دليلك لفستان الزفاف، وحسب شكل جسمك كمان

[amatalrahman237]

السلام عليكم ورحمة الله وبركاته

ازيكم يا بنات، هبدأ موضوعي بقصة صغيرة

كان يا مكان في بنوتة هتتخطب وكانت يا عيني وحيدة ملهاش اخوات بنات وماكانتش عارفة تعمل ايه ولا تتصرف ازاي في الفستان والميكب والطرحة والحاجات دي كلها ولانها مش فاهمة اي حاجة ولا حتى طبيعة نفسها اختارت الحاجات كلها بالبركة والحمدلله ربنا سترها معاها وطلع شكلها كويس

البنوتة دي طبعا هي اانا وانتي وانتي واحنا كلنا، وانا بدور دلوقتي عالنت على صور لفستان الفرح عشان انقي وما اتلخمش زي ما حصل في الخطوبة لقيت مجموعة حاجات متميزة اوي فحبيت اقولكم عليها وهي طبعا منقولة من مواقع اجنبية مش منتديات تانية يعني دة مجهودي الشخصي

عشان تكونوا عارفين احنا هنعمل ايه في الموضوع دة

اولا هنفهم مع بعض انواع الفساتين وايه اللي يليق مع اجسامنا بالصور وهنبتدي بأشكال الفساتين ثم اشكال الكمام و أخيرا أِشكال الرقبة

ثانيا لو كان في تشجيع وعجبتكم الفكرة هنزلكم شوية صور لفساتين بس الفساتين دي موجود ليها صور قريبة للتطريز والتفصيل ومن الظهر وكل حاجة

ثالثا بقى لو كان في تشجيع اكبر هنزل صور لفورمات الشعر والميكب واكسسوارات الفرح وكل حاجة احنا بندور عليها

[أم عبد الله 2]

طيب يأمورة الحقينا بحاجات حلوة كده أحسن أنا محتااااااااسة

[amatalrahman237]

هنبدأ اول حاجة باشكال الفساتين واللي يليق علينا منها

A-line

التصميم دة بيخلي الوسط ارفع وبيعرض منطقة الصدر. لو عندك منطقة الارداف اعرض من فوق ، دة هيكون انسب تصميم ليكي.

في نفس الوقت بيجذب الانتباه لمنطقة الصدر وبيخليها شبه مسطحة. بالتالي لو الصدر صغير يبقى لازم نحط الفستان يكون مبطن عند الصدر وطبعا دة مع البرا المناسبة.

Full Skirt or Ballerina Dress

التصميم دة بيفكرني بسندريللا ودة بيكون مناسب للي عندها منطقة الارداف رشيقة وصدر ممتلئ او كبير يعني عشان الجيبونة الكبيرة هتعمل توازن بين فوق وتحت وتديكي لوك السندريللا. ودة من اكتر التصميمات الرومانسية واللي مرتبطة بالفرح في ذهننا كلنا
من كلامنا اللي فات احنا لازم نتجنب الاستايل دة لو منطقة الصدر مش كبيرة عشان هو اصلا بيصغرها. كمان لو انتي صغنونة كدة وبسكوتة ابعدي خااااااااااالص عن الاختيار دة لانك هتختفي يا ماما جوة الفستان.
برضه لو منطقة الارداف كبيرة وعريضة عندك اجررررررررري علطول من ادامه عشان هو بيركز عليها

Column Dress

دة زي ما انتو شايفين كدة بيكون ماسك شوية عالجسم او نقدر نقول انه واخد تفصيلة الجسم وممكن يكون معمول من قماش عادي او ممكن نستخدم الشيفون فوقيه ويدينا اللوك الروماني
الاستايل دة بيكون مناسب جدا للبنت الطويلة الرشيقة وعلى فكرة هيليق اوي برضه مع البسكوتة الصغنونة
وزي مااحنا شايفين برضه ان الاستايل دة بيكون قريب اوي من الجسم فطبعا لو الارداف كبيرة دة ممكن يبينهم اكتر.
الاستايل دة محتاج جسم رشيق اوي يا بناااااااات

Empire Line Dress

ودة الاستايل اللي بيكون فيه تفصيلة على الصدر او تحته وبعد كدة بينزل علطول ومش بيحدد لا وسط ولا ارداف ودة هيكون رائع لو الوسط عريض والصدر صغير. كمان العرايس الصغننة هتبان اطول عشان الفستان هينزل علطول بعد الصدر وشكله بيكون رقيق ورومانسي اوي

وطبعا لو العروسة طويلة زي حالاتي كدة يبقى تشيل الاستايل دة من دماغها علطول عشان هيخليها اطول. كمان لو الصدر كبير يبقى بلاش منه عشان هيكبره اكتر.

