المساعد الشخصي الرقمي

مشاهدة النسخة كاملة : ماعدت اعرف اتصرف مع امي ..انصحوني الله يجزاكم خير



*الدانه*
18/01/2006, 08:55 AM
بسم الله الرحمن الرحيم

السلام عليكم ورحمة الله وبركاته

كيف الحال إن شاء الله دوم بخير ؟

أخواتي..حبيباتي..والله ماكتبت لكم مشكلتي..الا وانا ماعدت أعرف كيف أتصرف مع الوالده الله يحفظها

أمي ..طيييبه وحنووونه..لكن جنب هذا كله حااااررره..وعصبيه...كلامها لازم هو الصح ..خصوصا لما نكون احنا ياعيالها اللي نبي نبين لها الصح..تعصب وتقول وش شايفيني عندكم؟؟

واذا اصرينا ان اسلوبها غلط او اللي تسويه الاغلبيه يشوفه تصرف غلط تصر على موقفها عناد

طبعا هالشي في مشكلتنا مع الشغاله

المشكله اللي تعذبني كثير وترعبني..مشكلة امي والشغاله

امي من النوع اللي ماتحب الشغالات لكن مجبره عليهم...لأنها تعاني من الروماتيزم وماتقوى على الشغل..وبيتنا كبير ومافي الا انا البنت..والكل ماشاءالله تبارك الله اولاد

والشغالات تعرفون شغلهم موب ذاك الزود...

اكثر من مررره تعصب امي على الشغاله..وتصارخ عليها..وشغالتنا تجيب المرض تنرفز اللي مايتنرفز..فما بالكم بأمي اللي بسرعه تعصب

فتوصل بعض المرات مع اسلوب الاستهبال بالشغاله ان امي من كثر ماهي معصبه تمسكها من ملابسها وتدفها بقوه..او تهزها بيدها...زي كذا

شغالتنا ماسكه الغسيل وتنظيف البيت..أما الطبخ والصغار مالها شغل فيهم

يعني مثلا اليوم...قامت أمي الساعه 7 الصباح..وقعدت تراقب الشغاله وكانت الشغاله ماتدري..

لاحظت ان الشغاله تمسح الارضيه بمنشفه مبلله بدون ماتكنس الغبار..تعرفون كيف يصير لما احد يسوي كذا...قرف ووصاخه

قامت امي نزلت لها..سألتها بكل هداوه ..كنستي كل مكان ؟..قالت:ايه ماما
قالت امي:..كنستي ؟؟؟؟؟؟؟
قالت:ايه ماما
عصبت امي لأنها كانت تراقبها وهي ماكنست

قالت امي وهي تصارخ : كذااابه ماكنستي انا شفتك من فوق..ومسحت لها بيدها الارض وورتها ان الارض لسه وصخه..قامت الشغاله قالت لا ماما بعدين يكنس مافي الحين..وقامت تخربط بالكلام اللي ماينفهم..امي تقول متى يعني بعدين؟؟ وهذيك تحوس وتدور وتخربط من الخوف

وبدأ موالهم من جديد صراخ وعصبية امي معها..هي تستاهل..لانها غلطانه..بس احنا نخاف تسوي شي بأمي والا لأحد فينا علشان تحرق قلب أمي

اغلب الاحيان كذا يصير مع الشغاله...خاصه لما تكذب..والا يضيع شي ويطلع هي اخذته ونمسكها ونوريها انه كان باغراضها وماتعرف وش تقول وتضحك وتسوي نفسها هبله ماتدري..امي ماتمسك اعصابها معها..ولو مانبعدها عنها كان ذبحتها بين ايدينها..وعلى كذا امي تزعل علينا وتاخذ بخاطرها علشان نقعد نقولها لاتسوين فيها كذا موزين يمه

اليوم اقولها وش بتستفيدين لو سوت في أحد منا شي؟؟؟...ولا سوت لك انتي شي..تقول :ماتقدر تسوي"طبعا علشان ماتحسس نفسها بالخوف"

بصراحه انا اليوم مره عصبت وماني عارفه كيف اتصرف

الشغاله هذي وكل الشغالات يجيبون البلى ويستاهلون اللي يجيهم

وامي ماقدر امسك اعصابها معاهم

وخايفه تسوي لأمي شي والا لأحد منا..

بعض المرات اقول للشغاله معليه ماما تعبان علشان كذا يعصب ويصارخ حتى علي انا..انتي كويس

وكل هذا علشان خايفه تسوي شي فينا

امي تشوف ان الشغاله ماتقدر تسوي شي..لأن قبل تسافر تفتشها زيييين

لكن أنا ما آمن لهالكافره..تقدر تخبي اي شي صغير بأي مكان تبي واحنا مانقدر نوصل له

افيدوني يابنات كيف أتصرف مع امي واقنعها بأسلوب غير اللي هي تسويه

اما الشغاله..لاتقولون غيروها..لأن هالشي يصير مع كل شغاله تجي..

سحايب دبي
18/01/2006, 09:05 AM
و الله لا يأمن مكرهن

الحل من وجهة نظري انكم تبدلونها و تجيب وحده غيرها
وش اللي جابركم عليها

طبيعي يكون الانسان في هالسن عصبي و متمسك برايه لانه يحس بانه صار كبير و انه الناس بدت تقلل من دوره و انا اشوف هالأمر طبيعي عند الوالدين خصوصا لما يكبرون عيالهم و يعتمدون على نفسهم ... يحسون بان حياتهم صارت خاليه و ما لها طعم فيقومون على أبسط الأمور يقومون الدنيا و يقعدونها ... الله يخليهم لنا ... بعد ترى هم البركه و الخير ..

من رايي المشكله مو بأمك .. يعني وش بنقوللك بدلي أمك :) ما يصير يالغاليه
تخلصوا من هالشغاله و هاتوا لكم وحده مسلمه و تكون خلوقه و ان شاء الله تتبدل الأوضاع للأحسن


و الله يسوي اللي فيه الخير و يباركلكم في الوالد

ترى اهم شي شغلها و شغاله بدالها مليون شغاله بس صحة الوالده اهم لا تخلونها تعصب ...


اعذروني للإطاله

عروس الموج
18/01/2006, 09:25 AM
هلا اختي...

خل الوالده اتحاسب والله انه بيبولها المرض ..زمثل امي الله يرحمها كانوا الخدامات وايد يعصبوبها والله كانت تمرض من وراهم وهم ما في فايده منهم يصرون على عناده بالعكس هم ما يأثر فيهم هالشي عادي ما يحسون والله وانت بيتكم مثل بيتنا يعني انا بنت وحده وكله اولاد كن وايد انعاني منهم يعني عادي مرات الطباخه يدق في راسه ما تتطبخ ولا تسير اتنام بدري بس كان هذا في حياة الوالده الله يرحمها بس يعاندون كانوا صدق يقهرون انا عسب جي اكره الشغالات ولا اسويلهم سالفه فالبيت...

حاولي انج انتي الي اتكلمينهم خلي الوالده تسكت عنهم وخبريها اذا في شي خله اتقولج انتتي وانتي عصبي عليهم جي ما بتتعب الوالده وراهم

سحايب دبي
18/01/2006, 10:25 AM
راي اختنا عروس الموج جدا معقول

ممكن توكل لج او لأحد الأولاد اللي في البيت مسؤولية محاسبة الخدم
ترى عندنا في البيت الخدامه قوليلها لو سويتي جذي بابا بيعصب تموت من الخوف

لانه امي مره طيبه معاهم و تطوف لهم اخطائهم بس الوالد الله يديمه و اخوي الكبير ما يعطونها مجال من غير ما يتكلمون تعرف انهم معصبين و تروح تسوي الصح

زوجة راشد
18/01/2006, 10:27 AM
هلا الدانه ...... والله نفس اللي كان يصير مع امي الله يرحمها ... الخدامات عوفوها حياتها الله يرحمها ... انا مع الاخوات اللى قالوا بدلوا الخدامه .. ومن ناحيتج انتى ما اعرف شو ظروفج بس خل ايكون لج دووور فمراقبه الخدامه... جذه الوالدة بتحس انه فيه حد معاها فالشي ... وما راح يكون الشي عليها بروحها ..... وبشكل عام البشاكير اذا ما تراقبينهم من حيث النظافه والشغل يسرحون ويمرحون على كيف كيفهم ....... وابد ابـــــــــــــــــــــــ ـد لا توقفين بجانب الخدامه ... لانج بتحسسين الوالدة انها غلط ... واكره ما عليهم فهالسن ان حد من عيالهم يحسسهم انهم غلطوا فشي ... ولا تقولين للشغاله ان الوالده غلطانه لانج بتقويين الشغاله على الوالده وبتحس انه مهما الوالده قالت لها وعصبت عليها في حد بيوقف معاها .......


الله ايخليلج الوالده ويحفظها ويصلح اموركم يارب

ذهب مخلوط بالماس
18/01/2006, 10:39 AM
اختي انا اقول الحلا انكم اتجبون خدامه مسلمه احسن عشانج وعشان امج يا قلبي حتى امج لما تشوفها مسلمه صدقيني راح ترحمهاااااااااااااااااااا اااااا والخادمه المسلمه ما تجذب وامج راح ترحمهاااا وااااااااايد لانه مسلمه

غنوجةزوجي
18/01/2006, 03:28 PM
يا الغالية ليش انت ما تريحي امك وتستلمي بدالها المراقبة
وهيك امك بترتاح وانت بتقدري تقنعي الشغالة <الجديدة>بانها تشتغل كويس وتعلميها يلي بدك ياه باسلوب حلو
وكمان انت بترتاحي من الصريخ والمشاكل

*الدانه*
18/01/2006, 04:27 PM
اولا اشكركم ..والله يجزاكم خير على حلولكم ماقصرتو

بس انتو فاهمين ان امي كبيره بالسن؟؟!!

حبيباتي امي مادخلت ال40 للحين الله يخليها ويحفظها لنا يارب..وانا الكبيره عمري 21..

الوالده الله يحفظها ويخليها تزوجت وجابتني وهي مره صغيره

يعني مستحيل توافق لو اقولها اذا تبين شي من الشغاله قوليلي..وأكون الوسيط بينهم

رايكم بتبديل الشغاله ؟؟

كل الشغالات يجيبون المرض ويصير معاهم هالمشكله...وكل اللي جبناهم مسلمات..هذي ثاني وحده كافره

لان حتى المسلمات كانو يسوون مشاكل ومصايب بعد..تخيلو وحده طلعت من ورانا تراسل سواق جدتي..وهو فين وهي فين

يعني الاذى من الاثنين..انا ابي اقنع امي انها كل ماغلطت الشغاله تخصم من راتبها كتخويف..وقبل ماتسافر تعطيها اللي خصمته علشان حرام ناخذ تعبها..بس المشكله شلون اقنعها؟؟..قلت لها اليوم ..بس ماقتنعت..لانها كانت بتسوي الحركه هذي قبل فتره وابوي رفض..يقول حرام

ابوي مايقصر...اليوم مسكها وعطاها محاضره طويله عريضه..وقعدت تتبكى وتسوي حركات..بس ماعطاها وجه..وقالها اذا تبين ماما يصير كويس انتي صيري نظيف

اليوم بكلم ابوي وبقوله يخلي امي تخصم على كيفها من راتب الشغاله..على اساس قبل تسافر نعطيها اياه..ولا تقعد تعصب وتحرق دمها على هالكافره

شرايكم انتو؟؟

اختكم الدانه

فجرالليل
18/01/2006, 08:16 PM
حاولو تغيروها الى ان تلاقو وحدة كويسة ... مع اني اعرف ان الشغلات قصصهم كثييرة

انا ما اخوفك .... بس لازم تاخذو احتياطاتكم ... لانه مثل هي الشغلات ينتقمو كثير ....

حاولو ما تاكلون من ايدها شي ... ولا تخلوها مثلا تنضف غرفكم الخاصة .....

وانا افضل تغيروها ... لانها ماراح تصبر كثير ...

وبالنسبة للمعاملة ... فحاولو تخففو عنها ... لانها كمان بشر مثلنا تحس وتنجرح ...

حاولو دايما تبعدو امكم عن انضار الشغالة ...

مثلا راقبيها انت ... قولي لامك انك انت اللي تراقبينها ....علشان تخف ...

لانه اكيييد قلب الشغالة نار على امك واي مرة راح تنفرج وتعمل شي ...

حاوووولو تغيروها

الله يحفظكم

وطبعا لا تنسو تقراو اذكار الصباح والمساء ...

دمتم في حفظ الله وورعايته

Arnobat_ALfreej
18/01/2006, 11:13 PM
الدانة الله يحفطج لوالديج

سمعي يا بنت الناس خلي أبوج يشلها ويوديها المكتب ويقلها جدام راعي المكتب تبين تشتغلين ولا لا لو تبين تشتغلين سمعي كلام ماما ونظفي عدل ولو ما تبين تشتغلين الباب يفوت جمل وتذكرتج جاهزة وهي بتكون جدام راعي وبتقول

ولو ردت البيت يلسي إنتي معاها بدون أمج ( قولي لأمج أنا بحل المشكلة ) ورويها شلون تنظفون بيتكم وشوفوها

ولو ما ردت يبوا غيرها مسلمة وروها العين الحمرة من أول ما تدش


صدقيني في بيت عربي وبيت أهلي كل ما تيي خدامه تبى تلعب يودونها المكتب وتعتدل لأنه بعض المكاتب يضربونها أو يصرخون عليها
وإن شاء تتعدل بس نصيحتي لج ( مع إحترامي ) لا تخلون البيت دوووم مب مرتب يعني كل ما ترتب تخربون أنتوا يمكن ما تسوون ها شي بس في واايد خدامات يعاندون ويوسخون علشان أهل البيت يوسخون

شمس أبوظبي
20/01/2006, 07:34 AM
الله يعينج بس انتي ليش ما تراقبين بدل امك وتخلينها ترتاح؟؟

لولا_لولا
27/01/2006, 11:05 PM
انا معاج الغاليه

التبديل ماراح يجيب نتيجه

حتى المسلمات في منهن شينات وتطلع منهم البلاوي

ومع الخوات اللي قالن دامج انتي البنت خل توكلج بالمعامله المباشره مع الشغاله والوالده الله يحفظها
ترتاح منها ومن الصدعه

بس قبل هالشي حاولي تكونين مع الوالده .. في صفها يعني .. مو مثل ماتقولولها لا تعصبين او لا تسوين جذي فيها
يعني حاولي تسايرينها في البدايه لما تكون معصبه من شي واتهدين من عصبيتها من دون ماتذكرينها هيه شو سوت..
عشان تكون متطمنه.... ومرتاحه وانتي تتعاملين مع الشغاله

حاولي تريحينها اختي ..وتسعين لهالشي
هذي امج
الله يحفظها يارب ويطول في عمرها .. ويخليها لكم ويخليكم لها

سمراءالسودان
14/02/2006, 07:06 PM
حاولوا غيروها بوحده مسلمه ونشيطه الله يعينك كانك تتكلمي عن امي في عصبيتها

غابشة
15/02/2006, 09:48 AM
السلام عليكم ورحمة الله وبركاته

في نظري بصراحه هذي مومشكلة عويصة ومالها حل ,الحل ياعزيزتي خل إمك تشغل نفسها بش ثاني يفيدها مثلا شاركيها في جمعيات تحفيظ القرآن وتلاوته الصبح لأن الفاضي يعمل قاضي والجمعيات ماشاء الله في كل إمارة موجوده مع المواصلات وبتتونس وبينشرح صدرها أو جيبي لها مدرسة قرآن البيت تعلمها تلاوة القرآن وتجويده , وبالنسبة للشغالة هذي أشياء عادية لأنه مستحيل تجي شغالة كامله من مجميعه والكامل الله سبحانه ليش لأنها لو كانت زينه في كل شي لازم إذا راقبتيها بتشوفين فيها عيوب وتقدرين إنت في الفترة اللي تكةن فيها الوالدة مشغولة بترتيب الأمور في البيت ومراقبة الشغالة وبعدين علمي إمك تقول أوراد الصباح والمساء وشغليها بالقنوات الإسلامية مثل المجد والشارقة في باقي اليوم بدون ما تحسسينها إنج لاغيه دورها وفهميها إنه إذا بغت أي شي تخبرك وأنت تقدرين تتفاهمين مع الشغالة.

والله المستعان