله ولا يوم من الايام لحد يومكم هذا فكرت اتييبلها هدية او لبس او اي شئ بسيط مع انه كانت الوحيدة شايلة البيت تنظف وتغسل كان اي شئ هدايا تحصله من الناس او من عيالها او زوجها تشله وتعطيه بنتها ( عمتي الوحيدة العدو الودود لأمي لحد يومكن هذا)

امي تخبرني تقولي مرة يدج الله يرحمه حصل ذهب برا وقال بروح اعطيه فلانه (امي) راحت يدتي شلته من ايدهاقالت بعطيه بنتي مسكينة فلانه زوجها بيبلها
تقصد امي قالها يدي حرام عليج فيها الخير شايلة البيت كله على ظهرها تطبخ وتنظف تقول هي مابتنفعني
بنتي بتنفعني لم ياكلون عيالها (عمومتي) الغداء تحط لامي قطعة صغيرة من اللحم وكأنها نست الاكل اللى ياكلوه عيالها من ايد امي على فكرة فيهم بخل غير طبيعي الكرم بعيييد عنهم عايلة ابوي كلها اقصد

ومرة يا واحد يبيع قطع راحت امي المسكينة تشتري كم قطعة راحت يدتي خذتها من ايدها قالت بيي مرة ثانية عقب اشتريي من عنده هالقطع بحطهم حق بنتي

يعني بالمختصر مستخسرة في امي اي شئ واي شئ تحصله تعطيه بنتها (عمتي) وابوي كله يصدق امه ويزاعل امي ويهاوشها يعني محد ريال واقف يمها ولحد يومكم هذا

والله امي تقول تحملت وايد وايد منهم مادري كيف الحين ياريت هالشئ راح وانتهت المشاكل لا بقولكم الامر

مرت السنين طبعا تعدلت الاوضاع وامي طلعت وخذت بيت بروحها ايام الثمانينات وفي بداية التسعينات ركضت الفلوس في ايد ابوي والحمدلله حالتنا وايد زينة من ناحية المعيشة وبدت امي تتناسى اللى سوته يدتي فيها واللى ذوقتها المر في بيتها وكبروا عمومتي طبعا

ابوي في التسعينات عقب ماركضت الفلوس في ايده وشغله راقي رابع شله فاسدة مال حريم وخربطوا و تزوج على امي تزوج وحدة ياريت تسوى وحدة من الشارع تبي فلوس يعني مصلحة مو حب في ابووي من لمغرب العربي طبعا البداية كان بالدس وعقب خلاص انكشف وبان طبعا صارت مشاكل كبيرة هذيج الفترة بينه وبين امي تخيلوا تزوجها وابوي كان يايب من امي ثمان عيال

والله ياخواتي هالانسانة عقربة متزوجة عشان الجواز ومركز ابوي والفلوس وتبي تلهف كلشئ وخبيثه قبل كانت متزوجة باكستاني عنده محل ذهب بس لم شافها مو شريفة طلقها
طاحت تسيطر على ابوي لحد ماتزوجها وابوووي ياحسرة يموت فيها وصار مايطيق امي بعيشة الله والسبه حبه وهيامه في الحقيرة حسبي الله عليها
والحين هالعقربة عقب ماحصلت اللى بغته الجواز طبعااا درست جامعة ويابت عيال من ابوي واشتغلت في شغل حتى رئيس بلادها ما يحصل كثر هي اللى تحصله

وابوي لحد الحين يعاشرها واييب منها عيال وكم مرة تصير مشاكل عندهم وتطرد ابوي من البيت ويقعد عندنا شهور مايروح لها ذالتنه ذل وهو بعده ميت فيها
وطبعا في السنوات الاخير وايد تغير على امي صار مثل الذيب مايحبها و مايطيقها ولا يعاشرها معاشرة الازواج صارلها 9 سنوات تقريبا امي ماتنام عنده والله امي عايشة مثل المطلقة في البيت ومتحملة منه عشانا وكم مرة نروح نضارب مع حرمته الثانية وابوي يهاوشنا عشانها

تخيلو الثانية تسئ معاملته وكم مرة تطرده من البيت وتزاعله شهور ولم تبغي تصالحه بس عشان مصلحة يركض بايده مو بريوله وامي المسكينة الصابرة والبيت والمسؤولية كلها على ظهرها صاير لها فرعوووون مو زوجها اي كلمة غلط ياويلها مخلي كرامتها في الحضيض مايحترم امي ولا مقدر العشرة واللى سوته فيه وفي اهله
يعني بالمختصر ظالمها بالحقووووووق كلها وظالمنا بعد حتى في الصرف مايصرف عليها والله يابنات ماابالغ نحن نصرف عليها لان كبرنا ونشتغل
وحتى اغراض البيت يالله يالله يعطينا وان عطانا مايكفي لانه بخيل مثل طبع اهله ماينادي امي باسمها صارله اكثر من عشر سنوات امي زاعلته سنتين والسبه ظلمه ووقاحته وجبروته ولا فكر يطيب خاطرها او يصالحها والله امي حاولت تكلمه بس اهو ماعطاها ويه بالمرة الحين بس كلمته من شهور لم ياته نكسه صحية وخاف طبعا انه يموت وسافر الخارج بس عقب مااتعافي ردت حليمة لعادتها القديمة نفس اسلوبه الظالم ماتغير شئ

امي نقولها لو اشتكيتي في المحكمة بتوقف يمج بس امي تقول طز فيه اهو وفلوسه انا ماابغى في هالدنيا شئ الا رضى الله والله بياخذ حقي منه وانا كم بعيش في هالدنيا

خواتي سلسة الظلم مانتهت امي اكتشفت قبل سنتين انه اهله ابوي يزورون حرمته الثانية تروحلهم ويروحولها وامي على نياتها كانت على بالها انهم واقفين معاها في معاناتها مع ابووي وحرمته وكانت تروحلهم وتحترمهم وتاخذ لهم صحووون اكل وهدايا
اكتشفت في النهاية انهم طعنوها ورا ظهرها ونسوا افضالها ومعناتها لم كانوا صغار هي ربتهم واكلتهم وشربتهم ولبستهم لم كانت يدتي سايبة مو مخلية بيت ماتروحله

طبعا زاعلتهم كلهم وقطعت علاقتها فيهم وماصارت تروحلهم وهم نفس الشئ ياريت حسوا على دمهم شوي واعتذروا لها طنشوها وماسالوا عنها وفضلوا بنت الشوارع على امي المسكينة

امي الحين تقول حسبي الله عليه اول شئ بلاااني في اهله والحين في حرمته الثانية الله لايسامحه وامي موكله امرها لله سبحانه

على فكرة هذي فكرة مختصرة ماقلت لكم اشياء وايد صارت من ومن اهله ضدها الله يعينها

ادري طولت بس الحين شورايكم بصررراحة ؟؟؟
ابيكم تدعووووا لامي انه الله ياخذ حقها عاااجلا غير اااجلا

بنت الغالي
01/11/2006, 10:46 PM
:( :( :(


الله يجزاها خير ويعوضها بدل صبرها وياخذ حقها من الي ظلموهـــا يارب .......ان الله يمهل ولايهمل

دهــــــن عــــــود
01/11/2006, 10:59 PM
اختي لا تحاتين احنا عندنا رب ما ينسى عبيده وهو ارحم الراحمين وبياخذ حق كل مظلوم في هالدنيا ،،

وصدقيني دعوة المظلوم مستجابة ، وأن الله يمهل ولا يهمل ،،

وإن الحق ينام أحيانا ولكنه لا يمـــــــــــــــــوت ،،

نصر الله كل مظلوم وانتقم الله من كل ظالم بإذنه جلّ وعلا ،،

إنه علاّم الغيوب ،،

يا رب يا حي يا قيوم انصرها على من ظلمها ،،

منال الكويت
01/11/2006, 11:38 PM
الله يآجرها في مصيبتها ويعوضها خير إن شاء الله ويخليها لكم يااااااااااااااارب

نجمة ماسية
02/11/2006, 12:53 AM
والله ياختي انا انقهرت عشان امك وكمان لما تتبدل احوال الوالد الله يهديه يبخل عليكم ويحرق قلب والدتك بالزواج والله حرام عليه الله يهديه ويعوض على امك تعبها ان شاء الله الله يبارك فيكم وفيها وتكونا في احسن حال وتاكدي ان عين الله لاتنام والله الظلم افظع مافي الحياة وهو اللي يسودها بس للناس رب هو الكريم يسمع شكوى المظلوم من فوق سبع سماوات انتوا خليكم حيلها وهونوا عليها واكيد فيكم جميعا الخير الله يهدي ابوكي ويسامح جدتك في صنف من الحموات لا يخاف الله ويجعل بناته في السما وبنات الاخرين في سابع الارض الله يهدي الجميع ويجزى امك خير ان شاء الله.

