السلام عليكم ورحنة الله وبركاته
حبيت اليوم اعرض لكم مشكلتي مع أمي < لاتستغربون ايه مع أمي >
أمي إنسانه جداً طيبه وخجوله لدرجه ما احد يتوقعها والله يعني
تخيلو لوحده من زوجات اخواني اصرخت على زوجها والله انها ماترد
ولا تقولهم ليه ولا تدافع عن عيالها لدرجة أنهم زوجات اخواني واخواني قبلهم مستغلين طيبتها ودائما يجيبون عيالهم عندنا في سفرهم ويخلون همهم علي انا وأمي زي مره زوجة أخوي سافرت وتركت ولدها الصغير عندنا والله العظيم انه كان يصيح من كل قلبه يبي أمه ولا مر يوم علينا من غير صياحه واخر شي يوم جات من مكه وش قالت ايه والله الواحد يبي يتعبد ربه ويصيلي لو اني موديته الحين كان عذبني وحتى الصلاة ماكان صليتها في الحرم والمشكله ان اللي تنغث اكثر شي من وجودهم أمي لانها تكون شايله همهم لما يجون اهلهم ياخذونهم ونا طبعا من يصيح جاتني امي وجلستني قومي شوفي ولد اخوك ماراح يسكت الا اذا شافك والله اني اتبهدل واتعذب وامهم جالسه مرتاحه مقضيه اجازتها بسعاده واحنا مبتلين في عيالهم ولا بعد ازيدكم من الشعر بيت لما تولد حضرت جنابها في وقت الدراسه طبيعي يعطونها اجازه عشان المولود بس تخيلو بعد ما تنتهي اجازة الامومه من تحط ولدها عنده طبعا عند أمي اللي ماتقدر تقول شي عشان عيالها وتجي كل صبحيه من الساعه سته ونص تطق الباب فيه ويجلس عند امي الى ان تجي من المدرسه وتاخذه ولا مرات لا تخليه عند امي الى العصر عشان تنام وترتاح بعدين تمر وتجلس شوي وتقول جزاك الله خير وتروح والمشكله اني مرات انفعل واقول بتكلم وبقول انه عيب عليهم يسون فينا كذا كأن حنا خدام لهم ولعيالهم ولكن وش تتوقعون أمي ماترضى وتجلس تهاوشني وتقول هذول حريم اخوانك معليه وين تحط ولدها اذا ماحطته عندنا ...
والمشكله الأكبر ان أمي خوافه مره يعني تخاف تجلس بروحها ماتبغاني الا انا اجلس معاها واذا جيت اطلع ولا ابي اروح مكان وهذا نادر جداً طبعا تشوفونها تزعل ولا تكلمني وتجلس تخانق وتقول انتي ماتحبيني ولو كنتي تحبيني ماكنتي طلعتي وانتي عارفه اني ما اصلح الا وانتي معي والحمدلله هي بصحه وعافيه وماهي محتاجه رعايه مني ولكن اذا طلعت يظطر اخوي الكبير انه يجلس معاها لما ارجع مثلا اكون رايحه سوق ولا عند وحده من زوجات اخواني ولا مثلا رايحه مكان قريب لمدة يوم مع احد اخواني وهذا نادر جدا طبعا ولكن مع كذا هاليوم اللي اطلع فيه يكون نكد علي والمشكله لما نقولها تعالي معانا ماترضى تقول لا انا أحب جلسة البيت طيب اقولها وانا اموت يا أمي من جلسة البيت والله بموت انا من هالجلسه اللي انا جالستها ساعتها يحن قلبها علي وتقول روحي بس تقولها وهي زعلانه وتجلس يوم ولايومين ماتكلمني ..
قسم بالله حياة العذاب انا جالسه اعيشها ولا احد حاسس فيني الا رب العالمين العالم في حالي بس