ابي مساعدتكم في هالمشكلة

[ملكة الذوق]

مرحبا
أنا و 2 من صديقاتي بدينا مشروع صغير وهو عمل تغليف وتصميم الهدايا وتوزيعات للمواليد والاعراس والمناسبات وجذي....
المهم احس عندنا مشكلة وهي ان احنا نبي طريقة ننتشر فيها بسرعة
احنا شاركنا مرة بيوم مفتوح بمدرسة ومرة بحفل تخرج والحمدلله لقينا الاقبال من الناس وبيومها كانت بضاعتنا الاكثر مبيعا طبعا بشهادة المشرفات والموجودين ووزعنا اعلانات وكروت بس للأسف مو زايد تجينا طلبات مع ان كل اللي يشوفون الشغل يعجبهم ويمدحون فيه انه نظيف ومرتب وان أفكارنا جديدة وجذي
سؤالي هل في أحد من الاخوات صادفتها هالمشكلة وكيف تغلبت عليها؟؟
ساعدونا يعطيكم العافية نبي الشغل يمشي
والله يوفق الجميع يارب

[طوق البنفسج*]

الاعلان أهم شي في المشروع التجاري....حطوا اعلان في الوسيط...سووا بروشورات فيها صور نماذج من شغلكم..وزعوها في الاماكن اللي ممكن تنطلبون منها(معرض عرايس-قسم مراجعه الحمل في العيادات الخاصة(ماظني الحكومي يوافقون)-مدراس البنات والجامعات خصوصاً للي في السنة النهائية)
وادفعي نسبة للمكان اللي بتحطين فيه الاعلان(العيادات) أو البنت اللي بتوزع بروشوركم على صديقاتها.

حطي ميزانية كبيرة للاعلان وبتعوضينها من الشغل اللي بييج.

[fire lily]

اختي هالشي طبيعي بدايه المشروع لان الناس لين الحين ماتعودوا عليكم


لان الكل بيروح للمكان المتعودعليه


وشغلكم طبيعته الزباين ما يحتاجونه كل يوم او كل اسبوع يعني لازم تحاوون تجرون زباين دايميين كثر ما تقدرون

وتسوون خصومات للزباين الي دايما يجون عشان يتشجعون ويستمرون ويجيبون حد لكم


اذا عرفتوا زبونه مثلا وكانت من النوع الكشيخ والي تأثر فالناس وحسيتوها اجتماعيه,, سوا لها خصم خاص وقولوا لها اي حد يجي من هلج او معارفج بس يقولنا انه من طرفج احنا على طول بنسوي له خصم ( بس طعا خلوا خمها خاص شوييي احسن عن اهلها) وهالطريقه بتحس انه محها وبتاخذ رجلها وبتجيب الي حواليها

اتمنى تستفيدن من هالشي وتبشريني

بالتوفيق اختي

[ملكة الذوق]

تسلمون خواتي طوق البنفسج وfire lily على ردودكم الكريمة وانشالله خير احنا سوينا حمله اعلانية في بداية شغلنا وانشالله الحين ناوين على حملة ثانية وبقول لصاحباتي عن أفكاركم
ودعواتكم