جبال الهيمالايا
02/11/2006, 01:03 AM
ربنا يفك كربها قريب ان شاء الله ويجعله في ميزان حسناتها باذن الله

qshark
02/11/2006, 01:04 AM
والله صج لين قالوا الجنة تحت اقدام الأمهااات

وفعلاً الأم ما تتعوض

الله يأجرهاا ويجزيهااا ألف خير

وانتوا الخير والبركة

ولاتنسين ان رب العالمين يمهل ولا يهمل

ومشكوره حبيبتي على ثقتج فينا وفي المنتدى اللي خلاج تفضفضين لناااا

ارنوبة البراري
02/11/2006, 06:29 AM
اللة يصبرها وانشاء اللة اعيالها بيوقفون معاها

الروح
02/11/2006, 07:00 AM
الله ياخذ حقكم وحقنا وحق كل مظلوم والله ينتقم لكم ولنا من كل ظالم
باين ان زوجته الثانيه ساحرته هذي واضحه يالله يارب الوالد يصحى ويكتشف الحقيقه
لاتنسون الدعاء
ورددوا حسبنا الله ونعم الوكيل
حسبنا الله ونعم الوكيل فيها وفي اشكالها

اسيرة قلبه
02/11/2006, 07:11 AM
http://www.3roos.com/up3/asoorah.gif


الله ياااااااااااااااااااااااا ااااااخذ حق امك عاجلا غير آجل ياحي ياقيوم

لاحوووول ولاقوة الا بالله

حسبي الله ونعم الوكيل

الله يعوض صبرها خير ويهدي ابوك يااااارب العالمين

الله يعطي امك الصحه والعافيه وطولة العمر والله يجزاها كل خير على اللي سوته

ادعي لها حبيبتي بكل صلااة لاتنسينها يالغاليه وماخاااااااب من توكل عليه

وخلي الوالده تدعي بصلاتها وانصحيها بصلاة الليل اذا هي ماتصليها وقولي لها تدعي من كل قلبها وبإخلاص وبإن الله رح يستجيب دعوتها

الله المستعااااااان



http://www.3roos.com/up3/asoorahe.gif

عروس مصر
02/11/2006, 07:14 AM
:( :( :(


الله يجزاها خير ويعوضها بدل صبرها وياخذ حقها من الي ظلموهـــا يارب .......ان الله يمهل ولايهمل
امين

ღ رآقيهـ ღ‏
02/11/2006, 07:19 AM
السلام عليكم ورحمة الله وبركاته

حبيبتي بجد أغلب الحريم سابقا عاشوا بنفس الطريقة للأسف يعني مروا بنفس الظروف العيشة ببيت اهل الزوج والبهدله من قبل اهله وبعدها يتغانى ويتزوج عليها

عيوني كل هذا عند رب العالمين والله يعوض صبرها خير

انتو حاولو دوم ما تقصرون وياها من أي ناحية عشان ما تحس ان عيالها بعد ما طلعوا باريين فيها

والله يحفظها لكم ويحفظكم لها وإن الله يمهل ولا يهمل

ويقولوا نام مظلوم ولا تنام ظالم

رمانة الوادي
02/11/2006, 07:39 AM
الحل بسيط ......ابسط مما تتخيلين.......اذا تبين تتخلصين من الزوجه الثانيه لبوج شي سورة من القران ....تقرينها وتدعين على الظالم . .......بس ما اقدر احطها على العام اذا تبين كلميني بالخاص

أسماء زكي الدين
02/11/2006, 07:44 AM
السلام عليكم ورحمة الله وبركاته

حبيبتي بجد أغلب الحريم سابقا عاشوا بنفس الطريقة للأسف يعني مروا بنفس الظروف العيشة ببيت اهل الزوج والبهدله من قبل اهله وبعدها يتغانى ويتزوج عليها

