السلام عليكم ورحمة الله وبركاته
في منكم فاكرني وفيه منكم مايعرفنيش اصلا
تزوجت من سبع سنوات وتأخر حملي وبالكشف والفحوصات اكتشفنا اننا لابد من اجراء حقن مجهري لان العدد عند زوجي كان ناقص جدا جدا جدا
اجرينا الحقن فعلا ونجح وتكون في رحمي جنين ووصل لاسبوعه السابع ثم توقف نبضه واجريت عملية تنظيف
بعدها انفصلنا بالطلاق لاسباب عائلية اخرى لا مجال لذكرها هنا
تزوجت مرة اخرى والحمد لله وتأخر حملي مرة اخرى وبالكشف والفحوصات اكتشفنا ان لدي التصاق بتجويف الرحم وانسداد بالانابيب والسبب هو عملية الحق المجهري السابقة وعملية التنظيف
ومن جه زوجي الجديد نقص في كمية السائل وزيادة نسبة الحيوانات المنوية المشوهه بالاضافة الي ان ظروف شغله ساعات ما تسمحش انه يكوون موجود وقت التبويض
يعني الموضوع مقفول من الناحيتين هيهيهيهي ناحيتي وناحية زوجي
طبيبي قاللي لازم عملية منظار لفك الالتصاق ... دخلت العمليات واخدت البنج وخرجت كما انا ودخللي الدكتور بعدها يقوللي وجدنا الالتصاق من النوع الشديد والرحم ملزق في بعضه وصعب جدا جدا فكه وان فك هيلزق تاني وان الحل الوحيد للحمل امامكم هو الحقن المجهري مع ريسك جامد جدا للاجهاض
قلنا خلاص طالما مافيش ادامنا غير كدة نعمل حقن مجهري وخلاص
نصحني اخويا بالذهاب لدكتور اخر واخذ رأيه ... فعلا روحت لطبيب اخر قاللي منظار قلتله عملنا منظار وكان رأي الطبيب كذا وكذا وكذا فرد الطبيب الجديد وقاللي ده تخصصي انا وهو مش متخصص مناظير
قلت وايه يعني اعمل عملية منظار مرة اخرى ومش هخسر حاجة ماهي لازقة لازقة وكل الي هخسره فلوس تانية هتتدفع في عملية مكررة
عملت المنظار تاني عند الدكتور الجديد وانا بصراحة كان الامل عندي ضعيف
بعد المنظار خضعت لكورس علاجي شهرين وبعدين اجريت اشعة الصبغة مرة اخرى لبيان مدى نجاح العملية ... والحمد لله الانابيب مفتوحة والرحم تمام التمام والحمد لله رب العالمين
والدكتور فرجني على العملية على الدي في دي DVD
ووراني ازاي فتح الانابيب وسلكها بمشيئة الله فسألته طب والاتصاق الرحم قاللي ما كانش لازق اوي وانفك بمجرد دخول المنظار
حسبنا الله ونعم الوكيل ... امال الدكتور الاولاني قاللي ليه انه لازق جدا جدا من النوع الشديد وانه ماينفعش يتفك (بقولكم كدة علشان ما تصدقوش كلام اي دكتور)
المهم بعد ما الدكتور الجديد شاف نتيجة اشعة الصبغة وتأكدنا الحمد لله من نجاح عملية المنظار الي اجراهالي قاللي نستنى تلت شهور باذن الله يحصل حمل طبيعي ... بس انا قلتله لا مش هستنى التلت شهور واني عايزة اعمل تلقيح صناعي لاني عارفة حالة زوجي ممكن ما تسمحش بالحمل الطبيعي
المهم قبل اجراء التلقيح الصناعي قريت عنه كتير وسألتكمم هنا كتيييير اوي والكل اجمع على انه النجاح مش من اول مرة وفقلت هجرب وكنت متاكدة ان النجاح مش من اول تجربة وعندي استعداد اعملها واجرب مرة واتنين وتلاتة واربعة لحد ما ربنا يريد لي الحمل
وكلكم عارفين ان التلقيح الصناعي ده اخف بكتيييير من الحقن المجهري لانه ما هو الا ان الزوجة بتاخد منشط تبويض لافراز اكتر من بويضة واحدة وبعد كدة بتعمل متابعة تبويض ويشوف الطبيب حجم البويضة امته يكون جاهر للتلقيح وبتاخد الزوجة حقة تفجير قبل العملية ب 36 ساعة وبعد كدة يتم اخذ عينة سائل منوي من الزوج وغسلها بالمعمل بطريقة معينة بحيث يزال منها الشوائب والحيوانات المنوية المشوهه ويتم حقنها في رحم الزوجة وبعد كدة زيها زي الحمل الطبيعي في الخطوات التالية من اخصاب وانتظار النتيجة
فترة ال 14 يوم عدت عليا صعبة جدا مع اني كنت منتظرة النتيجة السلبية
رحت المعمل يوم التحليل وذهبت لاخذ النتيجة وكان تحليل رقمي فوجئت بالنتيجة افتكرتها غلط وسألت المسؤل بالمعمل قاللي حامل يا مدام
قلت حمل كيميائي وهينتهي
روحت للدكتور الي عمللي العملية قاللي اروحله بعد 15 يوم علشان يعمللي سونار
وانا شبح توقف نبض الجنين يسيطر عليا مثل ما حدث في حملي من زواجي السابق
وفعلا حدذ ما كنت خايفة منه ... دم بني نزل عليا واتصلت بالممرضة قالتلي ريحي على ظهرك وزودي حقن المثبت وبعد يومين زاد الدم اتصلت بيها قالتلي الدكتور مسافر تعالي للدكتور المساعد يشوفك وربنا يستر
رحت وانا ببكي وعمل سونار وشاف كيس الحمل ونبض البيبي
ظل الشبح يسيطر عليا لاني كنت لسة في فترة الست والسبع اسابيع
وعدت التلت شهور الاولى ببالغ الصعوبة وكانهم تلت سنين
الدكتور قاللي ولادتي هتكون قيصرية لان الحمل هذا يعتبر حمل عزيز اونه خايف على البيبي من الطلق فحددلي ميعاد لاجراء العملية ببداية شهري التاسع يوم 6 ديسمبر صباحا وكنت في الاسبوع السابع والثلاثين قبل الميعاد الطبيعي بثلاث اسابيع
في صباح اليوم المحدد صحيت من النوم على الم ببطني كاني عندي اسهال او ان الدورة جاية
ورحنا جري على المستشفى اتاري المغص ده كان طلق وولدت الحمد لله ولادة طبيعية
كان الله يقوللي اني انا المنجي ورزقت بطفل جميل الحمد لله رب العالمين عنده دلوقتي شهرين
حبيت افرحكم معايا
هتقوليلي وليه اتاخرتي في انك تفرحينا معاكي
هقولكم ... كنت خايفة من نتيجة التلقيح الصناعي وقلت اكيد حمل هينتهي في اوله واني عايزة افرحكم بنجاح العملية
واني حبيت اقولكم ان ربنا كريم ومافيش حاجة صعبة على الله اول تجربة تاني تجربة تالت تجربة كلها ارادة الله
وان نجاح العملية ليس بالحمل فقط ولكن حبيت اقولكم نجاح العملية بان الطفل يكون بين ايدك
خلوا عندكم امل وخلوا عندكم ثقبة بالله انه سامع دعائكم وانه قادر على الاستجابة
دايما رددوا كلمة يا رحيم يا رحيم يا رحيم يا رحيم ..... يارحيم
حبيت ابشركم وافرحكم بالخصوص بالقسم ده
اوعوا تفقدوا الامل ابدا ... على فكرة دعيتلكم وانا في الطلق
رد مع اقتباس
المشاركة الأصلية كتبت بواسطة التفاحة الجناوية
