o( تـجربتي الكــاملة مع تدريب الحمام )o

[non0_non0]

السلام عليكم الى جميع امهات عروس
قبل ما ابدي هذه الموضوع من تعبي و تجربتي الشخصية .. فقط لـ افيد باقي الامهات

طبعــا موضوع تدريب الحمام او الخلاص من الحفاظه موضوع طويل و فيه مليون سؤال و علامة استفهام لدى بعض الامهات ..
انا فكرت اكتب تجربتي لان بحثت في النت طويلا و مابقى موضوع في كل المنتديات ماقريته ..

و اخـــــيرا اجه اليوم اللي قررت اتخلص من الحفاظة.. و من احط شي ابالي خلااااص بسويه يعني بسوية.. تجربتي طولت اسبوعين بالتمام و الكمال .. وبعد هالاسبوعين بنتي صارت تدخل الحمام صبح و ليل و الحفاضه خلاص نسيناها .. :worn_out:.. للعلم بنتي لما علمتها كان عمرها سنتين و نص





بسم الله نبدا
عزيزتي الام .. لما تقررين تبدين مرحلة تدريب الحمام .. اول خطوة لازم تروحين للسوق و تشترين المستلزمات و اللي هي ... :

قيصرية او نونية او قعاده اللي تسمونها.. و الافضل من النوع اللي فيه موسيقى :rolleyes:




العاب و هداية رخيصه جدا .. فقط للتشجيع و لسقات تشجيع او ستيكرز :thumbs_up:




الملابس الداخلية من النوع الرخيص (في حالات الطوارئ يفضل رمي الملابس الداخلية):hysterical:




Changing mat ... اللي يستعملونها عشان يغيرون الحفاظه.. استعمال واحد



فيه من بامبرز تكون فيها 12 قطعة و سعرها مناسب .. :biggrin:




فيه شي اهم من كل شي .. هو الصبر و طولة البال .. رح تجيكي ساعات تقولين ببطل خلاص .. اياكي ثم اياكي. هذه الطريق لا يوجد فيه رجعه (دخول الحمام مش زي خروجو.. توكلي على الله سبحان و تعالى و ابدي و فكري كلها اسبوعين و بترتاحين من شي اسمه حفاظه..


التــكملة في الرد الثاني.. ارجو عدم الرد الى عند اكتمال الموضوع ..



اختـــكم
نورة

[non0_non0]

رجعنــــالكم ..


قبل ماتبلشين بالموضوع.. لازم يكون فكرج و بالج مع الطفل فقط.. يعني اذا كان اي شي يمنعج من اهتمامج بالطفل اربعه و عشرين ساعه خلاص اجلي الموضوع البعدين.. 8o|
انا بالنسبه الي اشوف نجاح هالموضوع يعتمد اعتماد تام على مدى اهتمام الام للطفل خلال هالمرحلة.. اذا مو اربعه و عشرين ساعه عينج عليه مستحيل تقدرين تكملين المشوار بسلام.. :thumbs_up:

خبري زوجكي او يور هازبند بالموضوع و قوليله هاليومين اعذرني رح اكون مشغوله دائما و اذا جعت فيه شي اسمه مطاعم ;)



اجه اليوم الموعود..
حطي طفلك او طفلتك المدلله و سولفي معاها و قولي لها ماما حبيبتي انتي صرتي كبيره و خلاص الحفاضه للبيبيات .. و نزعيها الحفاضه و قولي لها بااااي .. و اهلا و سهلا للملابس الداخلية..
قولي لها صرتي مثل ماما تلبسين خلاص.. رح تفرح بالبداية و ترحب بالموضوع .. (عبالها لعبه):worn_out:


ملاحظة:
فيه شي يسمونه pull ups .. او الكارثه و الخطا الكبير..


