ابي حريتي

[desert_girl]

السلام عليكم ,,

انا متزوجه من 3 سنوات وشوي وعندي طفله رضيعه مشكلتي اني حاسه اني مو متزوجه
السبب سكني مع اهل زوجي زوجي وحيد اهله عنده 3 اخوات اعمارهم تقريبا في بداية
الثلاثينيات ومش متزوجات
طبعا لما خطبوني قالت والدته ماراح تسكن معانا راح يكون لها سكن مستقل فيها وهالشئ
فرحني كثييييير لاني انسانه خجوله واحب الاستقلاليه والحريه ومن كثر ماكانت تهمني الاستقلاليه
كنت اقول لو زوجي خيرني بين السكن في بيت مستقل او حفلة العرس او شهر العسل اكيد كنت
بختار السكن المستقل فترة الخطوبه اوهمني زوجي انه يدور على شقه وانا كنت اسأله عن السكن

يقول انا ادور لما قرب العرس قالي احنا بنسكن بيت اهلي لمدة 3 شهور وبعدين بننقل في شقه
لان الشقه المطلوبه بيخليها المؤجر قريب انا صدقته ومن شده خجلي ما فاتحته في الموضوع
عشان ما يفتكرني تضايقت من اهله ومرت سنه كامله وبعدين فاتحته قال احنا مرتاحين وايش
المشكله واحنا ماعندنا اطفال قلت له وحريتي انا من حقي تكون لي مملكه خاصه فيني
مثل ماوعدتونا انت واهلك قالي يصير خير ولما احاول افتح الموضوع كان يتوتر ويتنرفز
جدا لانه ماعنده رد انا كنت ابكي واتضايق كثير

اهله محترمين واحسهم لازمين حدودهم ويحاولون يكونون سطحيين معاي جدا عشان مايخسرون
اخوهم والام كذلك الا انها في بعض الاحيان تصدر منها تصرفات بدافع الغيره

في السنه الثانيه من زواجي حملت ومابغيت ازعج نفسي بالموضوع بس مااقدرت قالي انا ودي ابني في الحديقه الخلفيه لبيتنا ملحق نعيش فيه طبعا هو قرر هالشي بنفسه انا تنازلت في
سبيل يكون لي سكن لحالي ولما ولدت وصار عمر بنتي 6 شهور فاتحته من جديد قالي اصبري
وانتي ليه متغيره وايش اللي زاعجك احنا مرتاحين

طبعا هو اذا صحا الصباح راح فطر عند والدته واسمعها تقوله حبيبي ايش تبغى اعملك ع الغدا يقول
لها كذا وكذا طبعا تستناه عند باب الصاله تستقبله وانا جالسه زي الضيفه لما نتغدى تجيه
حبيبي عجبتك الاكله اللي سويتها لك طبعا انا كاني حيطه

مع العلم اني ساكنه بس في غرفه نوم فقط وزجي ماشاء الله مقتدر يعني اخواته مدلعات يلبسون
الماراكات والألماسات بس للأسف شخصيته سلبيه اقول له ماتحب يكون لنا مكان لحالنا عشان اطبخ لك الاكلات اللي تحبها يقول لي يصير خير قريب راح نبني وانا عارفه انه يسكتني عذره انا
مشغول بالعمل هو يشتغل عمل خاص مع والده لكن مايمشي له راتب ولا يدخر شي للمستقبل
يقول وقت ما ابغى اسحب من رصيد العمل اللي هو عام لعيلته كلها

طبعا معلوماتي عن دخل عمله الشهري صفر مستحيل يقول
زوجي عمره 37 يعني مش صغير بس للأسف مايفكر فينا يفكر كيف يشتغل لاهله وبس

هو يعاملني بما يرضي الله لكن انا بديت اختنق وحاسه ان هالشي اثر حتى على علاقتي معاه
حتى اهله بدو يلاحظون علي ويسألونه شفيها حزينه ايش السبب وهو يرد عليهم ويقول يمكن
تعبانه

انا من تزوجت وانا سجينه مع العلم اني متعلمه وعندي بكالوريوس ادب انجليزي عمري 26وطموحه لكن كل شي حلو مات فيني

فكرت ادخل اهلي في الموضوع بس مابي اكبر السالفه وقلت اصبر لكني بديت اتعب

ارجووووج ابي حل ؟؟

[ساعة غروب]

هلا اختي

تعرفين شنو اللي فيك ؟؟؟

انتي سجينة كلمة اهل زوجك ووعدهم لك بالسكن المستقل

تبين رايي بس لا تزعلين

زوجك بما انه وحيدهم فمتعود على الدلع واعتماده على اهله مثل ما هم يعتمدون عليه يعني المصلحة متبادله بينهم وانتي ليش جذي ليش ما تشاركينهم في المطبخ في الحوار في كل شي وهذي فرصتك انتي زوجة ولدهم الوحيد استغلي الفرصة ومادامهم طيبين مثل ما تقولين عنهم خلج على طول مع امه روحي معاها المطبخ واسئليها عن الاكلات اللي تهم زوجك وحاولي تعمليها له باشرافها حاولي تغيرين من شخصيتك معاهم خلك مرحة وصدقيني راح تكسبينهم من اول شي روحي مع اخواته للسوق ومع امه بعد

ريحي اعصابك وخلي اهتمامك بطفلتك ومادام اهله مو مضايقينك ليش تدفعون ايجار شقة او بيت خلي الافلوس تنفعك وتنفع بنتك وخلي عنج سجنك بالوعود اللي صار لها 3 سنوات وما تحققت ولا بتتحقق لو بعد 10 سنوات الا اذا حدثت معجزة الاهية

الله يوفقك