بسم الله الرحمن الرحيم ♡ ~
في البداية : الحمدلله حمداً طيباً مباركاً فيه .. كما ينبغي لجلال وجهه وعظيم سلطانه امابعد:
يشرفني يكون اول موضوع لي بالمنتدى ولن اطيل الحديث ولاكن وراء كل نجاح سلسلة طويله من الفشل
حبيت اعرض تجربه لي مع النجاح في بعض امور الحياة اتمنى تفيدكم
بداية من دخلت الثانوي تغيرت حياتي نوعاً اصبحت كبيره في نظر اهلي ماكنت احب الدراسه وكنت كثيرة الغياب .
اولى ثانوي الجميل فيها كنت داخله تحفيظ وعلى بداية التزام ولله الحمد
مرت هذيك السنه ونجحت بنسبة 89٪ بأقل جهد الحمدلله ماصادفتني مشاكل غير اني انخطبت ولاتم الموضوع ولاكنت ابي الزواج
ثاني ثانوي :
البداية الفعلية لاختبار الحياة
في النصف الاول ع الاختبارات النهائية مرض ابوي وكاد يفارق الحياة لولا فضل الله ثم الدعاء كنت ازوره وارجع اذاكر وبالاختبارات افكر فيه تفاجئت بنسبتي بعد ماطلع ابوي الا هي 79٪ وتراكمي !! ابد مو مستواي ضاعت بعض احلامي الدراسية وتحطمت ماعدت اداوم وجتني فترة تعبت من الضغط وصار دايم هابط عندي .. الترم الثاني كان عندي هدف ارفع النسبه والحمدلله رفعتها لـ 80٪ وحطيت في بالي وقتها { لن يوقع قرار في الارض الا بأمر من السماء فعلق قلبك بمن في السماء تخضع لك قلوب من في الارض }
اذا الله كاتب ادخل جامعه بدخل غصصب
ثالث ثانوي :
المحك الحقيقي لي .. اجتهدت في الفصل الاول وحاولت اجيب نسبه وكانت درجاتي حلوة الا بالرياضيات كنت شاطره فيه بس !!
المهم الفصل الاول جبت 85 وقلت الحمدلله مع ان مو على اجتهادي بس رضيت وسلمت امري لله
خفت من القدرات والتحصيلي والنسب المركبه ! كان حلم ابوي ومازال اني ادخل الجامعه واصير دكتورة .. وانا اقول ان شاء الله يبه !!! وامي تضحك علي انا وابوي تقول طول السنه غايبه وتبيها تصير دكتورة !
المهم الفصل الثاني من ثالث زادت الابتلاءات .. حصل لي ظرف ان احد اهلي فقدناه في ظروف سفر غامضه .. كنت متعلقه فيه جدا ماعاد صرت اداوم من الهم واهلي تعبوا من بعده استمر الحال شهرين وانا اتعذر للمعلمات واغيب عن الاختبارات وكانو يقولون مستحيل نعطيك مشاركه كامله وهم يدعون لي ولاهلي .. الحمدلله عدت المشكله على خير بعد فترة شهور ورجع هالشخص جاء بعدها اختبار القدرات جبت فالاثنين نفس الدرجه 76 وكانت اعلى درجه ع مستوى فصلي حتى الدفره ماجابوها واستغربوا مني ..ماشاء الله لاني رحت مكه ودعيت ( يارب ارفع قدري وقدراتي ) .
بعد كذا قربت الاختبارات النهائية وازداد خوفي كيف انقبل بالجامعه ونسبتي كذا ! بليلة اول اختبار جتنا اختي الكبيره اخر الليل زعلانه من زوجها وصارت مشكله كبيرهه ؟
قعدت اهدي فيه بما اني اختها اللي اصغر منها ،، زاد الهم ع قلبي ورحت اول اختبار الحمدلله اديت اللي عندي ومرت الاختبارات وجا اخر ايوم بالثانوي وانا .... ما ادري وين مصيري ! بس مازال الامل كبير بالله
بعد كذا اختبار التحصيلي الحمدلله حليت فيه ع التوفيق والحظ وذاكرت ما استطعت
ما اطول عليكم
طلعت النتايج كلها
ونسبي كلها جيده جدا ماشاء الله
ما كانت ممتاز .. لاكن كانت تستحق القبول
قدمت ع الجامعات وانا ع اعصابي
وقدمت على منح الصندوق الخيري لان والدي متقاعد
والان الحمدلله استعد لدراسة قسم من اقسام الطب
ما كنت احلم بيوم من الايام اني ادخله
شي مثل الحلم . وصديقاتي نسبهم فوق 95٪ ماقبلوهم بالطب !
وطلع اسمي بجامعة نورة التحضيرية ماعدا الطب لاكن مارسلت ملفي
حبيت ادخل طب ع حساب المنحه المجانية
بعد كذا رجع المفقود واختي رجعت بيتها .. التم الشمل
وتخرجت .. وانقبلت بمجال اللي يحلم فيه ابوي ♡ ~
علقوا اموركم بالله .. ورتبوا امنياتكم
كونوا على امل بالان الاشياء الجمييله وان تأخرت سوف تأتي
ما حبيت اوصف الالم اكثر من الامل
قصه اختصرتها هي حكاية تعب 3 سنين
ثلاث وصايا ذهبيه لكل طالبه او غيرها عندها مشكله او شي
1 : قيام الليل
2: الاستغفار
3 : حسن الظن بالله في جميع الاحوال
وان الله اذا اعطى ادهش انتي بس اطلبيه
والله المستحيل يصبح سهل جدا
اي سؤال انا حاظرة .. يسعدني اي تعليق منكم
دعواتكم بالتوفيق بدراستي الجامعية
وباذن الله بالموضوع الجاي احكي لكم قصة خطوبتي اللي كتب ربي لي فيها الفرج مشابهه لقصة دراستي
تحياتي ♡ ~ ♥♥♥
رد مع اقتباس
