المساعد الشخصي الرقمي

مشاهدة النسخة كاملة : جمال مرسي



أمانيـــز
18/01/2012, 06:59 PM
- الاسم : د. جمال محمد مرسي
من مواليد كفر الشيخ فبراير 1957م
2- عضو اتحاد الكتاب المصريين
3- صدرت له مجموعتان شعريتان ( غربة – أصداف البحر و لآلئ الروح )
ـ بالإضافة لمجموعة ثالثة مع عدد من الشعراء العرب (على شرفة القمر )
4- يكتب في العديد من الصحف و المجلات العربية والمصرية
والمنتديات الأدبية على شبكة الإنترنت .
5- مؤسس منتديات قناديل الفكر والأدب على شبكة الإنترنت .

أمانيـــز
18/01/2012, 07:01 PM
و ليه نحزن ؟

ما دام نقدر نعيش الفرْح

و نشطب من معاجمنا معاني الجرح

و نمحي لون سواد غيّم على عنينا

بمحايه

عشان نقدر نشوف الشمس

نور الشمس

ننسى إيه يكون اليأس

و في ساعة صفا نرسم

في كراسة الحياه ورده

و ياسمينه

و شجرة توت و ضلايه

و عصفورة لصاحبتها

بتهمس همس .

***

فتحت اليوم شبابيكي على الدنيا

و كان الوقت وقت شروق .

لقيت الناس

كتير أجناس

برغم جراحها فرحانة

دا رايح شغله من بدري

و دا ماشي

و دا بيجري

و دي بتنادي يا أوطة و يا بطيخ

و دا رايح على غيطه و شايل فوق كتافه الفاس

و وسط المعمعه جاني

يا صاحبي صوت و كان مخنوق

ينادي يقول يا تسنيمي

عليا قومي سدي الباب و خليني

أعيش وحدي بأحزاني

دا انا اللي فيا يكفّيني

جاوبت الصوت

بقلب حنون ملاه الشوق

بلاش الحزن ليه نزعل

و ليه دايما نبص لتحت لو نقدر نبص لفوق .

***

و ليه نحزن

مادام نقدر نشوف أحلامنا في مرايه

و نلقى اصحابنا حوالينا

في وقت الشدة يحمونا

و ايدهم لينا ممدوده

تعدي بينا سكتنا اللي مسدوده

و ليه دايما نبص لنص كوبايه و كان فاضي

مادام نقدر نبص لنصها المليان

دي هي الدنيا يا صاحبي كدا حالها

تبات مهموم تقوم فرحان

و عجلة يومها ما وقفت عن الدوران

أمانيـــز
18/01/2012, 07:05 PM
يـا كايـد الأزهــارْ
يا جـوري يـا مفتّـحْ

فكـري معـاك احتـار
و البال كمـان يسـرح

الليـل بيبقـى نـهـار
و العتـمـهْ تتـبـدلْ

لو يـوم تمـر الـدار
يـا حلـو و تصـبّـح

عطشان و مش عطشانْ
و الميـهْ مـن نبعـكْ

و السحر فيـك ألـوان
و التقـل مـن طبعـكْ

و السهـد و الأحـزان
بـانـت و تـتـدلـل

لـو تشتكـي لإنسـان
يعمل ما هوش سمعـكْ

يـا ناشـر النسمـات
و العطـر يسحـرنـا

النـاس بقـت أشتـات
فـبـلاش تفـكـرنـا

فيهـم محـب الـذات
و الباقـي مستـنـدلْ

و العمر عدّى و فـات
عجـزنـا و كبـرنـا

يـا كايـد الأزهــارْ
فتّح بقـى و صحصـحْ

حواليك أعـادي كتـار
بتـعـض و بتـدبـحْ

خليـك كـدا زنـهـار
و اوعك في يوم تدبـلْ

لحسـن ذئـاب الليـل
يا جوري فيـك تفـرحْ

أمانيـــز
18/01/2012, 07:08 PM
حبيبي يا رسول الله .

حبيبي يا رسول الله

يا خاتم أنبياء الله .

يا مُرسَل بالهدايه من إله الناسْ ..

لكل الناسْ .

و بالقرآن تنور ضلمة التايهين

و ترجم بيه شيطان خناسْ .

و في سالف عصور الجهلْ ،

كنت النورْ .

و ينزل بالهدى جبريلْ ،

يقول : " اقرأ " ..

يزيد النورْ

و ييجي الأمر من ربكْ ،

تهاجر يا بن عبد اللهْ

تخط برجلك الطاهره طريق النورْ .

و نفضل في سنا نوركْ ...

على درب الهدي ماشيين ،

ليوم الدين .

