تعبت نفسيا من هالحياه >> ودي ارتاح

[أريد حلاً]

السلام عليكم ورحمه الله وبركاته
مو عارفه وش اقول او كيف ابتدي
بس الي اعرفه اني تعبت من الحياة الي عايشتنهاا تعبت
مافي اهتمام لاحب باين ولا مشاعر
زهقت من حياتي الزوجيه
ابي اعرف هل الحياه الزوجيه هي كذا ولا بس انا غير
زوجي ماعمره سمعني كلمه حلووه الا اذا طلبت منه ولا اذا قالهاا احسها بالغصب تطلع منه فبطلت ذي العاده صرت مااطلب منه يقول لي شي حتى قبل كان يقول لي اذا بيناديني عمري او حياتي الحين صارت نادر واذا قالها والله اني افرح
مشتاقه انه يقول لي كلمه حلوه ويشعرني بحنانه


من تزوجت طلعات نادره جدا واذا بنطلع نطلع نمشي لعيال ولا بالغصب يعني عادي يمر الشهر مايطلعهم >> زوجي كان متزوج وعنده من زواجه ولدين صغار واحد توه بالمدرسه والثاني توه بالروضه
>
انا توني والده صار لي خمسه شهور واحس نفسيتي زفت في زفت
اقوله طلعني مشيني يتحجج برد اذا كان برد وحر اذا كان الجو حلو
او حر شوي


الحنان انا الي اطلبه في العلاقه الحميميه ولا اذا جيت اطلبه يقول لازم يعني تخيلووو يقول لي لازم
واذا طلبت منه شي يسعدني مايسوويه يتحجج بأي شي
مايكلمني مايضحك معي والله انه يضحك على المواقف الي بالتلفزيون اكثر ممايضحك معي حتى ولده الصغير ماياخذه كثير واذا صاح يقول لي قومي ادخلي الغرفه ولدك اذانا بصراخه في البدايه اقوم بس بعدين ماصرت اسمع كلامه واقول له وش تبيني اسوي يعني
والله اني تعبت منه
حالتنه الماديه سيئه جدا راتب زوجي 2500 ريال الحمد لله نعمه من عند الله
وانا ادري ان نص الي فيه بسبب الحاله الماديه
قررت اساعده وسويت كم مشروع بس الي يطلع لي منهم يادوب يكفي مصروف حق الايد واذا طلع لي شي اساعده واعطيه عشان البيت واغراضه بس شهر يطلع فيه انتاج بالمشروع وعشره شهوور لا
مافيه فلوس زياده مستحمله حتى اني ماشريت لي ملابس داخليه والله انهم ذابو من كثر الاستخدام حتى ملابس للشتاء ماخذيت عشان بس لااكسر ظهره بالطلبات معنى اذا بشتري لي ملابس او شي اورح الاماكن الي اعرف ان اسعارهم تناسبنا واختار على ذوقي معنى ذوقي صعب شوي واذا شريت احاول مايوصل مشترياتي 200 ريال
هالمره طلبت منه جهاز رياضه مايتجاوز 400 ريال يقول لما يجي الخير ياناس هو يبني اضعف وجسمي مابنحف الا بالرياضه جربت امشي برا البيت ولدي مرض وجت له حساسيه بالصدره من البرد مامشي مع ولدي اوديه عند عمته ونفس الشي مرض
ووالحين صار عندي فلوس اشتري لي الجهاز بس محتاره اشتريه ولا اشتري جهاز بخار حق الولد ابيه يساعدني يقول مايقدر والله اني تعبت ولا يقول لاتشتري جهاز البخار واشتري جهاز الرياضي وجعني راسي مايخاف على ولده ولا همه بس اني اضعف وامتعه .......
وانا عارفه اني اذا ماشريت لي الاول مابيشتريه لي ولا بيشتري الجهاز حق ولده والله اني صابره وحامده ربي واقول بكرا يجي الخير وووربي كريم مخبي لنا الاحسن
وبعيش معه على الحلوه والمره ومسوتنه يادهينه لاتنكتين يعني حاطتنه على كفوف الراحه بس هو والله مايحمد ربه على النعمه >> زوجته الاوليه عاش معها سنه وثلاثه شهور ورته الويل حتى الطرد تطرده من البيت
وورايحها بيت اهلها زعلانه وتقعد شهرين بالثلاثه وترجع اسبوع او اسبوعين وتطلع ترجع بيت اهلها زعلانه وتقعد بالشهور يعني ماعاش معها كثير
انا ماامن عليه بس هو مايحمد العيشه
انا اقدر استحمل العيش معه بس هو مايعطيني ريق حلو دايم متنرفز معصب انا ادري بسبب الحاله الماديه حتى اني قلت له يغير الوظيفه ويروح لشركه ثانيه راتبهم اكثر ويعيشنا مستوورين واحسن من كذا بس هو موب راضي
ومتاكده انهم بيوافقو عليه وخاصه ان له خبره في شغله 14 سنه بس اكلم مين
والله لو يفتكر فيني اقدر استحمل وواعيش على الحلوه والمره بس وش اسوي احس نفسي بطيح بالخطاء بس افكر بربي ثم ولدي واذا جت الفكره براسي امسك المسباح وواقعد اسبح واستغفر ربي
وبعض الاحيان تجيني افكار انا حلوه واجتماعيه واخلاق بشهاده الجميع ليش ماتطلق اخذ ابني ووربي ان شاء الله يسهل لي امري بس اتعوذ من ابليس اهم عليي ولدي لا يعيش مشتت >> شايفه كيف عياله من زواجه الاولي
ماني عارفه وش اسوي عطوني حلول كيف اتعامل معاه
ولا المصيبه واالادهى اني اعرف جزئيا السبب الرئيسي الي مخلني زوجي متباعد عني يبيني انحف انا والله مو دبه انا مليانه وزني الحين بسبب الحمل 75 كيلو واحاول انزل وزن بس زي ماقلت لكم ينزل من فوق والي تحت يبي
له رياضه
ماعمره طالعني ماعمره قال لي انتي حلوه اذا تكشخت له
وبسببه صايره اهمل بيتي عادي عندي مااغسل المواعين الا يوم ثاني عادي مااكنس البيت يوميا مالي خلق اسوي ولا شي
يروح العمل ويرجع يقعد قدام التلفزيون مايتكلم االا اذا انا تكلمت يسكر التلفزيون عشى او غدا ويروح ينام
وعلى هالروتين
زهقت زهقت واخاف اطيح بالخطا ياربي عليه مايحس مايخاف ربه فيني اهم شي هو ملابس نظيفه اكلي جاهز وانا على تراب
عطوني حل والله اني بعض الاحيان افكر ابلع حبووب بس اخاف ربي يعني استريح من الدنيا وومااستريح بالاخره
>>
>
ادري ان كلامي مو مرتب وان فيه يمكن اخطاء املائيه ومافيه تناسق بس من الحاله النفسيه الي فيني
اضحك مع الناس والهم ياكلني من داخل

[دقات قلبFي]

غاليتي

الرجاء الالتزام بقوانين الركن

تم تعديل الكلمات الجريئه وذلك لأن الركن مفتوح للجميع وهناك من يقرأ الموضوع من مختلف الأعمار وهذا لايناسب الجميع ....


اذا اردت التعمق بمشكلتك كما ترين فلديك ركن المشاكل الخاصه ,,,

اتمنى لك التوفيق


تقبلي ودي

[so happy]

كان الله في عونك.ادعي ان ربنا يهديه و اكثري من الاستغفار و حاولي تعرفي سبب غضبه و عدم الامبالاته بك و ببنكم.دعواتي الك

[روضة سعيد]

والله حياتي قريت مشكلتك مرتين وجاني صداع المهم الله يرزقكم
اختي اقترحي على زوجك يدور له وظيفه ثانيه انا ادري والله اني الماده ماتساعد بس الواحد مايجلس كذا يتمنى بدون عمل
ليش انتي ماتطبخين اكلات وتبيعيها والله تدخل فلوس خااصه في الحديق او في النت والله ودي اساعدك لكن مابيد حيله

[أم جلثم]

الله يعينج أختيه .... ربي يفرج همج وينفس عن كربتج

إنتي حااولي اترريحينه ابكل الطرق ... لا تهملين بيتج ولا نفسج ... خليه يشووفج وإنتي قاعده ادورين ع رااحته

حسسيه بهالشي ..... وإن شاء الله بيحس فيج وبيعووضج عن كل اللي فات

بس لا تخلين الشيطان يلعب ابراااسج .... تعوذي منه داايما

وعليج بالاستغفار وقيام الليل وقراءة القرآن ... وبذن الله الفرج من ربنا قرريب

دعوااتي معاج .....*

[.. أمــ عــلــيــ ..]

الله يعينك ويسهـّـل أمورك

هو مبيـّـن عليه انه تعبان من زواجه الأول ومسؤولية الاطفال اللي بينهم .. وبعد زيادة على كذا الحالة الماديـّـة الضعيفة ..!!!

يعني تحمـّـلي عصبيته هالأيام .. وأنتي حطـّـي أعصابك بالثلاجة شوي .. لحد ما تهدأ الأمور شوي ويفرجها عليكم رب العالمين ..

طيب ما جربتي تدوري لك على شغل أو وظيفة يكون دخلها زين ؟.!!

أو حاولي معاه بالكلام الليـّـن الحلو إنه يدوّر له شغل ثاني علشان تزيد المادة شوي لأن الحين هو عنده مسؤولية بيتين ......!!! وثلاث أطفال .. !!

ومسألة انك تهملي نفسك وبيتك علشانه هو .. ليش حبيبتي ؟.!!!

اهتمي بنفسك وبيتك وولدك لك أنتي أولاً ولنفسك فقط .. بعدين فكـّـري بزوجك ..!!

ترى اذا اهتميتي بنفسك لنفسك والله تحسـّـين بالسعادة و راحة البآل .. ومع الوقت يحس فيها زوجك ..!!!

ولا تقولين أنا ما أبي أطلب منه ما يقدر ومن هالأعذار .. ترى الرجل ما يحب كذا .. بالعكس .. يحب يحس إن المرأه محتاجة منه الفلوس لشئ في خاطرها .. أنتي جربي اذا كنتي محتاجة أغراض أطلبي منه الفلوس بسهولة ودلع .. وفــن .. علشان تكسبين اللي تبين وتكسبين زوجك بصفـّـك .. !! ( ترى كيدنا عظيم بس وين اللي يستعمله زين !! ) .. :)

لا تتكلمين معاه أبداً عن زواجه الأول .. اعتبريه ما تزوّج غيرك ولا له أطفال .. لا تتدخلين بطلعات أولاده من زوجته الاولى .. أهم ما عليك ولدك وبسسسس .. والباقين أمـّـهم تتصرف معاهم وتشوف اللي يناسبهم ..

واذا على الطلعات .. جربي أكثر من مرة أطلبي منه انكم تطلعون تغيرون جو .. مثلاً : يوم اجازة الاسبوع .. قولي له بهدوء وشوية حزن ودلع : انا خاطري أشوف المكان الفلاني .. خلنا نروح له اليوم نغير جو ونتمشى .. وكل ما بغيتي تطلعين أطلبي منه عادي لا تستحين أبداً هذا زوجك وهذا حقك ...!!!! وان شاءالله مع الوقت بيصير هو اللي يقولك يالله نطلع نتمشى .. !!

الحل الحين بيدك أنتي .. لازم تتغيرين شوي .. علشان تشوفين النتائج اللي تبينها .. بس طبعاً لا تنسين الصبر .. لأن النتيجة ممكن تطوّل ما تجيك .. وممكن تجيك بظرف شهـر .. بس على كل حال .. أنتي طوّلي بالك .. ولا تيأسين .. وجربي كل الطرق المناسبة والمتاحة لك .. ولا تقولين زوجي ما يتغير .. بالعكس كل الرجال قابلين للتغيير .. بس محتاجين شوي ~ كيد نساء ~ ....


:065:

~

[رز بلبن]

الله يعينك

اصبري عليه وان شاء الله الله يغير الحاال

عليك بالدعاء ووالاستغفار وصلاه الليل وربي يفرجها ان شاء الله

[Яоμgξ]

وانا راي من راي ام على

ومهما كان فديتج مافي انسان مايحس او مايتغير

الا ويكون له نقطة ظعف حاولي ربج يمكن يصير للاحسن من ابسط الاشياء

والحياه ماتوقف لهذا الحد وربي يوفقج ويهديه ...

[mrs.7la]

الله يعوضكم ويفتحلكم ابواب الرزق ويهدي زوجك ويسخره ليكي

[انفاسـﮱگ دخـﮱون]

إنّ مع العُسر يسرا "
وحدها كافية لنُدرك أنّ كل شيء سيمضي، سينتهي.. الفرق هو في شكل النهاية، كيف ستكون؟ وكيف سنكون حينها؟
الإنسان مُعرّض للمشاكل والضيق كيفما كانت وفي أي وقت يشاؤه الله. وهذه إشارة من الله إلينا أن في الضيق حكمة، وفي الحزن حكمة، وفي الظروف الصعبة حكمة أيضاً
قد تكون إحدى حكمها هو العودة إلى الله، التضرّع إليه.. والتقرّب منه
علاقة الإنسان بربّه لابدّ أن تكون مستمرّة، حية في كلّ ثانية ، فلا حول لنا ولا قوّة الا به سبحانه
..
تعرّضنا للمشاكل نداء من الله إلينا، كي نعود إليه ، نسأله الفرج، ونستغفره ليتوب علينا.. فلا ضيق سيُفرج إلا بالتذلل له وصدق الانطراح بين يديه


مالذي عليك فعله حين تكون تحت وطأة المشاكل؟

عليك أن تقوم بمراجعة نفسك، المراجعة الشفافة الصادقة، التي تجعلك صريحاً في النظر إلى تقصيرك..
عليك أن تؤمن أن الله هنا، يسمع العبد حين يدعوه، ويمدّ نعمه حين يرجوه.. فاسعَ إلى ذلك
جدّد توبتك، واعمل على تصحيح أخطائك مع الله، في صلاتك.. في خُلقك.. في كلّ ما يربطك به ومعه
تمسّك بصلاتك، حافظ عليها، اجعلها جوهرتك التي تحميها من شرّ الدنيا، لتحميك من عذاب الآخرة
اجعلها ملاذك وملجؤك الذي تفرّ إليه من ضيق الدنيا وكدرها لتنعم براحة وسعادة عظيمين ، حتى تكون قرّة عينك فيها
اعلم أنّ صلاتك هي ركيزة دينك، وهي طريقك للتواصل مع الله بلا حاجز، وهي حجابك الحاجز عن الفتن والمعاصي، وأنها من ستحميك من الوقوع في أي ذنب تعلمه ولا تعلمه
وتذكّر أن دينك يقوم عليها، وأنها أول ما ستُسأل عنه، وأنها البطاقة الأولى التي إن نجحت في المحافظة عليها فالدنيا نجحت في جعلها كافية للعبور بسلام في الآخرة
ثق بأنّها راحتك، أمانك، وأنها الوسيلة التي تقوّيك أكثر، وتجعلك صامدا أكثر، واثقاً بالله وبأنّه معك وسيعينك على تجاوز محنتك
رطّب لسانك بذكر ربّك، استغفره قدر ماتستطيع.. واعلم أن استغفارك خير لك، وأن استغفارك هو فرجك، هو وقودك للحفاظ على الأمل
وقُم بدعاء ربّك كثيراً.. فدعاؤك هو حديثك مع الله، اسأله ماتُريد، ألحّ عليه في الدعاء، وثق أنّ دعاءك لن يخيب، فالله يحفظ دعاءنا له، وسيحقّقه لنا هُنا أم في الآخرة
فإن كان الخير أن يتحقّق دعاؤنا في الدنيا فسيحقّقه الله، وإن كان الخير أن يتحقق في الآخرة فسيحفظه الله لنا للآخرة بأي شكل يشاء
تذكّر أن الدعاء في كلّ وقت هو خير، وأن عظمة الدعاء ومكانتها عند الله جعلته يُخبرنا أن آخر ساعة من يوم الجُمعة مستجابٌ فيها الدعاء، وأن الدعاء بين الآذان والإقامة كذلك، وفي جوف الليل أيضاً
تذكّر قول الله: [ ادعوني استجب لكم ] .. هذه الآية وحدها كافية لنؤمن أن الله لا يخيب ظنّ عبده به، فاحسن الظنّ بالله

لا تنسى أيضاً أن تجعل الاستخارة رفيقك في كلّ وقت، في كل مرحلة من حياتك.. وحتى حين ترى نفسك في مشكلة أو محنة
استخر ربّك فيها، واطلب منه إن كان في تلك المحنة خيراً أن يُريك إياه، وأن يجعلها قوة لك، زيادة في خبرتك في هذه الحياة لتُحسن التعامل فيما بعد في كل ما يواجهك
تصدّق كثيراً بنيّة الفرج، بنيّة الخير، بنيّة السعادة.. واعلم أنّ الصدقة تُطفئ غضب الربّ، وأن محنتك مشيئة من الله، فتصدّق وادعو ربّك ألا تكون هذه المحنة غضبا من الله عليك

أخيراً.. تذكّر:
[ ومن يتقّ الله يجعل له مخرجاً ]
وتذكّر:
[ ومن أعرض عن ذكري فإنّ له معيشة ضنكا ]

[انفاسـﮱگ دخـﮱون]

ورايي من رايي ام علي رايها سديد كوني جنته في بيته ولا تكوني ناره اصبري عليه والله بيفرجها ان شاء الله

[ام ليان 2]

كلام ام علي:thumbs_up:

[دنيا الالم]

احب اقول لك إن الحياه ماتتوقف على شخص واحد‏!‏ وأنا حاسه إنك تعبتي حالك وبدأتي تهملي في بيتك و في نفسك ومو بعيد بكره يجيك اكتئاب والسبب زوجك؟؟ رجائي لك اشغلي نفسك بأي شي حلال وحلو مثل‏"دور التحفيظ‏"‏ وامسك العصا من النص ادي زوجك حقوقه صح بس تغاضي عنه وعن تقصيره في بعض الأمور-بعض وليس الكل-وادعي الله دائما انه يرضى عنك فمن رضي الله عنه امتلأت حياته بالورود والأفراح:adore:دعواتي لك