ابي اعرف اللي سويته صح ولا غلط !

[أريد حلاً]

السلام عليكم
هذي ثاني مرة اكتب هني
كتبت هني قبل مشكلة بسيطة
وهذا رابط الموضوع الاولي علشان تعرفون قصتي

http://forums.3roos.com/showthread.php?t=595013

انا ساكنة بغرفة وحدة بدون حمام والحين بكمل سنة قريب وانا ساكنة فيها تعبانة وايد بس متحملة علشان زوجي لان ادري بظروفه وكان واعدني ان في فلوس راح تنزل لنا راح يعطيني اياها علشان اخذ شقة اجار وراح اتوظف قريب يعني راح تنحل مشاكلنا ودورة زوجي الشهر الياي تخلص ومعاشة بزيد وبعد اهو يكمل دراسة الدبلوم يعني الحمد لله امور وايد راح تتحسن في حياتنا
بيت زوجي زينين بس ماارتاح وياهم عدل وساعات فيهم حركات تقهرني بس احقرها ومعظمها تمر بسلام

المهم ان البيزات نزلت لزوجي من شهر فرحت لما نزلت وقلت خلاص بصير عندي سكن خاص وتميت احلم واخطط زوجي دور وياي شقة قريبة من بيت اهلي علشان امي اللي راح تتحمل في البيبي الجاي لما اكون بالشغل ان شاء الله
رحنا اول شقة وماعجبنا السعر وحسيت زوجي يطالعها عالسريع وبسرعة يبي يمشي بس مشيت الموضوع بعدين اهو قال لي بنفسه اخذي الارقام من عند الوالدة بتصل فيهم واتصل فيهم وبعدين رحنا نشوف الشقة الثانية وعجبته وعجبتني واحنا هناك كان يقول لي خلاص ناخذها ؟ استانست انه يبي ياخذها مثلي
وقال لصاحب الشقة ان المغرب راح يتصل فيه علشان يأكد عليه
صار المغرب ومااتصل سالته قال بكره واتصل يوم ثاني وااكد عليه فرحت اكثر
وبعدها وقع العقد ويا الريال استانست اكثر واكثر وتميت اسولف لامي عن الشقة واحلم فيها حتى ثيابي جهزتهم علشان انقلهم : )
وفي الليل تغير مرة وحدة وقال لي ان ماراح ياخذها خلاص وانه ماراح يدفع البيزات
ويوم ثاني الصبح بعد قال لي ان راح يكنسل العقد
والسبب ان هالشهور ماعنده فلوس يدفع له
انزين ليش مافكر في هالشي قبل لا يخليني افرح واطير لسابع سما ؟ قبل لا تنزل الفلوس
ليش ماتراجع لما كنا ندور ؟
منصدمة من موقفه
امي سالتني عن الشقة وقلت لها قالت ليي اذا على هالكم شهر بساعدكم لما تتوظفين ( اجراءاتي كلها مكملة بس باقي اوقع العقد ويا جهة العمل ) وبعدين كلمته وماوافق
قال ليي لشهر 6 لما اولد راح ياخذ الشقة
من زود الضيق اللي حسيته قلت له ببيع ذهبي وماوافق
تعبانة ماانام - ولو انام نص ساعة او ساعتين واقعد
ولو بنام دموعي على خدي واهو مو حاس فيي
اخذت اغراضي وجيت بيت اهلي اريح لي واهو مو موافق خلاني اخلي جزء بسيط منهم في الغرفة
كتبت له الليلة الساعة 2 مسج كتبت له كل اللي حاسة فيه وقلته له ان يوم الاحد راح اخذ باقي اغراضي وانتظر رده

مادري اذا حسيتون فيي او لا ..
انا راعيته ايام طويلة وكنت تعبانة وساكتة
بس الحين عطاني امل كبير اني راح يكون عندي سكن خاص فيي ومرة وحدة سحبه مني

ماادري اذا اللي سويته صح ولا خطأ ؟
شورو علي

[ملكة الآحساس]

الله يهديك ... معقدة الامور ..

الي تتحمل من اول شي تكمل للاخر ...

وان شاء الله تسكنون بيت بروحج قريب ...

[أكليلة الحوراء]

الله يساعدش خيو واجد صعب غرفه وبدون حمام
الله يسهل امورش انشا الله ويعطيش على نيتش

[أريد حلاً]

الله يهديك ... معقدة الامور ..