اياكي ثم اياكي تستعملين هذه المخلوق العجيب.. لاني جربتها في اليوم الثالث و خرب علي تعب يومين كاملة .. و رجعت للصفر .. افهمها هذه ملابس داخليه تقول لا ماما هاي حفاظه.. و مافهمت الموضوع .. :mad:


اول ثلاث او اربع ايام تقدرين تستعملينه او تستعملين الحفاظه العادية في الليل فقططططط.. ماكو اي مشكلة الخيار لك .. طول ما الطفل فاتح عيونه لازم مايكون لابس حفاظة.. هالنقطة فهمتوها عدل؟؟ ^o)


بديت اول يوم و نزعتها الحفاظة و قلت لها خلاص انتي بتسوين (وي وي و بوبو ) بالحمام الجديد مالتج..
فرحت البنت و رحبت بالفكرة كـ انها لعبة ..

اول يوم صعب جدا جدا.. رح تاخذين الطفل كل نص ساعه للحمام . و طبعا ماراح يسوي شي .. و بسسس تطلعين من الحمام على طول بيسويها.. و هنا يجي دور الجينج مات اللي يغيرون عليها الحفاظ .. وين مايجلس الطفل خلال فترة التعليم . لازم يقعد على هاي .. لا تقوليله عشان البول .. قوليله هاي عشان الارض وسخه و بحطها تحتك .. كنت اخليها جوا بنتي لما تلعب و لما تاكل و ماكنت اخليها تمشي و تلعب كثير.. كنت العب معاها و احنه قاعدين.. و فرغت لها مو طبيعي ..

اول يوم مو طبيعي تشوفين طفلك اغبى المخلوقات الارضية.. تقولين معقوله كل نص ساعه اوديه و مايسوي شي .. بس طولي بالك عزيزتي.. لا تستعجلين .. عطيه وقته لان شي صعب..
كان يمشي و يسويها.. الحين تبين يمسكها و يسويها وقت ماانتي تبين.. مايصير!!:-o


اول يوم الحوادث وصلت اكثر من ثمان مرات.. و على الساعه تسعه خلاص لبستها الحفاظه و نامت


يوم ثاني كان عندها حضانه.. اول الصبح نزعتها الحفاظه و لبستها الملابس الداخلية و كلمتها طبعا الكلام مهم كل شوي لازم تذكرين الطفل ان هو كبر و و و و

بالسيارة حطيت تحتها جينج مات .. عشان اذا صار حادث ماتسوي على كراسي السيارة


و الساعه وحده رحت اخذها من الحضانه.. و قالولي انها سوت اربع حوادث ثلاثه صغار و وحده كبييرة .. نومبر تو :| .. طبعا تحطمت .. بس صبرت:-#

و رجعنا للبيت بعد نفس الحاله الحوادث وصلت اربعه


ثالث يوم نفس الحالة .. بس يوم الثالث سوت نومبر تو بالحمام و فرحت و عطيتها هديه..
لانها جربتها كم مره و شافتها تقرف .. قالت استعمل الحمام احسن.. :thumbs_up:

يوم الرابع خلاص صارت تسوي كل النومبر تو بالحمام.. و هنا انا فرحت اخر فرحة خلاص انتهيت من مرحلة.. صارت كل مره تبي تسوي تقول.. بس البوله للحين مامسيطره عليها .. :badly:

يوم الخامس و السادس الحوادث قلت بكثير .. بس صارت تحصر نفسها .. ماتسويها لا بالملابس و لا بالحمام و بدا يصير عندها امساك .. :thumbs_down:

خلصنا اسبوع و الحالة تقريبا احسن بشوي .. الحوادث قلت و قامت تسالني لما تبي تروح الحمام .. مرات تسوي مرات لا .. :confused:

بكمل لكم الاسبوع الثاني بالرد الثاني.. شكرا لمتابعتكم :L:

[non0_non0]

الاسبوع الثاني بنتي صارت كثيييييييير احسن... هذه كله بفضل القعاده او القيصرية اللي فيها موسيقى..
انا بـ اول اسبوع كنت استعمل النونية (القيصرية) العادية .. بس بحثت بالنت و شفت ان اللي بالموسيقى احسن.. و رحت على طول و جبتها .. و كانت هدية من السماء..

هي الفكرة انها لما تتبلل او يجي عليها ماء رح تطلع موسيقى .. فهمت بنتي قلت لها كل مره تسوين شي رح تطلع موسيقى.. هي فرحت و كل شوي تروح.. قامت هي بروحها تنزع ملابسها و تقعد عليها وتحاول تسوي شي .. هالقعاده هاي فد شي فضيييييع ساعدتني بشكل مو طبيعي..



