بنات دبي وبوظبي بسرعة..عندكن ضيوف

[جبال وسهول]

خواتي سمعت أنه بنات دبي وبوظبي عندهن أفكار حلوة للضيوف

سواء في تقديم الطعام أو أتيكيت الضيافة

مثلا البعض يستخدم طاولات الطعام

والبعض يسوي خدمة فنادق وبوفيه

والبعض يتفنن في طريقة عرض الطعام

ويحطون طاولات صغيرة لحفلات الشاي (العصر)

اسعفونا بأفكاركن :cool:

نريد نسوي ملف حول الضيافة وأتيكيتها وأفكار حلوة إلها:)

[عوشةالمهيري]

الصراحة فكرة رهيبة في تنظيم الحفلات:D ممكن احط صور

[جبال وسهول]

تسلمين أختي

اذا عندج صور حلو بعد

وياليت كل وحدة تخبرنا شو تسوي لما يكون عندها ضيوف

[جبال وسهول]

أنا مثلا

أعطي الضيوف عصير في البداية

وممكن قهوة

وأجلس أنا أو خواتي معاهم إلين ما يجهز الطعام ( الغداء أو العشاء) في غرفة الطعام

وبعدين نطلب منهن يروحن على الغرفة الطعام

في هذه الأثناء نحط الحلويات والسويت في الميلس

أثناء الغداء أو العشاء تكون راعية البيت إهيه اللي تقدم الأكل للضيوف
وتقربه لهم

وغالبا ما تكون المائدة فيها أطباق كبيرة توجد فيها الأصناف

والضيوف أو راعية البيت يحطون الأكل في صحون

يالله كل وحدة تخبرنا شو تسوي؟؟؟؟

[جبال وسهول]

وأيضا بخصوص العوده والدخونه والعطوره

في ناس تحب تحط الدخون في البداية وفي ناس في الأخر

كل وحدة تخبرنا متى يحطون للناس العوده

[ذوق]

مثل ماقالن البنات.....
اول مايدخلون الضيوف..طبعا بعد السلام شوي ونقهويهم وفواله حاره(عصيد,بلاليط, خبيصه,...) هذا اذا الضيوف الي من سن امهاتنا:D
اما اذا بنات شابات...عصييير فرش مشكل وكيك و حلويات ويتقدمن في طريقه حلوه وممكن اذا عندج عربه صغيره الي للحلويات اتحطين عليها الكيك والحلويات فوق والرف التحتي القهوه والشاي او العصاير... بعدها دق سوالف ;)
اذا في عشا يكون في غرفه ثانيه يترتب فيه كل شي...
بعد العشا يدخنون الضيوف... في ناس ادخن الضيوف اول مايون يعني بعد القهوه وبعد العشا .....:D

[ذوق]

لاتقولون يعني الحريم الكبار مالهن رب ياكلن كيك وحلويات لا كله ينفع عادي;)

[عوشةالمهيري]

الصراحة احنا اول مايون العرب انرحب فيهم


وبعدين نصب لهم القهوة والشاي

وعقب المدخن

وبعدين الفولة طبعا:D

[دنياي عذابي]

هلا خواتي
اذا كانت العزيمه بسيطه نرحب بالضيوف
المدخن والعطور
وعقب العصير والقهوه والجاي على عسب ضيوف (البعض يعدمها على شكل عربانه
وعقب العشا ..
وبعده الحلو ..

اذا كانت العزيمه كبيره وضيوف وايد افضل بوفيه اسهل ويسد

اما اذا كانوا الضيوف وقت العصر ..
اسوي طاولات الي في ميلس واحط عليها مفارش ونيب صحونالبوفيه ونحط الاشياء الخفيفه مثل الفطاير وبيتزا (وقت العصر) ونحط في صحون وتكون في مجلس نفسه هب في غرفة طعام لانه وقت العصر (خفايف)
وطبعا العصير ..وصراحه افضل كوكتيل

[جبال وسهول]

تسلمون خواتي على المشاركة


البقية ..هاه عندكن أفكار ؟؟؟


يالله خبرونا عنها

:up:

[ست الدلال]

موضوع جميل جدا

شوفي

أول شي نرحب بالضيوف بالقهوة مع حلويات التمر في الميلس

أما الدخون فأفضله في الآخر علشان يطيب ريحة ثيابهم بعد الأكل

وعلى قولة المثل الشعبي (بعد العود ما فيه قعود )

بعدين نعطيهم عصير

وبعدين نخليهم يتفضلون على طاولة الطعام ( الوجبة الرئيسية ) وتكون في غرفة ثانية

أثناء هالفترة نزهب السويت في الميلس

بعدين لما يقعدون في الميلس


يكون السويت في الطاولة الرئيسية اللي وسط القنفات


بعدين نييب الطاولات الصغار جدام كل وحدة أو ثنتين من الضيوف على حسب

ونحط جدامهن مجموعة منوعة من كل صنف

وجييييييييي


وإذا تذكرت أفكار ثانية بخبركن

:smile:

[دائما عروس]

السلام عليكم
موضوع حلو وايد وبينفعنا ...
من ناحيتي عندي التقديم ينقسم لقسمين ...
قسم للضيوف المتعوده عليهم
وقسم للضيوف الي يزورونا بين فتره لفتره يعني زوار رسميين
***
لو الضيوف هم اقربنا وصديقاتي واهلي ...
ابدا بالعصير ...
بعدها الشاي والقهوه واحطهم بصينيه مرتبه ...والفاكهه والحلويات بصينيه ثانيه وخلاص ...ممكن ادخنهم وممكن لا على حسب وقت الزياره
***
الرسميين ...والي هم يزورونا باوقات معينه وفي المناسبات ...تكون لهم معامله خاصه ...واطباق خاصه واكواب خاصه ومن ناحيتي افضل الفضيات لانه فيه اشكال وصحون تقدرين توزعين كذا صنف بصحن واحد ...
الضيافه
ابدا معهم بالماي
وبعدها العصير ...
وبعدها الحلويات والمعجنات وانواع من حلويات التمور ...مع الشاي والقهوه او النسكافيه ...
اخر شئ اقدم لهم الفاكهه وتكون عباره عن سلطه وموزعه كلن بطبق يعني لكل ضيفه صحنها ...
وابخر الضيوف واعطرهم قبل لايطلعون بوقت ...مب تباخروا ومع السلامه :)
***
وسلامتكم

[جبال وسهول]

مشكورات خواتي ست الدلال ودائما عروس


البقية بانتظار آرائكن

:up:

[بداري]

شوفوو حبايبى :shy:أول شى أستقبل ضيوفى فى الميلس وبعدين أقدمالعصاير وبعض الحلويات بس ما أكثر منها وايد عشان ما يشبعون وهذا كله محطوط على عربه مخصصه للاكل والشى الاهم انى أحط العطور الفرنسيه عشان يتعطرون منها بس مب وايد:confused::confused::D2وبعدين نسولف لين وقت العشا ونسير للغرفه الثانيه الى هى غرفة الطعام وطبعا كل شي مزهبتنه من قبل المفارش والورد الطبيعى ,والاكل طبعا وبعد ما يخلصون ننتقل للغرفه الثالثه الى هى الغرفه التراثيه هاى الله يسلمكم غرفه فيها تكى وسياده يعنى مثل مال أول وطبعا صينيه القهوه والشاى والعود والبخور ودهن العود فى المقدمه وها شو رايكم فى ضيافتى :shy::shy::shy::shy::shy::shy:

[جبال وسهول]

ما شاء الله عليج يا بداري

عجبتني سالفة الغرفة التراثية :up: