ارجوا النصيحه ... محتاجه لنصيحتكم ..

[بذرة قطر]

السلااام عليكم ورحمه الله وبركاته ..

اختي الغاليه عندي مشكله ومحتارة فيها

انا انخطبت من شهر 1 وطبعا هم كانوا طالبيني لودهم من سنه وكنت ارفض لاني اعرف صفات البنت اللي يبغى يتزوجها بان تكون ضعيفه

وانا اعرفه انه انسان عصبي بس هذا اللي اعرف عنه

المهم تمت الخطبه وانا وافقت على موافقة امي وابوي اولا

ولانه فيه مشاكل ببيتنا بسبب طلاق امي وابوي قلت يمكن ارتاح

كانت فترة خطوبتنا حلوة ومتفاهمين بس من نهايه شهر 5 بدت المشاكل بينا كانت خفيفه وبس مرة زعل علي وطالت المدة تقريبا اسبوع ماقدرت استحمل كلمت امه علشان تكلمه بس الموضوع كبر

اكبر واكبر بعد تدخل الأهل ..

الحين تراضينا بس ظل قلبه شايل علي مع انه غلط لي انا نسيت او تناسيت علشان حياتي تمشي

لانه بسبب هالمشاكل فكرت بالطلاق وهو يدري بالموضوع

وقال لامه انه يبني ويحبني بس ليش قلبه شايل علي مدري

كلامه واسلوبه الجاف يجرحني وابتعد عني بس علشان ماتكون بينا مشاكل لحد يوم الزواج هذا قراره

انا تعبت نفسيا لانه امور تجهيزاتي متعبتني لانه كل اسويه بروحي واحاول ابين له هالشئ علشان يحس


بس احس كلام امه مسيطر عليه

لانه مرة قلت لامه اذا ريلي ما احترمني انا ماراح احترمه

هذا حقي اطالب باحترامه لي

قالت لي غلط اللي تقولينه ليش ما ادري

وين الغلط وقال لي انا ماراح انسى لج هالكلمه طوول عمري

وين الغلط ابي افهم من حقي ولا لاء !!؟؟!

تعبت نفسيا والله افكر بالطلاق

وافكر انا تطلقت راح اتعب اكثر مع ابوي

مدري


هو طيب وحنون بس كلام الغير ياثر عليه

كرهت امه والله

وهو صار مايبي يجي بيتنا ليش ما ادري

قلت له اذا ماتبيني قول علشان خلااص انهي كل شئ

بس رد علي وقال ما اقدر اجاوبج


يتصل يسال عني

بس لما اساله يجاوبني بجفاء

تعبت اختي ياريت تنصحيني

لو سمحتي اختي اذا الموضوع مب مكانه بالقسم ممكن تحذفينه لانه مابي ينعرض على العضوات


وشكرا

[ساعة غروب]

هلا حبيبتي

شوفي حبوبة مبين انج تعبانه حيل

انا حاسه فيج بس نصحتي لا تخلين فكرة الطلاق تسيطر عليج كلش شيليها من راسج

واذا فكرت يوم في الطلاق لا تبينين له هالشي لا تتكلمين عن الموضوع بالمرة معاه
الريال ما يحب انه ينقاله هالكلام

وبعدين شنو اذا ما احترمج ما تحترمينه هذا اكبر غلط انج تقولين له هالكلام تدرين انتي شنو قاعدة تسوين

تدرين انج قاعده تهدمين وتزيدين في الشرح الي بعدين راح تشوفين نتايجه في حياتج تبين تنفصلين وتقعدين عند اهلج وتصيرين علج بحج الاوادم

شوفي عزيزتي المراة ما لها الا بيت ريلها حاولي تتقربين منه اكثر واحترميه وصدقيني اذا انتي احترمته وتقربت منه وحاولتي تذبين الجليد اللي بنكم صدقيني راح يحترمج وقدرج ويحطج فوق راسه بعد

الريال يحب يكون دنجوان عصر وزمانه عيشيه الدور فهميه ان حياتج ظلام بدونه حسسيه بقيمته عندج

الله يوفقج وخلني اطمن عليج تواصلي معاي

[بذرة قطر]

تمسلين حبيبتي والله مب عارفه اشلون اشكرج انتي الوحيدة اللي بينتي له معنى كلامي

انا قلت هالشئ لانه مابي يكون نسخه من ابوي اللي ما احترم امي


المهم انا اليوم بحاول اكلمه ابي اكسبه لانه باقي على زواجي اقل من شهر وادعي لي

وراح اقولج وش صار معاي

[بذرة قطر]

صباح الخير اختي ...

امس اتصل فيني علشان البطايق العرس ولاا سال عني لما قرب من بيتنا طلبت منه انه ينزل لانه صار لي شهر من ما جفته من بدت المشاكل .. طبعا رفض بحجه المشاكل اللي صارت وقال انه يبي يبتعد استغربت من كلامه وقلت له صار لك فترة طويله تزورني وكنت نتنظر اليوم اللي راح تجيني فيه طبعا كان يجني كل جمعه


المهم رفض وانا حسيت ان شايل على امي من زمان مع انها ماكلمته كلش بس بسبب امه كانت تفهمه اللي تقوله امي غلط

حاولت معاه ينزل وقلت محتاجه لك وابيك تجي تسولف معاي وصحت بس قال اطلبي اي شئ حتى عيوني بعطيج اياها الا اني ازورج


سكت عنه ماعرفت وش اقوله حاولت اسولف معاه واساله مثل تحبني ولاا لاء دووم يجاوبني ما اقدر اجاوبج او مدري ..

المهم لما جاه راحوا له اخواني الصغار اعمارهم 8 سنين طبعا صار لهم فترة ماجافوه واستحوا يسلمون عليه وماسلموا الا بعد ماطلب منهم


ورد كلمني وقالي اخوانج تغيروا علي قلت هذولاا يهال وانت مثل اخوهم الكبير هاوشهم اذا ما اسلموا يمكن استحوا منك لانه من زمان ماجافوك وسكت

قلت له اذا استمرينا على هذا الحال راح تكون حياتنا باردة قال لي لاء انا ما احب الحياة الباردة

حاولت احسسه انه محتاجه له قال مب جاي وانا الحين اسمعج بالتلفون قلت لما اشوفك غير

كنت ابيه يقعد معاي ومع هلي علشان مايحس انه فيه شئ مافيه فايدة يقول لما تجيبن البيت عندي راح اقعد معاح وش الفايدة وانا بروحي خايفه من تعامله معاي بعد العرس


لما اساله انت شايل بقلبك على امي قال لي لاء مع انه ادري واحس بهذا الشئ وقلت لامي وامه بعد

رفض يعترف

وامس اعترف وقال امج قالت ماتبني اجي وامي ماقالت هالكلام بس هذا كلام امه

امي بنفسها تقول لي خليه يجيج او اطلعي معاه وتفاهموا

مدري لمتى بظل حياتنا جذيه

ورد بكلمه انتي قلتي اذا ما احترمتني ما راح احترمك قلت له انا عمري ماتكلمت مع شخص غيرك ولاا عرفت الحب الا معاك اهنيه سكت تحججت انه ما اعرف اتعامل معاها قبل بس الحين اتعلم واسال اهنيه سكت مارد علي

وبس حاولت اني ما اعصب عليه ودووم اقوله حبيبي

واخر شئ قال لي انا بقلبي شئ بانه يحس انه امه شايله بقلبها واني مقصرة معاها

قلت له صح انا مقصرة لاني تضايقت وايد من بعد المشكله اللي صارت وقلت ادري انك تعزها وانا اعزها قبل لااعرفك وعزيتها اكثر بعد ماعرفتك << قلت هالكلام وانا بصراحه متضايقه من تدخلها فيني مابيها تتدخل الا ليش تروحين المجمع مع صديقتج رديت عليها قلت لها ريلي راضي

ولاا انتي ماضعفتي الا كرشتج ولاا ريليج وقالت هالكلام قدام ولدها فشلتني قدامه

انا مادريت عليها سكت بس صج صج تضايقت ما احبها ومستحيل احبها بس ما اكرها

علشان جذيه بخلي علاقتي معاه سطحيه بعد العرس وماراح اطلع من غرفتي الا مع ريلي

شاريج تفكيري صح لانه مابيها تدخل بحياتي انا دخلتها قبل وتحسفت والحين مابيها

وبينت له انه امي واخواني مالي غيرهم بهدالدنيا سكت يعني يبني اراضي امه وامي لاء راح يبتعد عنها


تمللت من التفكير حتى العرس ماني فرحانه فيه

حسبي الله ونعم الوكيل باللي وهقني بحياة احسها تعيسه لاا انام الا بمنوم محد حاس فيني :confused:

[ساعة غروب]

هلا حبيبتي بذرة قطر

افى شالحجي اللي تقولينه شوفي حبيبتي

الريال عموما ً تبين تكسبينه لازم اول شي تكسبين اهله

شوفي امه لازم بتدخل هذا ولدها وانتي بعد بتسكنين عندهم يعني لازم تستحملين اللي بيصير هذا انت من اولها بتقعدين في دارج ولا بتطلعين منها الا معاه شالكلام افى بس افى خلج عاقله وسوي اللي بقولج عنه

امه في اسرع وقت تزورينها ولا تنسين تشترين لها هديه معاج وما وصيج بالكلام الزين الذرب اللي ينقط عسل ابيها تفهم ان مكانتها عندج عاليه وانها مثل امج واكثر بعد ،، استحملي اذا كنتي تبين حياتج تستمر باستقرار

ثانيا ً قعدي مع امج وتكلمي معاها وقولي لها ( حفظيه وقولي لها الكلام اللي بقولج اياه ) يمه فلان ( خطيبج ) من زمان ما يانا ولا زارنا شرايج تتصلين فيه وتشرهين عليه شوي وتعزمينه على غداء او عشاء ، يمه داخلتج بالله كلميه خليه يحس انه مو غريب يمه لا تنسين اني زوجته وكلها شهر وبروح بيتي عنج خالنحاول نكسبه ونكسر الحاجز اللي صار من قبل خل ترجع النفوس مثل اول يمه ترى هذا ولدج وله حق عليج عشاني يمه تكفين كلميه.

انزين بعدين انتي لا تيبين له طاري عنه ييته الا تعال ابي اشوفك الا انت زعلان من امي غيرى هالنغمة شوفي دايما ً قولي له وحشتني وايد مثلاً امس وانا قاعده اشوف فليم تخيلت نفسي معاك اعيش قصة الفلم طبعا ً شوفي قصة رومنسيه ، امي تسلم عليك وتقولك من زمان ما زرتها اذا سكت او رد وقالج ما ادري او ما ابي ايي بيتكم قولي له والله انا مالي شغل انت وعمتك تنيازون انا اهم شي عندي انك في قلبي وماليه عيني من شوفتك واهم شي اني مو مقصره مع خالتي الغاليه ام الغالي وانت اذا عندك كلام تنياز مع عمتك قولها هالكلام

ما عندج اخوان كبار في سنه او ليش مو امج تكلم الوالد انه لما يجي عند بابك يلزم عليه يدخل

تعرفين شنو انا ارمي بالكلام هذا انا ابي خطيبج يحس انه مو غريب عنكم انه واحد منكم وفيكم خلي المشاكل اللي صارت وخلي الاحترام ودايما حسسيه انج محترمته وله تقدير عندج وان المشاكل اللي مرت فيكم كانت خير برهان على حبكم لبعض وتمسكم في بعض ابدا ً لا تندمين على مشكلة صارت ترى هذا اختبار من رب العالمين لعزمكم وصبركم ولا تحسبين على امه ترى هي ام في الاول والاخير وهذا الشعور بتحسين فيه لما الله يعطيج الولد ان شاء الله بتعرفين شكثر انتي غلطت في حق هالانسانه

ابيج تعزينها وتطبين خاطرها حتى لو غلطت عليج هذا امه جنته وناره واللي ما فيه خير في امه ما في خير في زوجته والناس

يالله عاد انا طولت عليج وبشريني بالنتايج

[بذرة قطر]

كلاام وايد يريحني وفكرتج انه امي تتصل فيه وايد اعجبتني بس لو اتصلت فيه امي اليوم اخاف يحط بباله اني قلت لها الكلاام اللي قاله لي اليوم هو بروحه مابيني اقول لامي شئ واما طبعا ماقلت لها

اما بالنسبه لامه والله كنت احبها قبل لاتاخذني لودها بس هم مايحسون بالتعب اللي انا فيه يتفقون معاي على شئ واخر شئ يورطوني مثلا الفرقه قالوا شوفي الفرقه اللي تبينها واحنا بندفع واخر شئ قالوا لاء انتي تحملي المبلغ وانا بنفسي متحمله اشياء وايد وحاولت ابين لها ظروفي بس هي تحسب لظروف ولدها قلت معليش وشليت الفرقه وبعدها جات على التصوير وقلت معليش بس وابتعدت عنها علشان ماتحذف على اشياء ثانيه لانه المعروف عندنا المعرس هو اللي يتكفل بكل شئ وانا بينت لهم من البدايه اني مابي عرس دام ريلي ماعنده امكانيه للعرس
وكنت بس هم اللي اصروا على هذا الشئ