في اليوم الـ 11 .. قلت بجرب اطلع معاها و بشوف .. لبستها حفاظه طبعا للاحتياط..
ماطولت يمكن ساعتين و رجعت و هناك سألتها كم مره قالت مافيني شي..
و لما رجعنا للبيت تفاجاة ان الحفاظة فااااضيه و ناااشفه .. و على طول ركضت بنتي للقيصرية مالتها بسرعه و سوت بوله طووووويلة.. كانت محصورة حبيبتي و ماسكتها..

طبعا نسيت اقول لكم .. من بداية الاسبوع الثاني و بنتي صارت تقعد من النوم و الحفاضه ناشفه مية بالمية .. و تقعد محصورة .. خلاص صارت تعرف كيف تمسك نفسها..



في اليوم الـ 12 .. طلعت للسوق و طولت .. و كل شوي كنت اسالها و لما انحصرت سألتني و اخذتها و سوت عادي مثل البنات الكبار فديتها..


من يوم الـ 10 خلاص ماكان عندنا حوادث ابد .. بس قلت بتاكد منها هاليومين و خلاص بشيل الحفاظه بالليل بعد مره وحده..


الموضوع كله طول معاي 12 يوم .. و اهم نقطة كانت اني على طول اراقبها و اهتم لها .. كنت بس اخليها بروحها تسويها..

السالفة يبيها طولة بال.. لا تتعبين و لا تضوجين و اندعي و صلي ..

و لما كملت اسبوعين خلاص شلت حفاظة الليل .. و من يوم يومها ماسوتها لا بالنهار و لا بالليل..




و بعد شهر تقريبا قالت خلاص ماحب القعاده (النونية) او القيصرية.. و صارت تستعمل الحمام العادي مثلنه ..



و بعد ست اشهر تقريبا صارت ماتسالني.. تروح بروحها تقعد تسوي و تناديني اغسلها ..
و لا تنسون تعلموهم بالعناية الشخصية و غسل اليدين بعد كل زيارة للحمام ..

شكرا لمتابعتكم .. و اي سؤال بخصوص اي موضوع انا حاضرة اجاوب عليه.. و اتمنى تكون لهجتي او لغتي مفهومه للكل.. حاولت اخلط من كل لهجه عشان الكل يفهمني..


و ارجع و اقول لكم الموضوع من تجربتي الخاصه .. و مو منقول و لا حرف من اللي كتبته .. مجهود شخصي و اتمنى عند النقل للافاده انكم تذكرون ولو اسم منتدى عروس ..


اتمنى اكون افدتكم بتجربتي .. و شكرا لكم




اختكم
نــــورة

[samah1]

:adore::adore::adore::adore::adore::adore:

ماشاء الله عليك حبيبتي، تجربة ناجحة جدا وراح اطبقها مع بنيتي بس هلا لساتها صغيرة شوي سنتين بس ان شاء الله راح ارجع لموضوعك:L:


F:
:L::L::L::L::L::L:
F:

[abeek o ma2behum]

ماشاء الله تبارك الرحمن
موضوع طويل وشيق عجبتني الصور
محليه الموضوع
تدرين انا توني ادري بالاختراع الي يطلع موسيقى ؟!!

عندنا في البحرين هاي الشي لاني اول مره اسمع عنننه
حلوة فكرته وايد واحس انها تشجع البيبي ان يروح يسويها فالحمام كانه سحر اذا صار في ماي بيطلع موسيقى

بخصوص ال Changing mat هاي اذا استعملناه حق البيبي وما سوه شي عليه
خلاص انقطه ؟ ولا عادي يستعمل اكثر من مره ؟

[om lucas]

تجربة حلوة وموفقة حفظتها سطر سطر وانشاء الله اطبقها على ابني بس يكبر مشكوووووورة لانك افديتنا بتجرتك الحلوة
والله يخليكي بنتك ويكومج بل سلامة

[الملكة سـ]