عشان حققت للدنيا بكلْمة حق مطلبها

و خليت الطريق واضحْ

في شرقيها و مغربها

و جند الشر بالحجة بتغلبها

و تجذبها،

لدين اللهْ .

و لو كنت الغليظ القلب كانوا انفضّوا من حولك

و لكنكْ ..

مثال النُبل و الأخلاق في كل زمانْ

و جيت بالحق لجل تتمم الأديان

و تغرس في القلوب الطهر ،

تمحي الغدر و الطغيانْ .

و يتبدل سلاح الكفر و الجبروت

بغصن أمانْ .

و من نار الجحيم نهربْ إلى جنه من الإيمان

لأنّك رحمة للإنسان .

***

و بيدور الزمن بينا ...

و لا نصحصح

و تتبدل رجال و بلاد

تروح أمجاد

و ييجي ناس كتير حُسّاد

قلوبهم صخره مليانه بزيف و سواد

لا لاقوا حد يردعهم

و لا بالحق يمنعهم

فسابوا كلابهم الهايجه بعرض "المصطفى" تسرح

و تكذب تفتري تنبح

و تنشر سمها تجرح

و في الدنمارك يا حسرهْ...

لقت مطرح

و قلبي للأسى و الحزن يا "طه" بقى مسرح .

صور عِفْنه و كدابه

جرايد كلها كتابه

تعالب مكر و ديابه

و مين يا ناس يصحّينا من النومه ؟

ندافع عن حبيب الله بكلمة حق أو قومه

نشوف أعداءْ لنا بانوا و لا مرايه

إذا قابلونا وش لوش و حكايه

و لما نديّر السحنهْ ...

لهم في الضهر سلاّيه .

بتنهش لحمنا و تدبح

***

حبيبي يا رسول الله

فداك روحي

فداك أهلي و أولادي

راح ارفع بالندا صوتي

و أقول الحق لو في الحق كان موتي

بضايعهم نقاطعها

و شكوانا ، لمجلس أمن نرفعها

نخلي الأرض ، كل الأرض تسمعها

و لولا إن دين الحق علمنا

بإن الأنبيا واحد

لكنا نقول على موسى

على عيسى

و لكن ربنا الواحد

أمرنا بالإيمان بيهم

و دا الفرق اللي بين الكفر و الإيمان .

و دا العلم اللي علمته

لنا في خاتم الأديان .

ماذا اقول
24/01/2012, 12:14 AM
مشكورة يا غالية على إختياراتك الطيبة
والله يعطيكِ العافية

زَخَأُتْ أَلْمَطْرُ ❤••
27/03/2012, 09:08 PM
تسلمين يااااقلبي رووووعة

تم التقييم

Anfas Elfajer
13/09/2012, 02:08 AM
و ليه نحزن ؟

ما دام نقدر نعيش الفرْح

و نشطب من معاجمنا معاني الجرح

و نمحي لون سواد غيّم على عنينا

بمحايه

عشان نقدر نشوف الشمس

نور الشمس

ننسى إيه يكون اليأس

و في ساعة صفا نرسم

في كراسة الحياه ورده

و ياسمينه

و شجرة توت و ضلايه

و عصفورة لصاحبتها

بتهمس همس .

***

فتحت اليوم شبابيكي على الدنيا

و كان الوقت وقت شروق .

لقيت الناس

كتير أجناس

برغم جراحها فرحانة

دا رايح شغله من بدري

و دا ماشي

و دا بيجري

و دي بتنادي يا أوطة و يا بطيخ

و دا رايح على غيطه و شايل فوق كتافه الفاس

و وسط المعمعه جاني

يا صاحبي صوت و كان مخنوق

ينادي يقول يا تسنيمي

عليا قومي سدي الباب و خليني

أعيش وحدي بأحزاني

دا انا اللي فيا يكفّيني

جاوبت الصوت

بقلب حنون ملاه الشوق

بلاش الحزن ليه نزعل

و ليه دايما نبص لتحت لو نقدر نبص لفوق .

***

و ليه نحزن

مادام نقدر نشوف أحلامنا في مرايه

و نلقى اصحابنا حوالينا

في وقت الشدة يحمونا

و ايدهم لينا ممدوده

تعدي بينا سكتنا اللي مسدوده

و ليه دايما نبص لنص كوبايه و كان فاضي

مادام نقدر نبص لنصها المليان

دي هي الدنيا يا صاحبي كدا حالها

تبات مهموم تقوم فرحان

و عجلة يومها ما وقفت عن الدوران






مع أنني لست من هواة العامية في الأدب بشكل عام
لكن بعضها يكون جذاب جدا
تلك الكلمات مليئة بالأمل وتعلمين ياغالية كم أعشقه

طبت وطاب اختيارك الفريد