الي تتحمل من اول شي تكمل للاخر ...

وان شاء الله تسكنون بيت بروحج قريب ...

كنت متحملة ولو مو الامل اللي عطاني اياه ماصار فيي جذي
احسه كسرني من اللي سواه
والحين رضيت باللي يبيه على راحته .. بس ماابي اسكن هناك ابي اقعد في بيت اهلي لما تنحل الامور


الله يساعدش خيو واجد صعب غرفه وبدون حمام
الله يسهل امورش انشا الله ويعطيش على نيتش

ان شاء الله

المسج اللي طرشته له مارد عليه ولا حتى فكر اليوم يسأل عني
شسوي الحين ؟

[Black^Rose]

شوفي عزيزتي في بعض الرجال صعب الزوجه تدفع لهم فلوس او تبيع ذهبها او تطلب من اهلها يشوفها كبيرة في حقه وهذا شي طبيعي بيرفض,,
ويمكن بعد ماقرر يأخذ الشقة حسبها وراجع افكاره وشاف انه مابيقدر يدفع الفلوس بعدين وبيتورط..
وانا حاسة فيكي صعب تسكني في غرفة وفي نفس الوقت حامل بس خلال هالفترة اجلسي عند اهلك كم يوم غيري نفسيتك شويه وبعدين ارجعي لبيتك وزوجك وافتحي الموضوع معه باسلوب وان شاء الله يقتنع ..
وفي نقطه بضيفها لو حسيتي ان زوجك قادر يدفع ايجار وهذا الشي مابيأثر عليه خلي اهلك يتفاهموا معه يوفر لك سكن,,
الله ييسر امورك ويفتح لك باب الرزق بأذن الله..

[موسيقى هادئة]

أصبري حبيبتي انتي تقريبا نفس مشكلتي بس الف الحمدلله انحلت وطلعنا ابشقة بس بعد عنااااااء لذلك اكلج صبري ..

وعلى كولة المصريين خلي الاخر علاخر يعني خليج كاعدة ابيت اهلج لان

زعلج مبرر والة سبب وبعدين من يريد ايصالحج رجعي وياه

وافتهمي منة ليش هالرفض المفاجأ؟؟

وادعيلج من كل قلبي الله ايفرجهة عليكم وترتاحون ..

[شجون إمرأة]

اللي انتي فيه خيوو صعب لكنه مو مستحيل <<< اقنعي روحش بهذي الجملة

ان شاء الله اموركم بتتعدل بس يبغي ليها صبر

وانتي متحسسه وتصيحين لان انتي حامل وحساسيتش زايدة

ماعليه تمي ببيت ابوش واستريحي شوي من ضغط هالسالفه بس ردي لزوجش ووقفي وياه بمحنته بعدين بيحس انش تخليتين عنه

[SHREEFA]

الله المستعان ان شاءالله وربي يفرجها عليج ويسكنج في البيت الشرح اللي يسعدج فيه ربي ويبارك لج فيه
ما جلست مع زوجك عرفتي شنو ظروفه سبحان الله يمكن عنده ظرف قاهر
اللي خلاه يتراجع باخر لحظه ويكنسل العقد وكل شي
هل تناقشتوا ...
غاليتي راح الكثير وما بقى الا القليل ان شاءالله اصبري والله تنالين الخير كله ان شاءالله

بس لاتزعلين منه ولاتزعلينه منج ... تكلمي معاه وربي يسهل الامور وعرفي سبب تغير رأيه



دمتم سالمين
اختكم شريفة

[قطريهـ ماتهابـ]

وفي الليل تغير مرة وحدة وقال لي ان ماراح ياخذها خلاص وانه ماراح يدفع البيزات
ويوم ثاني الصبح بعد قال لي ان راح يكنسل العقد
والسبب ان هالشهور ماعنده فلوس يدفع له
انزين ليش مافكر في هالشي قبل لا يخليني افرح واطير لسابع سما ؟ قبل لا تنزل الفلوس
ليش ماتراجع لما كنا ندور ؟


اختي ريلج يبيج بس يمكن صج ضروفه ماتساعد لاتضغطين عليه

اغلب الريايل يستحون يقولون انه ماعندهم فلوس ولايحبون ياخذون من حريمهم

انتي صبرتي وايد فصبري للين ماتتحسن ضروفكم

حرام ايامكم تضيع بين زعل ونكد

[cute soul]