عيوني كل هذا عند رب العالمين والله يعوض صبرها خير

انتو حاولو دوم ما تقصرون وياها من أي ناحية عشان ما تحس ان عيالها بعد ما طلعوا باريين فيها

والله يحفظها لكم ويحفظكم لها وإن الله يمهل ولا يهمل

ويقولوا نام مظلوم ولا تنام ظالم



سبحان الله كأن هذه القصة تتكرر في كل البيوت زمان؟؟

أمي - رحمها الله - عاشة عيشة تشبه تلك التي وصفتها لكن ليس من جدتي الله يرحمها من عماتي كان

كان يمكن حالها أهون لأن جدتي كانت طيييييييييييبة ووالدي كان عاقل وأول ما ربي فتح عليه أخذها وسافر بعيد عنهم ...

لكن تعرفي ما خلوه يطلع بسريره حتى ... وقال لأمي لما زعلت ولا يهمك زبالة هذي وأنت تستاهلي أحسن منها وفعلا لك

لكن كان بيحملها أعمال فوق طاقة البشر لكن هي اللي غلطانة لأنها كانت بتعمل كل شيء وما تقول تعبت ولا تعترض
وتوفيت رحمها الله - يوم ما ولدتني - أصابها نزيف حاد وتوفاها الله ..

بعدها تزوج والدي من خالتي ربي يحفظها ويعطيها الصحة كانت عمتي ما بتقصر معاها .. وياما جات تزورنا وتقعد عندنا شهور وتقرفنا فيها ويوم يوصلها أبوي لبلدها يرجع قالب علينا كم يوم ... لما كبرنا فهمنا أيش ممكن يكون بيصير غير إنها كانت دايما تذكرنا إنها مو أمنا .. ولو ضربتنا توسوس لنا وتقول لنا لأنها مو أمك لو أمك كانت سوت كذا أو ما سوت كذا ...


سبحان الله .. آخر مرة جت بيتنا طلعت منه مسوية مشكلة كبييييييييييييييييييرة بين أبويّ وأمي (خالتي)

وكبرت بشكل ما حد يتصوره وأدت لأن أول مرة والدي يرمي يمين طلاق على أمي لكن بعدها بكم يوم ردها وراح أخد أخته ووداها البلد وقال لها لا تعتبي بيتي مرة تانية !!

لكن بعد ماذا أصيبت أمنا التي تحملته وتحملتنا وكانت لنا نعم الأم أصيبت بجلطة من الصدمة والحزن على نفسها ...

نفس الشيء عمتي منكدة على زوجة عمي لغاية ما مات .. وظلت تعذب فيها والحين نفس الشيء يتكرر مع أختي ربي يفرجها عنها


ياااااااااااااااااااااه لمعشر الرجال .. ربنا يهديهم وييبعد الحاقدين عن بيوت المسلمين ..


تعرفي أختي اللي راح يزيح عن أمك كل المعاناة .. أنتم ... كونوا حولها دائما لا تنسوها من هداية ولو وردة كل فترة .. أعملوا لها عزومة خارج البيت تعرفي بتحس إن كل تضحياتها كانت في محلها وهذا واضح ولله الحمد إنكم تستاهلوا وأكثر ...

طالما ربي يسرها عليكن واشتغلتوا عوضوها وحسسوها إنه هي فعلا في غنى عن مال والدكم وهو أدعوا له الله يهديه ...

دلوعة حبيبي
02/11/2006, 07:55 AM
http://daloo3at7abibi.jeeran.com/halahab.gif

لا حول ولا قوة الا بالله..

الله يمهل ولا يهمل صدقيني بيجي يوم وياخذ حقها وحقكم.. اهم شي هي تحتسب اللي سوته عند الله .. ومن عافنا عفناه خلها تنتبه لنفسها وتهتم بنفسها وتنسى ان لها رجال.. وانتوا عيشوا حياتكم واطلبوا رضاها ولا تقصرون معها بشي.. هي ضحت عشانكم فلازم تكافئونها..

