دراسة مشروع جديد

[xpink_frreakx]

:welcometo3roos:

هاي حلوات كيفكم؟
حبيت اخذ نصايحكم بمروش ابي اسويه
اولا انا ادرس بجامعه بالشارقه وانا وكثير بنات ماعندنا سياره ولا وسيله نقل ومواصلات
وغالبا نستخدم تكاسي
وبصراحه مره غالي علينا لان اغلب الوقت نطلع دبي ومجمعات بعيده ويحسب علينا كثير والله
ولان الحراسه شديده شوي وماتدخل سيارات غريبه فقررت اني أأجر سياره لمده شهر و اجيب سواقه امراه وباسعار حلوة وبنفس الوقت ويكون امان اكثر للبنات ولاني طالبه عندهم راح ادخل سياراتي بسهوله
وراح يكون كاشتراكات شهريه يعني 700 مثلا و50 خصم اذا جابت طالبه ثانيه ولكل طالبه طلعتين يوميا يعني احس مره رخيص كانها بتدفع 175 بالاسبوع
بس مو عارفه كيف اجذب البنات يعني كيف اسوي دعايات ولافيه شيء بعد لازم اسويه؟
وثانيا احس ان هالعرض بيكون احس للموظفات او طالبات مدارس او شيء بس مااعرف وين اسوي دعايه؟
طبعا زي ماتدرون ان راتب سواقه بالقليل 2000 وايجار سياره حلوة شبه جديده كثير
واذا تعرفون مكان كويس اخذ السيياره منه بليييز محتاجه مساعدتكم مره حايسه بهالموضوع
تحسونه مشروع كويس ولا لا ولو عندكم نصايح بليز علموني
وشكرا مقدما :)

[‏احلى من العسل]

تقدرين تاخذين سياره من معارض السيارت وممكن تحصلين بسعر مناسب

[مجرد سرااب]

ترا هالمشروع وايد ناجح و زين ^^

موفقه يا قلبي

[xpink_frreakx]

مشكووورة يعطيكم العافيه

بس انا ماعندي مبلغ اشتري سياره من معرض
اتمنى فيه ايجار المنتهي بتمليك

والمشروع حلو يعني كذا زي الي قلته اوكي ومافيه اضافات؟
وكيف اسعاري احس جدا مناسبه ووين اسوي الدعايات والقى زباين من برى لاني ماراح ابدأ فيه الا اذا جمعت 10 مشتركات بالقليل عشان احمي نفسي من الخسارة

[مجرد سرااب]

اعتقد ان الاعلان في الجريده بيكون ممتاز على اساس الكل يقراه

وعلى هالاساس يتصلون فيج :)

وهذا مجرد اقتراح و اتمنى ان الاخوات يفيدونج ان شاء الله

لان و الله حتى احنا في قطر كل اعتمادنا على الليموزينات في الرايحه و الجايه @_@

[‏احلى من العسل]

تاجير السيارات ما ينفع احسن تشترين سياره

ممكن عن طريق النت تسوين دعايه

واذا ممكن تعطيني رقمج عشان اسويلج دعايه

موفقه ان شاء الله

[العنزية1400]

جيبي سياره كبيره علشان يمكن توصلين عوائل

[xpink_frreakx]

هلا خواتي مشكورة عالرود
بس ماعندي فلوس شراء :( يعني يمكن ااجر اول لين مااجمع واشتري
ومااعرف اي نوع سياره اخذ

[أم حمد الغايب]

فكره طيبه حبوبه وبالتوفيق فيها ..بس نصيحه جمعي وطلعي سياره لو مستعمله بس تكون نضيفه وبعدين ابدي المشروع لانه الايجار غالي وصعب غير البترول وراتب السائق يعني انتي ما استفدتي شي ولاسمح الله لو صار حادث او شي بتكون الخسائر أكثر ..ويفضل تاخذين سياره فورويل أو باص صغير لانه مجمعات الجامعات كبير وممكن وايد بنات يطلعون معاج فاذا كانت السياره صغيره ماراح تكفي ..وعن الاعلانات اعملي اعلان على ورقه وخذي تصريح من الجامعه بانك تحطيه في سكن الطالبات وكم ركن من الجامعه واعملي اعلان في النت والجريده في اعلانات مجانيه وبكذا تكوني غطيتي جانب كبير للترويج عن المشروع ولاتكتفين بجامعتكم بس اعلني في التقنيه وغيره وطبعا يبيلج تصاريح وغيرها بس احس الامور ميسره ..ونصيحه لاتخليا لسياره بدون مخفي عشان البنات ياخذون راحتهم وما يتعرضون لاي مضايقات لانج انتي بتتحملين المسؤوليه مع اهالي البنات وغير كذا تكون في مواعيد محدده لطلعه والرجعه ولاماكن محدده عشان البنات ماياخذون راحتهم وايد ..في امور كثيره لازم تنتبهين لها غير والله يوفقج.

[xpink_frreakx]

يعطيك الف عافيه اختي افكار حلوة مشكورة :)

[&&طيف المساء&&]

لله يوفقك

[xpink_frreakx]

الجميع ان شاءالله :)

[ام سارووووووه]

فكره حلوه بس اهم شئ تكون السياره تأمينها شامل على شان لاقدر الله حدث شئ تتحملها الشركه

[xpink_frreakx]

مشكورة حبيبتي

الي تبي تشاركني بالنصف بهالمشروع ترسلي عالخاص

[رسيس الليل]

مشروع ناجح 100%100
الله يوفقك