الله يصبرك انا اقول خليك ببيت اهلك هالفترة عشان الحمل و حاولي تفهميه اسبابك و انك تحتاجي رعاية خاصة هالفترة عشان ما تصير مشاكل بينكم و الله ييسرلك الخير يا رب

[ام موازي]

الله ايسرلج امرج

بس انتي غلطتي انج طلعتي من البيت بدوم موافقته
جي بدال ماتهدين الامور بتزيدينها تعقيد والله يستر


الحياه ملياانه مشاكل ياختي
انا وحده شاب راسي من المشاكل .. وتوصل السالفه انه يقولي اطلعي من البيت وسيري بيت اهلج
بس لني افكر بعقل اتعوذ من بليس واستغفر وكل شي يتعدل الحمدالله

[ام ليان 2]

الله يعينك ويفرج همك

[ميمي زايد]

الصبر مفتاح الفرج

[أريد حلاً]

آخر التطورات

سويت مثل ماقلتون لي وسالته عن الاسباب قال لي ان السبب الفلوس ويبيني انتظر جم شهر وافقت وسكت بس قلت له ان بيتهم مابطبه بعد لما يصير عندي شقة واذا اهو يبي يشوفني يجي بيت اهلي ووافق واليوم ثاني يوم يجي من بعد 3 ايام
اما البيزات اللي كانت عنده اشترى فيهم اغراض للبيبي واشترى له تلفون بدون مايقول ليي حتى بعد مااشتراه شفته اليوم عنده وسكت بعدين رجعت اتصلت فيه لما طلع قلت له مو كأن عندك شي جديد في البداية نكر وبعدين قال لي انه اخذ تلفون جديد
تضايقت لان تلفون مورخيص غالي قال لي ان راح ياخذ ليي مثله قلت له ماابي
ابي الشقة ماابي تلفونات :( ماقلت له بس من داخل انقهرت
الله كريم

[قطريهـ ماتهابـ]

اختي بقولج بصراحه اذا بعدتي عن ريلج ممكن بكرة يخون لانه محتاج للحب والحنان

ليش تحرمينه منج عشان الفلووس

مافيها شي نطري كم شهر لين مالله يفرجها


حرام جذيه تضغطين عليه

واذا شرا تلفون يديد يمكن بخاطره ترا اهو من حقه بعد يستانس

اختي عيشي حيااتج بمرها وحلواتها

ترا مافيه شي كامل

والصبر مفتاح الفرج

[نيغار]

امممم ما ابي اقولج شي يزيد ضيقج بس و الله عانيت مثل ما عانيتي و ربي فرجها في النهاية.. حتى انا كتبت قصتي و معاناتي اني ساكنة في بيت اهل زوجي و هم زينين بس انا مو مرتاحة و خصوصا نغزات رايحة و نغزات جاية و زوجي تفهم في النهاية و طلعنا بشقة مع انه وايد انضغطنا ماديا

بصراحة زوجج حاولي تفهمينه انه الزوجة في الشرع و الاسلام لازم تكون في مكان يريحها عشان تقدر تلبي احتياجات زوجها و اسرتها و لا ما بتقدر تتم فيهم على اكمل وجه.. تدرين انا احنا النسوان مشكلتنا انا احنا نقبل بالوضع في البداية مراعاة لظروف الزوج.. و معظم الازاج ما يقدرون هالشي و يتمادون و يتغلون هالفرصة لصالحهم و ما يفكرون في المسكينة الي صابرة و متحمل هالمعاناة
على الزوج انه يقدم الاولويات و يخلي الكماليات.. مثلا الموبايل الجديد يعتبر من الكماليات الي مو ضرورية و لامهمة.. بس انا اقول لو تفاهمتي معاه بطريقة افضل من بدل طلعتج لبيت ابوج كان بيكون احسن..
تدرين ليش؟؟ لانه الازواج اكره ما عليهم هالحركة و بيطالبج ترجعين بدون ما اهو يجيبج و اذا ما رجعتين بقولج خلج قاعدة ببيت ابوج لانه يحس روحته لج بيكسر غروره كرجل..
حاولي تتفاهمين معاه بهداوة و حسسيه انه الحامل وضعها يختلف و نفسيتها تختلف فلازم يأقلم روحه معاج عشان البيبي الا هو ولده و ولدج.. و الله يهديه و يسخره لج

[~¤ô_ô¤~ ام تومة ~¤ô_ô¤~]

ان شاء الله تسكنين بشقة وترتاحين


بس اصبري هل كم شهر والله كريم

[Rabea3 al-ward]

اللي انتي فيه خيوو صعب لكنه مو مستحيل <<< اقنعي روحش بهذي الجملة

ان شاء الله اموركم بتتعدل بس يبغي ليها صبر

وانتي متحسسه وتصيحين لان انتي حامل وحساسيتش زايدة

ماعليه تمي ببيت ابوش واستريحي شوي من ضغط هالسالفه بس ردي لزوجش ووقفي وياه بمحنته بعدين بيحس انش تخليتين عنه

مثل ماقالت اختي شجووون
بس حبيبتي حسسيه انج يايه بيت ابووج عشان ترتاحين شوي
وتردين
وان الحمل ونفسيتج وايد مأذينج
لاتحسسينه انج مو واقفه وياخ
قعدي جم يوم وردي لان الريال اذا حس زوجته في يوم من الايام مو واقفه وياه لو في مووضوع بسيط
ياخذه نقطه سوده عليها طول ما اهو وياها
وحتى لو قالج نسى يتم في باله لو شنووو

الله يوفقج وياج ويسهل عليج ولادتج

[حور السلطنة]

من رايي انج ماتكبرين السالفة ووقفي عند زوجج ع الحلوة والمرة

[أريد حلاً]

هلا بنات
مشكورين على التفاعل مع قصتي :)
سويت مثل ماقلتون وفهمت زوجي اني قاعدة في بيت اهلي لان تعبانة وبرتاح شوي وبعدها برجع معاه وفي هالفترة صرت مثل قبل اغسل له الثياب واكويهم في بيت اهلي
وقعدت فترة ورجعت وياه
طبعا اول يوم رجعت كانو هناك خواته وامه وسلمت عليهم ماردو عليي السلام غير امه وبعد بدون نفس حز في نفسي هالشي
سالته ليش ماردو علي قال يمكن ماسمعو قلت له اوكي
وصرت اذا اشوفهم ابدي اسلم وشفتهم ان قامو يسلمون عليي عادي بعدين
تميت وياه اسبوعين بس موقااادرة اتحمل :'(
الحمام مااقدر ادشه كل وقت لان بره والحين البول - مكرمين - كل ربع ساعة ومو حاس فيي
حتى صادني ندم اني حامل وتمنيت اني موحامل - استقغر الله -
كل ماافكر ان 600 دينار صرفها على الفاضي انقهر وحتى مافكر يشتري ليي هدية بسيطة منها
والحين وعدني من كم يوم ان ياخذ ليي الشقة وقريب من اهلي وخلاني استانس
واليوم بالضبط رجع في كلامه
يقكر بس في نفسه
واذا تعرفون عن البحرين ان في مكرمة 1000 دينار
يبي يشتري فيها كاميرة
اشوف اخوانه من استلموها عوضو زوجاتهم واللي راح اخذ لزوجته هدية واللي سافر وياها
ليش مسوي فيي جذي :'(

قلت مابرجع له خلاص واذا يبيني يكلم اهلي
ومابرجع له الا اذااخذ لي الشقة

:(

[أريد حلاً]

اعرف ان يفكر بنفسه ومايفكر فيي
عادي عنده اقعد في بيت اهلي على طول وبس وقت النوم اكون وياه
ساعات يجي على بالي الطلاق من كثر مااحس انه ظالمني

[وردة الجوري 18]

لا حول ولا قوة إلا بالله
وش أخبارك الحين أختي

[أم سعد123]

شوفي أختي أولا الله يعينك ويجمع بينكم بالمعروف وأقولك هنيئا لك بهالزوج فكري عدل والله لو كان رجال موبزين جان أخذ ذهبك مثل ماقلتي وطمع في فلوس أمك لكن راعي مبادئ حتى مارضي إنه يطلعك على حساب غيره إحمدي الله أختي فغيرك مو ملاقي سكن وكل هذا زوج ماشاء الله راعي مشاعر ويحترمك والذليل إنت قلتيه تحملي عشانه مسكين ولا تنسيه من دعواتك ثم إن الفرج قريب والله قادر على كل شئ عليك بالكلمة الطيبة وباللين والإبتسامة والدلع وهو راح يقدر ويطلعك بإذن الله لكن اللي لازم تعرفي هو إن الرجال يعرفو يتصرفو في البيزات عكسنا إحنى يوم نشوف الراتب نزل نقول خلاص اليوم أشتري وباجر أسوي لكن الرجال لا قبل لا ينزل يكون مخطط ووين يوديه
فكري ولا تستعجلي وتجنبي أخواته ولا تبينين لهم غنك طالعة أو تبي تطلعي حتى مايضغطو عليه ويتنازل على إن ياخذ لك شقة غنت إبتسمي وسوي روحك فرحانة وعادي بس زوجك كلميه بلطف وغيري عليه الكدر وإبتسمي في وجهه وإن شاء الله تشوفين الخير وحاولي تقوليله يوم تكون برع البيت أحس و أتمنى تكون عندي شقة بروحي لكن يوم تكون جمبي ما أفكر في شي غير وجودك أنت بيتي ومسكني ومن هنا كوني ذكية ودخلي كلامك بسلاسة وإفتحي الموضوع بعفوية وخلاص ويارب ييسر أموركم وتطلعو عما قريب بس لا تنسي تخبرينا أو تعزمينا على بيتك الجديد الله يفتحها عليكم يارب

[أم سعد123]

اختي بقولج بصراحه اذا بعدتي عن ريلج ممكن بكرة يخون لانه محتاج للحب والحنان

ليش تحرمينه منج عشان الفلووس

مافيها شي نطري كم شهر لين مالله يفرجها


حرام جذيه تضغطين عليه

واذا شرا تلفون يديد يمكن بخاطره ترا اهو من حقه بعد يستانس

اختي عيشي حيااتج بمرها وحلواتها

ترا مافيه شي كامل

والصبر مفتاح الفرج



فكري يوم قالك بشتريلك مثله والله حز في خاطري مسكين حتى ماتتحسرين حاول يرضيك بكلمة أشتريه لك غرضي زوجك ولا تبتعدي عليه ترا تندمي بعدين الرجال يبي حنان وحب مايبي المرة تكون ضاغطة عليه وصححي غلطتك برسالة تحرك فيه المشاعر فكري أختي فكري فيه ألف وحدة تنتظر مثل زوجك لا ضيعيه من إيدك والرجال حتى لو كان فقير غن ماكان يلاقي حنان فزوجته يروح يتزوج له وحدة ثانية تسد هالحنان وهالحب اللي فاقده ورح تقولين ماعنده شي يفتح فيه بيت فكيف إثنين أقول لك بدل مايروح للحرام يشوف له بنت ناس تحبه ويتزوجها وتصبر معاه على الحلو والمر فكري في هالسطر الأخير لا تبتعدي على زوجك أبدا ودلليه ودلعيه أكثر من الازم ولا تكدري عليه ووالله إن زوجك طيب جدا

[عروسة ابراهيم]

والله مابعرف شو صرلي وانا عم أقرأ مشكلتك صعبة وحاسة فيكي وبنفس الوقت حسيت بزوجك صبرتي وقت طويل أصبري كمان شوي ولاتحسسيه أنه شخصيتك ضعيفة كملة بتاخدك وكلمة بترجعك الله يفرج كربتك ويهدي زوجك وان شاء الله بتلاقي بيت مناسب ...

[اللؤلؤه السوداء]

اختي الله يعينك بصراحه حاسه فيج وعارفه شلون ضروري السكن لزوجه وخصوصا ان في بيبي جاي بالطريق
انا نصيحي لج ان تحكمي عقلج وحاولي تمسكين العصا من النص ولا تسمحين لزوجك يضيع البيزات على اشياء فاضيه ما ضيع ال600 دينار
فادا نزلت لكم الالف دينار قعدي وياه واتفقي شنو بتسوون فيها.... مثل ما انا سويت 250 دينار له حق يتصرف فيها و250 لج و500 دينار للشقه .... مو معقوله الف دينار لكاميرا
هو الحين مو حاس ان البيبي يبغي له مكان ويبغي يلعب وياخد راحته وادا عندج غرفه وين بتقدرين تخلينه يلعب وبعد الطامه ان حمامج بره مثل ما فهمت
واسلوب الزعل وان انتي بتروحين بيت اهلج لحد ما يفهم مع احترامي لج بس هالشي ما ينفع وبتدخلين الاهل في مشاكلكم المشكله ممكن تنحل بينكم بدون تدخل احد لا اهله ولا اهلج ...
وبعد لا تجيبين سالفه ان تبيعين ذهبج وهو عنده لا تعودينه على هالاسلوب
والله يوفقج خيوو وطمنينا عليج