Mermaid Dress

فستان عروسة البحر او ديل السمكة بيدي شكل جميل للبنت اللي جسمها متقسم بالبلدي كدة، يعني عندها صدر حلو وارداف متوسطة. الفستان دة هيخليكي زي مارلين مونرو.
بس مهم اوي قبل ما تشتري فستان زي دة انك تتاكدى انك قادرة تقعدي وتتحركي براحتك بيه. كمان لو جسمك مليان من تحت زي التفاحة او الكمترى ، الفستان دة هيظهره اكتر

البنت اللي معندهاش اي امكانيات خالص برضه مش ينفع تلبس الفستان دة خاااااااااااالص

بكدة انا خلصت اشكال الفساتين والمشاركة الجاية هكتبلكم اشكال الكمام وازاي نختار اللي يليق معانا بس لما اتاكد ان الموضوع عجبكم
ودلوقتي تصبحوا على خير يا حلوين:21_210::21_163::21_162::21_161:

[jessy2009]

جميل ياريت تكملي وتحطي فساتين من كل نوع يعني اشكال مختلفه من كل نوع
جزاكي الله كل خير

[رووفة]

ميرسي يا عسسسل

[nonastar]

حلوووووووووووووووووووين اوووووووووووووووووووووووو وووى

[عنوان الغلا]

ماشاء الله
كملي ياعسل

[Miss FaTi]

ماشاء الله مشاركتك جميلة وموضوع مهم

يلا بقى كملى اهم جزء لانى محتارة فية وهو الاكمام

ومتبخليش بالصور

[paradise rose]

جميل موضوعك ياريت تكمليه للاخر

[bosycat2008_562]

جميل قوى موضوعك ده بس ياخساره جيه متأخر قوى انا جبت الفستان خلاص بس الحمد لله كان معايا اختى واصحابى
وانا من ساعت الخطوبه وكنت عارفه ايه اللى يمشى معايا من انواع الفساتين وهو القطعتين المنفوش من تحت وانا جسمى متناسق معنديش ارداف كبيره هيا صغيره بس مش نحيفه ومنطقه الصدر عندى صغيره بردوا مش نحيفه مع البراه والكب بتاع الفستان مبطن وده احسن شكل عليا فى الفساتين

عقبال كل البنات ما تلاقى فساتين فرحها وتكون زى القمر والبدر المنور فى ليله زفافها

[amatalrahman237]

طيب يأمورة الحقينا بحاجات حلوة كده أحسن أنا محتااااااااسة

من عينيا يا أم عبدالله، نورتيني

جميل ياريت تكملي وتحطي فساتين من كل نوع يعني اشكال مختلفه من كل نوع
جزاكي الله كل خير

ماشي يا جيسي انتي تؤمري، حط من كل الانواع وبالصور(f)

ميرسي يا عسسسل

ميرسي ليكي يا رووفة

حلوووووووووووووووووووين اوووووووووووووووووووووووو وووى

ربنا يكرمك يا قمر(f)(f)

[يارب عفوك و رضاك]

موضوع جميل اوي.. تسلم ايدك .. يا ريت تكملي الأكمام كمان .. و تقوليلي بقى طب اللي عريضة من الأرداف و من الكتاف و الصدر وسط تعمل ايه .. يعني الطخينة بمعنى أصح تلبس ايييه !!!!

[amatalrahman237]

ماشاء الله
كملي ياعسل

هكمل يا الغلا كله

ماشاء الله مشاركتك جميلة وموضوع مهم

يلا بقى كملى اهم جزء لانى محتارة فية وهو الاكمام

ومتبخليش بالصور

المشاركة الجاية يا قمر وبالصور وهتلاقي اللي يعجبك ان شاء الله

جميل موضوعك ياريت تكمليه للاخر

مادام عاجبك يبقى هكمله، انا والله اول مرة اعمل موضوع بس عشان عارفة انه موضوع مهم لينا كلنا حطيته

جميل قوى موضوعك ده بس ياخساره جيه متأخر قوى انا جبت الفستان خلاص بس الحمد لله كان معايا اختى واصحابى
وانا من ساعت الخطوبه وكنت عارفه ايه اللى يمشى معايا من انواع الفساتين وهو القطعتين المنفوش من تحت وانا جسمى متناسق معنديش ارداف كبيره هيا صغيره بس مش نحيفه ومنطقه الصدر عندى صغيره بردوا مش نحيفه مع البراه والكب بتاع الفستان مبطن وده احسن شكل عليا فى الفساتين

عقبال كل البنات ما تلاقى فساتين فرحها وتكون زى القمر والبدر المنور فى ليله زفافها

ربنا يكرمك يا جميلة عالمشاركة الحلوة، بس مش خسارة ولا حاجة الحمدلله انك جبتي حاجتك وربنا يكملك على خير وابقي فيدي اختك واصحابك بقى واحنا معاهم(f)(f)

[amatalrahman237]

ميرسي اوي لكل البنات الامامير اللي ردوا عليا او دخلوا شافوا موضوعي وقيموني
انا هتكلم في المشاركة دي عن اشكال الكمام المتوفرة وصحيح في بنات كتير بتكون محجبة يعني الكم مداري بس هي ممكن تعمل شكل الكم والرقبة اللي تناسب جسمها وتلبس البادي تحتيه
احنا عندنا حوالي 3 انواع من الكمام

Long or Three-Quarter Sleeves

الكم الطويل او التلت كم ودة ممكن يكون جزء من الفستان او جاكيت او بوليرو زي الصورة هنا

ودة بيكون مناسب اوي لاي واحدة عايزة تجذب الانتباه للجزء العلوي منها زي في حالة لو عندك الارداف كبيرة مثلا. كمان الكمام الطويلة بتداري الايد لو تخينة مثلا او لو الاكتاف مربعة بس هنا لازم الكمام تكون ناعمة وواسعة مش ضيقة اوي ومفصلة الايد.


امتى بقى نبعد عن التصميم دة؟
لو شكل الدراعات حلو وانتي عايزة تبينيها. كمان لو انتي جسمك صغير الكمام الطويلة هتبين دراعك اطول من الحقيقة لدرجة انها ممكن تكون شكلها غير متناسق مع جسمك الرقيق.

Short Sleeves

الكمام القصيرة ممتازة لو انتي عايزة تغطي الاكتاف عندك، كمان لو انتي عندك شكل الكمترى ومحتاجة تدي الاكتاف شكل مربع شوية، ممكن تستخدمي البطانات بتاعة الاكتاف برضه
والموديل دة بيكون رائع لو انتي عايزة تبيني شكل دراعك. وعلى فكرة لو انتي طويلة وعملتي فستان حلو مع الاكمام القصيرة هتباني اقصر.



اما بقى لو الدراع كبيرة فهيكون احسن لو غطيناها بالاكمام الطويلة. كمان لو الاكتاف عريضة اوي عن تحت، الموديل دة هيظهرهم اكتر.

Spaghetti Straps

الحمالات الرفيعة اوي بيخلي شكل الرقبة جميل وبيقلل حجك الاكتاف العريضة. لو الصدر عرييض وكبير عندك اختاري الحمالات اعرض من كدة عشان الرفيعة هتبينهم اوي.
الموديل دة بيظهر جمال الدراع والاكتاف والرقبة. ومن اكتر الموديلات الجميلة والجذابة. خدي بالك انك تلبسي برا من غير حمالات عشان متبوظشي المنظر.


الموديل دة برضه مش مناسب للاكتاف العريضة والدراعات الكبيرة. الحمالات الرفيعة بتظهر شكل الرقبة وممكن نستخدم معاه عقد جميل عشان نكمل جمال الموديل.

بكدة انا خلصت اشكال الكمام والحمالات وفاضلنا نعرف اشكال الرقبة المناسبة لجسمنا.... محتاجة اعرف رايكم عشان اكمل او أوقف لو الوضوع مش مفيد
تقبلوا تحياتي

[amatalrahman237]

موضوع جميل اوي.. تسلم ايدك .. يا ريت تكملي الأكمام كمان .. و تقوليلي بقى طب اللي عريضة من الأرداف و من الكتاف و الصدر وسط تعمل ايه .. يعني الطخينة بمعنى أصح تلبس ايييه !!!!

ربنا يخليكي يا قمر، اديني نزلت الاكمام عشان خاطرك ودلوقتي هحضر شكل الرقبة والصدر كمان
وهنزل مجموعة فساتين للمليانين عشان خاطرك بس اهم حاجة في رايي انك تحبي جسمك وتثقي فيه(f)(f)