مدري اخاف امي تتصل فيه ويشك اني قلت لها شئ وانا خلاص تبت ما عاد اقول لامه ولاا لامي شئ



عندي اخووو اصغر مني بسنه ودووم يسولف معاه بس مابي اقوله لانه بيعايرني بعدين

بعد كم يوم بخلي امي تكلمه احسن صح وبقولها تسال عنه وتعزمه

بالنسبه لامه بحاول اتصل فيها واسال عنها


اما اني ازورها ما اقدر لانه الحين ممنوع

وانا قبل ازورها واقدم لها الهدايا بس امي تقول دام هم مايجبون لج هدايا ليش تعطينهم يكفي انج تعاملينهم بالزين يعني اكبسيهم بطيبتج مب بالهدايا لانه يعتقدون اني اسرف فلوسي على الفاضي :ss:


وبالنسبه اساله بانه متى بتجي ماراح اطلب منه كلش لانه امس يوم جفت رفضه قلت براحتك بس حط ببالك اني محتاجه لو جودك معاي الحين لانه تعبانه نفسيا من العرس
..

[ساعة غروب]

اوكي حبيبتي انتي صح هالمرة

وكلام امج عين العقل لا تودين هدايا بس عاد مو بالمرة لا في المناسبات الاعياد امه يايه من الحج يايه من العمرة يعني مناسبات وبس

واخوج لا تكلمينه انتي خلي امج تقوله احسن يعني على انها تعلمه السنع مثلا ً تقوله روح حق ريل اختك خله يدخل شدعوه قاعد تسولف معاه ولا قلطته ولا شرب شاي او قهوة يعني من هالكلام

الله يهديكم لبعض وخليكم لبعض ولا يغير عليكم قولي آمين

[بذرة قطر]

آآآمين

انا قبل لااسافر واجي البحرين كنت اتصلت على امه وقلت لها اني بسافر وطلبت منها انها تدعي لنا

هذا الأسبوع اللي طاف

بس الحين اخلي امي تتصل فيه بعد كم يوم احسن ...


ومشكورة اختي وما قصرتي معاي والله يوفقج بس خلج معاي :o

[بذرة قطر]

رجعت كلمت امي بخصوص تكلمه وتتشهره علي انه مايجي ولاا يسال عنها لانه بمثابه امه وانها تعزمه على عشى او غدا


بس شكلها مب مقتنعه تقول اخاف يكبر راسه علينا انا قلت لاا قلت يمه اكسبيه لبيتنا علشان بعد شهر بعيش عندهم بس ما اذكرت لي الموضوع كلش اليوم مدري وش اسوي ؟!!!

المهم

اليوم طرش لي مسج الصبح وقال صباح النور من شهر ماطرش لي مثل هالمسج قبل كل يوم الساعه 6 الصبح اما يتصل او مسج طبعا بالكلام الرومانسي

بس صج قال صباح النور بجفى بس احمد ربي لانها بدايه خير ان شاء الله ...!!

[ساعة غروب]

الحمدلله الحمدلله اهم شي ان في بدايه منه الله يكتب لكم السعاد آمين

واذا عن امج ترى امج انسانة حكيمة واذا شايفت ان هالشي اللي بتسويه يصب في مصلحتج حتى لو مو مقتنعة بتسويه عشان بنتها العروس الحلوة

اقولج شي

خطيبج ترى يحبج وما وده يخسرج ولا تخلين اعباء العرس تأثر على مكانته بقلبج ترى هو انسان طيب وحنون وفي قلبه لج اكبر دليل على حبه

[بذرة قطر]

واخيرا امي كلمته لقيتهاحافظ الرقم عندها اول شئ قالت لي مارد علي وبعدين هو اتصل فيها وقالت له شفيك زعلان علينا امس تمر علينا ولاا تنزل وتسلم واذا زعلان مع مرتك بكيفك معاها بس انا وش دخلني ماتسال عني ولاا تسلم وانا وامك مالنا خص فيكم وهذي حياتكم وماراح نتدخل فيها

قال لها مب زعلان ولاا شئ وان شاء الله مرة عليكم قريب << ما اظن لانه ماينسى

المهم ارتحت شوي والحمد لله والباقي على انا اتصل بكرة بامه مدري عاد وش اقولها

هو قالي ما بيج تتاسفين لها بس ابيج ماتقصرين معاها وتعاملينها مثل امج طبعا انا شرحت له وقلت ترى اعز امك قبل لااعرفك ... الخ


بس مدري اخاف يظن اني قلت لامي او اشتكيت عندها ههههههههههههههه الله كريم

اقولج شي

خطيبج ترى يحبج وما وده يخسرج ولا تخلين اعباء العرس تأثر على مكانته بقلبج ترى هو انسان طيب وحنون وفي قلبه لج اكبر دليل على حبه

شلون عرفتي انا ماتكلمت عنه وايد

[ساعة غروب]

وايد زين ان امج كلمته

اذا اسألج قولي له ما ادري يمكن حست انك زعلان لا تنسى انها ام وتحس بعيالها بس لا تقولين له انج كلمتي امج تكلمه تحملي اوكي اياج ثم اياج تقولين

وامه كلميها عادي سألي عنها وعن صحتها ولا تيبين طاري الزعل واذا اسألتج عن العرس والترتيبات بيني لها انج قاعده تحضرين للعرس وقولي لها اذا انا احتجت شي حق العرس ما بلقى غيرج يسندني انت سندنا وعزوتنا الله يخليج لي يا اغلى ام اوكي خلج ذربه معاها ترى مهما يكون هذي ام ريلج وجدة اعيالج في المستقبل ومالكم الا رضا الوالدين عليكم

اما شلون عرفت انه يحبج ليش عيل انا اخصائية اجتماعية جذي حسيت هذا كله من بين السطور اللي كتبتيلي فيها رسايلج

وعلى فكرة انتي بعد تحبينه بس تكابرون وايد الله يوفقكم

[بذرة قطر]

صح نكابر واااايد

وهو اكثر يعني يطرش لي مسجات عتاب بس لما اتصل فيه واحد ثاني كلش غير :ss:

واكيد ماراح اقوله عن شئ بقوله مدرررري


والله يوفقج دنيا واخر يارب

وبكرة بقولج وش صار لي مع امه

على فكرة انا انادي امه ب يمه مب خالتي وهذا طلب امي مني
مع اني دووم اقول لامي هذي الكلمه ماتنقال لو حده غيرج يامه تقول لاء بعد قول لي لها

[بذرة قطر]

مساء الخير اختي

شلونج ؟؟!!

بعد ماترردت صار لي كم يوم مدري ماودي اتصل فيها لاني وايد تضايقت من تصارفتها معاي المهم اليوم اتصلت فيها ماردت علي

حتى مابينت لخطيبي هالشئ مدري اقوله علشان يعرف اني اتصل بس هي ماترد ..

انا وايد متضايقه مدري شلون راح اعيش ببيتها بصراحه ..

مع انها قبل لاتخطبني ماكانت جذيه معاي

وبالنسبه لريلي يتصل فيني ويسال عني طبعا مب مثل قبل المشاكل بس احسن من بعد ماتصالحنا لما حسسته اني محتاجه لوجوده معاي بكل وقت يتصل ويطرش مسج ويقول لي انتي وين ؟؟

الحمد لله

روجعت اسمعه كلام حلوو مثل قبل اما هو لاء كلام نفس الشئ مدري زين يعني بحدود وايد

ادري يبلي اصبر علشان يرجع مثل قبل ..

بس في شئ قالت لي عمتي باني ما اخذ ملابسي كلها هناك ببيتهم اخذ معاي شوي وكل ما احتاج ارجع اللي عندي واخذ الجديد من بيت ابوي تقول خايفه مب مرتاحه لامه كلش


وهذا بعد مخوفني مع ودي استقر بمكاني وبملابسي وانا من النوع ما احب انثر اغراضي بكل مكان

[ساعة غروب]

هلا حبوبه

بالنسبة لاتصالج بأمه قولي له عنه بس بطريقة انج تسألين عنها مثلا ً شلون خالتي شخبارها وايد ولهانه عليها طبعا ً هو بيقولج اتسلي فيها سألي عنها وبعدين ردي عليه قولي له والله اتصلت بس ما ردت علي بس ولا يهمك اتصل فيها مرة ثانيه

وبالنسبه لاغراضج عادي نقليهم عشان انتي تحسين بالاستقرار النفسي ولا عليج من امه دامج تعاملينها بالزين اهم شي هو معاج