يعطيج العافية حبيبتي
وتشوفين الحلوة عروس
انا بعد نفس طريقتج تقريباً سويتها مع ولدي بس ولدي الله يحفظه
عمره سنتين والحمدلله احين يروح الحمام طبعاً اللي شجعه انه يشوف
اخته تروح الحمام فكان يبي يسوي مثلها فااخذتها فرصة ودربته
الله يحفظهم من كل شر

[non0_non0]

:adore::adore::adore::adore::adore::adore:

ماشاء الله عليك حبيبتي، تجربة ناجحة جدا وراح اطبقها مع بنيتي بس هلا لساتها صغيرة شوي سنتين بس ان شاء الله راح ارجع لموضوعك:L:


F:
:L::L::L::L::L::L:
F:

اسعدني مرورك حبيبتي و تقدرين ترجعين بأي وقت و اي سؤال لا تترددين ..
مشكورة

[non0_non0]

ماشاء الله تبارك الرحمن
موضوع طويل وشيق عجبتني الصور
محليه الموضوع
تدرين انا توني ادري بالاختراع الي يطلع موسيقى ؟!!

عندنا في البحرين هاي الشي لاني اول مره اسمع عنننه
حلوة فكرته وايد واحس انها تشجع البيبي ان يروح يسويها فالحمام كانه سحر اذا صار في ماي بيطلع موسيقى

بخصوص ال Changing mat هاي اذا استعملناه حق البيبي وما سوه شي عليه
خلاص انقطه ؟ ولا عادي يستعمل اكثر من مره ؟

حبيبتي الاختراع هذه ابو الموسيقى نسيت اقول لكم موضوع في Toysrus
و صدقيني هو اللي سهل علي الموضوع ..

الجينج مات هاي ضرورية حبيبتي و انا علمت كم صديقة لي لان ماكانو يعرفونها
لا طبعا تستعمليها مره ثانيه عادي.. هيه تكون فيها طبقة رقيقه و كأنها قطن ينام عليها الطفل و اذا سوا شي مستحيل يوصل للارض .. و اذا ما سوا شي عادي تطبقينها و تستعمليها كم مره لين ماتصير خلاص قديمة او الطفل يسوي عليها شي ..

اتمنى تولدين بالسلامة .. و دائما في بالي و اندعيلج .. :L:

[non0_non0]

تجربة حلوة وموفقة حفظتها سطر سطر وانشاء الله اطبقها على ابني بس يكبر مشكوووووورة لانك افديتنا بتجرتك الحلوة
والله يخليكي بنتك ويكومج بل سلامة

تسلمين على المرور و الف شكر لج على احلى دعوات ..
و الله يخليلك ابنك و يكبر و تعلمينه و يصير عريس :cool:

[non0_non0]

يعطيج العافية حبيبتي
وتشوفين الحلوة عروس
انا بعد نفس طريقتج تقريباً سويتها مع ولدي بس ولدي الله يحفظه
عمره سنتين والحمدلله احين يروح الحمام طبعاً اللي شجعه انه يشوف
اخته تروح الحمام فكان يبي يسوي مثلها فااخذتها فرصة ودربته
الله يحفظهم من كل شر

الله يعافيكي حبيبتي
الله يخليه و يحفظة و تشوفينه عريس
اكيد الطفل الثاني يتعلم من الاول .. :thumbs_up: .. الله يخليهم لج الاثنين يارب و يحفظهم لج
و يحفظج لهم .. .F:

[Ms.Sugar]

موضوع فعلا رووعه

راح استفيد منه اكيييد مقرره اعلم ولدي بس يصير سنتين

وعجبتني الي تطلع مسيقى ان شاء الله احصلهاا

[non0_non0]

موضوع فعلا رووعه

راح استفيد منه اكيييد مقرره اعلم ولدي بس يصير سنتين

وعجبتني الي تطلع مسيقى ان شاء الله احصلهاا

حبيبتي و انا هذه قصدي.. انكم تستفيدون من تجربتي الشخصية
ان شاءالله تحصلينها :thumbs_up:
تسلمين على المرور الجميل

[مغتربة سدني]

والله تجربتك رائعة و مفيدة للامهات
حفظتها عندي في المفضلة

[non0_non0]

والله تجربتك رائعة و مفيدة للامهات
حفظتها عندي في المفضلة

يشرفني مرورك حبيبتي
F: