بنات فكرت في اننا بدل ما نكتب مشاكلنا مع الديكور وطلباتنا الخاصة في الركن اننا نخلي موضوع مثبت أي أخت عندها مشكلة معينة في الديكور أو طلب أو استفسار أواستشارة انها تكتب مشكلتها هنا وان شاء الله أنا أو الأخت الفاضلة ((( نور الهدى ))) والعضوات ما نقصر ونحاول نساعدها
ايش رايكم ؟؟؟
طبعا تقدرون تسألون أي شي عن الاثاث ، تصاميم ، اكسسوارات ، مشاكل البيت ( من ناحية الديكور )
يالله بانتظار ردودكم ومشاركاتكم ، اللي عندها شي تتفضل وان شاء الله مالها الا طيبة الخاطر
:clap: :clap: :clap: :clap:
فكره جدا حلوه اخت روومي
تسلمين علي هاالافكار الحلوه
وسبق وطرحت مشكلتي عند انتقالي الي شقه
وماشاالله عليج ساعدتيني وتقبلي مني كل الشكر
وانا بحاول اساعد من بعد اذنج اذا حد من العضوات عندهم مشكله بقدر ما اعرف
وتقبلي تحياتي
:smile:
مشكورة اختي الوردة الحزينة على سرعة التجاوب ومساعدتنا لبعضنا واجب على كل عضوة وعضو في المنتدى
على العموم انا قلت نخلي مشاكل الديكور كلها في ملف واحد عشان الكل يستفيد من تجارب الأعضاء وما يحتاج الوحدة تدور وين راح موضوعها الكل يدخل على نفس الملف ويلاقي مشاركته وحلها بأقرب وقت بأذن الله
تحياتي لك وللجميع
هلاااا بـ Roooomy سمعت انج بتزورينا يا هلاا ومرحبا فيج انا كتبت لج عن نفس المشكلة اللي اللحين باذكرها مع الاخت البحرينية بس ما اعرف وين الموضوع
على العموم عندي استفسار لأني لخبطت الدنيا صارت غرفة النوم ما اشتهي اشوفها:o أنا أحب اللون البطيخي ( الطوبي) صبغت الجدار به والموكيت بيج فاتح لحد اللحين ماشي ،،، أخترت الأثاث لون الخشب العادي مو الداكن العادي موديلها وايد حلو بس :eek2: تجري الرياح بما لا تشتهي السفن
اللون البطيخي أثر على الأثاث وصار لونه برتقالي يعني كلش م حلو ما ني شا سوي
نسيت اقول لك الستائر أخضر داكن من فوق السقف
يا الله حلي لي هاللغز بصراحة نفسيتي تعبانة بغيتها غرفة الأحلام صارت غرفة ؟؟؟؟؟؟؟
بــصـراحـــة يــا أخــواتـــي,,,,,,,,,,مــا تــقــصــرووووووون,,,,,,,,,
وجــزاكــن الله خــيــراً,,,,,,, وعــســاكــم عــلـى الــقــووووووة,,,,,,,
كاتب الرسالة الأصلية : RoOoOmy_M
تسلمي اختي نسيم البرايح على الكلام الحلو وأنا من الشرقية يعني دايما اجي عن طريق الجسر
طيب ايش رايك لو تغيرين الصبغ بطريقة بسيطة جدا وهي انك توصين على لون ثاني يعني غير درجة الأول وتسوين فيه حركة على الصبغ الأول طبعا لازم يكون من نفس النوع يعني لو لامع الثاني لامع ، لو مطفي الثاني مطفي وكذا
تقدرين تسوين حركة الاسفنجة
يعني كأنك راح تغيرين اللون القديم اللي راح يصير كأساس للون الجديد
وبكذا ماراح تخسرين الصبغ القديم وتجددين ديكورك
تحياتي لك
وتقدرين اختي بعد تغيرين من لون الجدار والصبغ عن طريق ورق الجدران
border تضيفينه في نصف الجدار أو بعد ترك مسافة ثلاثة ارباع من الأسفل بعدين الجزء الأسفل تسوينه بالطريقة اللي قلت لك عليها
وان شاء الله تنحل المشكلة
تحياتي لك
هذا واجبنا اختي
أحلى_عيون
ان شاء الله بس نقدر نساعد بعضنا
تحياتي لك
حبيبتي مشكوره على الموضوع الحلو
ابيج اتساعديني ..وبكون ممنونه
انه شريت الاثاث وابيج اتساعديني بألوان الموكيت والسجاد والستاير والجلسه العربيه
انه صبغت الشقه بيج فاتح كلها الصاله وغرفة النوم وغرفة الجلوس
الصاله شريت لها كراسي لونهم ابيض وخشبهم بني غامق جندل مثل القديم
شنو اخذ ستاير وموكيت وسجاد
غرفة النوم بنيه فاتحه مثل المحروقه وصايره مثل المعتقه صبغتها عندي مثل لونها مب عارفه انزل الصوره خساره جان شفتيها
نفس الشئ ...ستاير .....الخ
اما غرفة الجلوس بخلي فيها مكتبه للتلفزيون ومكتب للدراسه وهم من نوع ولون واحد للخشب اثنينهم بيج اخذتهم من هوم سنتر
وبخلي في هاذي الغرفه جلسه عربيه ومحتاره في لونها وموديلها
والستاير .....الخ
انه استشرت دكتوري مال الفن واقترح اني احصر نفسي في ثلاثة الوان في كل الشقه
لكل الغرفتين والصاله عشان ما تصير سلطه
ياريت تقترحين علي شنو الالوان الي اختارها حق كل غرفه وللصاله
كل وحده لون الستاير والموكيت والسجاد الي يكون قطع
شكرا
بصراحه فكره راااائعه يا عروس ركن الديكور وانا جدا بحاجه لها الان لاننا نأثث الان وابغى استشيركم
1/ ابغى تدلوني على محلات اللي تبيع سجاد (بساط) اللي شكله تراثي الوانه على احمر واسود صغير للمداخل بالبيت انا في الرياض لقيت مره عند محل يبيع اباجورات وتحف ومداخل بس مافي الا 2 ومحجوزه لناس ومايقدر يجيب منها حاليا
2/ ابغى بعد مداخل مرآة وطاوله تحتها بس فكرتها تكون حلوه وحجمها صغير
[COLOR=tomato]
تكفووووون السجاد اللي تعرف ترد علي بس لاتقولون القفاري ومحلات السجاد المعروفه لان هذي ماعندها الا صيني واشياء فخمه وانا ابغاها للمرات من الاشياء الجديده اللي الوانها باهته شوي كأنها قديمه[/COLOR]
السلام عليكم ورحمة الله وبركاته
مرحبا بالأخت الفاضلة رومى فكرة في غاية الروعة جداً رائعة
وأن شاء الله نقدر انحل جميع المشاكل
ولى عودة علشان انشوف مشاكل الأخوات
الله يعطيك الف عافيه
سلام
يعطيكم العافية أخواتنا المشرفات رومي ونور الهدى ..
وانا بصراحه عندي غرفتي الجديده قاعده احضر لها من شهرين من زود الحماس :cool2: لكن ما اعرف الافكار متضاربه في بعضها .....
انا ذوقي رومانسي جدااا واحب يكون في غرفتي ورود مجففه وشموع واحب الوان الغرفه تكون هااااادئة فكرت باللون البحري او التوتي الازرق وفكرت في اللون التفاحي .. وابقي رسومات على الحائط !!!!!
والاثاث طبعا مب كثير طاولة السرير وخزانة الملابس وطاولة المرآة ..
لكني للحين محتاره في شكل الغرفه بشكل عام لان وايد اشياء في بالي ولا اقدر اثبت على شيء .......
عطوني من افكاركم الحلوة .. ويكون شكلها رومانسي ....
وشكرااااااااااااااااااااا اااااااا:shy:
RoOoOmy_M ..حبيبتي ..... فكرة رائعة .. ومجهود أروع ...
حبيبتي .. نسيم البرايح...
كان المفروض تختارين الأثاث اللي لونه بني غامج فاهمه قصدي ( مثل لون الكاكاو ) .. لأنه يناسب لون الجدار ولون الستاير .. صح بتطلع الغرفة غامجة لكن أحلى .... ويكون شرشف السرير مثل قطعة الستارة ( فصليه عند محل الستاير .. بعد ماتختارين لج موديل إكون راقي وفخم ) .. وحطي بوردر ألوانه اتكون مثل لون الستارة .. وحطي قطع سجاد جامعة اللونين ( لون الستارة ولون الجدار ) وإذا ماحصلتي ممكن تاخذين قطع السجاد بلون الستاير ..وحطي تحف وديكورات واكسسوارات بلون الجدار ....
والحل لمشكلة لون السرير إنج تصبغينه ..والصبغ مابكلفج إنشالله .. سيري عند أي مصنع أثاث .. أو المحلات اللي إفصلون الأثاث واختاري اللون ..وبيطلع حلو إنشالله ...
وصح .. حطي كوشنز على السرير جامعة اللونين لون شرشف السرير اللي مثل الستارة ولون الجدار...
وإنشالله بكون أوكييييييييييي...
ايوت
العفو اختي هذا واجبنا
حبيت اهنيك على الأختيار الموفق على اختيار اللون البيج للصبغ لأن الألوان الترابية ( ألوان الأرض ) تعتبر من الألوان الأنيقة اللي ما تتغير مع تغير الموضات وتقدرين تختارين اثاثك واكسسواراتك بكل راحة مثلا ستاير الصالة اختاريها بالوان ترابية متدرجة واختاريها من الخامة اللي تعجبك
تقدرين تسوينها مشجرة بس طبعا تضيفين مخدات أو اكسسوارات وقطع سجاد تناسب لون التشجيرة
أو تشجيرة خفيفة
ايش رايك في هذا
الكراسي باللون الأبيض والحواف الخشبية الغامقة اختيار آخر موفق لك اختي ( ماشاء الله ذوقك كثير حلو ) اختاري مخدات غامقة شوي أو بدرجات البني والبيج
والسجاد نفس الشي بس قولي لي ايش لون الأرضية وهل هي فرش أو سيراميك عشان اقدر أقول لك بالنسبة للأكسسوارات اختاريها بألوان مناسبة ايضا ولامانع من اضافة اللون الذهبي يعني لو تبين تعلقين مناظر اختاري اطارات غامقة لو كان لون الصبغ بيج فاتح والعكس لو كان غامق واستخدمي اكسسوارات خشبية مثل الصناديق القديمة ( شوفي موضوعي - الديكورات الهندية - فيه امثلة على هالصناديق
وحصر اختياراتك في ثلاثة ألوان صحيح خاصة في الصالة وأماكن الأستقبال لأن كثر الألوان تسبب تشتت في النظر والواحد ما يقدر يميز الديكورات بس طبعا لكل قاعدة شواذ يعني أحيانا اختيار ألوان كثيرة يكون في مصلحة ديكورك مثلا أكثر من لون للجدار بس لون واحد للأثاث اختي اذكري لي نوع الأرضية وأي أسئلة ثانية أنا تحت أمرك
تحياتي لك
