المساعد الشخصي الرقمي

مشاهدة النسخة كاملة : معلومات فرش لعائدون من ماليزيا...



عمرون
05/07/2005, 01:54 PM
احنا تونا راجعين من ماليزيا فالي عندة اي استفسار ..تسعدني اجابتة.

دلوعة زوجها
06/07/2005, 12:00 AM
غاليتي نحن عائلتين مكونه من 9 أشخاص ننوي السفر لماليزيا في شهر اغسطس لمدة 20 يوم
فارجو أفادتي بأسماء الأماكان التي نستطيع أن نزورها و نستمتع بها لأن العائله يوجد معها أطفال وارجو افادتي باسماء الشقق النظيفه
ولك شكري مسبقا

عمرون
06/07/2005, 01:42 PM
مرحبا..يسعدني ان اشارك ببعض المعلومات المتواضعة والي اعرفها عن ماليزيا, واتمنى ان يستفيد الجميع منها ...

بالنسبة للعوائل الكبيرة...
الي عرفتة انة اذا كانت الرحلة على الخطوط الماليزية فية خصم يجب المطالبة بة لانكم تعتبرون فوج سياحي(وهذا الخصم تقدمة اغلب شركات الخطوط الجوية الكبيرة), بعض موسسات العمل لها خصومات على سعر التذكرة...مثل موظفي الاتصالات, وشركات البترول واكيد فية غيرهم فاسالوا عنها لان موظف مكتب الحجوزات ما بيعلمكم عنها الا اذا سالتوة.
وبالنسبة للاطفال اقل من سنتين ممكن توفير مقاعد امامية مع سرير للطفل.


الشقق...كوالالمبور
هالمرة احنا سكنا في... شقق دربي...
.صراحة احلى من الفنادق الف مرة, وهي وراء التوين تور مباشرة, يعني من البلكونة تشوفون الابراج, الاثاث جدا نظيف , الشقة واسعة وفيها...مطبخ متكامل + صالة وطاولة طعام مفتوحين على بعض + كل غرفة بحمام + حمام للصالة..بس لاتاخذون الفطور مالهم لانة مافية شي...وعلى فكرة في نفس الشارع فندق نيكو الي بعد يقولون انة حلو بس احنا مالقينا فية حجز, اما في نفس المنطقة فية شقق هوليدي ان ابارتمنت, ...بالنسبة للشقق او حتى الفنادق اسالو عن الاسرة الاضافية وخلوهم يسجلونها في العقد الي بتوقعونة لانة البعض منهم ما يوفر غير فرش على الارض..وانتوا تكونون طالبين اسرة اضافية مب دواشق!!ّ!!

عمرون
06/07/2005, 02:23 PM
المعذرة ...بس الكمبيوتر علق عندي...
بالنسبة للفنادق...
الميرديان+الهيلتون...جنب بعض بالضبط
جدد تم افتتاحهم من 8 اشهر بس ما انصح فيهم لعدة اسباب...الموقع بعيد جدا عن المدينة حوالي 30 دقيقة ولاتغشكم الصور انهم وراء التوين تور, الغرف ضيقة والاضاءة معتمة ومافية غير 3قنوات على التلفزيون وكلها بلغتهم وهذا حال اغلب الفنادق عندهم, بينما في شقق دربي فية ستالايت وقنوات عربية..والفطور مب هالقد.
فندق ريناسنس..في قلب المدينة, قريب من كل شي, حلو ..فطورهم زين.
ماينز...ممكن تباتون ليلة فية...وهو عبارة عن شقق فندقية ومنتجعات+ سوق+مطاعم+ مدينة ترفيهية تفتح من 6-11 مساءا

ملاذ العين
06/07/2005, 05:32 PM
اختي ممكن تقوليلنا عن الجو كيف كان هناك..؟؟

غرام القلب
09/07/2005, 10:01 AM
حبيت أضيف معلومه لو تسمحولي..

بالنسبة للعوائل الكبيره، ممكن تسكنون في تايم سكوير Time square موجود في كوالالمبور و قلب المدينه، و هو عباره عن فندق نظام سويتات و أكبر مركز تسوق (يعني فندق و مركز تسوق في نفس الوقت) و فيه ملاهي حق الأطفال يعني مافي خوف عليهم ، يطلعون من الغرفة و في بوابه تاخذهم على الملاهي يعني ما يحتاج يطلعون برع الشارع، و تحته في ستاربكس و سوبرماركت صغير أسمه سفت إلفن (11-7) ومفتوح 24 ساعة، وجدام الفندق محطة القطار إذا ناويين تروحون مناطق برع، وبمجرد إنكم تطلعون من باب الفندق تروحون يمين بتلقون السوق كلللللللله إلين نهاية الشارع، المطاعم والمحلات و الكوفي شوبات...