والله ياجركم في مصيبتكم ويخلف لكم خيرا منها .. والوالده ما قصرت كفت ووفت..

http://daloo3at7abibi.jeeran.com/godcare-banner1.gif

nodoo
02/11/2006, 09:07 AM
والله انا اقرأ القصة ودموع في عيونى حسبي الله ونعم الوكيل الصراحة ابوك ظالمممممممم وله يوم واهله بعد لهم يوم لا تنسين ان حق امك بيضيع هذا كل الله يشششششوف وبيراويهم مرة وحدة انشالله يارب يمهل ولا يهمل مسكينة والدتك يعنى ابي اعرف محد من اهل امك وقف بوجه ابوك او اهله اهم شي خل امك تاخذ حقها مو بالمعاشرة لأن بيجيب لها الأمراض من الحقيرة اللي عنده اهم شي انا اقصد تحاولون تأمنون مستقبل امكم تخلون ابوكم يكتب لها شي على الأقل مو كل شي للحقيرة الثانية اللي لاهفة كل شي ..........

وهذا ابوك بتشوفين الله بيطقه مرة وحده وبيراويه لا تزعلين بس ماشالله عليكم حطوا بالكم على امكم .... والله يسر امورها واموركم........

ماسة
02/11/2006, 09:22 AM
الله يعين امج ويعينكم انتو بعد

ولا تنسون ان الله يمهل ولا يهمل



دايما كونوا مع امكم ولا تضايجونها وحاول تلبون كل اللي ترغب فيه

والله يأجرها

al 3zezh
02/11/2006, 09:59 AM
اختي لا تحاتين احنا عندنا رب ما ينسى عبيده وهو ارحم الراحمين وبياخذ حق كل مظلوم في هالدنيا ،،

وصدقيني دعوة المظلوم مستجابة ، وأن الله يمهل ولا يهمل ،،

وإن الحق ينام أحيانا ولكنه لا يمـــــــــــــــــوت ،،

نصر الله كل مظلوم وانتقم الله من كل ظالم بإذنه جلّ وعلا ،،

إنه علاّم الغيوب ،،

يا رب يا حي يا قيوم انصرها على من ظلمها ،،



الله ياخذ حقها منهم و خلي اتوكل امرها للعزيز الجبار

qmr
02/11/2006, 10:07 AM
اختي
نعم امك عانت كثيرا كثيرا
لكن حان وقت التوقف عن المعاناه لازم يكون في وقت ينقال في لااااااااااااااااااااا وكفاية انا مش هبقي ضحية تاني
لازم امك تكون مقتنعه انها هي بكرمها الذايد وطيبتها المتناهية الي خلتهم يركبوها لكن العقربه التانية بشخصيتها وبرودها وقله اصلها خلتهم زي الكلاب حواليا
في ناس يا بنتي مهما عملتي فيهم طبعهم بيغلبهم

حاليا انتم بسم الله ما شاء الله تسعه خليكم حواليها وخلي خواتك الرجال يقفوا لابوكي وعمامكم بالمرصاد
كفي اهانه حبيبتي فامك ام تستحق ان يقبل قدميها لا يديها
وخلي امك ما تستقبل ابوكي طول ما هو طرود من حضن العقربه
وخلي خواتك يقاطعوا مقاطعه تامه عمتك ولا يجعلوها تعتب باب البيت

خلي امك تتوقف عن المعامله الطيبه وكفاها ما ذاقته خلال السنوات الماضيه

وحثي انتي اخوتك علي الوقوف في وجه ابوك واعمامك وعمتك بالخصوص
وبصراحه كمان اكتر خلي اخواتك ما يناموا علي روحهم ويضمنوا حقهم لحسن ابوك يكتب للعرقبه وعيالها كل ما يملك وتكونا انتم بلا شئ وده مش بعيد عنه
انسي العواطف فابوك باعكم يوم ما سمع كلام امه ومن بعدها عمتك وضعف شخصيته وسيطرة الحرمه العقربه عليه

قلب الفجيره
02/11/2006, 10:58 AM
الله يخليها لكم ياااارب
بي اليوم اللي ابوكم بيندم عليه قد شعر راسه
ربج فوق

مرموم
02/11/2006, 01:50 PM
السلام عليكم ورحمة الله وبركاته

الله يفرجها عليها يا رب....مقدّرة مدى حرقتك على والدتك....و أغلب أمهات زمان عانوا من نفس الشيء...

بس لازم هي تحس إنه حياتها ما ضاعت...و إنها جابت أولاد و بنات يعوضوها عن كل شيء صار لها...يقفوا بجانبها دايما و يبروا بها....دايما مبتسمين و تدخلوا الفرحة على قلبها بتفوقكم و بركم...

صدقيني الأم لما تشوف عيالها حواليها تنسى كل أحزان الدنيا....و تقول لهم إنتوا عندي بالدنيا كلها...




أختي أسماء...الله يرحم والدتك و يرحم خالتك يا رب...و يغمد روحهم الجنة...و عمتك أكيد بتلاقي جزاءها...لو مش في الدنيا في الآخرة...و الله لا يرضى الظلم على نفسه...كيف يرضاه على عباده...!

Hypercool
02/11/2006, 02:11 PM
حسبي الله ونعم الوكيل...
من يشوف بلاوي الناس تهون عليه بلوته..
الله يصبرها ويصبركم.. ويأجركم ...
تحسبوا الله .. وبيرجع حقكم...
وفي النهاية انتو اللي لها... الله يخليكم ليها ولا يحرمكم من بعض..

انفينيتي
02/11/2006, 06:56 PM
اختي أدري قلبج محترق من اللي يستوي بأمج المسكينه، بس بردي قلبج وفكري في ان الله ما
يغفل عن كل انسان، ترى الأعمال كلها مكتوبه، الزين والشين منها....

في ناس الله يعاقبهم في الدنيا والآخره وعقاب الآخر وايد شديد....ابوج للأسف كان ضعيف الشخصية يوم خلى أمه تظلم أمج بهالطريقة وهو بعدين ظلمها أكثر يوم تزوج عليها، بس فكري تزوج وحده ثانيه، تذله وتهينه وهذا جزء من العقاب، وادعي له انه ينتبه ويستغفر ربه قبل ما يفوت الأوان....زوجة أبوج يالسه تجمع هالفلوس كلها، شو بتسوي بها؟.؟ تسوي لها أملاك حقها وحق
عيالها؟؟ تبني في بلادها وتصرف على أهلها؟؟؟ هذا كله في الدنيا وأكيد هالفلوس ما بتوديها
وياها في القبر والله بيحاسبها عن أعمالها السوداء وجدتج نفس الشي، أحيانا رب العالمين يسلط على الظالم شخص عزيز عليه يعذبه ........يمهم ولا يهمل

انتي واخوانج عوضوا أمكم عن العذاب اللي شافته، وأكيد هي ما تحملت هذا كله الا عشانكم انتوا... ونجاحكم في حياتكم العملية والشخصية أكبر فرحة بالنسبه لها.....
اختي لا تنسين تدعين ان الله يهدي أبوج....ترا مهما سوى هو أبوج وله الحق عليج انج تدعين
له بالهداية

ماريتا
02/11/2006, 07:30 PM
مشكوراات وايد

والله بردتوا عن قلبي شووووي

مع انه ما بيبرد غليلي الا لم اشوووف حرمة ابوووووووي الله لايسامحها لادنيا ولا اخرة تتقطع قطعة قطعة جدامي قولوا امييين ان شاءالله عاجل غير اجل

حسبي الله عليهن سراقات الريايييل ياريت يسرقووون عزابية لا يسرقوون متزوجين وعندهم عيال

يبنن حياتهن وسعادتهم ومصالحهن على حسااااب تعاسة اسرة كاااملة

من تزوجها ابوي ونحن في مشاكل لا لها اول ولا لها ااخر

اما على يدتي واعمامي نحن خلاص ماصرنا مثل قبل معاهم اقصد العيااال بس صرنا نروحلهم في المناسبات والاعياد نسلم ونطلع كتأدية واااجب

وعلى فكرة هم على عبالهم انهم بتطلع زوجة ابوووي طيبة وكريمة وتملى كروشهم من الاكل مثل ماكانت تسوي امي لم ضحكوا عليها بس هذي ذيببببة والذيب مايهرول عبث الا وراه في شئ وخليها تنفعهم

تخيلوا مرة اتضاربت مع ابوووي وطلبت الطلاق وراحت المحكمة قولوا ليش تبى فلوس زيادة تبى ابوووي يكتب اسم شئ من املاكه على اسمها عشان تضمن حقها الحقيررررة وتامن مستقبلها

