السلام عليكم ورحمة الله وبركاته
هذي أول مشاركة لي في هالمنتدى الرائع لكن كنت أتردد عليه بشكل مستمر , ولما لقيته فيكن أخواتي من حب للمساعدة فكرت في عرض مشكلتي الا هي اكبر مصدر ازعاج في حياتي ومعكرة علي صفو تفكيري ودايما اكون مضايقة منها ...واتمنى القى عندكم المساعدة والنصيحة
حنا 7 أخوات و3 أخوة ماشاء الله , خمس من أخواتي متزوجات وانا واختي اللي اكبر عني بسنتين غير متزوجات , اخوتي ثلاثتهم متزوجين وعلاقتي معاهم اوكي وماتذكر مرة صار لي خلاف معاهم والحمدلله , امي طيبة وحنونة وفي حالها واحبها مووت وعلاقتي مع بقية أخواتي الكبار المتزوجات والاخت العزباء الي معاي بالبيت بعد اوكيه صج تصير خلافات بسيطة وبعد لحظاات ولا كأن صاير شي ....
عطيتكم تعريف بسيط عني والحين ببدأ بمشكلتي :cry:,
مثل ماقلت لكم عن علاقتي بافراد عايلتي لكن وين مشكلتي بالضبط ؟ مشكلتي هي اختي اللي ترتيبها بالوسط وهي متزوجة صار لها 3 سنوات تقريبا , اكبر عني ب10 سنوات تقريبا لكن شقولكم اكثر خلافاتي معاها ...لأنها ببساطة هي الا تفتعل المشاكل معاي انا مسالمة ومااحب اتهاوش ودايما افضل اعيش بأجواء هادئة والا يحترمني احترمه سواء كان اصغر عني او اكبر عني , اهيا عصبية اذا كلفتني بمهمة واعتذرت اسويها لأن عندي مشاغل ثانيه تجلس تسبني وماتخلي كلمة وسخة الا ترميها , ومااعتقد احد بيغلطون عليه وبيسكت وهو مظلوم !!!!
الشيء الثاني اهيا قلبها طيب بس شنو الا مخرب عليها ؟؟ مثلا تسوي لي شغله بعدين تجلس تتمنن علي وتقول لو ما انا كان انتي جذي وجذي وكل هذا بفضلي ومثل ماتعرفون المنّة تذهب المعروف من جذي اوقات اتحاشى اكلفها تسوي لي شي ....رغم انها اذا صارت لها مشاكل تيي تقابلني وتفضفض وتقول كل الا عندها واذا تبكي ابكي معاها وتكسر خاطري واكون صاغية لفضفضتها
لكن وين كل ماسوينا لها شي ينقلب ضدي افعل خير تلقى شر !!!
الشيء الثالث عادي عندها تغلط علي جدام زوجها وتسبني اذا ماسويت شي لها وتهاوشني وتفشلني !!!:sad:
الله وكيلكم حتى كانت تتهمني بأشيه انا بريئة منها من لما كنت بابتدائي :cry:اتذكر كانت راقدة معانا بالغرفة بنت عمتي واهيا بمثل عمري , في الليل البنت احتاجت تروح الحمام كرم الله السامع وفي الظلام خافت قالت لي اروح معاها , رحت معاها حتى ماتخاف وقفت لها يم الحمام حتى تقضي حاجتها ونرجع نرقد , وحنا راجعين للغرفة شفنا هذي اختي اللي قلت لكم عنها طالعة من الغرفة يازعم احتاجت تروح الحمام بس اهي في نيتها الشينة تراقبنا شنسوي !!؟ وانا ذاك الوقت ابدا ماحطيت في بالي ان تفكيرها جذي , اوكي يوم ثاني الصبح بعد مامشت البنت بيتهم وانا اتذكر كنت جالسة اشاهد التلفزيون نادتني اختي ورحت لها الغرفة وقفلتها ومسكتني تحقيق شنو كنتين تسوين البارحة مع بنت عمتج في الحمام :eek2:شهالسؤال ؟؟؟ انا انصعقت قلت لها ماسويت شي بس طلبت مني اوقف لها يم الحمام وبس !! وجلست تحقق وتشك فيني اني سويت شي غلط معاها ماتحملت جلست ابكي بحرقة وقهر:cry: لأن هذي التصرفات مستحيل اسويها :cry:
وهالسنين حتى لو تهاوشنا ترجع يوم ثاني ولا كأنها مسويه شي وتتكلم معاي عادي انا اقول يمكن فكرت في غلطها وندمت لكن للأسف ترجع لتصرفاتها
مع كل هذا انا قلت ببدأ معاها صفحة جديدة مهما كان هي اكبر عني ,ماافااااد , هل كل مرة بتحمل ؟ كل مرة بتغلط علي واسكت عنها ؟ وهل واجب علي اني اكلمها والله اتحاشاها وابتعد عنها خير شر افضل لي ؟ ارجوكم انصحوني انا في حيرة وضايقة نفسي والله اكتب ودموعي على خدي حاسة ماالي احد بهالدنيا :cry::cry: