مشكلتي المؤرقة

[NISSAN]

السلام عليكم ,,

انا ترددت ايد قبل لا اطرح مشكلتي وانتي تردي علي وتفيدني بنصايحج ..

بس بالاخير تشجعت وقلت لازم اطرحها لج يمكن اقدر استفيد من نصايحج واشوف انا صح او غلط ..

انا مخطوبة وكلها كم شهر وراح اتزوج بس مشكلتي تكمن في اني وايد افكر ودايما ابليس يعلب بعقلي وافكار توديني وتجيبني ..

دايما افكر اقول شكلي اني تسرعت بالخطوبة وافكر اني انفصل عن خطيبي ليش لاني انظر لفوق شوي ,,

يعني مثلا انا دارسة وجامعية وهو مو مكمل دراسته ولا درس بالجامعة ,,فأفكر انه هو مو من مستواي او مايناسبني ,,

اشوف بنات كل وحدة ماخذة واحد دارس ومن مستواها وانا اقعد اتحسف اني وافقت عليه ..

ساعات اقول يمكن هذا نصيبي رب العالمين كاتبه لي ورب العالمين مايسوي شي الا الي يكون بصالح العبد .. والعبد عمره مايعرف مصلحته ..

احيانا افكر لو اني انفصلت عنه يمكن يجيني واحد احسن منه ومن الي انا اتمناه يعني مثلا دارس وعنده منصب وششغل زين ..

ساعات افكر اقول لا انا بأمكاني اوقف وياه واساعده واخليه يكمل دراسته ويخلص وبعدين يصير عنده منصب وشغل وشهادة ..

اوهو خطيبي ما شاء الله يحبني ويموت فيني والي ابيه يجيبه لي وطيب وحنون ومو مقصر علي بشي حتى لو يقصر على نفسه بس مايقصر علي ..

انا والله ياختي في حيرة مادري هل اني اتخذ خطوبة لقدام او للوراء ..

نصحيني .. شوري علي الله يخليج ..

انا بانتظار ردج

[ساعة غروب]

انا من رايي تتعوذين من ابليس وتركين عنج هالافكار اللي راح تخسرج اشياء حلوة في حياتج

شوفي الحياة مو بالشهادات ياما ناس عنهم شهادة الدكتوراه لكن اسلوب في الحياة ما عندهم لباقة في الكلام والتصرف ما عندهم

بعدين انتي صح من حقج وكل واحد فينا يطمح انه يكون شيء حلو في هالدنيا او يرتبط بشخص له منصب وشاه ووجاهة اجتماعية بس والله ثم والله هذا كله ما يجيب ذرة من السعادة

حمدي الله على انه عطاج زوج يحبج ويدور رضاج غيرج مو حاصل له

الله يوفقج ويبعدج عن الشيطان وشركه