نفس الكلام بالنسبة لفندق الماريوت، عبارة عن فندق و سوق في نفس الوقت، اللوبي ماله روعة و بتلقون فيه خليجيين وايد يعني تحسون بالأمان، بس مافي ملاهي للأطفال مثل التايم سكوير، الماريوت فيه كل الماركات العالمية مثل ديور و لويس فيتون و فندي و كريستيان لاكروا و غيره وغيره، و تحت الفندق في محل مال الآيس كريم و "شيشه" حق رياييلكم إذا يحبون الشيشه و مجرد ماتطلعون من الفندق و تروحون على إيدك اليسار تلقون ستاربكس و سوبر ماركت سفت إيلفن (11-7) و كل المحلات عدال بعض إلين نهاية الشارع سنتر ورا سنتر، و كل المطاعم الماليزية و الأجنبية مثل كنتاكي و مطعم عربي "طربوش" و مطعم إيراني بس نسيت أسمه...

و إذا بغيتوا أي شي تراني بفيدكم باللي أعرفة..

بالنسبة للجو ترا على حسب المناطق، يعني داخل المدينة كوالامبور تكون درجة الحرارة 24 و في المساء رطوية شوي بس المهم إنه أبرد عن جو الخليج، يعني مول ما يحتاج لبس ثقيل أو جاكيتات أو بوت، لا كله لبس خفيف و قمصان رقعتهن خفيفه أو تي شيرتات و الأفضل لبس البرمودات حق الأطفال لانه أكثر ناس يشتكون من الحر خصوصا يوم يلعبون..


تحياتي

غرام القلب

الفارسـة
10/07/2005, 06:57 AM
اختي ممكن تقولي لنا الالكترونيات مثل الجوالات واللاب توب كيف هناك ؟؟

واسعارها غاليه ؟؟

وكم توصل اسعارها بشكل عام ؟؟

واماكن الترفيه ؟؟ يعني حنا مافيه صغار مره يعني اصغر شي رايح للمتوسط

فيه ملاهي تصلح كذا ؟؟

والسكن ايهم احسن في اي مدينه ؟؟

وبالنسبه لمرض سارز الطيور كان فيه والا في مناطق معينه ؟؟


اشكرك اختي على هذا الموضوع الله يجزاك خيـــر

عمرون
10/07/2005, 07:57 PM
بالنسبة للجو في كوالالمبور مقبول..يعنى الحرارة ما تزيد عن 28, بس مب حر, واغلب الوقت غيوم
في جزيرة لانكاوي و جزيرة بننج تقريبا نفس الشي
مرتفعات الكاميرون وجنتنج حوالي 14 يعني بلايز غليظة شوي وللاطفال جاكيت
وبالمناسبة مرتفعات الكاميرون فيها فقراء وايد وبعضهم قرى مسلمين...احنا مرينا على هالقرى ووزعنا عليهم بعض هدايا الاطفال الي كانت تي مع الوجباتوفي الطيارة والملابس الي استغنينا عنها وانبسطواعليها وايد.

بالنسبة للالكترونيات ما عندي فكرة, لكن احنا كنا محتاجين فلم للكاميرا الدجيتل وكان ارخص من سعرة عندنا.
اما بالنسبة للسكن فالاحسن انكم تسكنون في العاصمة كوالالمبور خصوصا اذا كانت رحلتكم قصيرة, واذا كنتوا ناوين تتنقلون فالافضل بعد تبدون فيها وبعدين تروحون الاماكن او الجزر الثانية لان ما فية رجلات مباشرة للجزر, وبالتالي بيضيع يوم الوصول على انتظار الرحلات.
واذا ناوين على جنتنج فالافضل تسيرون من كوالالمبور (لان المطار فيها فالافضل ترتاحون على الاقل يومين)وبعدين بالباص على جنتنج وثم للكاميرون والعودة لكوالالمبور ..لان المسافة بتكون اقصر ورحلتكم ارتب واريح...ولاتعتمدون على كلام موظف مكتب السياحة لانهم ما زاروا هالاماكن, ومعلوماتهم من الانترنت بس.
الطريق من العاصمة لجنتنج حوالي 4 ساعات بس تعدي بسرعة لان الطريق وايد حلو وفية استراحات نظيفة, واحلى منة بوايد الطريق من جنتنج الى الكاميرون بتلاقون الشلالات والوديان والاستراحات غير الي يبيعون العسل والرامبوتان بو الشعر الاحمر- والمنجوستين البنفسجي واغلى شي الكيلو ب5رينجت ماليزي
بالنسبة للامراض ما شفنا شي, وبالعكس مستوى النظافة عندهم لايعلى علية
والملاهي عندهم تجمع كل الاعمار
وافضل شركات السياحة عندهم هي ماليزيا توريزم لانها تابعة للحكومة
وعلى مستوى الافراد, شخصيا فضلت عدم التعامل مع الصينين لانهم يخادعون شوي, اما الماليزين فاغلبهم مسلمين ومتعاونين اكثر

