المشاركة الأصلية كتبت بواسطة Daisy Ash
و عليكم السلام و رحمة الله و بركاته...
مبروووك عليج القطوة الجديدة... يا حبي لهم يجننون...
أنا كان عندي قطو شيرازي أسود و عيونه برتقالية يخرع ههههههههه بس يجنن، اسمه ميجي
المهم، الله يعينج يبيلها عناية و طولة بال... أول شي بسألج، لما شريتيها عطوج شهادة ميلاد لها أو لا!
و سألتي إذا عطوها التطعيمات أو لا!
إذا ما عندج هالمعلومات، خذيها لطبيب بيطري يفحصها و قولي له يعلمج شلون تنظفينها... هي تلحس نفسها لأنها تبي تنظف نفسها، لكن في نفس الوقت هي تبلع شعر بالحركة هذي، فأنتي لازم تشترين لها مشط خاص و تمشطينها بعكس إتجاه نمو الشعر عشان تشيلين الشعر الزايد، بحيث إذا لحست نفسها ما تبلع شعر كثير، لأنه يسبب لها تلبك معوي! و حتى لكم انتوا، لأن الشعر يتطاير و يتلزق بالملابس و بالأثاث و احتمال يسبب لكم حساسية صدر!
و مثل ما قالت الأخت قبلي، ضروري تنظفين أذانيها و تقصين أظافرها، بصراحة أنا و لا مرة نظفت أذنه كان الدكتور ينظفها، بس كنت أقص أظافره...
حطيها بحضنج و أمسكي يدها و اضغطي على قوائمها، اللي مكان الكف عندنا
طبعاً اضغطي بشويش و بتطلع الأظافر برا، قصي الطرف الأبيض بس! انتبهي تقصين عند اللون الوردي من الظفر لأنه يطلع دم و يألمها!
بس أحسن لج تخلين الدكتور يعلمج الطريقة...
بالنسبة للأكل، لما تجوع بتعرفين، تصير تماوي كثير و تتلزق فيج، و في السوبر ماركت قسم كامل لأكل القطاوة حسب أعمارهم، خذي لها اللي يناسب عمرها...
و عطيها تشرب ماي، أنا قريت إن الحليب مو زين لهم فما كنت أعطيه، بس انتي اسألي الدكتور عن نوعية الأكل و الشراب اللي تقدرين تعطينها...
أما قضاء الحاجة، القطاوة نظيفين كثير، و مستحيل يسوونها بأي مكان، لازم تراب و يدفنون وراهم! تلقين في السوبر ماركت كيس ورقي كبير مكتوب عليه litter sand اللي هو الرمل الخاص فيهم... و تجيبين طشت تخصصينه لها أو تشترين من محل بيع أغراض الحيوانات صندوق اسمه litter box، تفرغين فيه كيس الرمل و تحطينه بمكان معين بالبيت، و هي إذا تبي تقضي حاجتها بتصير تحاول تحفر في الأرض، فانتي وديها عند هالصندوق و ابتعدي عنها... طبعاً مرة أو مرتين بتصير هي تعرف المكان لحالها...
ميزة هذا النوع من الرمل إن الفضلات ما تنتشر فيه، يعني لو قضت حاجتها بتصير مكانها كتلة رمل، فاللي عليح تسوينه تجيبين مجرفة صغيرة و تتخلصين من هالكتلة عشان ما تطلع روايح...
أما شلون تشيلينها هذي سهلة، حطي ذراعج اليمين تحت قوائمها الأمامية، و ذراعج اليسار مرريها تحت قوائمها الخلفية بحيث تثنينها و ضميها لصدرج عشان ما تتفلت منج... لأنج لو حاولتي تشيلينها غلط راح تنحاش!
و السبوح، اشتري لها شامبو خاص، عاد انتي و حظج! أنا القطو حقي كان يكره السبوح و تصير حرب لما نجي نسبحه... بس إن شاء الله تصير قطوتج مسالمة مع الماي... أنا أصب عليه ماي دافي و افركه بالشامبو و بعدين أغسله عنه، و ألفه بفوطة و أفركه زين عشان ينشف، و أحياناً إذا كان برد أنشفه بالسيشوار
ترى القطاوة يحبون الألعاب... جيبي لها كور ناعمة، إسفنج أو قماش و خليها تتعارك معاها
هذا اللي جا في بالي... و إن شاء الله معلوماتي كافية و مفيدة...
موفقة إن شاء الله F: