قصة ولادتي الحلوة بصراحة وابد ما كانت قصة رعب لاني ما كنت مستعدة لها بالمرة وتوقعت بعده وقت على الولادة ولا كنت حتى قريت شنو بيصير او اي شي عنه ، كنت اقول بس اخلص من التوزيعات و بقرا شوية من الموسوعة اللي عندي عن الولادة و عوارضها
طبعا دشيت التاسع واني كنت تعبانة من الشغل ، يعني من نهاية السابع بدا عليي التعب العدل ، شغل من الصبح لليل ، يعني لاخر يوم قبل الولادة كانوا بيودوني تقييم بس الله رحمني و صرت تعبانة فترة و الدكتورة نصحتني بالراحة ، ولا قدرت اجهز التوزيعات لانه صادف بنفس فترة عاشوراء والزحمة على الطلعة والروحة و توزيعاتي لازم اسويها قبل ولادتي بجم يوم بس (لانها كانت نبات البامبو والمفروض اولد على 9 فبراير) و طبعا أول اسبوعين من التاسع ظليت كله مراجعات المستشفى لان البيبي ما كانت تتحرك مع اني كنت اقول لهم اني احس فيها تتحرك بس الله يهداها بنتي من يخلون الجهاز ما تتحرك بالمرة واضطروا يرقدوني ليوم علشان الاطمئنان والجهاز كله عليي ، يوم جيت بروح اكمل الا صادف وفاة عم زوجي بيوم السبت 24 يناير ، و طبعا ما قدرت اروح ولا اجي ، و بيوم الاحد كان عندنا مجلس العزاء ، واني قاعدة بالماتم كنت احس بشي من الالم ولما كنت اقول لحماتي لانها جالسة صوبي ، تقول ليي هذي من القعدة والتعب وما اعتقد انج بتولدين ، طبعا ما قدرت اكمل المجلس و طلعت و رحت بيت عمي ارتحت و انبطحت ، لما خلصوا المجلس ، طبعا الكل رجع على البيت الكبير (بيت من كذا عايلة ومنها بيت عمي ) و شافوني بنات عم زوجي الا يقولون ليي شكلج ولادة ، بنسوي لج بخور وما ادري شنو علشان يعجل الطلق لو كان مو طلق كاذب ، قلت لهم لاااااااااا ما ابغي اولد الحين (يعني حتى ما رحت امشي ولا سويت اي شي يعجل الولادة ) و بروح البيت و برتاح و بصير زينة ، طبعا رحت البيت وعلى طول قمت اجهز اموري ، لاني كنت مخليتهم كلهم بالشنطة بس رجعت وتاكدت من كل الامور و كان باقي عليي بس التوزيعات وطبعا ديكور المستشفى فقلت بلحق على عمري لان باقي ليي اسبوعين على الولادة ، بنفس ا ليوم العصر كان عندي مراجعة عند دكتورة موزة بالعسكري ، كانت تقول ليي بدخلش لولادة ، اقول لها اني الالم اللي اجا اليوم الصبح عادي وما ابغي اولد الحين وعند زوجي مجلس عزا لعمه ، تقول خلاص متى بيخلص المجلس ، تجين بيوم الثلاثاء بالليل و بيوم الاربعاء نخلي عليج طلق صناعي لان حملش ما كان طبيعي وما ابغي اجازف فيش الى ما يجي لج طلق طبيعي و تتعبين
بنفس الليلة رحت المحل (الانوار) علشان اخذ نبات البامبو و كنت قايلة لزوجي مو رايحة العسكري ولا شي و بترك الشي بامر الله رب العالمين متى اولد ابغي طبيعي ولا ابغي طلق صناعي
طبعا المفروض وحدة من حمواتي بتساعدني بالتوزيعات (وبدينا بتوزيعات الاطفال بيوم الجمعة ) بس صارت حالة الوفاة وما قدرت فاتصلت لاختي تجي ليي بيوم الاثنين علشان نبدأ بالتوزيعات وطبعا اختي هي تشتغل وما قدرت تجي الا على الساعة 3 و شي الظهر ، بوقت الصبح بنفس اليوم (الاثنين)، ما رحت مجلس العزاء لان كنت احس بشوية الالام و تذكرت ان الدكتورة موزة قالت ليي لازم تسجلين كل مرة يجي لج فيها الالم علشان اشوف لو كان طلق طبيعي ، ومن الساعة 10 و شي الصبح الى وقت جيت اختي كان عندي ورق صوبي و اسجل فيها وطبعا اللي اتذكره ما كان الالم بشكل منتظم و مخربط
لما جت اختي ، هي كانت تشتغل بشي واني بشي ثاني و كانت قاعدة قبالي بنت اختي المسكينة تساعدني هي طبعا بعمر 15 سنة بذاك الوقت ، وكنت اقول لها كل ما اطالعش يجي ليي الالم ، قومي سوي لج شغلة ثانية خخخخخ ، طبعا المسكينة خليتها تروح على الكمبيوتر لاني كنت مجهزة كل شي بس عليها التنسيق لبطاقة التوزيع ، و الالم طبعا ما راح ، بس كان تحجج مني ، لما رجعت و بتساعدني بلف البامبو ، كنت اقول لها الالم كله منش ، الا اختي تقول ليي ويش قاعدة تسوين (اكتب بالورقة)، وكان الوقت على ال 5 العصر ، اقول لها اسجل الالم كل جم يجي ، تقول قومي بسرعة اتسبحي واخذي دوش لو كان طلق بيزيد عليش ، تقول الحين كل جم يجي ، اقول لها كل 7او 8 دقايق الا تقول بسرعة الحين قومي واتصلت لزوجي و قالت له يجي لاني على وشك ولادة وهي قامت تجهز باقي الامور اللي تحتاجينها على ما اخذت دوش ، و كنت اقول لها ما رحت الصالون احف ولا شلت شيرة الا تقول مو مهم اهم شي ، سويتي الشي اللي قلت لج عنه خخخخخخ ، طبعا اي على السريع وعلى ما اجا زوجي خذت الموسوعة و اقول لها بقرا على السريع اعراض الولادة ، قامت تضحك عليي وتقول اي موسوعة ، اني خبرة ب3 عيال وانتي على وشك ولادة ، و جا زوجي مع الصدمة الكبرى عمتي ام زوجي معاه وكان على الساعة 6 و شي يمكن ، طلعنا من البيت واني اتالم حدي ولا نطقت بولا كلمة بالطريق لاني كنت مستحية من عمتي ، والطريق بهذا الوقت زحمة و زوجي يبغي يطير بينا وعمتي تقول بعده وقت لا تستعجل عليها واني اقول له اتصلت العسكري وما عندهم غرف خاصة وودني التخصصي ، وصلنا المستشفى على خير و قرابة الساعة بالطريق ، طبعا زوجي مر على السلمانية الا اقول له مووووووو اهني خخخخخ ، عمتي تقول ويه عيل وين بتولدين خخخخخ ، زوجي يقول ادري باخذ الطريق هذا عن الزحمة ، ما وصلنا المستشفى التخصصي الا اني خلاااااااااص ، نزلنا و على الطوارئ و ودوني للفحص بالغرفة فوق ، الا تقول ليي الدكتورة كل جم كان يجي لج الالم اقول لها كل 5-6 دقايق بالسيارة والحين ما فيني شي لما وصلت ، تقول بخلي عليج الجهاز علشان اشوف الطلق الا ما فيه ولا شي وخلته 20 دقيقة ورجعت تركته 20 دقيقة ثانية الا تقول مو منتظم عندج و بكتب لج خروج و لما تحسين بالالم عدل تعالي مرة ثانية المستشفى ، طبعا لما قلت لها اني ساكنة بسار و يبعد مسافة عن المستشفى قالت ليي روحي بيت الوالدة او بيت عمتش لانهم اقرب للمستشفى (بالمنامة) ، استانست حدي لان ناوية اروح الصالون بيوم ثاني الصبح و ديكور المستشفى ااكد عليه من المحل لاني اخترته بس ما سويت التوصية ، توني بس قايمة البس عبايتي ، الا كيس الماي ينفتح و ما كنت عارفة ويش اسوي ، قلت لزوجي بروح البيت و بسرعة بشوف الصالون الليلة و سوي باقي الامور انت باجر ، طبعا كنت معتمدة اني بمشي ، يوم جت الممرضة الا تقول خلااااااااااااص انتي ما تمشين من المستشفى لان تبطل كيس الماي ، جتني الصيحة وقتها ، اقول لزوجي بنتك جت بغير موعدها و في تاريخ مو حلوووووووو خخخخخخخخ و باقي عليي اشياء اسويها اوردور والحالة حالة ، طبعا زوجي راح اخذ عمتي على البيت و رجع و بقى معاي ، بهذا الوقت جت اختي و عيالها المستشفى والمسكين ولد اختي كسرت خاطره ، يقول جايب لج خالو شاورما واني ابغي اضحك بس الالم واصل حده وكانت على ال 10 تقريبا وكان كلحين الاتصالات من الاهل و زوجي قال لهم بالتفصيل ويش يصير حتى شنو اكلت من المستشفى (سندويش جبن) و كلششششششش مو قادرة من الالم ، المهم بعد ما مشوا ظل زوجي معاي بالغرفة مو راضي يمشي ، على الساعة 12 كنت اقول له خلااااااااااص اني بموت من الالم وهذا الاوكسجين ما يسوي شي والمسكين عيونه تغرغر و يقول يعني ويش بيدي اسوي انا ، كنت اتالم حدي بس يهون عليي كل شي لما اتذكر اي كثر هو حساس ، يعني الحمد لله ما صرخت ولا كسرت ولا اي شي ، الممرضة كانت تجي و تقول قومي امشي علشان الطلق يصير اسرع واني بموتتتتتتتتتتتت من الالم ، المهم ما صارت الساعة 12 الا اقول نادوا الدكتورة ابغي ابرة الطلق اللي تخفف الالم والحمد لله قتلت الالم كله وما حسيت الا بالقليل خخخخخخخخخخخ الى الساعة 3 تقريبا يوم شالوها عني علشان الولادة مايصير احس باثار الابرة (يعني 3 ساعات افتكيت من حدة الطلق خخخخخخخ)
وطبعا لما قالوا لزوجي الحين بنوديها علشان الابره ، ومن خلوها ليي بظهري الا اشوف زوجي مغمى عليه خخخخخخخخ ، ما قدرت على الموقف كل ما اتذكره افطس من الضحك ، طبعا الممرضة والدكتورة قالوا له يمشي و يجي على الصبح لان الى الساعة 8 ما راح اولد
وما جت الساعة 3 ونص الا اقول لهم اتصلوا له الحين الحين لاني اتالم حدي ، و جت الدكتورة المناوبة والا تقول انتي خلاص متوسعة 7 سنتي واصريت على الممرضة تتصل كلحين ، تقول خلاص اتصلت وما بتولدين الا الصبح ، رجعت و قلت لها اتصلي مرة ثانية ابغيه يجي، طبعا زوجي مشى من المستشفى على ال 2 تقريبا و ما لحق وصل بيتهم و سبح الا اتصلوا له و رجع بيجي ، وطبعا عمتي ربي يخليها اجت معاه ، وولدت بالسلامة الحمد لله على الساعة 5 و ثلث ، بوقت اذان الصبح بالضبط ونورت الكتكوتة الدنيا
طبعا زوجي كان وياي بغرفة الولادة وعمتي كانت وراء الستارة ، كنت اسمعها تقرا قران وادعية واني بطول الوقت واني بالطلق والولادة دعيت التسهيل من رب العالمين واهل البيت
وما صارت الساعة 6 الصبح الا اشوف اختي الثانية وبنتها (بحسبة بنتي هذي ) الا عندي بغرفة الولادة ، اقول لهم ويش اللي جابكم بهذا الوقت ، يقول زوجش ما ترك احد ما ارسل له مسج واتصل من الوناسة ولا جانا نوم وكلحين اتصالات للاطمئنان، وسمعنا صوت بنتش وهي تصيح وجينا على طول لان بنتي مو راضية الا تجي و تكون اول وحدة تشوف البيبي
خخخخخخخخ اما بمرحلة الطلق مع الالم ، كنت افكر بالتوزيعات والديكور و البطاقة والخ خخخخخخخخ يعني على قولة المثل "الناس في معمعة والعروس تبي رجل"
لما ولدت الصبح ما كان ليي مزاج انام بصراحة ، و ظليت على الاتصالات للاوردرات و كلحين ما اقوم اروح اشوف بنتي او اتصل لهم جيبوها (متخرعة وايد ) واتذكر ما نمت ذاك اليوم الا الساعة 11 وشي الليل
المسكين زوجي من المشاوير اللي سواها ، ما جا المستشفى بعد ما مشى الصبح على ال 9 تقريبا الا الساعة 5 العصر ، على المشاوير اللي بعضها من غير فايدة (لان ما حصلت مكان يسوي ليي ديكور المستشفى واعتمدت على عيال اختي الكبار بديكور الغرفة خخخخخخ) ، بس ناوية هالمرة اسوي كل شي بالثامن تحسبا لاي ظروف وهالمرة ناوية اجرب الطلق الى اخر مرحلة وما اقطع ساعات الالم :D
ووووووووووووايد طولت بالهذرة والقصة، بس ويش اسوي :o
اللي بيكون بكرية واول ولادة ، اهم شي لا تسمعني وايد بقصص الولادة والافلام وتوكلي على الله بكل شي والله يسهل ان شاء الله علينا اجمعين