fay fay
11/07/2005, 03:52 AM
موضوع روعه

تسلمين

اختي بغيت اعرف كم صرف العمله ؟؟

انا سمعت ان الرنقت الماليزي يساوي الريال السعودي بالتمام .. جد ؟؟

شغله ثانيه
اذا يتساون بالسعر هل المعيشه بماليزيا رخيصه والاسواق او لا ؟؟ لان دوم اسمع ان ماليزيا رخيصه فاذا كانت نفس الريال السعودي فبتكون نفس مستوى معيشتنا مب ارخص ولا اغلى منها .. صح ؟

الفارسـة
12/07/2005, 08:16 AM
مشكووره اخــتي الله يعطيــك العافيــه على المعلومات

غرام القلب
12/07/2005, 03:20 PM
نفس الشي بالنسبة للدرهم الإمارتي يساوي الرنجن الماليزي لكن في ماليزيا له قيمه، يعني إحنا في الإمارات الدرهم ما يسوى شي حتى الجرائد بدرهمين، اما هناك العكس تماماً يعني لو نزلتي السوق و في جيبج 100 رنجت ماليزي بتكفيج لثاني يوم، الأكل و الشرب وااااااااااايد رخيص حتى الملابس رخيصه، يعني تلقين القمصان على 19 و أحياناً الثلاث قمصان ب 15 رنجت ماليزي، النعول والجوالي ب 20 رنجت ، أذكر مره رحنا أغلى مطعم في ماليزيا و كله يسوي اكلات بحرية، طلع الشخص الواحد ب 30 رنجت ماليزي ..

هذا الفرق ... يعني عملتهم بالنسبة لنا وايد رخيصه و تقدرين تشترين بها أشياء كثيييييييييييييرة..

يعني لو قعدتوا أسبوعين أو عشرين يوم على سبيل المثال، 4000 ريال = 4000 رنجت ماليزي تكفيج و يمكن يزيدن بعد...

للحديث بقية أنا طالعة من الدوام و راحه البيت :smile:

باي

fay fay
12/07/2005, 10:56 PM
غرام القلب
تسلمييييييييين خيتوووو لردك العجيب

يبرد القلب ^_*

الفارسـة
13/07/2005, 07:21 PM
يعني لو قعدتوا أسبوعين أو عشرين يوم على سبيل المثال، 4000 ريال = 4000 رنجت ماليزي تكفيج و يمكن يزيدن بعد...




هذا للفرد يعني شخص واحد او اكثر ؟؟

ياليت تحددين تقريبيا

غرام القلب
17/07/2005, 07:45 AM
لا هذا للشخص الواحد، يعني إحنا العام قعدنا 20 يوم و كل وحده منا كانت شاله 4000 رنجت يعني 4000 درهم، وماخلينا شي ما اشتريناه، كل وحده منا أخذت شنطة ماركة و الباقي ملابس و نعول و من غير الأكل و المواصلات و هدايا لصديقاتنا و رجعنا الإمارات و بقبت في جيوبنا الخردة الباقية من الفلوس بعد...

رحت بشنطة و رجعت بشنطة و نص هههههه والله..

المشتاقه لله
21/07/2005, 09:09 PM
السلام عليكم ...
أولا الحمد لله على سلامتج
حبيبتي حبيت أسألج عن ماليزيا لأن بنسافر 3ينات وامي و أبوي
وحجزنا الفنادق الأتيه :
*دورست ريجنسي
*جينتينج
*ريجوس
شلون وضعهم بالنسبه حق
*الترفيه
*قرب المطاعم منهم
*جم ياخذون وقت للذهاب حق السوق
وحبيت أسأل عن كوالا لمبور لأنا راح نقعد فيها 16 يوم ممكن نعرف شلون نقضيهم ؟؟؟أبي أماكن حلوه
ولاتنسين بنروح مع ابوي يعني مانبي اماكن فيها اللبس غير محتشم ( مايوهات يعني)
وحبيت أسأل عن مرتفعات كاميرون شنو فيها وحلوة ؟؟؟؟؟؟؟؟؟ وتنصحين نروح لها وجم ساعه
بالباص
وجم اسعار المواصلات بالنسبة للباص؟؟؟؟؟؟؟؟؟ بالرينجت والتاكسي جم ؟؟
واَخر طلب في شواطىء حلوة في كوالا لمبور مافيها ناس تتسبح يعني مكان للعوائل يعني بدون مايوهات.
وتسلمين اختي واسفه عالازعاج