راح ابوووي الظالم كتب لها قطعة ارض وبعد في ارقى المناطق ولم طلبنا منه يكتب اسم هالفيلا اللى ساكنين فيها باسم امي عشان تبقى حقنا عقب ما يمووت عصب ورفض جنه عدونا مو ابوونا وهو اصلا مايبى يكتب شئ باسم امي لانه مايداانيها

هذا الحين عرفناه مؤخرا من ناس ثقة خبرونااا والله العظيم انقرهنا قهر مايعلمه الا الله

ادعووولنا انه الله مايوفقها لا دنيا ولااا اخره وانه يصرف عنا شرها ونواياها الخبيثة يارب

دايما اقووول هالمشاكل كلها من تحت راسه هووو لانه لو يخاف الله شوي مابيتزوج وحدة زبالة مثل هذي جان تزوج وحدة محترمة تخاف الله
وجان ماظلم امي وظلمنا كل هالظلم حسبي الله عليه صرت اكرهه غصبا عني من اللى شفته


الله يخليكم ياربنات ادعوله بالهداية وانه الله يرقق قلبه ويكتب هالفيلا باسم امي مانبي منه شئ غير هالفيلا عشان مااتيي باجر وتقولنا ابي نصيبي من هالبيت الله يكفينا شرها عاجل غير اجل

ماريتا
02/11/2006, 07:30 PM
مشكوراات وايد

والله بردتوا عن قلبي شووووي

مع انه ما بيبرد غليلي الا لم اشوووف حرمة ابوووووووي الله لايسامحها لادنيا ولا اخرة تتقطع قطعة قطعة جدامي قولوا امييين ان شاءالله عاجل غير اجل

حسبي الله عليهن سراقات الريايييل ياريت يسرقووون عزابية لا يسرقوون متزوجين وعندهم عيال

يبنن حياتهن وسعادتهم ومصالحهن على حسااااب تعاسة اسرة كاااملة

من تزوجها ابوي ونحن في مشاكل لا لها اول ولا لها ااخر

اما على يدتي واعمامي نحن خلاص ماصرنا مثل قبل معاهم اقصد العيااال بس صرنا نروحلهم في المناسبات والاعياد نسلم ونطلع كتأدية واااجب

وعلى فكرة هم على عبالهم انهم بتطلع زوجة ابوووي طيبة وكريمة وتملى كروشهم من الاكل مثل ماكانت تسوي امي لم ضحكوا عليها بس هذي ذيببببة والذيب مايهرول عبث الا وراه في شئ وخليها تنفعهم

تخيلوا مرة اتضاربت مع ابوووي وطلبت الطلاق وراحت المحكمة قولوا ليش تبى فلوس زيادة تبى ابوووي يكتب اسم شئ من املاكه على اسمها عشان تضمن حقها الحقيررررة وتامن مستقبلها

راح ابوووي الظالم كتب لها قطعة ارض وبعد في ارقى المناطق ولم طلبنا منه يكتب اسم هالفيلا اللى ساكنين فيها باسم امي عشان تبقى حقنا عقب ما يمووت عصب ورفض جنه عدونا مو ابوونا وهو اصلا مايبى يكتب شئ باسم امي لانه مايداانيها

هذا الحين عرفناه مؤخرا من ناس ثقة خبرونااا والله العظيم انقرهنا قهر مايعلمه الا الله

ادعووولنا انه الله مايوفقها لا دنيا ولااا اخره وانه يصرف عنا شرها ونواياها الخبيثة يارب

دايما اقووول هالمشاكل كلها من تحت راسه هووو لانه لو يخاف الله شوي مابيتزوج وحدة زبالة مثل هذي جان تزوج وحدة محترمة تخاف الله
وجان ماظلم امي وظلمنا كل هالظلم حسبي الله عليه صرت اكرهه غصبا عني من اللى شفته


الله يخليكم ياربنات ادعوله بالهداية وانه الله يرقق قلبه ويكتب هالفيلا باسم امي مانبي منه شئ غير هالفيلا عشان مااتيي باجر وتقولنا ابي نصيبي من هالبيت الله يكفينا شرها عاجل غير اجل

business_girl
02/11/2006, 08:55 PM
الله يعينكم

ويفرج عليكم يارب

وان شاءالله الأجر والحق ما بيضيع عند رب العالمين