بلبلة الحب
31/07/2005, 07:39 AM
إذا ممكن مساعدة بغيت مراكز تجارية فيها محلات اتبيع قمصان نوم وملابس داخلية حلو لأني عروس وأبا اتزهب وثاني شي أبا محلات ايبيعون شنط ماركات حلوة ضروري سفري يوم الأربعاء الياي

PrINcEss
01/08/2005, 01:53 AM
معلومات مفيده
مشكوره

بلبلة الحب
01/08/2005, 07:49 AM
الله ايخليكم ردوا علي ابسرعة ماشي وقت

nono748
01/08/2005, 09:15 AM
الشنط الحلوة في كل المراكز, لكن قمصان النوم ما اعرف مكان محدد مختص

عيون وساع
01/08/2005, 10:49 AM
انا توني رادة من مليزيا وبانكوك اذا في اي سؤال نحن في الخدمة

عيون وساع
01/08/2005, 10:53 AM
اختي بلنسبه لقمصان النوم بصراحة مب ذاك الزود وما شي عندهم مقاسات لان مقاساتهن صغار وايد

عيون وساع
01/08/2005, 10:59 AM
اما عن الملابس الداخلية شي وحلوين وممكن تحصلين لين مقاس 38
وبتحصلينه في محل اسيتان الدور الارضي واسعارهن زينه مب غالين وايد وهذا المحل بتحصلينه في مجمع klcc

عيون وساع
01/08/2005, 11:03 AM
اما شنط الماركات بتحصلين كل الماركات موجودة عندج الديور والوي فيتون والفندي الجوشيوبتحصلين في klcc
او له اسم ثاني سوريا شوبيج مول

insana
08/08/2005, 10:12 AM
مرحبا

بس حبيت اضيف نقطه ان الأسعار في ماليزيا تقريبا تشبه الأسعار في الخليج .. وإذا شخص كان يبي يروح و يستانس فشئ أكيد انه راح يحط مبلغ اكبر.

انا توني راجعه من ماليزيا شهر مايو وكلفتني السفره 20 يوم انا و زوجي 3000 دينار يعني 30 الف درهم /ريال

مناهل78
08/08/2005, 11:49 AM
بنات آنه بعد راجعة من ماليزيا رحتها أول يوليو ولمدة 9 أيام، وحبيت أقول لكم وين رحنا:::

أول يومين صنواي لاجون وسكنا في Pyramid Tower تابع لفندق سنواي لاجون مومباشرة على المجمع ومدينة الألعاب،، السويتات وايد روعة ونظيفة وبها مطبخ وطاولة طعام والغرفة حجمها زين والفطور البوفيه وايد روعة،، فيه مطعم أيراني عند مدخل المجمع من برع واايد أكله حلو..

بعدين رحنه على جنتنغ وسكنه First World Hotel هو نظيف بس مب راقي بس الزين فيه أنه بالمجمع يعني ما تتعطلون وطبع مدينة الألعاب أروع..

بعدين رحنا على كوالالمبور بفندق Crown Plaza يبعد عن السوق بس دقيقتين مشي ونقدر نوصل لكل السنترات بواسطة القطار السريع يعني بس دقيقة وتنزلين،، رحنا على حديقة الفراشات والطيور ورحنا تعشينا بالمطعم الدوار ببرج الإتصالات، مميغ مول هذا أكثر من روعة يبعد ربع ساعة تقريبا عن داخل المدينة وفيه المحل Vinccy هذا تكرمون محل نعل روعة ورخيص على 20 -40 رنجت، الماينز مارحناه بس ايقولون روعة،، رحنا China Town بس الغش عيني عينك تشوفين سعر الشنطة من 300 رنجت يوص ل 50 رنجت..

أخذنا معانا تقريبا 500 دينار للمصاريف وأشتريت للأهل بعد والحمدلله كفتنا لأن مثل ماقالوا الأخوات الحياة رخيصة وخصوصا شنط المدارس والأحذية وحتى الملابس بالخصوص مجمع صنواي لاجون وايد رخيص...

لا تركبون مع سواق تاكسي هنود لأنهم الصراحة حرامية يلفون الشوارع لف بس علشان تطول المدة وياخذون أكثر....

الصراحة السفرة كانت وايد روعة ولا أمراض ولا شي وخصوصا أن آنه وزوجي كنا بروحنه وأحتفلنا بذكرى زواجنه الثانية هناك، بس مسكين ولدي لما رجعنه مارضي يتركنا ولا دقيقة مع أنه طول غيابنا لم يتأثر...

انا وحبي
10/08/2005, 03:00 PM
انا بنات احتمال اروح هاي الفتره بس انتظر اردون خبر بخصوص الحجز ااكدون علينا لان كله فل بس شوه تنصحوني اروح او اروح مكان ثاني غير ماليزيا خبروني انا بسير مع زوجي وعيالي فديتهم بنت وولدين وخواتي هنتين صغار